ဟာဟက်ဒ်အိမ်တော်တွင် နွေရာသီတိုင်း ပုံမှန်တွေ့ဆုံပွဲများရှိတတ်သည်။ သို့သော်လည်း ယခုနှစ်မှာတော့ ကလာရ်ဒင်း ဘွန် ဘရန့်ဒ်တစ်ယောက် ရိုးရှင်းသည့်အကြောင်းအရင်းတစ်ခုကြောင့်တည်းနှင့် အာဗစ်သို့ လာခဲ့ခြင်းမဟုတ်ပေ။

စေ့စပ်ပွဲကိစ္စကို တရားဝင်မကြေညာခင် မိသားစုနှစ်စုကြား ကြိုတင်ဆွေးနွေးရန်နှင့် နှစ်ဦးနှစ်ဖက်မိတ်ဆွေဆက်ဆံရေးကို တိုးတက်စေရန် တွေ့ဆုံပွဲအား ဖန်တီးခဲ့ခြင်းဖြစ်သည်။ မိသားစုနှစ်စုလုံး၏ရည်ရွယ်ချက်က ရှင်းလင်းပြတ်သားနေပြီး မည်သူကမှဖုံးကွယ်ရန် ကြိုးစားမနေခဲ့ပေ။ အထူးသဖြင့် ကလာရ်ဒင်းပင်။

"မင်္ဂလာပါ မြို့စားဟာဟက်ဒ်။"

ကလာရ်ဒင်းက ပြီးပြည့်စုံသောဦးညွတ်နှုတ်ဆက်မှုဖြင့် မက်သိုင်းရပ်စ်အား နှုတ်ဆက်လိုက်သည်။ မက်သိုင်းရပ်စ်အရှေ့တွင်ရပ်နေသူမှာ ယဉ်ကျေးသိမ်မွေ့သော အမျိုးသမီးတစ်ယောက်ဖြစ်၏။ သူ(မ)ထံမှာ ယခင်ကလို သေးငယ်၍ စိတ်ရှုပ်စရာကောင်းသော မိန်းကလေး၏အရိပ်အယောင်မျိုး မမြင်ရတော့ပေ။

"ကြိုဆိုပါတယ် မိန်းကလေးဘရန့်ဒ်။"

မက်သိုင်းရပ်စ်လည်း ကလာရ်ဒင်းအား ပုံမှန်အတိုင်းပြန်နှုတ်ဆက်လိုက်သည်။

နှစ်ဦးသားက အချင်းချင်း ကျက်သရေရှိစွာပြုံးပြလိုက်ကြသည်။

ထို့နောက်တွင်မူ ၎င်းတို့နှစ်ယောက်ကြား မည်သည့်အကြောင်းအရာသစ်မှ မရှိတော့ပေ။ နှစ်ဦးသား အချင်းချင်း မရင်းနှီးကြသော်လည်း အချိန်အတော်ကြာသိခဲ့သူများဖြစ်သောကြောင့် ဂုဏ်သရေရှိမျိုးနွယ်များဖြစ်သော မက်သိုင်းရပ်စ် ဘွန် ဟာဟက်ဒ်နှင့် ကလာရ်ဒင်း ဘွန် ဘရန့်ဒ်တို့၏အကြောင်းများကို အချင်းချင်း အရိုးထဲစိမ့်နေအောင်ထိ သိထားကြပေသည်။ ၎င်းကပင် တစ်ယောက်ကိုတစ်ယောက် ရွေးချယ်ခဲ့ရခြင်း၏ အကြီးမားဆုံးနှင့် အသိသာဆုံးအကြောင်းအရင်းတစ်ခုဖြစ်လေ၏။

မက်သိုင်းရပ်စ်က ကျွမ်းကျင်စွာပင် ကလာရ်ဒင်းအား လမ်းပြပေးခဲ့သည်။ အဲလက်ဆာ ဘွန် ဟာဟက်ဒ်က သူ(မ)၏အလုပ်သမားများကို အိမ်တော်နှင့်ဆက်ထားသည့် အနောက်ဘက်ဖန်လုံအိမ်တွင် နေ့လယ်ခင်း လက်ဖက်ရည်သောက်ရန် ပြင်ဆင်ခိုင်းလိုက်၏။ ၎င်းမှာလည်း ကလာရ်ဒင်းက ဖန်လုံအိမ်ကိုသဘောကျသည်ဆိုသောကြောင့် အဲလက်ဆာက ဦးစားပေးတွေးတောပေးခြင်းပင်။

"ကျွန်မ လာလည်တဲ့အခါတိုင်းမှာ ဖန်လုံအိမ်က အမြဲလှနေတာပဲနော်။ မြို့စားကတော်ကြီး အဲလက်ဆာက ဒီနေရာမှာ နိဗ္ဗာန်ဘုံတစ်ခု လုပ်ထားသလိုပါပဲ။"

အသံမထွက်ဘဲ လက်ဖက်ရည်သောက်နေသော ကလာရ်ဒင်းတစ်ယောက် ချီးကျူးစကားဆိုလိုက်သည်။ သူ(မ)က ပျော်ရွှင်စွာပြောနေသော်လည်း ကျက်သရေရှိအမျိုးသမီးတစ်ယောက်ကဲ့သို့ တည်ငြိမ်သောအသံနှင့် ပြောနေခြင်းဖြစ်၏။

"ဒီနေရာကို ပြင်ဆင်ဖို့အတွက် အများကြီးကုန်ကျခံထားရတာလေ။ ဒီနေရာရဲ့တန်ဖိုးကို သိတဲ့သူတစ်ယောက်ရဲ့လက်ထဲ အဒေါ်က လွှဲပေးချင်နေတာ။"

အဲလက်ဆာ ဘွန် ဟာဟက်ဒ်က နူးညံသောအသံဖြင့်ပြန်ပြောခဲ့သည်။ မြို့စားကတော်ဘရန့်ဒ်ကတော့ သူ(မ)၏သမီးကို ခံစားချက်အပြည့်နှင့် ဂုဏ်ယူစွာကြည့်လိုက်၏။ ကလာရ်ဒင်းလည်း အတန်အသင့် ရှက်ပြုံးလေးပြုံးလိုက်သည်။ 

"မက်သိုင်းရပ်စ်၊ ကလာရ်ဒင်းကို အာဗစ်ရဲ့နိဗ္ဗာန်ဘုံဆီ လိုက်ပြလိုက်ပါဦး။"

လက်ဖက်ရည်သောက်ချိန်အပြီးတွင် အဲလက်ဆာ ဘွန် ဟာဟက်ဒ်က တီးတိုးပြောလိုက်သည်။ ပြီးပြည့်စုံသော ညှိနှိုင်းခြင်းက စတော့မည့်ပုံပင်။

မက်သိုင်းရပ်စ် လက်ဆန့်လိုက်သည်နှင့် ကလာရ်ဒင်းကလည်း သူ(မ)၏ ဖောက်ထွင်းမြင်ရသောဇာပါးလက်အိတ်ကို ဝတ်ဆင်ထားသည့်လက်အား မက်သိုင်းရပ်စ်၏လက်ပေါ်သို့ အလိုက်သင့်တင်လိုက်သည်။ ရုတ်တရက်ဆိုသလို ဖုန်မှုန့်များနှင့်သွေးများပေနေသော ဖြူဖျော့ဖျော့လက်တစ်စုံက မက်သိုင်းရပ်စ်၏အတွေးထဲ ပေါ်လာခဲ့ပြီးနောက် ပြန်လည်ပျောက်ကွယ်သွားခဲ့၏။

နှစ်ဦးသားက သင့်တော်သောအကြောင်းအရာတစ်ခုကို စကားစမြည်ပြောရင်း လျှောက်လမ်းအတိုင်း ထွက်လာခဲ့လိုက်ကြသည်။ ကျောက်သားဖြင့်လုပ်ထားသော ရေပန်းမှာ ရေများ ဖြည်းဖြည်းချင်းစီးကျနေပြီး ဖန်လုံအိမ်၏အလယ်၌ အလွန်လှပစွာ တည်ရှိနေ၏။ ငှက်ကလေးများ၏အော်သံက နေ့လယ်ခင်း၏ ပျင်းရိစရာပတ်ဝန်းကျင်အနေအထားကို လျော့ကျသွားစေသည်။

ကလာရ်ဒင်း မက်သိုင်းရပ်စ်ကို ခိုးကြည့်လိုက်သည်။ သူက အမြဲလိုလို အေးချမ်းစွာပြုံးပြနေသော်လည်း သူ၏စိတ်ခံစားချက်များကိုသိရဖို့က ခက်လှပေ၏။ လောကကြီးအပေါ်ထားသော သူ၏သဘောထားနှင့် အတွေးအမြင်ကိုလည်း သိရန်ခက်ခဲပေသည်။

သူက ယဉ်ကျေးသိမ်မွေ့သော အမျိုးသားတစ်ယောက်ဖြစ်သော်လည်း ခေါင်းမာပြီး ဘဝတစ်လျှောက်လုံး မည်သူ့ကိုမျှ ဦးမညွတ်ခဲ့ဖူးသည့် အမျိုးသားတစ်ယောက်လည်းဖြစ်နေ၏။ ကလာရ်ဒင်းအတွက်တော့ သူက စူစမ်းလေ့လာရန်လိုအပ်သည့် စိတ်ဝင်စားဖွယ်အကြောင်းအရာတစ်ခုပင်။

"ဖန်လုံအိမ်ထဲမှာရှိတဲ့ ငှက်ကလေးတွေက အရမ်းလှတယ်နော်။"

သစ်ကိုင်းပေါ်တွင်နားနေသော အရောင်အသွေးစုံလင်လှသည့် ငှက်ကလေးများကို ကလာရ်ဒင်း ချီးကျူးလိုက်သည်။ ထိုအခါမှသာ ဖန်လုံအိမ်ထဲတွင် ငှက်များရှိနေကြောင်း မက်သိုင်းရပ်စ် သတိထားမိသွား၏။

အာဗစ်၏ လက်ရှိအိမ်ရှင်မဖြစ်သော အဲလက်ဆာ ဘွန် ဟာဟက်ဒ်သည် နှင်းဆီပန်းများကို သဘောကျသကဲ့သို့ ငှက်များကိုလည်း သဘောကျသူတစ်ဦးဖြစ်သည်။ နှင်းဆီပန်းများကိုစိုက်ပျိုးဖို့ ဥယျာဉ်မှူးများကို ခန့်အပ်ထားသလို ဖန်လုံအိမ်ထဲရှိ ငှက်များကိုထိန်းသိမ်းရန်လည်း တိရစ္ဆာန်ထိန်းသိမ်းသူများရှိပေ၏။ အဲလက်ဆာ၏ကဏ္ဍကတော့ မြင်ကွင်းကို ကြည့်ရှုခံစားနေဖို့သာ။

ဤသည်မှာ အဲလက်ဆာ ဘွန် ဟာဟက်ဒ် သူ(မ)၏ကမ္ဘာလောကကြီးကို မြင်သည့်အမြင်ပင်။

အခြားသူများ သူ(မ)အတွက်လုပ်ပေးထားသောအရာကို ခံစားနှစ်သက်နေရန်ဖြစ်သည်။

"ယုံတောင် မယုံနိုင်ဘူး။ ဒီတစ်ကောင်က အရမ်းငြိမ်တာပဲ။ ဘာလျှို့ဝှက်နည်းလမ်းတွေများ ရှိနေတာပါလိမ့်။"

သူ(မ)၏လက်ပေါ်တွင် လာရောက်နားခိုနေသော ငှက်ကလေးကိုကြည့်ကာ ကလာရ်ဒင်းက ပြုံးပြီးမေးလိုက်သည်။

မက်သိုင်းရပ်စ် အနီးနားတစ်ဝိုက်ကို လှည့်ကြည့်လိုက်သည်။ ဖန်လုံအိမ်ထဲရှိငှက်များမှာ အံ့သြစရာကောင်းလောက်အောင် ငြိမ်သက်နေ၏။ ပြတင်းတံခါးများကို အကျယ်ကြီးဖွင့်ထားသော်လည်း ပျံထွက်မသွားကြပေ။ ဤငြိမ်သက်အေးချမ်းနေသော နေရာတွင်သာ လှပစွာတေးသီကျူးနေကြသည်။

သစ်ကိုင်းပေါ်တွင် လျှောက်သွားနေသော ကြက်တူရွေးနှင့် ကလာရ်ဒင်းလက်ပေါ်မှ စာကလေးကို မက်သိုင်းရပ်စ် စူးစိုက်ကြည့်လိုက်သည်။ ထို့နောက် ဆံပင်ဖြူဖြူနှင့် တိရစ္ဆာန်ထိန်းသိမ်းသူဆီ အကြည့်ရောက်သွားခဲ့သည်။ ထိုတိရစ္ဆာန်ထိန်းသိမ်းသူက ကလာရ်ဒင်း၏အရှေ့သို့ လှမ်းလာပြီး ပြောပြလာခဲ့လေ၏။

"သူတို့ရဲ့ အတောင်ပံတွေကို ဖြတ်ထားတာပါ သခင်မလေး။ ဒါကြောင့် သူတို့တွေ အဝေးကိုပျံသွားလို့မရသလို ထွက်ပြေးလို့လည်းမရတာမလို့ ငြိမ်နေကြတာပါ။ သူတို့ရဲ့အတောင်တွေကိုသာ ဖြတ်မထားဘူးဆိုရင် ယဉ်ပါးအောင်လုပ်ဖို့ မလွယ်ကူပါဘူး။"

"အတောင်ပံတွေ? အဲ့ဒါက သူတို့ကို မနာကျင်စေဘူးလား။"

"ကျွန်တော် သူတို့ရဲ့အမွေးတွေကိုပဲ ဖြတ်ထားတာမို့လို့ မနာပါဘူး။ တကယ်တော့ သူတို့ကို အန္တရာယ်များတဲ့နေရာတွေဆီပျံသွားပြီး ဒဏ်ရာရမှာကနေ ကာကွယ်ပေးထားတာကြောင့် ဒါကလည်း သူတို့အတွက်ကောင်းပါတယ်။ ကျွန်တော် သရုပ်ပြပေးရမလား။"

"အဆင်ပြေရဲ့လား မြို့စားဟာဟက်ဒ်။"

တောက်ပနေသောအကြည့်များဖြင့် ကလာရ်ဒင်းက မေးလိုက်သည်။

"မင်းသဘောပါ မိန်းကလေး။"

မက်သိုင်းရပ်စ် ခွင့်ပြုချက်ပေးလိုက်သည်နှင့် တိရစ္ဆာန် ထိန်းသိမ်းသူက ၎င်းတို့ကို ဖန်လုံအိမ်အဆုံးရှိ လှောင်အိမ်ကြီးထံ ခေါ်သွားခဲ့သည်။ ထိုနေရာတွင် အတောင်များမညှပ်ရသေးသော ငှက်များရှိနေ၏။

တိရစ္ဆာန်ထိန်းသိမ်းသူလည်း ထိုငှက်များထဲမှ လှပသောအဝါရောင်ငှက်တစ်ကောင်ကို ထုတ်ယူလိုက်ပြီး အလုပ်လုပ်သည့်နေရာသို့သွားလိုက်သည်။

"ဒါ ဘယ်လိုငှက်မျိုးလဲ။"

ငှက်ကိုကြည့်၍ မက်သိုင်းရပ်စ် မေးလိုက်သည်။

"ကနေရီပါ သခင်လေး။ ချစ်စရာကောင်းတဲ့ တေးသီငှက်ကလေးပါ။"

တိရစ္ဆာန်ထိန်းသိမ်းသူက အတိုချုပ်ဖြေပေးလိုက်ပြီး လက်ကိုင်ပုဝါလေးဖြင့် ငှက်၏မျက်လုံးကိုအုပ်ကာ ဘယ်ဘက်လက်ဖြင့် ငှက်အတောင်ပံကိုဖြန့်လိုက်၏။ ကျန်လက်တစ်ဖက်က ချွန်ထက်လှသောကတ်ကြေးကို ယူလိုက်သည်။

တိရစ္ဆာန်ထိန်းသိမ်းသူက တုံ့ဆိုင်းခြင်းမရှိဘဲ ကတ်ကြေး၏အသွားများကို လှုပ်ရှားလိုက်တော့၏။ အတောင်ပံမှ ညှပ်လိုက်သောအမွေးများမှာ အလုပ်ခုံပေါ်တွင် ပြန့်ကျဲသွားခဲ့သည်။ နောက်ထပ်အတောင်ပံတစ်ဖက်ကိုလည်း ထိုနည်းလည်းကောင်းညှပ်လိုက်ပြီးမှ ငှက်ကို ပြန်လွှတ်ပေးခဲ့သည်။

***

Aurora Novel Translation Team