အပိုင်း ၁၀ (ရံရွေတော် ပြဿနာ)
အရွယ်မရောက်သေးသည့်အတွက် အထက်တန်းလွှာ လူမှုရေးအသိုင်းအဝိုင်းသို့ မဝင်ရောက်နိုင်သေးသဖြင့် ကျွန်မက နတ်ရွာစံဧကရာဇ်၏ ချစ်သူများနှင့် မရင်းနှီးခဲ့။
"ချစ်သူတွေက ဧကရီနဲ့ မျက်နှာချင်းဆိုင်မတွေ့ဖို့ ကြိုးစားကြပါတယ်။ တွေ့ကြရင် နှစ်ဦးနှစ်ဖက် စိတ်ထိခိုက်ရမှာဖြစ်သလို၊ သူတို့ကလည်း ဧကရီရဲ့ မုန်းတီးမှုကိုမခံချင်ကြတာကြောင့်ပါ။"
"..."
ဆိုဗီရ်ရှုက ရက်ရှ်တာ၏ ထိုသို့သောစရိုက်ကိုပဲ နှစ်သက်သဘောကျလေသလားမသိပေ။
နယ်စားကတော် အယ်လီဇာလည်း အသက်ရှူမှားသွားရသည်။
"အဲ့ဒါထက် ခဏနေ အဲ့ဒီမိန်းမအတွက် ရံရွေတော် ရှာပေးရပါတော့မယ်။ အရှင်ဧကရာဇ်ကသာ သာမန်အရပ်သူလို့ပြောနေပေမဲ့ အဲ့မိန်းမက သာမန်အရပ်သူမဟုတ်တဲ့အတွက် စိုးရိမ်မိပါတယ်။ မှူးမတ်ကတော်တွေနဲ့ သခင်မလေးတွေက ဧကရာဇ်ချစ်သူရဲ့ ရံရွေတော်ဖြစ်ချင်ပါတယ်ဆိုပြီး အရှေ့ထွက်လာကြပါ့မလား…။"
~~~~~
"ဧကရီကို သွားတွေ့တော့ ကျွန်မက အရှင်ဧကရာဇ်ရဲ့ ချစ်သူဖြစ်ပြီး ဧကရီရဲ့ ညီမမဟုတ်တဲ့အတွက် မမလို့ မခေါ်ရဘူးဆိုပြီး ပြောပါတယ်၊ ဘယ်ရွန် လန့်ထ်။ အဲ့ဒီလိုပဲလားဟင်။ ဒါမှမဟုတ် ဧကရီအရှင်မက ကျွန်မကို မုန်းနေတာလား။"
ချစ်သူအဖြစ် အသိအမှတ်ပြုစာချုပ် ချုပ်ဆိုပြီးသွားပြီဖြစ်သော်လည်း တစ်ချိန်လုံး မျက်နှာချင်းဆိုင် တွေ့ဆုံနေရသဖြင့် ရက်ရှ်တာနှင့်ပတ်သက်သမျှ ကိစ္စအဝဝကို ဧကရာဇ်၏ ကိုယ်ရေးအရာရှိများအနက် ဘယ်ရွန် လန့်ထ်ကပင် အကုန်တာဝန်ယူထားခဲ့၏။
ယနေ့လည်း အကြောင်းရင်း အထွေအထူးမရှိဘဲ ရက်ရှ်တာ့ကို သွားတွေ့ခဲ့သည့် ဘယ်ရွန် လန့်ထ်တစ်ယောက် သူ့ကို နည်းလမ်းအမျိုးမျိုးနှင့် ကူညီပေးနေရာမှ မမျှော်လင့်သော စကားကို ကြားလိုက်ရသဖြင့် အံ့အားသင့်သွားကာ ပြန်မေးမိသည်။
"ဧကရီအရှင်မကို သွားတွေ့ခဲ့တာလားဗျ။"
"ဟုတ်ပါတယ်...ဧကရီအရှင်မက ကျွန်မဆီကို လက်ဆောင်တွေ ပို့ပေးခဲ့တယ်မဟုတ်လား။ လက်ဆောင်ရတယ်ဆိုရင် ကျေးဇူးတင်ဂါရဝစကားပြောဖို့ သွားသင့်တယ်ထင်လို့ပါ..."
ဘယ်ရွန် လန့်ထ်လည်း စိတ်ထဲကနေ ဟူးခနဲ သက်ပြင်းချကာ သူ့နဖူးသူ ဖိလိုက်လေသည်။
ရက်ရှ်တာက ခေါင်းလေးငဲ့သွား၏။
“ဘာဖြစ်လို့လဲဟင်။ ရက်ရှ်တာ အမှားလုပ်မိလို့လား။”
“မှားတယ်ဆိုတာထက်…”
“...”
“ဧကရီအရှင်မနဲ့ လေဒီ ရက်ရှ်တာရဲ့ အနေအထားအရိုက်အရာချင်းက လုံးဝ ဆန့်ကျင်ဘက်ဖြစ်နေလို့ပါ။”
“ဘာဖြစ်လို့လဲ။ နှစ်ယောက်စလုံးက ခင်ပွန်းတစ်ယောက်တည်းကို ပြုစုခစားနေကြတာပဲမဟုတ်ဘူးလား။”
ဧကရီအရှင်မကိုရော ဒီလိုပဲ ပြောခဲ့တာလား။ ဘယ်ရွန် လန့်ထ်၏ အမြင်လွှာက ခေတ္တခဏ ဝေဝါးသွားတော့၏။
သို့သော်လည်း ရက်ရှ်တာ၏ အနက်ရောက် မျက်လုံးရွဲကြီးများကို မြင်လိုက်ရသည်တွင် ဘယ်ရွန် လန့်ထ်လည်း ထိုမျှလောက် ဖြူစင်အပြစ်ကင်းလွန်း၍သာ ထိုအဖြစ်မျိုး ဖြစ်ခဲ့ခြင်းဖြစ်မည်ဟု လက်ခံလိုက်သည်။
ကလေးများ စကားမှားခဲ့မည်ဆိုလျှင် လူကြီးတစ်ဦး၏ စကားမှားခြင်းကဲ့သို့ သဘောကြထားမည် မဟုတ်ပေ။
ရက်ရှ်တာက အထက်တန်းလွှာ လူ့အဖွဲ့အစည်းနှင့်ပတ်သက်ပြီး အထက်တန်းလွှာ ကလေးများထက် ပို၍ပင် မသိနားမလည်သူ ဖြစ်သောကြောင့် အတိုင်းအတာတစ်ခုအထိတော့ နားလည်ပေးရပေမည်။
သို့သော်လည်း ထိုကိစ္စမျိုးဆိုလျှင်တော့...
“လေဒီ ရက်ရှ်တာက ဧကရီအရှင်မကို သွားတွေ့မယ်လို့ပြောတော့ ဘယ်သူမှ မတားကြဘူးလားဗျ။”
“ဂျယ်ရီနီနဲ့ ခီးစ်ကို ပြောတာလားရှင့်။”
“သူတို့တွေက ဘယ်သူတွေလဲ။”
“ရက်ရှ်တာရဲ အစေခံတွေပါ၊ အရှင်ဧကရာဇ်ကိုယ်တိုင် ခန့်ပေးခဲ့တာလေ။”
“အစေခံမဟုတ်ဘဲ...ရံရွေတော်တွေရော မရှိဘူးလားဗျ။”
ရက်ရှ်တာက ခေါင်းလေးကို အနည်းငယ် ငဲ့စောင်းလိုက်သည်။
“မရှိပါဘူး။”
ဘယ်ရွန် လန့်ထ်လည်း အံ့အားသင့်သွားသည့် မျက်နှာဖြင့် ရက်ရှ်တာ့ကို စိုက်ကြည့်ရင်း နေရာမှ ထလိုက်သည်။
ထိုသို့ဖြင့် ဘယ်ရွန် လန့်ထ်တစ်ယောက် ဧကရာဇ် ဆိုဗီရ်ရှုထံ ပြန်သွားကာ ရက်ရှ်တာနှင့် သွားရောက်တွေ့ဆုံခဲ့သည့် အကြောင်းအရာကို အစီရင်ခံတင်ပြပြီးနောက် ရှင်းပြခဲ့၏။
“အရှင်ဧကရာဇ်၊ အခု လေဒီ ရက်ရှ်တာကလည်း ဧကရာဇ်ရဲ့ချစ်သူ ဖြစ်သွားပါပြီ။ ပြီးတော့ သူက အထက်တန်းလွှာ လူ့အဖွဲ့အစည်းအကြောင်းကို နားမလည်သေးပါဘူး။ အစေခံတွေအပြင် ရံရွေတော်တွေလည်း လိုအပ်ပါတယ်။”
ဘေးမှ နားထောင်နေသည့် အတွင်းရေးမှူးတစ်ဦးက 'ရံရွေတော်တွေဆိုတာ အထက်တန်းလွှာမှူးမတ်အသိုင်းအဝိုင်းက လာကြတာလေဗျ။ သာမန်အရပ်သူ လေဒီ ရက်ရှ်တာကို အလုပ်အကျွေးပြုခစားဖို့ စိတ်ဝင်စားပါ့မလား' ဟု ကြားဖြတ် ပြောခဲ့သည်။
“သာမန်အရပ်သူဇာစ်မြစ်နဲ့ ချစ်သူဆိုတာက လေဒီ ရက်ရှ်တာတစ်ယောက်တည်း ရှိတာမှ မဟုတ်တာဗျ။”
ဘယ်ရွန် လန့်ထ်က သူပဲ အစော်ကားခံလိုက်ရသလို ခွန်းတုံ့ပြန်ပြီး ဧကရာဇ် ဆိုဗီရ်ရှုကို ထပ်မံတောင်းဆိုလိုက်သည်။
“တစ်ယောက်တလေလောက်ပဲဖြစ်ဖြစ် ရံရွေတော် ခန့်အပ်ပေးပြီး အထက်တန်းလွှာ လူ့အဖွဲ့အစည်းအကြောင်း သဘာဝကျကျလေး သိလာအောင် လုပ်ပေးသင့်ပါတယ် အရှင်ဧကရာဇ်။”
ဆိုဗီရ်ရှုက ဟင်းခနဲ သက်ပြင်းချကာ သဘောတူလိုက်သည်။
“မဟုတ်တောင် ကျုပ်လည်း စဉ်းစားနေတာ။ ဘယ်ရွန် လန့်ထ်။”
“ဟုတ်ကဲ့ပါ၊ အရှင်ဧကရာဇ်။”
“မောင်မင်းကပဲ တာဝန်ယူပြီး ရက်ရှ်တာအတွက် အသုံးဝင်မဲ့ ရံရွေတော်ကို ရှာပေးလိုက်။”
“အမိန့်တော်အတိုင်းပါ၊ အရှင်ဧကရာဇ်။”
~~~~~
အနောက်နန်းဆောင်နှင့် တွဲလျက်ရှိသော ဥယျာဉ်ထဲတွင် လမ်းလျှောက်နေစဉ်။
လူ့ဦးခေါင်းအရွယ်ခန့် ကြီးမားစွာပွင့်လန်းနေသော ပန်းတစ်ပွင့်ရှိပြီး ထိုပန်း၏ ပွင့်ချပ်ပေါ်၌ မကြည့်ဘဲမနေနိုင်အောင် ကြည့်ကောင်းလှသော ငှက်တစ်ကောင်က အမွှေးအတောင်များကိုသပ်ကာ ပြုပြင်နေ၏။
“ထူးဆန်းတဲ့ငှက်ပဲ။”
ရံရွေတော်များက ဆိုဗီရ်ရှု၏ အတွင်းရေးမှူး ရက်ရှ်တာအတွက် ရံရွေတော်ရှာပေးရန် ကြိုးစားသော်လည်း မအောင်မြင်ကြောင်း ပြောဆိုကာ ရယ်မောနေကြသဖြင့် ငှက်ကို မတွေ့ကြသည့်ပုံပင်။
ကျွန်မလည်း တစ်ယောက်တည်း အသာလေး ချဉ်းကပ်သွားလိုက်သည်။
လက်ကို ဆန့်တန်းလိုက်တော့ ငှက်က မကြောက်မရွံ့ ကျွန်မ လက်ဖမိုးပေါ်သို့ အလျင်အမြန် တက်လာ၏။
တောင်ပံများကို တဖျပ်ဖျပ်လှုပ်ရှားကာ နှုတ်သီးဖြင့် ကျွန်မ၏ လက်ဖမိုးပေါ်သို့ ပွတ်တိုက်ပြီး ချစ်စဖွယ် ပြုမူနေပုံထောက်လျှင် လူယဉ်သောငှက်ဖြစ်သည်မှာ သေချာပေသည်။
‘မှူးမတ်တွေ မွေးထားတဲ့ ငှက်များလား။’
သေးငယ်သော ဦးခေါင်းကို ပွတ်သပ်ရင်း ကြည့်လိုက်တော့ ငှက်၏ ခြေထောက်တွင် စက္ကူအပိုင်းအစလေးတစ်ခု ချည်နှောင်ထားသည်ကို တွေ့လိုက်ရ၏။
စက္ကူကို ဖြေလိုက်တော့ ဆန်စေ့လောက်သေးငယ်သည့် အရွယ်အစားဖြင့် မညီမညာသော စာလုံးများ ရေးသားထားသည်ကို တွေ့ရသည်။
-ကျုပ်က နှစ်သစ်ကူးပွဲတော်ကို တက်ရောက်မဲ့ တိုင်းတစ်ပါးက ဧည့်သည်တော်ပါ။ ဒီစာကိုတော့ အရက်သောက်ရင်း ရေးထားတာဗျ။
ကျွန်မ အသာလေး ပြုံးနေမိစဉ် ရံရွေတော်များက နောက်ကျမှ ချဉ်းကပ်လာကာ ဘာဖြစ်သလဲဟု မေးကြ၏။
“ဟယ်၊ ငှက်လေးပါလား။”
“ချစ်စရာလေး။”
“တကယ်လှတဲ့ငှက်ပါပဲ၊ ဒီလိုငှက်မျိုးကို ဘာလို့ခေါ်တာပါလိမ့်။”
“ယဉ်ပါးအောင်လုပ်ဖို့ခက်တဲ့ငှက်လို့ သိထားတာကို... အမဲလိုက်ရင်သုံးတဲ့ငှက် မဟုတ်ဘူးလားရှင့်။”
စာကို ပြလိုက်တော့ ရံရွေတော်များက တခစ်ခစ် ရယ်မောကြပြီး ပြန်စာရေးပို့ရန် တိုက်တွန်းကြသည်။
ကျွန်မ၏ နှုတ်ခမ်းထောင့်စွန်းများလည်း အလိုလို မြင့်တက်သွား၏။ တကယ်ပဲ တိုင်းတစ်ပါးသားက အရက်သောက်ရင်း မူးပြီးရေးထားသည့်စာဖြစ်မလား။
နှစ်သစ်ကူးပွဲတော်အတွက် တိုင်းတစ်ပါးမှ သံတမန်များ အမြောက်အမြား စုဝေးနေကြသည်ဖြစ်ရာ ဖြစ်နိုင်ခြေမရှိသည်တော့ မဟုတ်ပေ။
ယေဘုယျအားဖြင့် စာပို့ငှက်များ ပျံသန်းသွားတတ်သည့်နေရာက ငှက်များကို ဆွဲဆောင်နိုင်သော ထူးထူးခြားခြားအနံ့ရှိသည့် ငှက်မျှော်စင်ပင်။
သို့သော်လည်း ဤနေရာသို့ ပျံသန်းလာခြင်းက အံ့ဩစရာဖြစ်နေ၏။
ကျွန်မလည်း အမြဲဆောင်ထားလေ့ရှိသော အိတ်ဆောင်ဖောင်တိန်လေးကို ထုတ်လိုက်တော့ တခြားရံရွေတော်တစ်ဦးက အနီးအနားရှိ စက္ကူစတစ်ခုကို ယူလာပေးခဲ့သည်။
-မူးနေတဲ့ငှက် ပျံလာလို့ ပြန်ပို့ပေးလိုက်ပါတယ်။ ကောင်းကောင်း ပြန်လမ်းရှာနိုင်မယ်ဆိုရင်တော့ သခင်ထက် ဉာဏ်ပိုကောင်းတာမို့လို့ တော်သေးတာပေါ့။
ခေါင်းလေးအနည်းငယ်ပြူပြီး ကျွန်မ စာရေးနေသည်ကို ကြည့်နေကြသော ရံရွေတော်များက တစ်ခါထပ်ပြီး တခစ်ခစ် ရယ်မောကြလေသည်။
ကျွန်မလည်း ဖောင်တိန်ကို ပြန်ထည့်ပြီး ဤနေရာအထိ ပျံသန်းလာရသည့်ငှက်ကို ရေတိုက်ကာ ယင်း၏ ခြေထောက်တွင် စာရွက်ကို ပြန်ချည်ပေးလိုက်၏။
ငှက်က ကျွန်မ၏ လက်ဖမိုးကို နှုတ်သီးဖြင့် ပွတ်သပ်ပြီးနောက် တစ်ဖန် ပျံသန်းထွက်ခွာသွားလေသည်။
“ချစ်ဖို့ကောင်းလိုက်တာ။”
“ဒီငှက်က ဧကရီအရှင်မကို သဘောကျတဲ့ပုံပါပဲ။”
“ဟုတ်ပါရဲ့။ ဧကရီအရှင်မအနားမှာပဲ ကပ်နေတာ ဆန်းကြယ်မနေဘူးလား။”
သို့သော်လည်း ငှက်အကြောင်း ပြောဆိုနေရင်း အခန်းသို့ ပြန်ရောက်လာသောအခါ တံခါးရှေ့တွင် ဆိုဗီရ်ရှု စေလွှတ်လိုက်သော အတွင်းရေးမှူးက ရပ်နေ၏။
“ဘာကိစ္စရှိလို့လဲ။”
အခုလေးတင် ရောက်လာခြင်းမဟုတ်ဘဲ ဤနေရာတွင် အတန်ကြာအောင် စောင့်ဆိုင်းနေခဲ့ပုံရသဖြင့် မေးကြည့်လိုက်တော့ အတွင်းရေးမှူးက အလျင်အမြန် ပြန်ဖြေလေသည်။
“အရှင်ဧကရာဇ်က ဧကရီအရှင်မကို ခေါ်ဆောင်လာဖို့ အမိန့်ပေးလိုက်ပါတယ်။”
ရံရွေတော်များ၏ မျက်နှာများ ချက်ချင်းဆိုသလို တောင့်တင်းသွားကြတော့သည်။
ကျွန်မသည်လည်း အလားတူပင်။
လှပသည့်ငှက်ကို မြင်တွေ့ခဲ့ရသဖြင့် ပျော်ရွှင်နေသည့် ခံစားချက်ကလည်း တစ်နေရာသို့ ပျောက်ဆုံးသွားပြီး ရင်ထဲတွင် ကျဉ်းကျပ်လာရ၏။
ယခင်က ဆိုဗီရ်ရှု ကျွန်မကိုခေါ်သည့်အခါ ဘာမှမခံစားရပေ။
ယခုတလောတော့ ဆိုဗီရ်ရှု ခေါ်ပြီဆိုလျှင် ‘ဘာကိစ္စ ရှိပြန်ပြီလဲ’ ဟူသည့် အတွေးက ပထမဆုံး ဝင်လာတတ်၏။
“...ကောင်းပြီ။”
သို့သော် ရက်ရှ်တာက ဧကရာဇ်၏ချစ်သူဖြစ်နေပြီဖြစ်ပြီး၊ ကျွန်မက လိုသည်ထက်ပို၍ သူ ကျွန်မနှင့် ရင်းနှီးဖို့ကြိုးစားသည်ကို တားဆီးပိတ်ပင်ခဲ့သည်။
ထိုအချက်ဖြင့်ပင် ပြီးပြတ်ပေပြီ။
အဆုံးသတ်ပဲလား။
‘ဧကန္တ ငါက မမလို့ မခေါ်နဲ့ဆိုပြီး ပြောလိုက်တာကို အပြစ်တင်မလို့များလား... မဖြစ်နိုင်ပါဘူး၊ ဘယ်လောက်ပဲ ဆိုဗီရ်ရှုဖြစ်နေပါစေ အဲ့ဒီလောက်အထိတော့ မဖြစ်လောက်ပါဘူး။’
သူသည်လည်း သူ့မိခင်ကို မြင်ခဲ့ရသောကြောင့် ဧကရီနှင့် ချစ်သူ၏ ဆက်ဆံရေးကို သိမည်မဟုတ်ပါလား။
“ခဏလောက် စောင့်ပေးပါ။”
အခန်းထဲသို့ ဝင်လာပြီးသည့်နောက်တွင် ကျွန်မက လမ်းလျှောက်ခဲ့သောကြောင့် အောက်အနားများ စိုနေသည့် ဝတ်စုံကိုချွတ်ကာ ပိုမိုခမ်းနားသည့်ဝတ်စုံကို ပြောင်းလဲဝတ်ဆင်လိုက်၏။
အတွင်းရေးမှူးနောက်မှလိုက်ကာ အရှေ့နန်းဆောင်သို့ သွားခဲ့သော်လည်း တော်သေး၍ ရက်ရှ်တာနှင့်တော့ မတွေ့ခဲ့။
ကျွန်မ အခန်းထဲရောက်တော့ ဆိုဗီရ်ရှုက လက်ဖက်ရည်တစ်ခွက် ကမ်းပေးကာ လိုရင်းကို ချက်ချင်းပြောလေသည်။
“ဧကရီလောက်တော့ မဟုတ်ပေမဲ့ ချစ်သူကလည်း ရံရွေတော် တစ်ယောက်နှစ်ယောက်တော့ ထားကြတာပဲ။ ရက်ရှ်တာကိုလည်း ရံရွေတော် တစ်ယောက်နှစ်ယောက်လောက် ခန့်အပ်ပေးဖို့ စီစဉ်ထားတယ်။”
“ကြားပါတယ်ရှင့်။ အရှင်ဧကရာဇ်ရဲ့ အတွင်းရေးမှူးက လှုပ်ရှားနေတယ်ဆိုပြီး။”
“...အဲ့ဒီလိုဆိုပေမဲ့ ရက်ပိုင်းလောက်ရှိနေပြီကို ထူးထူးဆန်းဆန်း မှူးမတ်အနွယ်တော်တွေက လာမလျှောက်ကြလို့လေ။”
“ဟုတ်လားရှင့်။”
“ငါ့အထင်ပြောရရင် နန်းတော်ရဲ့ အရှင်သခင်ဖြစ်တဲ့ ဧကရီက ရှေ့ထွက်မလာတော့ အားလုံးက ကိုယ့်ဘေးကင်းရေးကိုယ် ထိန်းနေကြတာလို့ထင်တယ်။ အဲ့ဒါကြောင့် ဧကရီကိုယ်တိုင်ပဲ ရက်ရှ်တာအတွက် ရံရွေတော်တစ်ယောက် ရှာပေးနိုင်မလား။”
~~~~~
Miel's Translations