About This Novel

ဒါကတော့ ဝတ္ထုတုန်းကလည်း ဝတ္ထုအလျောက်၊ webtoon ထွက်တော့လည်း webtoon အလျောက် တအားအောင်မြင်ခဲ့ပြီး drama adaptation သတင်းထွက်နေတဲ့ 'Remarried Empress' ကိုရီးယား webnovel ကို ဘာသာပြန်ဆိုထားတာဖြစ်ပါတယ်။ 

နာဗီရယ် ထရိုဗီက ပြီးပြည့်စုံတဲ့ ဧကရီတစ်ပါးဖြစ်ဖို့အတွက် သူ့တစ်ဘဝလုံး ပုံအပ်မြှုပ်နှံပြီးတော့ ကြိုးစားလေ့ကျင့်ခဲ့တဲ့သူပါ။ နဂိုထက်မြက်ပြီး အရည်အချင်းလည်းရှိတော့ သူ့ရဲ့ကြိုးစားမှုက အရာထင်ခဲ့ပါတယ်။ ငယ်သူငယ်ချင်းလည်းဖြစ်၊ ခင်ပွန်းသည်လည်းဖြစ်တဲ့ အရှေ့အင်ပါယာရဲ့ ဧကရာဇ်ကို အကောင်းဆုံး ပါရမီဖြည့်ပေးရင်း အမြော်အမြင်နဲ့ ပြည့်စုံပြီး၊ မှူးကြီးမတ်ရာတွေ တိုင်းသူပြည်သားတွေ လေးစားရတဲ့ ဧကရီတစ်ပါးဖြစ်ခဲ့တယ်ပေါ့နော်။ 

နာဗီရယ်က သူ့ကိုယ်သူ ဧကရီမဟုတ်တဲ့ တခြားဘဝတစ်ခုအဖြစ်နဲ့ တစ်ခါမှ တွေးမကြည့်ခဲ့ဖူးတဲ့သူပါ။ အဲ့ဒီလို တွေးနေစရာလည်း အကြောင်းမရှိခဲ့ဘူးလေ။ ခင်ပွန်းဖြစ်တဲ့ ဧကရာဇ်က အပျော်မယားကို ခေါ်သွင်းလာပြီး ကွာရှင်းကြဖို့ ပြောမလာခင်အထိပဲဆိုပါတော့။ 

ဂရုတစိုက်နဲ့ အလေးအနက် တည်ဆောက်ခဲ့တဲ့ သူ့ကမ္ဘာကြီး ရုတ်တရက် ကျွမ်းထိုးမှောက်ခုံဖြစ်သွားတော့ နာဗီရယ်က သူ့ဆုံးဖြတ်ချက်နဲ့သူ ဆိုင်းမဆင့်ဗုံမဆင့် ပြင်းထန်တဲ့လုပ်ရပ်ကို လုပ်ပါလေရော။ အဲ့ဒါက ဘာလဲဆိုတော့ ကွာရှင်းဖို့ သဘောတူလက်ခံပြီးတာနဲ့ အနောက်တိုင်းပြည်က ခံ့ညားချောမောတဲ့ တော်ဝင်မင်းသားနဲ့ ချက်ချင်း နောက်အိမ်ထောင်ပြုလိုက်တာပါပဲ။ 

ကိုယ့်ရဲ့အမိမြေ အရှေ့အင်ပါယာနဲ့ အပြိုင်အဆိုင်ဖြစ်တဲ့ တိုင်းပြည်မှာ ကိုယ်တိုင်အုပ်ချုပ်ရမဲ့နေရာကို ရောက်လာတဲ့အခါ နာဗီရယ်တစ်ယောက် ဘယ်လိုစိန်ခေါ်မှုတွေနဲ့ ရင်ဆိုင်ရမှာလဲ၊ သူ့ရဲ့အမြော်အမြင်နဲ့ ထက်မြက်မှုကို ဘယ်လိုအသုံးချပြီး အတားအဆီးအနှောင့်အယှက်တွေကို ကျော်ဖြတ်သွားမလဲ၊ အတိတ်က ရေစက်ဆိုး ခင်ပွန်းဟောင်းဆီကနေရော လုံးဝလွတ်ကင်းနိုင်ပါ့မလား၊ ခင်ပွန်းအသစ်နဲ့ရော ဘယ်လိုနှစ်ပါးသွားမှာလဲ အစရှိတာတွေကို ဒီဝတ္ထုမှာ ရင်တမမ အသည်းတယားယားနဲ့ သွေးတက်ရင်း ဖတ်သွားရမှာပေါ့နော်။ 

ဒရာမာတွေတစ်ပုံတပင်နဲ့ တအားလောင်ရမဲ့ဇာတ်လမ်းဖြစ်တဲ့အကြောင်းကိုတော့ အထူးတလည် ပြောပြနေစရာမလိုဘဲ ဇာတ်လမ်းအကျဉ်း ဖတ်လိုက်ရုံနဲ့ ရိပ်မိကြလောက်မှာပါ။ သူ့ရဲ့ webtoon ကလည်း နာမည်ကြီးဆိုတော့ တော်တော်များများ ဖတ်ဖူးပြီးသား ဖြစ်ကြလိမ့်မယ်ထင်ပါတယ်။ ဝတ္ထုမှာကတော့ သွေးတက်စရာတွေကို အသေးစိတ် ဖတ်ရပါမယ်။ ဒီတော့ ဒရာမာမကြည့်ရသေးခင် ဝတ္ထုလေးနဲ့ အရင်လောင်လိုက်ကြတာပေါ့နော်။ 

~~~~~ 

Miel's Translations