"အားလုံး ကြားကြရဲ့လား။ ဥယျာဉ်မှူး ဘီလ်က ကလေးမလေးတစ်ယောက်ကို ကျွေးမွေးထားတယ်တဲ့။"
အိမ်ဖော်အမျိုးသမီးငယ်တစ်ဦးက အလုပ်သမားများနားနေသည့်အခန်းသို့ အလျင်အမြန် ပြေးဝင်လာသည်။ အနားယူနေသည့် အလုပ်သမားများ၏အကြည့်များက ထိုအိမ်ဖော် အမျိုးသမီးငယ်ထံ ကျရောက်သွားကြ၏။
"ကလေးမလေးတစ်ယောက်လား။ မစ္စတာ ရမ်မာကလေ။ သူက ခြင်္သေ့တစ်ကောင် ဒါမှမဟုတ် ဆင်တစ်ကောင် မွေးတော့မယ်ဆိုတာကမှ ပိုပြီးဖြစ်နိုင်ချေရှိသေးတယ်။"
အလုပ်သမားတစ်ယောက်က လှောင်ပြောင်သလို ပြောလိုက်သည်။
ဟာဟက်ဒ်အိမ်တော်၏ ဥယျာဉ်မှူး ဘီလ် ရမ်မာက ပန်းပင်များ စိုက်ပျိုးသောနေရာတွင် ပါရမီပါသူဖြစ်၏။
သူ၏ပါရမီကြောင့် ကြမ်းတမ်းသော သူ၏စိတ်သဘောထားနှင့်တောင် ဥယျာဉ်မှူးရာထူးကို နှစ်ပေါင်း ၂၀ ကြာ ထိန်းသိမ်းထားနိုင်ခဲ့သည်။ သူက ဟာဟက်ဒ်မိသားစု၏ အထူးတလည် ယုံကြည်ခံရသူလည်းဖြစ်သည်။ အထူးသဖြင့် နော်မာပင်။ ပန်းများကိုချစ်သည့် နော်မာ၏ထူးခြားသည့်စိတ်ကြောင့် သူ(မ)က ဘီလ်၏ အပင်စိုက်ပျိုးခြင်းနှင့် စိတ်နေသဘောထားကို အဆုံးမရှိ နားလည်သည်းခံပေးထားခဲ့၏။ ဟာဟက်ဒ်အိမ်တော်၏ အနောက်ဘက်သစ်တောထဲတွင် ဥယျာဉ်မှူးနေရန် အခန်းငယ်တစ်ခုပေးထားသည်ကလည်း သူ(မ)၏ဆုံးဖြတ်ချက်ပင်။
ဘီလ် ရမ်မာ၏ဘဝက ရိုးရှင်းသည်။
သူက ဥယျာဉ်ထဲတွင် အလုပ်လုပ်ကာ သူ၏အခန်းငယ်ထဲမှာ အနားယူ၏။ သူ၏အလုပ်သင်များနှင့် အတူသောက်သောအချိန်မှလွဲ၍ သူ၏အချိန်အများစုကို ပန်းပင်၊ သစ်ပင်များနှင့်သာ ကုန်ဆုံးတတ်သည်။ သူ့ဇနီးသည် ကျန်းမာရေးမကောင်း၍ သေဆုံးသွားပြီးနောက် ဆယ်စုနှစ်များစွာကြာပြီဖြစ်သော်လည်း သူက အခြားအမျိုးသမီးများနှင့် မပတ်သက်ခဲ့ပေ။
ဘီလ် ရမ်မာက မိန်းကလေးတစ်ယောက်ကို ကျွေးမွေးထားတယ်တဲ့လား။ ပြတင်းပေါက်နားတွင် ထိုင်နေသော အိမ်ဖော်တစ်ယောက်က အလန့်တကြားထမအော်မီအထိ အခန်းထဲတွင်အနားယူနေသော အလုပ်သမားများက ၎င်းအား အဓိပ္ပါယ်မရှိသောကောလာဟလဟု သတ်မှတ် ယုံကြည်ထားကြသည်။
"အိုး ဘုရားရေ။ ဒါက အမှန်ဖြစ်မယ်! ဟိုကို ကြည့်လိုက်။"
ထိုအိမ်ဖော်က မျက်လုံးအပြူးသားနှင့် မှန်ပြတင်းပေါက်ကို ညွှန်ပြလိုက်သည်။ အလုပ်သမားများအားလုံး တစ်ပြိုင်နက်တည်း ပြတင်းပေါက်ထံပြေးသွားကာ မကြာခင်မှာပဲ အလန့်တကြားဖြစ်သွားကြလေ၏။ ဥယျာဉ်၏တစ်ဖက်တွင် ဘီလ် ရမ်မာက ခန္ဓာကိုယ်ကိုငုံ့ကိုင်းကာ အပင်များစိုက်ပျိုးနေပြီး ကောလာဟလသတင်းပျံ့နေသော မိန်းကလေးက သူ့ခြေလှမ်းများအတိုင်း လိုက်ပါနေခဲ့သည်။
ထိုမိန်းကလေး၏ ကျစ်ဆံမြီးကျစ်ထားသော ရွှေရောင်ဆံပင်က သူ(မ)ခုန်ပေါက်ပြေးလွှားနေသည့်အချိန်တိုင်း ချိန်သီးကဲ့သို့ အရှေ့အနောက် လွှဲယမ်းနေသည်။
"ကျွန်တော် ဆုံးဖြတ်ချက် မချရသေးဘူး။"
ကလေးအကြောင်း မေးခွန်းများမေးကြသည့်အချိန်တိုင်း ဘီလ်က တူညီသောအဖြေကိုသာ ဖြေကြားပေးတတ်၏။
"ကျွန်တော် သူ(မ)ကို ဒီမှာထားလို့ မဖြစ်တာမို့ သေချာစဉ်းစားဖို့လိုတယ်။"
ဘီလ်၏အတွေးများက နွေဦးရာသီမှ နွေရာသီ ကူးပြောင်းသည်အထိ ဆက်ရှိနေပြီး လေလာ လူဝဲလင်တစ်ယောက် ဟာဟက်ဒ်အိမ်တော်ကြီးတွင် ဖြည်းဖြည်းချင်း နေသားကျလာခဲ့လေပြီ။ ကလေးမလေး၏ ဝီရိယရှိစွာဖြင့် ဥယျာဉ်နှင့်သစ်တောထဲ လှည့်ပတ်သွားနေသောမြင်ကွင်းက ဟာဟက်ဒ်အလုပ်သမားများအတွက် ရင်းနှီးသောမြင်ကွင်းဖြစ်လာ၏။
"သူ(မ) နည်းနည်းအရွယ်ရောက်လာပြီထင်တယ်။"
ဟာဟက်ဒ်အိမ်တော်၏စားဖိုမှူး မစ္စမိုနာက ပြတင်းပေါက် အပြင်ကိုကြည့်ကာ ပြုံးလိုက်သည်။ လေလာတစ်ယောက် သစ်တောထဲရှိ အခန်းငယ်လေး၏အနောက်တွင်ပေါက်နေသော မြက်ပင်များနှင့် ပန်းပင်များကို စူးစမ်းနေသည်။
"သူ(မ)က အများကြီးလိုပါသေးတယ်။ အခြား ပုံမှန်မိန်းကလေးတွေထက် သူ(မ)က လူကောင်သေးနေသေးတယ်။"
"ဒီမှာ ဘီလ် ရမ်မာ။ ကလေးတွေက ရှင့်အပင်တွေနဲ့မတူဘူး။ သူတို့က ညတွင်းချင်း ကြီးမလာဘူးလေ။"
မစ္စမိုနာက ခေါင်းခါလိုက်ကာ သူ(မ)ယူလာသော ခြင်းတောင်းကို စားပွဲပေါ် ချလိုက်သည်။
"ဒါက ဘာများလဲ။"
"ကွတ်ကီးနဲ့ ကိတ်မုန့်တွေ။ မနေ့က အိမ်တော်မှာ လက်ဖက်ရည်ပွဲတော် လုပ်တယ်လေ။"
"ကျွန်တော် အချိုတွေမကြိုက်ဘူး။"
"ဒါက လေလာ့အတွက်ပါ။"
မစ္စမိုနာ၏ ထင်မှတ်မထားသောအဖြေကြောင့် ဘီလ် ရမ်မာ၏မျက်ခုံးနက်များက တွန့်ချိုးသွား၏။
ဤကလေးက ဒီနေရာတွင် ရှိနေရမည့်သူမဟုတ်သော်လည်း မြို့စား၏အလုပ်သမားများက လေလာ့ကို နေ့စဥ်နေ့တိုင်း ကြည့်ရှုစောင့်ရှောက်ပေးခဲ့ကြသည်။ ၎င်းတို့က သူ(မ)ကို နှုတ်ဆက်ကြသလို အစားအသောက်များလည်း လာပေးတတ်ကြပြီး တစ်ခါတစ်ရံ သူ(မ)ထံ လာလည်တတ်ကြသေး၏။ ဤသည်မှာ ဘီလ် ရမ်မာအတွက် ပြဿနာ ဖြစ်လာခဲ့သည်။
"သူ(မ)ကို အဝတ်အစားတွေ ဝယ်ပေးသင့်တယ်။ ကောင်မလေးရဲ့ စကတ်က ဒူးအပေါ်တောင် ရောက်တော့မယ်။"
မစ္စမိုနာက ငှက်အနောက်ပြေးလိုက်နေသော လေလာ့ကိုကြည့်ကာ စုတ်သပ်လိုက်သည်။ ဘီလ်တစ်ယောက် ပြန်လည်၍ပင် မချေပနိုင်ခဲ့ပေ။ သူ၏အမြင်တွင်လည်း လေလာက သူ(မ)နှင့်မတော်တော့သည့်အဝတ်များကို ဝတ်ထားသလိုဖြစ်နေသည်။
"အိုး ဘုရားရေ! သူ(မ)ကို ကြည့်လိုက်ပါဦး!"
မစ္စမိုနာက ထွက်သွားရန်လုပ်လိုက်စဉ် ရုတ်တရက် အလန့်တကြားဖြစ်ကာ လေလာ့ကို ညွှန်ပြရင်း အော်လိုက်သည်။ ဘီလ်က မစ္စမိုနာ ညွှန်ပြသောနေရာဆီ စူးစမ်းလိုစိတ်ဖြင့် လိုက်ကြည့်လိုက်၏။ လေလာလိုက်ဖမ်းနေသော ငှက်က သစ်ကိုင်းထက်မှာ နားနေသောအခါ သူ(မ)က အပင်ပေါ်သို့ ပေါ့ပါးစွာတက်လိုက်သည်။ သူ(မ)၏လှုပ်ရှားမှုများက ကျွမ်းကျင်နေပြီး ရှဉ့်တစ်ကောင်ကဲ့သို့ မြန်ဆန်လှ၏။
"သူ(မ)က အပင်တက်ရတာ တကယ်ကျွမ်းကျင်တယ်။"
မစ္စမိုနာက ဘီလ်၏ ဂရုမစိုက်သော အဖြေစကားကြောင့် မျက်နှာကြီးပုပ်သိုးသွားခဲ့သည်။
"ဘီလ် ရမ်မာ! ရှင်က သူ(မ) အပင်တွေပေါ် တက်နေတာကိုသိတာတောင် လွှတ်ထားတာလား။ ရှင် ကလေးကို ဘယ်လိုစောင့်ရှောက်နေတာလဲ။"
"သူ(မ)က မင်း မြင်တဲ့အတိုင်း သန်မာလာတာလေ။"
"ရှင်က ကလေးမလေးကို သားရဲတစ်ကောင်လိုမျိုး ပျိုးထောင်နေတာပဲ! ဘုရားသခင်ရေ။"
ဘီလ်က မကြားသလိုဟန်ဆောင်ကာ ပြတင်းပေါက်ကို ကြည့်နေသဖြင့် မစ္စမိုနာက အသံမြှင့်ကာ ဆူဆူပူပူ ပြောလိုက်သည်။ လေလာက သစ်ကိုင်းတစ်ခုပေါ်တွင် အနားယူကာ ငှက်ကလေးများ ခြုံပုတ်ထဲမှာကစားနေသည်ကို ကြည့်နေခဲ့၏။
ကလေးမလေးကို လအတော်ကြာ စောင့်ကြည့်ပြီးနောက်မှာတော့ လေလာ လူဝဲလင်က ကမ္ဘာကြီး၏အကြောင်းကို စိတ်ဝင်တစားဖြင့် သိချင်နေသော မိန်းကလေးတစ်ယောက်ဖြစ်ကြောင်း သိလိုက်ရတော့သည်။ ပန်းပင်များနှင့် မြက်ပင်များ၊ ငှက်များနှင့် အင်းဆက်များ။ သူ(မ)၏မျက်လုံးများထဲ အံ့သြစရာအဖြစ် ပေါ်လာသောအရာအားလုံးက သူ(မ)အတွက် စိတ်ဝင်စားစရာဖြစ်လာသည်။ တစ်ညတွင် လေလာက ညစာစားရန် ပြန်မလာသည့်အတွက် ဘီလ်က တောအုပ်ထဲ သွားရှာခဲ့ရာမှ လေလာတစ်ယောက် မြစ်ကမ်းဘေးတွင်ထိုင်ကာ ရေဘဲအုပ်စုကို ကြည့်နေကြောင်း မြင်ခဲ့ရသည်။ သူ(မ)က အလွန်အာရုံစိုက်နေသည့်အတွက် ဘီလ် ထပ်ခါထပ်ခါ ခေါ်နေတာတောင်မှ မကြားခဲ့ပေ။
ပြင်းပြင်းထန်ထန် ဆုံးမစကားများပြောပြီးနောက်မှာတော့ မစ္စမိုနာ အိမ်ပြန်လာခဲ့သည်။ ဘီလ်က သူ့အခန်းငယ်၏အပြင်ဘက်ကို ဖြည်းဖြည်းချင်း လျှောက်လာခဲ့သည်။
"ဦးလေး!"
လေလာက ပျော်ရွှင်စွာ သူ့ကို လက်ပြလာ၏။
ကလေးမလေးက အပင်ပေါ် တက်သွားချိန်ကအတိုင်း လျင်မြန်စွာပင် ပြန်ဆင်းလာပြီး ဘီလ်ထံ ပြေးလာခဲ့သည်။ လေလာဝတ်ထားသည့် အရောင်ညစ်နွမ်းနေသော မီးခိုးရောင်ဂါဝန်က အင်္ကျီလက်များတိုနေကာ စုတ်ပြဲနေလေပြီ။ သူ(မ)၏အဝတ်အစားများက မြို့စားကြီးနှင့်တွေ့လျှင် မသင့်တော်သည့်အတွက် ဘီလ် သူ(မ)အတွက် အဝတ်အစားသစ်များဝယ်ပေးရန် ဆုံးဖြတ်လိုက်သည်။
"ပြင်ဆင်ပြီး အပြင်ထွက်လာခဲ့။"
နှစ်ဦးသား အခန်းငယ်၏ အနောက်တံခါးကိုရောက်လာချိန်၌ ဘီလ်က တိုတိုတုတ်တုတ်ပြောခဲ့၏။
"ဦးလေး။"
"ဦးတို့က မြို့ထဲမှာ အဝတ်အစားအသစ်တွေ ဝယ်ဖို့သွားမှာမို့လို့ မင်း လျှောက်တွေးနေစရာမလိုဘူး။"
ဘီလ်က ခြောက်ကပ်စွာဖြင့် ချောင်းတစ်ချက်ဟန့်ကာ လည်ပင်းကို အကြောဆန့်လိုက်၏။
"မြို့စားကြီး ဟာဟက်ဒ်က သိပ်မကြာခင်ရောက်လာတော့မှာ၊ ဒါကြောင့် မင်း ဒီလိုပုံစံနဲ့ဆိုရင် သူ့ကို နှုတ်ဆက်ရမှာ အဆင်မပြေဘူးလေ။"
"မြို့စားကြီးဆိုတော့ ဒီမြေရဲ့ ပိုင်ရှင်ပေါ့နော်။"
"ဟုတ်တယ်။ အခုက အားလပ်ရက်ရတော့ သူ ပြန်လာလိမ့်မယ်။"
"အားလပ်ရက်လား။ မြို့စားကြီးက ကျောင်းတက်နေတာလား။"
လေလာက ခေါင်းကိုစောင်းကာ မျက်မှောင်ကြုတ်လိုက်၏။ ဘီလ်က ပြုံးလိုက်ပြီး ကလေးမလေး၏ ပွနေသောဆံပင်များကို ပွတ်သပ်လိုက်သည်။
"မြို့စားက အသက် ၁၈ နှစ်ပဲ ရှိသေးတာမလို့ ကျောင်းတက်နေရတယ်။"
"ဘယ်လို။ ၁၈ နှစ်တဲ့လား။ မြို့စားကလေ။"
ကလေးမလေး၏ အံ့သြနေသောအမူအရာကြောင့် ဘီလ်၏ရယ်သံက ပို၍ကျယ်လောင်လာခဲ့၏။ ဘီလ်၏ ကြမ်းတမ်းသောလက်ချောင်းများနှင့် ထိလိုက်မိသော ကလေးမလေး၏ ပွယောင်းယောင်းဆံနွယ်တို့က ဝါဂွမ်းကဲ့သို့ နူးညံ့နေသည်။
~~~~
မြို့တော်မှရထားက ကားလ်စ်ဘာ ဘူတာရုံသို့ ဆိုက်ရောက်လာသည်။
စောင့်ဆိုင်းနေသော အလုပ်သမားများက ဘူတာရုံ၏သီးသန့်နေရာသို့ ချဉ်းကပ်လာကြ၏။ ၎င်းတို့က မတ်မတ်ရပ်ကာ တန်းစီလိုက်သည်နှင့် အရပ်ရှည်ရှည်၊ ပိန်ပိန်သွယ်သွယ် ကောင်လေးတစ်ယောက်က ရထားစင်္ကြံလမ်းပေါ် ဆင်းလာသည်။
"မင်္ဂလာပါ သခင်လေး။"
အိမ်တော်ထိန်း ဟက်ဆန်၏ ယဉ်ကျေးသောနှုတ်ဆက်မှုနှင့်အတူ အခြားသောအလုပ်သမားများကလည်း မကြာခင်မှာပင် ထိုကောင်လေးကို ဦးညွတ်ကာ အရိုအသေပြုခဲ့ကြသည်။ ဖြောင့်မတ်ပြီး ကျက်သရေရှိလှသော အပြုအမူဖြင့် မက်သိုင်းရပ်စ်က ၎င်းတို့၏နှုတ်ဆက်မှုကို ပေါ့ပါး တိတ်ဆိတ်စွာပဲ တုံ့ပြန်လိုက်၏။ သူ၏ နှင်းဆီရောင်နှုတ်ခမ်းများက အပိုအလိုမရှိဘဲ နှုတ်ခမ်းကွေးရုံသာ ပြုံးလိုက်သည်။
မက်သိုင်းရပ်စ် ခြေလှမ်းအနည်းငယ်လှမ်းလိုက်ချိန်မှ ဟာဟက်ဒ်အစေခံများက စတင်၍လှုပ်ရှားခဲ့ကြ၏။ စောင့်ကြည့်နေသောသူများက နောက်ဆုတ်လိုက်ကာ သခင်လေးဖြတ်သွားရန် လမ်းဖယ်ပေးခဲ့ကြသည်။ မက်သိုင်းရပ်စ်က အရှိန်မလျှော့ဘဲ ဖြတ်သွားလိုက်သည်။
"မြင်းလှည်းလား။"
ဘူတာရုံအရှေ့တွင် စောင့်နေသော မြင်းလှည်းကိုတွေ့လိုက်သောအခါ မက်သိုင်းရပ်စ်က မဲ့ပြုံးပြုံးလိုက်သည်။
"အာ...ဟုတ်ပါတယ် သခင်လေး။ မဒမ်နော်မာက ကားတွေကို စိတ်ချရတယ်လို့ မယုံကြည်လို့ပါ။"
"သိပါတယ်။ အဖွားအတွက်တော့ ကားတွေက ကြမ်းတမ်းပြီး အန္တရာယ်များတဲ့သတ္တုခဲတွေပါပဲ။"
"ကျွန်တော် တောင်းပန်ပါတယ်။ နောက်တစ်ခါဆိုရင်..."
"မလိုပါဘူး။ ရှေးဆန်တာလည်း မဆိုးပါဘူး။ တစ်ခါတလေပေါ့။"
မက်သိုင်းရပ်စ်က လှည်းပေါ်သို့ တည်ငြိမ်စွာတက်သွား၏။ သူ၏ ရှည်လျားသောလက်တံခြေတံများက သူ၏လှုပ်ရှားမှုများကို ဖြည်းဖြည်းမှန်မှန် ပုံစံပေါ်စေသည်။ လှည်းကို အရှိန်တင်ရင်း လူသူထူထပ်နေသော စျေးရင်ပြင်နှင့် လမ်းမများကို ဖြတ်ကျော်လာခဲ့၏။ မက်သိုင်းရပ်စ်၏အဝတ်အိတ်များကို တင်ခဲ့သောယာဉ်တွဲမှာ ရွှေရောင်အမှတ်အသားထုဆစ်ထားသည့် လှည်းအနောက်ကနေ ခပ်ခွာခွာလိုက်လာခဲ့လေသည်။
***
Aurora Novel Translation Team