ငှက်ကလေးက အတောင်ပံများဖြန့်ကာ ပျံသန်းသွားသော်လည်း အဝေးကြီးမရောက်နိုင်ဘဲ အောက်ပြန်ကျသွားသည်။ ပျံ၍မရတော့သည်ကို လက်မခံနိုင်သည့်ပုံစံနှင့် ထိုငှက်ကလေးက ထပ်ခါထပ်ခါ ပျံသန်းကြည့်နေသော်လည်း ရလဒ်ကတော့ အတူတူပင်။

ကြည့်နေရင်းဖြင့် မက်သိုင်းရပ်စ် ခါးကိုအရှေ့သို့ကိုင်း၍ ပန်းမွေ့ရာအစွန်တွင် မောပန်း၍နားနေသော အဝါရောင်ငှက်လေးကို ကောက်ယူလိုက်သည်။ သူ့လက်ထဲတွင် ပိတ်မိနေသောငှက်ကလေးမှာ ရုန်းကန်အော်ဟစ်နေ၏။ သို့သော် အော်ဟစ်နေသံကတော့ တေးသီကျူးသံနှင့် ပို၍တူပေသည်။

"သူတို့က လွယ်လွယ်နဲ့ မယဉ်ပါးသွားပါဘူး၊ သခင်လေး။ အတောင်ဖြတ်ခံထားရတာကို နေသားကျဖို့အတွက် အချိန်လိုအပ်ပါတယ်။"

မက်သိုင်းရပ်စ် ငှက်ကကလေးကို တိရစ္ဆာန်ထိန်းသိမ်းသူထံ လမ်းပေးလိုက်သည်။

"သခင်မလေး တစ်ကောင်လောက်ကို ယဉ်ပါးသွားအောင်လုပ်ကြည့်ချင်လား။"

ငှက်ကလေး စိတ်ငြိမ်စေရန် တိရစ္ဆာန်ထိန်းသိမ်းသူက ညင်သာစွာပွတ်သပ်ပေးနေ၏။

"ကျွန်မ တိရစ္ဆာန်တွေကို ကြည့်ရတာပဲသဘောကျတာပါ။ ယဉ်ပါးအောင်တော့ မလုပ်ချင်ပါဘူး။ ကျွန်မသိချင်နေတာကိုဖြေပေးလို့ ကျေးဇူးတင်ပါတယ်။"

ကလာရ်ဒင်းက ယဉ်ကျေးစွာငြင်းဆိုပြီး တစ်ဖက်လှည့်လိုက်သည်။

"လက်ဖက်ရည်စားပွဲကို ပြန်ကြတာပေါ့။"

ဒီတစ်ကြိမ်တွင် ကလာရ်ဒင်းကအရင် လက်ကမ်းပေးလိုက်သည်။ သွေးများနှင့်ဖုန်များ ပေကျံနေသော ပန်းပုရုပ်ကဲ့သို့ လှပသည့်လက်တစ်စုံက မက်သိုင်းရပ်စ်၏အတွေးထဲ နောက်တစ်ကြိမ်ပြန်ပေါ်လာကာ ပျောက်ကွယ်သွားခဲ့ပြန်သည်။

ကလာရ်ဒင်းနှင့်အတူ နေရာမှထွက်မသွားမီ မက်သိုင်းရပ်စ် အမိန့်တစ်ခုပေးလိုက်၏။

"အဲ့ဒါကို အိပ်ခန်းထဲယူသွားလိုက်။"

"...ဗျာ။"

မထင်မှတ်ထားသောအရာကြောင့် တိရစ္ဆာန်ထိမ်းသိမ်းသူလည်း မျက်လုံးပြူးသွားခဲ့သည်။

"အဲ့ဒီငှက်။"

မက်သိုင်းရပ်စ် သူ၏မျက်လုံးကျဉ်းများဖြင့် ငှက်ကိုညွှန်ပြလိုက်သည်။

"ကျွန်တော့်ရဲ့ ကနေရီ။"

...

လေလာတစ်ယောက် သူ(မ)၏ ဖြီးသင်ထားသောဆံပင်များကို သပ်ရပ်စွာ စုစည်းလိုက်၏။ ထို့နောက် သူ(မ)၏အေပရွန်ကိုဝတ်ကာ ခြင်းတောင်းကြီးကိုယူလိုက်သည်။

"ဒီကိစ္စကို ငါအဆုံးသတ်တော့မယ်။"

လေလာ သူ(မ)ဘာသာ တီးတိုးရေရွတ်နေရင်း မျက်နှာက လေးနက်နေခဲ့သည်။

လွန်ခဲ့သောရက်အနည်းငယ်က မြို့စားဟာဟက်ဒ် ပြန်ရောက်လာခြင်းအပြင် မိန်းကလေးဘရန့်ဒ်ကလည်း အာဗစ်သို့ လာလည်တတ်ပေ၏။ ရလဒ်အနေဖြင့် လေလာတစ်ယောက် အလျင်လိုနေပြီဖြစ်သည်။ သူ(မ) မြို့စားနှင့်ထိပ်တိုက်မတွေ့ခင်၊ မိန်းကလေးဘရန့်ဒ် သူ(မ)ကိုဆင့်မခေါ်ခင် တောအုပ်ထဲမှ ရက်စ်ဘယ်ရီများအားလုံးကို သူ(မ) ခူးယူဖို့လို၏။ ၎င်းတို့နှစ်ယောက် အလုပ်ရှုပ်နေသည်ကို သူ(မ)ကျေးဇူးတင်ရမည်။ နှစ်ဦးသားက စေ့စပ်ပွဲကိစ္စကို တရားဝင်ကြေညာရန် အသင့်ပြင်နေပုံပင်။

အနားကျယ်သော ကောက်ရိုးဦးထုပ်ကိုဆောင်းကာ တောထဲသို့ ခြေလှမ်းသွက်သွက်ဖြင့် လေလာ ရောက်လာခဲ့သည်။ ထိုနေရာတွင် အမှည့်လွန်နေသော ရက်စ်ဘယ်ရီသီးများကို သူ(မ)တွေ့လိုက်ရ၏။ အာဗစ်မှလူများနှင့် တောထဲမှတိရစ္ဆာန်များ မည်မျှပင်စားနေပါစေ အမှည့်လွန်၍ မြေပေါ်ကြွေကျနေသော အသီးများက အများအပြားရှိနေသေးသည်။

တက်ကြွစွာဖြင့် တောအုပ်ထဲလှည့်ပတ်နေခဲ့သော လေလာတစ်ယောက် မွန်းတည့်ချိန်မတိုင်ခင် ခြင်းတောင်းအပြည့်ရသွား၏။ ခြင်းတောင်း၏အလေးချိန်ကြောင့် လက်ပြုတ်တော့မလို ခံစားနေရသော်လည်း သူ(မ)၏စိတ်ထဲ ပေါ့ပါးနေခဲ့သည်။

လေလာတစ်ယောက် သူ(မ)၏ခြင်းတောင်းကို အပင်ရိပ်အောက်တွင်ထားခဲ့သည်။ ထို့နောက် မြစ်ကမ်းဘေးသို့သွားကာ သူ(မ)၏ မျက်နှာနှင့်လက်တို့မှ ပြင်းထန်သော ရက်စ်ဘယ်ရီသီးနံ့များနှင့် အရောင်များကို ဆေးကြောလိုက်သည်။

ရှူးလ်တာမြစ်က ဟာဟက်ဒ်ဥယျာဉ်နှင့် တောင်ကြားများကို လွှမ်းခြုံထားသည်။ မြို့လယ်မှကြည့်လျှင် မြစ်ကလှပသော်လည်း ရှူးလ်တာမြစ်၏ အလှဆုံးနေရာကတော့ အာဗစ်သုသာန်ပင်။

လေလာ သူ(မ)၏အေပရွန်ထဲမှ လက်ကိုင်ပုဝါကိုထုတ်ယူလိုက်ပြီး မျက်နှာပေါ်မှ ကျနေသောရေစက်များကို သုတ်လိုက်သည်။ လန်းဆန်းစေသောမြစ်ကြီးသည် နွေရာသီ၏ ပူပြင်းလွန်းသောရာသီဥတုကို လျော့ကျစေရန် အရေးပါလှသည်။ မြစ်ထဲမှာခြေထောက်စိမ်ဖို့ လေလာတွေးမိသွားသော်လည်း ခေါင်းခါလိုက်မိ၏။

ဤနေရာသို့အပို့မခံရမီ လေလာနေခဲ့ရသော အဒေါ်၏အိမ်၌ လေလာထက်ကြီးသော ဝမ်းကွဲမောင်နှမငါးယောက်ရှိသည်။ ၎င်းတို့က ကြမ်းတမ်း၍ အစအနောက်သန်ကြသည်။ တစ်နေ့တွင် ထိုဝမ်းကွဲများက သူ(မ)ကို မြစ်ထဲသို့ တွန်းချခဲ့ကြ၏။ ထို့နောက်မှာတော့ ၎င်းက သူ(မ)ကို မိသားစုထဲသို့ ကြိုဆိုခြင်းဖြစ်သည်ဟု သူတို့ကိုယ်သူတို့ ကာကွယ်ပြောဆိုခဲ့ကြသည်။ သူ(မ)၏အော်သံကိုကြား၍ လာကယ်ခဲ့သော အိမ်နီးချင်းများကြောင့်သာမဟုတ်လျှင် လေလာတစ်ယောက် ရေသရဲခေါ်ဆောင်ရာနောက်သို့ လိုက်ပါသွားရလောက်ပြီဖြစ်၏။

၎င်းက သူ(မ)ဝမ်းကွဲများ၏ အမှားဖြစ်သော်လည်း ထိုည၌ မူးနေသောဦးလေးထံမှ လေလာကသာ အရိုက်ခံခဲ့ရသည်။ တစ်ပတ်အကြာမှာတော့ သူ(မ)ကိုမောင်းထုတ်ကာ အခြားသော ဆွေမျိုးတစ်ယောက်ထံပို့လိုက်လေသည်။ ၎င်းတို့၏ ကျေးဇူးကို မသိတတ်သည့် ကလေးတစ်ယောက်အား ဂရုမစိုက်နိုင်ဘူးဟု ပြောဆိုရင်းနှင့်ပင်။

၎င်းက မျှတမှုမရှိသော်လည်း နောက်ထပ်ဆွေမျိုး၏အိမ်ကတော့ ပိုကောင်းလိမ့်မည်ဟု ယုံကြည်ထားသောကြောင့် လေလာ ကောင်းတဲ့အရာများဖြစ်သွားသည်ဟုသာ တွေးလိုက်သည်။

နောက်တစ်အိမ်။ ထို့နောက် နောက်ထပ်တစ်အိမ်။ တစ်နေရာမှတစ်နေရာသို့ ပြောင်းရွှေ့ရချိန်တိုင်း ကောင်းကောင်းမွန်မွန်ဆက်ဆံခံရဖို့ကို သူ(မ) မျှော်လင့်နေခဲ့သည်။ သူ(မ) ဦးလေးဘီလ်၏အိမ်ငယ်လေးတွင် အခြေကျသွားတော့မှ သူ(မ)၏မျှော်လင့်ချက်များ ပြည့်ဝလာခဲ့တော့၏။

ထို့ကြောင့် အရာအားလုံးက ကောင်းမွန်လှပေသည်။

လေလာ တစ်ဖက်လှည့်လိုက်ပြီး သစ်ပင်အောက်သို့သွားလိုက်သည်။ လေလာတစ်ယောက် ခြင်းတောင်းဘေးတွင်ထည့်ထားသော သတင်းစာကိုယူ၍ အေပရွန်ထဲထည့်ကာ အပင်ပေါ်တက်လိုက်၏။ ယခင်ကကဲ့သို့ မမြန်ဆန်တော့သော်လည်း သူ(မ) အကောင်းဆုံးလုပ်နိုင်ခဲ့သည်။ ၎င်းကို သူ(မ) ဦးလေးဘီလ်ထံမှသင်ယူထားခြင်းဖြစ်သည်။

လေလာက ခုံပေါ်မှာထိုင်နေသကဲ့သို့ သက်တောင့်သက်သာရှိစွာဖြင့် သစ်ကိုင်းပေါ်မှာထိုင်နေ၏။ ရှုးလ်တာမြစ်သည် ကမ္ဘာပေါ်တွင် အခမ်းနားဆုံးမြစ်ဟု သူ(မ) အခိုင်အမာယုံကြည်ထားသည်။ မြို့အတော်များများသို့ ခရီးသွားလာဖူးသော ကိုင်းလ်ကလည်း သူ(မ)၏စကားကို ထောက်ခံခဲ့လေသည်။ သူ(မ)၏အထင်အမြင်က အမှန်ဖြစ်သည်ဟု လေလာ ထင်မိသည်။

အစာရှာနေသော ရေဘဲများကို ကြည့်နေရင်း မြစ်၏လန်းဆန်းသောရနံ့က သူ(မ)၏နှာခေါင်းထဲ ဝင်ရောက်လာခဲ့သည်။ နွေရာသီက တကယ်ကို နိဗ္ဗာန်တမျှသာယာသောရာသီပင်။

စိတ်ကြည်လင်နေသောအကြည့်ဖြင့် ရုတ်တရက်ဆိုသလို လေလာ သူ(မ)၏အိတ်ထဲမှသတင်းစာကို ထုတ်ယူလိုက်ပြီး လျှို့ဝှက်ဆန်းကြယ်လူသတ်ဝတ္ထုနေရာသို့ လှန်လိုက်သည်။ ထက်မြက်သောဦးနှောက်ပိုင်ရှင် စုံထောက်ကြီးက သူ၏စုံစမ်းမှုနှင့် မှုခင်းကိုဖြေရှင်းတော့မည်ပင်။

သူ(မ)က ဝတ္ထုထဲတွင် စိတ်ဝင်တစား နစ်မြောနေခဲ့သည်။

~~~~

မက်သိုင်းရပ်စ် ရေမျက်နှာပြင်ပေါ်သို့ ပြန်လည်ပေါ်ထွက်လာချိန်၌ဖြစ်၏။

သူ၏ထင်ရှားသောလည်စေ့က ပြင်းထန်သောအသက်ရှူမှုနှင့် စည်းချက်ကျစွာဖြင့် အထက်အောက်လှုပ်ရှားနေသည်။ ကျန်းမာပြီး ဗလာကျင်းနေသော ထိုလူ၏ခန္ဓာကိုယ်က မြစ်ရေပြင်ထက် ထင်ဟပ်နေလေ၏။

အိမ်တော်သို့ပြန်မည်ဟု တွေးလိုက်ချိန်မှာပင် မက်သိုင်းရပ်စ်တစ်ယောက် စိတ်ပြောင်းသွားကာ မြစ်ရေစီးကြောင်းအတိုင်း ရေကူးဖို့ဆုံးဖြတ်လိုက်သည်။

ရှူးလ်တာမြစ်နှင့် အာဗစ်တောအုပ်ကို သဘောကျသော မက်သိုင်းရပ်စ်က ရှုခင်းတစ်ခုလုံးကိုမြင်နိုင်သော လှေဆိပ်နားရှိ လှေရုံကလေးထဲမှာ ပြောင်းရွှေ့နေထိုင်ခဲ့သည်။ သူ့အမေနှင့် အဖွားဖြစ်သူတို့က မြစ်ကမ်းဘေးသို့ လာလေ့မရှိသောကြောင့် ဤနေရာသည် မက်သိုင်းရပ်စ်၏ကိုယ်ပိုင်ကမ္ဘာလေးပင်။

အိမ်တော်သို့ လာလည်သူမရှိလျှင် မက်သိုင်းရပ်စ် ထိုနေရာသို့ မကြာခဏလာကာ ပြတင်းပေါက်အလွန်မှ ရှူခင်းများကိုကြည့်ရင်း စာအုပ်ဖတ်တတ်သလို ပျင်းလာလျှင်လည်း တစ်ရေးအိပ်လေ့ရှိသည်။ ၎င်းက သူ့အတွက် အရာအားလုံးလုပ်နိုင်သည့် သက်တောင့်သက်သာအရှိဆုံး နေရာတစ်ခုပင်။ သူအကြိုက်ဆုံးအရာမှာ ယခုလိုမြစ်ရေထဲမှာ စိမ်နေရခြင်းဖြစ်သည်။

မြစ်ရေထဲလဲလျောင်းနေရင်း သစ်ရွက်စိမ်းများကြားမှတစ်ဆင့် ကောင်းကင်ကြီးကို မက်သိုင်းရပ်စ် မော့ကြည့်လိုက်သည်။ လေတိုက်မှုကြောင့် သစ်ရွက်များလှုပ်ခတ်သံ၊ ငှက်များအော်သံနှင့်အတူ ရေစီးသံတို့ကို ကြားနေရ၏။ လွန်ခဲ့သောရက်အနည်းငယ်က အိမ်တော်တွင် ဆူညံနေခဲ့သည့်အတွက် မြစ်၏အေးချမ်းမှုအား သူ သေသေချာချာခံစားမိနေသည်။

ဟာဟက်ဒ်နှင့် ဘရန့်ဒ်မိသားစုများ၏ လက်ထပ်ပွဲညှိနှိုင်းမှုက ချောမွေ့စွာပြီးဆုံးသွားခဲ့သည်။ ကိစ္စအထွေအထူးမရှိလျှင် ကလာရ်ဒင်းနှင့်သူ၏စေ့စပ်မှုကို နွေအပြီးတွင်ကြေညာမည်ဖြစ်၏။

မက်သိုင်းရပ်စ်က သူ၏စေ့စပ်ကာလကို တစ်နှစ်အထိ သဘောတူထားသည်။

အာဗစ်မြို့စားအနေဖြင့် ဂုဏ်သိက္ခါအတော်များများရထားခဲ့လျှင် အရာရှိတစ်ယောက်အဖြစ် သူ့နေရာကို ထိန်းသိမ်းထားရန်မလိုအပ်တော့ပေ။ စစ်တပ်ထဲ တစ်နှစ်၊ နှစ်နှစ်လောက် အချိန်ကုန်ဆုံးပြီး စစ်တပ်မှထွက်လာလျှင် သူ့အတွက် လက်ထပ်ဖို့အသင့်တော်ဆုံးအချိန်ကို ရောက်ရှိလာမည်ဖြစ်၏။ မက်သိုင်းရက်စ်တစ်ယောက် လက်ထပ်ပြီးလျှင်တော့ မိသားစုစီးပွားရေးကို အာရုံစိုက်ရန် ဆုံးဖြတ်ထားသည်။

၎င်းက သူဆုံးဖြတ်ထားသော ရေစုန်စီးကာ လိုက်သွားမည့်ဘဝပင်။

မက်သိုင်းရပ်စ် မျက်လုံးများမှိတ်ကာ ခန္ဓာကိုယ်ကို ရေစီးကြောင်းအတိုင်း မျောနေခဲ့သည်။ နွေရာသီ၏ နွေးထွေးသောနေရောင်ခြည်၊ အေးစက်သောရေစီးကြောင်းနှင့် သူ့နားထဲမှာကြားနေရသော ရေစီးသံများက သူ့အတွက်အရာရာဖြစ်နေခဲ့သည်။ သို့သော်လည်း သူ မျက်လုံးများပြန်ဖွင့်လိုက်သည့်အခိုက်အတန့်မှာ ပြီးပြည့်စုံလှသော သူ၏ငြိမ်းချမ်းမှုက ပျောက်ကွယ်သွားခဲ့လေ၏။

မြစ်ကမ်းဘေးရှိ သစ်ပင်၏သစ်ကိုင်းပေါ်မှာ အမျိုးသမီးတစ်ယောက်ထိုင်နေသည်။ မျက်စိတစ်မှိတ်အတွင်းမှာပင် ထိုအမျိုးသမီးကို မက်သိုင်းရပ်စ် မှတ်မိသွားခဲ့၏။ တစ်ချိန်တည်းမှာပင် ထိုအမျိုးသမီးက သူ(မ)ဖတ်နေသော သတင်းစာကိုခေါက်ကာ သူရှိရာဘက်သို့ ခေါင်းလှည့်ကြည့်လာသည်။

၎င်းက စိတ်ရှုပ်စရာကောင်းသည့်အမျိုးသမီး လေလာ လူဝဲလင်ပင်တည်း။

***

Aurora Novel Translation Team