အပိုင်း ၁၂ (ငါ့ကို ဒီလိုလုပ်တော့မှာလား)
'ဒီအတိုင်းဆိုရင် မဖြစ်တော့ဘူး' ဟု တွေးပြီးသည့်နောက် ဆိုဗီရ်ရှုက သူ၏ အပါးတော်မြဲများနှင့် အတွင်းရေးမှူးများကို အကုန်ဆင့်ခေါ်ကာ အမိန့်ပေးလေတော့သည်။
"အနည်းဆုံးတော့ ယာယီပဲဖြစ်ဖြစ် ရက်ရှ်တာကို အလုပ်အကျွေးပြုခစားဖို့ ရံရွေတော်လိုအပ်တယ်။ မောင်မင်းတို့မှာလည်း မိန်းကလေးဆွေမျိုးတွေ ရှိကြမှာပဲ။ အခြေအနေကို ပြောပြပြီးတော့ နှစ်ယောက်ရွေးခေါ်လာခဲ့ကြ။"
ဧကရာဇ်၏ချစ်သူဆိုသည်မှာ ထူးဆန်းသည့် အရိုက်အရာတစ်ခုဖြစ်ပြီး စိတ်ဝင်စားမှုနှင့် အားကျခြင်းကို ခံရသလို၊ တစ်ခါတစ်ရံလည်း ကဲ့ရဲ့ရှုတ်ချမှုနှင့် မုန်းတီးခြင်းကို ခံရတတ်ပေသည်။
ဆိုဗီရ်ရှုက ရက်ရှ်တာ့ကို သာမန်အရပ်သူဟု ပြောထားခြင်းက မှူးမတ်များ၏ အရေးမပါသည့် မာနကို ထိခိုက်စေမှာသေချာသည်ဟု တွေးလိုက်၏။
ထို့ကြောင့် သာမန်အရပ်သူဇာစ်မြစ်မှလာသည့် ချစ်သူများကို မှူးမတ်များနှင့် အမည်ခံ လက်ထပ်စေပြီး အရိုက်အရာအဆင့်အတန်းကို ပြောင်းလဲပေးခဲ့သော ယခင့်ယခင် ဧကရာဇ်များလည်း ရှိခဲ့ကြသည်ပဲမဟုတ်လား။
သို့သော် အဆင့်အတန်းအရိုက်အရာကို ပြောင်းလဲဖို့ရန်အတွက် ရက်ရှ်တာ့အကြောင်းများက တအားကို ပျံ့နှံ့နေပေပြီ။
မည်သို့ပင်ဆိုစေ မှူးမတ်များက ဆိုဗီရ်ရှု ရက်ရှ်တာ့ကို ဆက်လက်ပြီး မြတ်နိုးနေသရွေ့ တစ်နှစ်...ဟင့်အင်း၊ တစ်လလောက်ပဲ ကြာသည်နှင့် အားလုံး ရက်ရှ်တာ့အပါးတွင် စုရုံးကာ ရင်းနှီးဟန် ဆောင်လာကြမည်သာ။
ထို့ကြောင့် ကိုယ့်သဘောနှင့်ကိုယ် အမှုထမ်းမည့် အပျိုတော် ရှာမရလျှင်၊ လောလောဆယ် အမိန့်ပေးပြီး ရှာရုံအပြင်မရှိတော့။
"သက်တူရွယ်တူဆိုရင် ဆက်ဆံရေးပိုကောင်းနိုင်မှာပဲဆိုတော့၊ အသက်ကွာဟမှု သိပ်မများရင် ကောင်းမယ်။"
အပါးတော်မြဲများလည်း အကျပ်ရိုက်နေကြဟန်ဖြင့် တစ်ယောက်နှင့်တစ်ယောက် အကြည့်ချင်းဖလှယ်လိုက်ကြတော့သည်။
~~~~
"ဒီလူ ကိုယ့်စကားကိုယ်လည်း ပြန်နားထောင်ကြည့်စမ်းပါဦး။ ကျွန်ပြေးမကို ခစားရမယ်ပေါ့လေ ဟုတ်လား။ ရှင် ရူးသွားပြီလား။"
"အဖေရယ်။ အမေ့ကို ဘယ်လိုများ အဲ့ဒီလိုပြောရက်ရတာလဲ။"
ဘယ်ရွန် လန့်ထ်က ဧကရာဇ်၏ချစ်သူအတွက် ရံရွေတော်လုပ်ချင်စိတ်မရှိဘူးလားဟု ပြောလိုက်သောအခါ ဇနီးသည်နှင့် သားငယ်က ချက်ချင်းပင် ဆွေ့ဆွေ့ခုန် ကန့်ကွက်ကြလေသည်။
ဘယ်ရွန် လန့်တ်လည်း ဇောချွေးပြန်ကာ လက်ကာပြလိုက်၏။
"ကျွန်ပြေးတဲ့လား။ မဟုတ်ရပါဘူး ရှင်မရယ်။ အဲ့ဒီပုဂ္ဂိုလ်က ကျွန်ပြေးမဟုတ်ဘဲ သာမန်အရပ်သူ..."
"ကျွန်ပြေးမဟုတ်ဘူးဆိုရင်တောင် တခြားလူတွေအကုန်လုံး အဲ့ဒီလိုပဲ သိထားကြတယ်ဆိုတာက ပြဿနာလေရှင့်။"
ဘယ်ရွန် လန့်တ်၏ ဇနီးသည်က အော်ကြီးဟစ်ကျယ်ဖြင့် ခါးထောက်ကာ ဘယ်ရွန် လန့်တ်ကို စိုက်ကြည့်ခဲ့သည်။
"ရှင်က၊ ကျွန်မကို ကျွန်ပြေးမအတွက် အလုပ်အကျွေးပြုစေချင်တယ်တဲ့လား။ လူတွေက ကျွန်မကိုတင်မကဘူး၊ ရှင်နဲ့ ကျွန်မတို့ရဲ့ ဂျက်စ်ကိုပါ ရယ်စားကြမှာရှင့်။ လန့်တ်အိမ်တော်ကတော့ ကျွန်ထက်တောင် နိမ့်ပါးသွားပြီဆိုပြီး။"
ဘယ်ရွန် လန့်တ်ကတော့ ရက်ရှ်တာကား တကယ်ကို ချစ်စဖွယ်မိန်းကလေးဖြစ်သဖြင့် တစ်နေ့နေ့တွင် ကျန်မှူးမတ်များလည်း အသစ်အဆန်းဖြစ်နေသော ထိုဧကရာဇ်၏ချစ်သူကို နှစ်သက်သွားကြလိမ့်မည်ဟု ယုံကြည်ထား၏။
သို့သော် ယင်းကား အနာဂတ်တွင် ဖြစ်လာမည့် ကိစ္စပင်။ လက်ရှိ လူမှုအသိုင်းအဝိုင်းတွင်တော့ ရက်ရှ်တာ့အပေါ် လူများ၏အမြင်က ကောင်းသည့်ဘက်မဟုတ်တာ သေချာပေသည်။
ထို့ကြောင့် ဘယ်ရွန်ကတော် လန့်တ်၏ စကားက လက်တွေ့ကျပြီးမှန်ကန်နေ၏။
"ရှင်မရဲ့ ဇာတိက တူမလေး အက်ရှ်ဆိုရင်...."
"ရှင်၊ အခု ရှင့်တူမ မဟုတ်တာနဲ့ ကလေးရဲ့ အနာဂတ်ကို...။ ရှင့်တူတွေ တူမတွေထဲမှာလည်း မိန်းကလေး သုံးယောက်တောင် ရှိနေတာပဲမဟုတ်ဘူးလား။"
"အဲ့ဒီကလေးတွေရဲ့ စိတ်နေစိတ်ထားကို ရှင်မလည်း သိရဲ့သားနဲ့ကွာ။ ဘယ်သူ့ကိုဖြင့် အလုပ်အကျွေးပြုပြီးခစားမယ်ဆိုတဲ့ စိတ်ဓာတ်မျိုး ရှိတာမှမဟုတ်ဘဲ။"
"ဘုရားရေ ဒီလူတော့ ကြည့်ပါဦး။ အခု ဒါက ဘယ်လိုဆင်ခြေလဲ။"
ဆိုဗီရ်ရှု၏ အမိန့်က ဘယ်ရွန် လန့်တ်တို့ ဇနီးမောင်နှံကြားမှ ရန်ဖြစ်ပွဲအဖြစ်သို့ ပြောင်းလဲသွားစဉ်။
ကျန်အပါးတော်မြဲများနှင့် ကိုယ်ရေးအရာရှိ အတွင်းရေးမှူးများ၏ အိမ်တော်များတွင်လည်း အခြေအနေက အတူတူပင်။
အားလုံးက ကျွန်ပြေးအကြောင်းပြောပြီး လက်တကာကာဖြစ်နေကြ၏။
သို့သော် ဒီအတိုင်း နောက်ဆုတ်ဖို့ကလည်း ဧကရီနှင့် သူတို့၏အခြေအနေက မတူပြန်ပေ။
နောက်ဆုံးတော့ ဖီရ်နူ နယ်စားမင်းနှင့် ဘယ်ရွန် လန့်တ်တို့က 'ဧကရာဇ်ရဲ့ အမိန့်တော်ဖြစ်နေတဲ့အတွက် ဘယ်လိုမှ မလွန်ဆန်နိုင်ဘူးဆိုပြီး လူတွေကိုပြောလိုက်ရင် ရတာပဲ' ဟုဆိုကာ၊ တစ်လလောက်ပဲ လာပေးပါဟု တောင်းပန်ပြီးသည့်နောက် တစ်ယောက်က သမီးဖြစ်သူ၊ နောက်တစ်ယောက်က သွေးဝေးသည့် ဆွေမျိုးကို ခေါ်လာနိုင်ခဲ့ကြသည်။
~~~~
ဆိုဗီရ်ရှုက ကျွန်မကို နောက်တစ်ခါထပ်ပြီးတော့များ မှူးမတ်အမျိုးသမီးတွေကို ဖိအားပေးခိုင်းနေဦးမလားဟု တွေးခဲ့မိ၏။
သို့သော် တစ်နည်းနည်းဖြင့် ပြဿနာကို ဖြေရှင်းနိုင်ခဲ့၍ပဲလားမသိ၊ သုံးရက်အကြာတွင် ကျွန်မ၏ ရံရွေတော်များက ဖီရ်နူ နယ်စားမင်း၏ သမီးနှင့် ဘယ်ရွန် လန့်တ်၏ သွေးဝေးသော ဆွေမျိုးဖြစ်သည့် အမျိုးသမီးတစ်ယောက် ရက်ရှ်တာ၏ ရံရွေတော်အဖြစ် ရောက်လာတော့မည့်အကြောင်း ပြောပြခဲ့ကြသည်။
အဝေးက ကျေးလက်တွင်နေထိုင်သူ ဘယ်ရွန် လန့်တ်၏ ဆွေမျိုးကိစ္စကို အသာထား၊ ဖီရ်နူ နယ်စားမင်း၏ သမီးက ရက်ရှ်တာ၏ ရံရွေတော်အဖြစ်သွားမည်ဆိုသည်မှာ အံ့သြစရာပင်။
"အဲ့ဒီအိမ်က သမီးဆိုရင် လေဒီ ဟယ်လင်မဟုတ်ဘူးလား။"
ဖီရ်နူ နယ်စားမင်းအိမ်တော်ဆိုလျှင် ခေါင်းမော့ရင်ကော့ကာ သွားလာတတ်သော မိသားစုဟု သိထားခဲ့သည်ကိုး။
"မှန်ပါတယ်၊ ဧကရီအရှင်မ။"
ကျွန်မ၏ လက်ဖက်ရည်ပါတီကို လာခဲ့တုန်းကတောင် တုန်လှုပ်ချောက်ချားနေခဲ့သော လေဒီ ဟယ်လင်က ရံရွေတော်အလုပ်ကို လက်ခံခဲ့သည်မှာ အံ့သြစရာပင်။
"ပုံမှန်ဆိုရင် လေဒီ ဟယ်လင်က စူးစမ်းလိုစိတ်ရှိပြီး ဖခင်နဲ့လည်း ဆက်ဆံရေးကောင်းတဲ့သူမဟုတ်လားရှင့်။ နယ်စားမင်းအတွက် တမင်ပဲ လုပ်ပေးတာများလားမသိပါဘူး။"
"အဲ့ဒီလိုလား။"
ကျွန်မလည်း ခေါင်းညိတ်လိုက်ပြီး ထိုအကြောင်းအရာကို ဆက်မပြောတော့။
တော်သေး၍ နာရီပိုင်းလောက်အကြာတွင် လမ်းလျှောက်ရင်း ယခင်တစ်ခါတွေ့ခဲ့သော ခံ့ညားသည့်ငှက်ကို ပြန်တွေ့လိုက်ရတော့ ရက်ရှ်တာ့အကြောင်းကို လုံးဝမေ့သွားနိုင်ခဲ့သည်။
ရံရွေတော်များက ငှက်ပျံသန်းလာပြီး ကျွန်မအရှေ့တွင် တဝဲလည်လည်လုပ်နေသည်ကိုမြင်တော့ အံ့သြတကြီး ဝိုင်းချီးကျူးကြ၏။
"ဘုရားရေ။ ဟိုကောင်လေး ရောက်လာပြန်ပြီ။"
"ဧကရီအရှင်မဆီ သွားနေတာ ကြည့်ပါဦး။ ဆန်းကြယ်လိုက်တာ။"
ဒီတစ်ခါလည်း ငှက်၏ခြေထောက်တွင် စာတစ်စောင် ချည်လျက်ပါလာသည်။
-ဒါပေမဲ့ ငှက်ထက်တော့ ကျုပ်က ပိုပြီး ဉာဏ်ကောင်းပါတယ်နော်။ အခုတော့ လုံးဝ အမူးပြေသွားပါပြီ။
စာကိုဖတ်ပြီးသွားတော့ ကျွန်မ သဘောကျပြီး ခပ်တိုးတိုးရယ်လိုက်မိသည်။
ထူးထူးခြားခြား စကားတွေတော့ မဟုတ်သော်လည်း၊ တစ်စုံတစ်ယောက်နှင့် ထိုသို့သော အဓိပ္ပာယ်မရှိသည့် စကားများဖလှယ်ကာ စနောက်ဖူးခြင်းမျိုးမရှိခဲ့သဖြင့် ရယ်ချင်စိတ်က ပေါ်လာ၏။
ကျွန်မလည်း ငှက်ကို ရေတိုက်ပြီးနောက် ဒီတစ်ခါလည်း စာရွက်သေးသေးလေးပေါ်တွင် စာတိုလေး ရေးလိုက်သည်။
-အခုအထိ အမူးမပြေသေးဘူး ထင်ပါတယ်နော်။ ငှက်ရဲ့ နာမည်က ဘာလဲရှင့်။
ကျွန်မ ရေးထားသောစာကိုတွေ့တော့ ရံရွေတော်များက တခစ်ခစ် ရယ်ကြလေသည်။
ပုံမှန်ဆို တည်တည်ငြိမ်ငြိမ်နေတတ်သည့် ကျွန်မက ဤသို့သောစာမျိုး ရေးသည်ကို စိတ်ဝင်စားကြပုံရပြီး၊ အားလုံးက တစ်ယောက်တစ်ပေါက် ဝင်ပြောကြ၏။
ကျွန်မက ငှက်ကလေး၏ ဦးခေါင်းကို နမ်းလိုက်ပြီးနောက် ကောင်းကင်ကို လက်လှမ်းလိုက်သောအခါ ငှက်လေးက ချက်ချင်း ပျံတက်သွားလေသည်။
'ဒီတစ်ခါတော့ စာကို မေးခွန်းနဲ့ အဆုံးသတ်လိုက်တာကို။ အဲ့ဒီစာကိုရတဲ့လူက နောက်တစ်ခါထပ်ပြီး စာပြန်ပါ့ဦးမလား။'
စာပြန်လျှင်ကောင်းမှာပဲဟု အတွေးဝင်လာ၏။
~~~~
မေ့မေ့ပျောက်ပျောက်ထားပြီး နေလာခဲ့သော ရက်ရှ်တာ၏ နာမည်က သိပ်မကြာခင်မှာပင် ကျွန်မနားထဲသို့ ပြန်ရောက်လာသည်။
"ဧကရီ၊ ရက်ရှ်တာနဲ့ပတ်သက်ပြီး မေးစရာရှိလို့ လာခဲ့တာ။"
ရက်ရှ်တာ့အကြောင်းကို အစဖော်လာသူကား ဆိုဗီရ်ရှုပင်။
ပင်မနန်းဆောင်တွင် နှစ်သစ်ကူးပွဲတော်အတွက်လုပ်မည့် လူမှုဖူလုံရေး အစီအစဉ်အကြောင်း ဘဏ္ဍာရေးဝန်ကြီးနှင့် ဆွေးနွေးနေစဉ်တွင်ဖြစ်၏။
"အရေးတကြီး ကိစ္စလားရှင့်။"
မဟုတ်လျှင်တောင် ကျွန်မ၏ ပုံမှန် အလုပ်နားချိန်ကို ကျော်လွန်နေပြီဖြစ်သောကြောင့် နာရီကို ကြည့်ပြီး မေးလိုက်သည်။
အရေးတကြီးကိစ္စ မဟုတ်ဘူးဆိုလျှင် နောက်မှပြော၍ရပေသည်။ ရက်ရှ်တာနှင့် ပတ်သက်သည့် ကိစ္စဆိုလျှင် အရေးတကြီးကိစ္စဖြစ်စရာအကြောင်းမရှိပေ။
ဆိုဗီရ်ရှုက ပြန်မဖြေဘဲ ဘဏ္ဍာရေးဝန်ကြီးကို မျက်နှာရိပ်မျက်နှာကဲပြလိုက်တော့ ဘဏ္ဍာရေးဝန်ကြီးက အိုးတိုးအမ်းတမ်းနှင့် နေရာမှ ထသွားလေသည်။
ဘဏ္ဍာရေးဝန်ကြီး ထွက်သွားတော့ လက်အောက်ငယ်သား အရာရှိများပါ အကုန်နောက်ကနေ လိုက်ထွက်သွားကြ၏။
တစ်ခန်းလုံးတွင် ကျွန်မတို့နှစ်ယောက်တည်းသာ ကျန်ခဲ့တော့သည်။
"ဘာကိစ္စများလဲရှင့်။"
ကျွန်မ မေးလိုက်တော့ စားပွဲပေါ်တွင် ဖြန့်ထားသည့် ဇယားကို ကြည့်နေသော ဆိုဗီရ်ရှုက ခေါင်းမော့လာသည်။
"ပြောခဲ့တဲ့အတိုင်း ရက်ရှ်တာ့အကြောင်းလို့။"
ကျေးဇူးပြုပြီး အဲ့ဒီချစ်သူနဲ့ ပတ်သက်တဲ့ကိစ္စတွေကို ကိုယ်တိုင်ပဲ ဖြေရှင်းလို့ မရဘူးလားဟင်။
ကျွန်မ လည်ချောင်းထဲအထိ တက်လာသော စကားကို မျိုချပြီး ခေါင်းညိတ်လိုက်သည်။
"ဟုတ်ကဲ့။"
"ဧကရီက မှူးမတ်တွေကြားမှာ ရက်ရှ်တာ့ကို ကျွန်ပြေးပါဆိုပြီး ကောလာဟလတွေ လိုက်ဖြန့်နေတာလား။"
"ထပ်ပြီးတော့ အဲ့ဒီအကြောင်းပဲလားရှင့်။"
ဟင့်အင်း။ အရင်ကထက်တော့ ပို၍အသေးစိတ်ကျ၏။ အရင်က 'ထူးဆန်းတဲ့ စကားတွေ' လျှောက်ပြောထားသေးလားဟု ပြောခဲ့သောကြောင့်ပင်။
အဓိပ္ပာယ်မရှိလွန်း၍ သူ့ကို စိုက်ကြည့်လိုက်မိသည်။
"ရက်ရှ်တာရဲ့ ရံရွေတော်တွေက ရက်ရှ်တာ့ကို သင့်တင့်လျောက်ပတ်တဲ့နည်းနဲ့ မဆက်ဆံတဲ့အပြင် ရံရွေတော်ရဲ့ တာဝန်ကိုလည်း လုံးဝမလုပ်ကြဘူး။"
"အရှင်ဧကရာဇ်။ ကျွန်မမှာ အရှင်ဧကရာဇ်ရဲ့ ချစ်သူနဲ့ ဘယ်လိုနည်းနဲ့မှ ဆက်နွှယ်ချင်စိတ်မရှိပါဘူး။"
"ဒါဆို ဘာဖြစ်လို့ ရံရွေတော်တွေက ရက်ရှ်တာ့ကို ဧကရီနဲ့ တစ်ခုချင်းစီ လိုက်နှိုင်းယှဉ်ပြီး အထင်သေးနေရတာလဲ။ သနားစရာကောင်းတဲ့ ရက်ရှ်တာခမျာ အဲ့ဒါကို မျိုသိပ်ပြီး ငါ့ကို တစ်ခွန်းတောင် မပြောနိုင်ဘဲ နေနေခဲ့ရှာတာ။ မတော်တဆ မျက်မြင်ကိုယ်တွေ့သာ မတွေ့ခဲ့ရဘူးဆိုရင် အဲ့ဒီလိုကိစ္စမျိုးတွေ ဖြစ်နေမှန်းတောင် သိမှာမဟုတ်ဘူး။"
"အဲ့ဒီကိစ္စက အဲ့ဒီရံရွေတော်တွေကို မေးသင့်တာ မဟုတ်ဘူးလားရှင့်။"
"မေးကြည့်ပြီးပြီလေ။ မေးကြည့်တော့ အဲ့ဒီမိန်းမတွေက အဲ့ဒီလိုပြောကြတာပဲ။ ကျွန်ပြေးကို အလုပ်အကျွေးပြု ခစားလိုစိတ်မရှိဘူးတဲ့။"
".....တကယ် တရားလွန်နေပါပြီ။"
~~~~
Miel's Translations