အပိုင်း ၁၆ (ငါ့ရဲ့ကွီးန် ဘယ်မှာလဲ)

နောက်နေ့မနက်ရောက်တော့ ရို့ဂ်စ်ပြည်နယ်၏ အရှင်သခင် ဇနီးမောင်နှံရောက်လာပြီး အိမ်နီးချင်းတိုင်းပြည်များမှ ဧည့်သည်တော်များလည်း တစ်ယောက်ပြီးတစ်ယောက် မြင်းရထားများဖြင့် ရောက်လာကြသည်။

ဧည့်သည်တော်က ဘယ်သူဘယ်ဝါဖြစ်သည်ဟူသည့်အချက်အပေါ် မူတည်၍ ကျွန်မ ဧည့်ခံမလား၊ ဆိုဗီရ်ရှု ဧည့်ခံမလား၊ နိုင်ငံခြားရေးဝန်ကြီးက ဧည့်ခံမလား၊ နန်းရင်းဝန်က ဧည့်ခံမလား သို့မဟုတ် ဒီအတိုင်း အရာရှိမှူးမတ်များကိုပဲ ဧည့်ခံခိုင်းမလားဆိုသည်ကို ဆုံးဖြတ်ရသည်။

တော်တော်များများကိုတော့ ကျွန်မနှင့် ဆိုဗီရ်ရှုက ထွက်တွေ့စရာမလိုပေ။

"ဧကရီအရှင်မ၊ ဧကရီအရှင်မ အနောက်ဘက် ဘုရင့်တိုင်းပြည်က ရောက်လာပါပြီ။"

"အနောက်ဘက် ဘုရင့်တိုင်းပြည်ကဆိုရင်..."

"ဟုတ်ကဲ့။ တော်ဝင်မင်းသား ဟိုင်န်ရီပဲ ဖြစ်မှာပါ။"

သို့ရာတွင် တော်ဝင်မင်းသား ဟိုင်န်ရီကား ကျွန်မကိုယ်တိုင် သွားရောက်တွေ့ဆုံရမည့် ဧည့်သည်တော်အနည်းအကျဉ်းထဲ တစ်ယောက်အပါအဝင်ဖြစ်ပေသည်။

ကျွန်မလည်း ခေါင်းညိတ်ကာ ထိုင်ရာမှ ထလိုက်၏။

ဖိတ်စာရေးနေကြသည့် အရာရှိများကလည်း ကျွန်မနှင့်အတူ ထိုင်နေရာမှထခဲ့ကြသည်။

ကျွန်မက သူတို့ကို ထိုင်နေကြရန် လက်ရိပ်လက်ခြည်ပြပြီးနောက် ဧရာမမှန်ကြီး၏အရှေ့တွင်ရပ်ကာ အဝတ်အစားများကို သေသပ်အောင်ပြန်လည်ပြင်ဆင်ပြီး လျှောက်သွားလိုက်သည်။

တော်ဝင်မင်းသား ဟိုင်န်ရီကား အနောက် ဘုရင့်တိုင်းပြည် ဘုရင်၏ ညီတော်ဖြစ်ပြီး နတ်ရွာစံဘုရင်၏ ဒုတိယသားတော်ဖြစ်၏။

သို့သော် ယခု လက်ရှိဘုရင်က မိဖုရားအပြင် တရားဝင်ချစ်သူ သုံးယောက်ရှိသော်လည်း မည်သူနှင့်မျှ ထီးမွေနန်းခံမရှိသေးသဖြင့် တော်ဝင်မင်းသား ဟိုင်န်ရီက ထီးနန်းဆက်ခံပိုင်ခွင့် ပထမနေရာတွင် ရှိနေသူပင်။

အနောက် ဘုရင့်တိုင်းပြည်၏ ဘုရင်က သားသမီးမရနိုင်ဘူးဟူ၍ ကောလာဟလများ ပျံ့နှံ့နေသည့်အပြင် လတ်တလော သူ၏ကျန်းမာရေးအခြေအနေကလည်း မကောင်းဘူးဟု သတင်းထွက်နေသည့်အတွက် အံ့ဖွယ်ရာဖြစ်ရပ်ဆန်းကြယ်မျိုး မရှိခဲ့ဘူးဆိုလျှင် တော်ဝင်မင်းသား ဟိုင်န်ရီက နောက်ထပ်နန်းတက်မည့် ဘုရင်ဖြစ်လာမည်မှာ သေချာပေသည်။

လောလောဆယ် နန်းမတက်ရသေးသော်လည်း အနောက် ဘုရင့်တိုင်းပြည်၏ အင်အားနှင့်အရှိန်အဝါက အရှေ့အင်ပါယာနှင့် အတူတူလောက်နီးပါးရှိ၏။

ကျွန်မကိုယ်တိုင်သွား၍ ခရီးဦးကြိုပြုရမည်မှာ ကျိန်းသေပေါက်ပင်။

ဧည့်ခံခန်းမထဲသို့ ဝင်သွားလိုက်သည်နှင့် ကျွန်မထက်အရင် ရောက်နှင့်နေကြသည့် အနောက် ဘုရင့်တိုင်းပြည်မှ သံတမန်အဖွဲ့ကို တွေ့လိုက်ရ၏။

ကျွန်မလည်း ခန်းမထဲသို့ ဝင်သွားရင်း သံတမန်အဖွဲ့ကို ခြုံငုံစနည်းနာကြည့်နေရာမှ ရှေ့ဆုံးတွင် ရပ်နေသည့် အမျိုးသားကို မြင်လိုက်ရချိန်တွင် အသက်ရှူရပ်သွားတော့သည်။

ထိုလူက အင်မတန် ခံ့ညားချောမောသည့်လူတစ်ယောက်ဟု ကောလာဟလများ ကြားဖူးထား၏။

အထက်တန်းလွှာ လူမှုရေးအသိုင်းအဝိုင်းထဲသို့ ဝင်လိုက်သည်နှင့် တော်ဝင်မင်းသား ဟိုင်န်ရီနှင့်ပတ်သက်သည့် ကောလာဟလများကို ဘယ်သူမဆို ကြားရမည်ပင်။

မိန်းမလိုက်စားသည်၊ စရိုက်က ကြမ်းတမ်းသည်၊ အင်မတန် ခံ့ညားချောမောသည်၊ အပြုံးနှင့် လူသတ်နိုင်သူ၊ လက်ရှိ အနောက် ဘုရင့်တိုင်းပြည်တွင် ဘုရင်က ကလေးမရခြင်းမဟုတ်ဘဲ မွေးလာသမျှ ကလေးများကို သူက ဖျောက်ဖျက်လိုက်ခြင်းဖြစ်သည်၊ အပြုံးလေးဖြင့် နောက်ကျော ဓားနှင့်ထိုးတတ်သူ အစရှိသဖြင့်။

တော်ဝင်မင်းသား ဟိုင်န်ရီက မိန်းမလိုက်စားတတ်သူ ဒါမှမဟုတ်လည်း ရက်စက်သည့်သူ ဟုတ်၊ မဟုတ်ကို ကျွန်မလည်းမသိ။

သို့သော် ကောလာဟလတစ်ခုကတော့ သေချာ၏။

သူ၏ ရုပ်ရည်ပင်။

သူက... တကယ် လှပေသည်။

ရွှေရောင်ဖျော့ဖျော့ဆံပင်က နူးညံ့ပျော့ပျောင်းပုံရကာ မသိမသာ ပင့်ထားသည့် နှုတ်ခမ်းထောင့်စွန်းတစ်ဖက်ကလည်း ဆွဲဆောင်မှုရှိ၏။

ချောမွတ်ဖြောင့်မတ်သည့် လည်တိုင်၊ မြင့်မားသည့်အရပ်အမောင်း၊ ကျယ်ပြန့်သောပခုံးများကလည်း လှပပေသည်။ သို့သော် အလှဆုံးမှာ လျှို့ဝှက်နက်နဲသည့် ခရမ်းရောင် မျက်လုံးများပင်။

'ဒီလိုယောကျ်ားမျိုးက ဘာမှမပြောဘဲ ထောင့်တစ်ထောင့်မှာကပ်ပြီး ရပ်နေရင်တောင် ကောလာဟလတွေ အမျိုးမျိုးထွက်မှာပဲ။'

စိတ်ထဲမှ ချီးကျူးလိုက်သော်လည်း သိသာအောင် ထုတ်မပြဘဲ ကျွန်မ တော်ဝင်မင်းသား ဟိုင်န်ရီ၏ မျက်နှာချင်းဆိုင်တွင် သွားရပ်လိုက်သည်။

သူက ဘုရင့်သားတော် တော်ဝင်မင်းသားဖြစ်သော်လည်း အနောက် ဘုရင့်တိုင်းပြည်၏ အဆင့်အတန်းအရ သူ့ကို ဧကရာဇ်သားတော် တော်ဝင်မင်းသားနှင့်တန်းတူ ဆက်ဆံရပေမည်။

သို့သော် ကျွန်မ မျက်နှာချင်းဆိုင်တွင် သွားရပ်လိုက်သည့် အခိုက်အတန့်မှာပင်။

ကျွန်မ ဘာမှမပြောရသေးခင် တော်ဝင်မင်းသား ဟိုင်န်ရီက ဒူးတစ်ဖက် ထောက်လိုက်ကာ သစ္စာစောင့်သိပါမည်ဟု ကျိန်ဆိုနေသည့် စစ်သည်တော်တစ်ယောက်အလား သူ၏လက်ကို ကျွန်မထံသို့ ကမ်းလင့်လာသည်။

နားမလည်နိုင်စွာ လက်ကမ်းပေးလိုက်တော့ သူက ကျွန်မလက်ဖမိုးကို ညင်သာစွာ နမ်းလေ၏။

သို့သော် စစ်သည်တော်များနှင့် ကွာခြားချက်ကတော့ ရှင်းလင်းထင်ရှားလှသည်။

စစ်သည်တော်များက ကတိသစ္စာကျိန်ဆိုစဉ် နမ်းသည့်အခါ မျက်လုံးကို မှိတ်ထားလျက်ဖြစ်စေ၊ အရှေ့တည့်တည့်ကို ကြည့်လျက်ဖြစ်စေ ထားကြသော်လည်း သူကတော့ ကျွန်မလက်ဖမိုးကို နမ်းနေစဉ် ကျွန်မကို ကြည့်နေ၏။

နူးညံ့သည့် သူ့နှုတ်ခမ်းများ ကျွန်မလက်ဖမိုးကိုထိပြီး ပြန်ခွာသွားသည့်အချိန်အထိ ခရမ်းရောင် သူ့မျက်လုံးများက အလွန်ဇွဲကြီးစွာ ကျွန်မထံမှ ခွာမသွားခဲ့ပေ။

"တွေ့ရတာ ဂုဏ်ယူဝမ်းမြောက်ရပါတယ်၊ ကျွန်တော့်ရဲ့ ကွီးန်။"

နှုတ်ဆက်ပြီး၍ သူ ကျွန်မလက်ကို လွှတ်ပေးကာ ပြုံးလိုက်သည့်အချိန်တွင် ဘာကြောင့်မှန်းမသိ ကျောရိုးတစ်လျှောက် စိမ့်ခနဲဖြစ်သွားရ၏။

'မိန်းမလိုက်စားသူကိုး' ဟူသော အတွေးထက် ရက်စက်သည်ဟူသော ကောလာဟလက အမှန်ဖြစ်နိုင်သည်ဟု တွေးလိုက်မိသည်။

သူ့အကြည့်တွင် အလိုရမ္မက်အရောင် မရှိပေ။

ထိုအစား ကောင်းကင်မှနေ၍ အောက်သို့ လှည့်ပတ်စောင့်ကြည့်နေသည့် လင်းယုန်လိုထင်ရ၏။

ကျိန်းသေပေါက် သူက အောက်မှအပေါ်သို့ ကြည့်နေသော်လည်း ထိုသို့ခံစားရသည်။

"ကျွန်မလည်း တွေ့ရတာ ဂုဏ်ယူဝမ်းမြောက်ရပါတယ်၊ တော်ဝင်မင်းသား ဟိုင်န်ရီ။"

သို့သော် တစ်ဖက်လူ မည်သို့သော အရှိန်အဝါမျိုးကို ပြနေပါစေ ကျွန်မက အရှုံးခံ၍မဖြစ်ပေ။

တော်သေး၍ ရင့်ကျက်တင့်တယ်သည့် မျက်နှာထားကိုထိန်းထားနိုင်ရန် နှစ်အတော်ကြာအောင် လေ့ကျင့်ထားပြီးသားဖြစ်နေ၏။

ကျွန်မက ပုံမှန်အတိုင်း ပြန်ဖြေလိုက်ကာ သူ့လက်ထဲမှ ကျွန်မ၏လက်ကို ပြန်ဆွဲရုပ်လိုက်သည်။ တဒင်္ဂလေး မျက်ခုံးတစ်ဖက်ပင့်သွားသလို ထင်ရသော်လည်း ထို့နောက် သူက ညင်သာစွာပြုံးလိုက်ကာ ဒူးကိုပြန်ဆန့်ပြီး မတ်တတ်ရပ်ခဲ့၏။

"ခရီးဝေးကြီးလာခဲ့ရလို့ ပင်ပန်းနေမှာပဲဆိုတော့ နှစ်သစ်ကူးပွဲတော် မတိုင်ခင်အထိ ကောင်းကောင်းအနားယူပြီး တော်ဝင်နန်းတော်မှာနေရတဲ့ ဘဝကို ပျော်ပျော်ရွှင်ရွှင် ဖြတ်သန်းခံစားနိုင်စေဖို့ မျှော်လင့်ပါတယ်။"

"အရှေ့အင်ပါယာ နန်းတော်ရဲ့ ဂုဏ်သတင်းတွေကို အမြဲတမ်း ကြားနေရတာပါ။ အရမ်းလှတယ်ဆိုပြီးတော့လေ။"

"ကျေနပ်သဘောကျမှာပါရှင့်။"

ဝတ်ကျေတမ်းကျေ လောကွတ်စကား ပြောလိုက်တော့ တော်ဝင်မင်းသား ဟိုင်န်ရီ၏ မျက်လုံးများ ကျဉ်းမြောင်းသွားလေသည်။

"အခုကတည်းက သဘောကျနေပါပြီဗျ။"

~~~~

ဧည့်သည်တော်များ ရောက်လာတော့ ကျွန်မ၏အလုပ်ပမာဏလည်း ထက်ဝက်လောက် လျော့သွားသည်။

နှစ်သစ်ကူးပွဲတော်နှင့်ပတ်သက်၍ ကျွန်မလုပ်ရမည့် ကိစ္စများ ပြီးဆုံးသွားသောကြောင့်ပင်။

ပုံမှန်ထက် စောစောအလုပ်ပြီးသဖြင့် အနောက်နန်းဆောင်သို့ ပြန်လာတော့ မနက်ကတည်းက ရံရွေတော်အဖြစ် ပြန်ရောက်လာသည့် လော်ရာက အလျင်စလို ပြေးလာကာ မေးလေသည်။

"ဧကရီအရှင်မ၊ ဧကရီအရှင်မ။ ဘယ်လိုနေလဲဟင်။ တော်ဝင်မင်းသား ဟိုင်န်ရီက ဘယ်လိုနေလဲရှင့်။ တကယ်ပဲ ကောလာဟလတွေအတိုင်း ချောရဲ့လား။"

ကျန်ရံရွေတော်များကလည်း စိတ်ဝင်စားပုံရပြီး ကော်ဖီခွက်လေးများ ကိုယ်စီကိုင်ကာ ကျွန်မအနားသို့ ဝိုင်းအုံလာကြသည်။

သူတို့က အဝတ်ဘီရို၊ မှန်တင်ခုံနှင့် လက်ဖက်ရည်စားပွဲများပေါ်တွင် ကော်ဖီခွက်များကို ချထားကာ ကျွန်မ အဝတ်လဲခြင်းကို ကူညီရင်း မေးခွန်းများ တရစပ်မေးလေတော့၏။

"ခရုမ်း မင်းသားကြီးက တော်ဝင်မင်းသား ဟိုင်န်ရီကို မြင်ပြီး အံ့ဩလွန်းလို့ သတိပါလစ်သွားတယ်ဆိုပဲ၊ အဲ့ဒါ တကယ်လားရှင့်။"

"မာနကြီးတယ်ဆိုပြီး နာမည်ကြီးတဲ့ ပြဇာတ်မင်းသမီးတစ်ယောက်ဆိုရင် တော်ဝင်မင်းသား ဟိုင်န်ရီနဲ့ တစ်ခါတွေ့ပြီးသွားတော့ သုံးနှစ်လောက် လိုက်ခဲ့တာဆို။"

ရက်ပိုင်းအတွင်း မြင်ရတော့မည်ဖြစ်သော်လည်း သူတို့၏ စူးစမ်းလိုစိတ်ကို မထိန်းနိုင်ကြပေ။

ကျွန်မလည်း တော်ဝင်မင်းသား ဟိုင်န်ရီ၏ မသွေမဖည် ဇွဲကောင်းသောအကြည့်၊ ခရမ်းရောင် မျက်လုံးများနှင့် အဝေးမှပင် ထင်ရှားလှသည့်အသွင်အပြင်ကို ပြန်ပြောင်းတွေးရင်း ဖြေလိုက်သည်။

"ကျွန်မ မြင်ဖူးသမျှ လူတွေထဲမှာတော့ အချောဆုံးပဲ။ လူမှဟုတ်ရဲ့လားဆိုပြီး သံသယဝင်ရလောက်တဲ့ ရုပ်ရည်မျိုးပေါ့။"

လော်ရာက အသံတိုးတိုးလေး အော်ဟစ်လိုက်သည်။

"ဝါး။ မြန်မြန်တွေ့ချင်လာပြီ။ နောက်ပြီးတော့ရော။ အသံကရော ဘယ်လိုလေးလဲရှင့်။"

"အသံကလည်း ကျွန်မ တွေ့ဖူးသမျှ ယောကျ်ားတွေထဲမှာ နားထောင်လို့ အကောင်းဆုံးပဲ။"

ချဲ့ကားပြောခြင်းမဟုတ်ဘဲ တကယ်ပင်။

ရံရွေတော်များက သူတို့ရင်ဘတ်ပေါ်သူတို့ လက်လေးများတင်ကာ တိုးတိုးလေး အော်ဟစ်လိုက်ကြသည်။

"အဲ့ဒီ တော်ဝင်မင်းသား လူချောက ဘယ်လို အတင်းအဖျင်းစကားတွေကို ချန်ထားခဲ့မလဲဆိုတာကို မျှော်လင့်နေမိပါပြီ။"

"လူတွေအများကြီး ခံစားရတော့မှာပဲနော်။"

တော်ဝင်မင်းသား ဟိုင်န်ရီနှင့် ပတ်သက်ပြီး သိလိုစိတ်အပြင် သူဖန်တီးမည့် ဒရာမာများကိုလည်း မျှော်လင့်နေကြပုံပင်။

ရယ်မောရင်း သူတို့စကားများကို နားထောင်နေစဉ် ပြတင်းပေါက်အပြင်ဘက်မှ ကွီးန်က နှုတ်သီးဖြင့် တတောက်တောက် လာခေါက်လေသည်။

"ရောက်တောင်လာပြီလား။"

မေးရင်း ပြတင်းပေါက်ကို ဖွင့်ပေးလိုက်တော့ ကွီးန်က ပြတင်းပေါက်ဘောင်ပေါ်သို့ ခုန်ဆင်းလာပြီး ကျွန်မကို ခိုးကြည့်ခဲ့သည်။

တွေးကြည့်တော့မှ ကွီးန်မှာလည်း ရွှေရောင်အမွေးများနှင့် ခရမ်းရောင်မျက်လုံးများ ရှိနေ၏။

ဤကဲ့သို့ တစ်မူထူးသော အရောင်များရှိနေလျှင် တောကြီးမျက်မည်းထဲတွင် ရှင်သန်ရန် ခက်ပေလိမ့်မည်။

ရုတ်တရက် ဤသို့သောငှက်မျိုးကို စာပို့ငှက်အဖြစ် သုံး၍ရရဲ့လားဟု စိုးရိမ်စိတ်ဝင်လာသည်။

ကျွန်မ သူ့ကို ကြည့်ရုံသာကြည့်နေသည်ကိုမြင်တော့ ကွီးန်က စာကို မြန်မြန်ဖတ်ပါဟု ပြောနေသည့်အလား သူခြေထောက်လေးကို အရှေ့သို့ ဆန့်ပေးခဲ့၏။

စာရွက်ကိုယူပြီး ဖြန့်လိုက်တော့ ကွီးန်က အခန်းထဲ ဝင်လာကာ စားပွဲပေါ်တွင်ထိုင်ပြီး သူ့အမွေးများကို စတင်၍ညှိသပ်လေတော့သည်။

ရံရွေတော်များ ကွီးန်အတွက် ရေနှင့်အစာ ပြင်ဆင်ပေးနေစဉ် ကျွန်မက စာကိုဖတ်လိုက်၏။

ရင်းနှီးနေသည့်လက်ရေးက နောက်ရွှတ်ရွှတ် ရေးသားထားသည်။

-ကျွန်တော် နန်းတော်ကို ရောက်ပါပြီ။ ခင်ဗျား ကျွန်တော် ဘယ်သူမှန်း သိလားဗျ။

~~~~

Miel's Translations