အပိုင်း ၈ (ဧကရာဇ်၏ ချစ်သူ၊ ဧကရီ၏ လက်ဆောင်)
ရက်ရှ်တာက မယုံမရဲလေး မေးခဲ့သည်။
"ဧကရီအရှင်မက ရက်ရှ်တာကိုရော လက်ဆောင် ပေးပါ့မလားဟင်။"
~~~~~
"မပို့ပေးပါဘူး။"
ကျွန်မ၏အဖြေကိုကြားတော့ ရံရွေတော်များက တော်ပါသေးရဲ့ဆိုသောပုံစံမျိုးဖြင့် အကြည့်ချင်းဖလှယ်ကုန်ကြသည်။
"တော်ပါသေးရဲ့။"
"ဧကန္တများ ဧကရီအရှင်မက အဲ့ဒီမိန်းမကို လက်ဆောင်ပေးမှာစိုးလို့ ဘယ်လောက်တောင် ကြောင့်ကြနေခဲ့ရသလဲ မသိပါဘူး။"
လက်ဆောင်မပို့ပေးရခြင်း၏ အကြောင်းရင်းများက အများကြီးရှိပေသည်။ ဆိုဗီရ်ရှု၏ လက်ထောက် ထွက်သွားပြီးနောက်တွင် အကယ်၍ဆိုတာ မသိနိုင်သဖြင့် အမျိုးမျိုးသော ဓလေ့ထုံးတမ်းများကို ရှာဖွေကြည့်ခဲ့၏။ ပွဲတော်ကတော့ ထားလိုက်၍ရသော်လည်း၊ လက်ဆောင်မပေးခြင်းက နည်းနည်း နားမလည်နိုင်စရာဖြစ်နေသောကြောင့်ပင်။ သို့သော် ရှာဖွေကြည့်လိုက်တော့ ဧကရီက ဧကရာဇ်၏ချစ်သူကို လက်ဆောင်ပို့ပေးသည့်အခါတိုင်း ပုဂ္ဂိုလ်ရေးအကြောင်းရင်းများရှိနေ၏။ ချစ်သူ အများကြီးရှိခဲ့မည်ဆိုလျှင် လက်ရှိချစ်သူက အာဏာ အလွန်အကြူး ဆုပ်ကိုင်ထားမည်ကို ထိန်းချုပ်ရန်အတွက်ဖြစ်ပေသည်။ ဧကရာဇ်၏ချစ်သူက ဧကရီနှင့် ကိုယ်ရေးကိုယ်တာရင်းနှီးမှုရှိခြင်း၊ သို့မဟုတ် အထက်တန်းလွှာ မှူးမတ်မျိုးရိုးကဖြစ်နေခြင်း။ ချစ်သူက ဧကရီနှင့် တူညီသောအိမ်တော်မှ သို့မဟုတ် တူညီသော မှူးမတ်မိသားစုမှဖြစ်နေခြင်း အစရှိသဖြင့်။ သို့သော် ရက်ရှ်တာကတော့ ဘယ်အမျိုးအစားထဲတွင်မှ ပါဝင်မနေပေ။ ဂရုစိုက်ချင်စိတ် လုံးဝမရှိဘဲ၊ အကြောင်းပြချက် မရှိဘဲ 'ကျွန်မရဲ့ ခင်ပွန်းကို အပ်ပါတယ်' ဟူသော စကားမျိုး ပြောရမည်လား။ ထိုသို့လုပ်ချင်စိတ်လည်းမရှိ။ ဆိုဗီရ်ရှုက အာရုံမစိုက်ရန် လက်ထောက်ကို စေလွှတ်ပြီး ညွှန်ကြားခဲ့လေတော့ ကိုယ်တိုင်ရှေ့ထွက်ဖို့လည်း မသင့်တော်ပေ။
"မစိုးရိမ်ပါနဲ့။ ပို့ကိုပို့ရမဲ့ အကြောင်းရင်းရှိမယ်ဆိုရင်တော့ မပြောတတ်ပေမဲ့ အဲ့ဒီလို မဟုတ်ရင်တော့ ပို့ပေးမှာမဟုတ်ပါဘူး။"
ရံရွေတော်တို့၏ မျက်နှာများတွင် ကျေနပ်သည့် အမူအရာများ ပေါ်လာတော့သည်။
"လော်ရာသာ ဒီမှာရှိရင် ဝမ်းသာလွန်းလို့ အော်ဟစ်နေမှာပဲ... ဒီနေ့ပဲ နန်းတော်ကနေ ထွက်သွားဖို့ စဥ်းစားထားတာဆိုတော့၊ လော်ရာကိုတော့ ကျွန်မ သီးသန့် ပြောလိုက်ပါ့မယ်၊ ဧကရီအရှင်မ။"
"လော်ရာရော၊ အဆင်ပြေရဲ့လား။"
"အို၊ အရင်တစ်ခါ သွားတုန်းက 'အဲ့ဒီမိန်းမ' ကို ဘယ်လောက်တောင် ဒေါသထွက်နေလိုက်သလဲ။"
"မားကီးစ် တာရီတာရဲ့ ဇနီးဆိုရင်လည်း ဒေါသထွက်လွန်းလို့ လက်ဖက်ရည်ပွဲ ကျင်းပတိုင်း အဲ့ဒီအကြောင်းကို ပြောတာပါဆို။"
ကျွန်မ၏ ရန်သူက လူများ၏ ချီးမွမ်းခြင်းကို ခံရခြင်းထက် လူများနှင့်ဆက်ဆံရေး မကောင်းလျှင် ပိုကောင်း၏။ မည်သို့ပင်ဖြစ်စေ ဆိုဗီရ်ရှုနှင့် သူ့လူယုံများက ရက်ရှ်တာကို ကောင်းကောင်း ဂရုစိုက်ပေးကြမည်ပင်။ သို့ဆိုလျှင် ကျွန်မ၏ လူယုံများကပါ သူ့ကို ဂရုစိုက်ပေးဖို့ လိုအပ်သေးရဲ့လား။
"ဒါနဲ့လေ ဧကရီအရှင်မ၊ ဟို... တစ်ခုလောက် မေးလို့ရမလားရှင့်။"
"ဘာများလဲ။"
"ကောလာဟလတွေအရ ဒီနှစ် နှစ်သစ်ကူးပွဲတော်မှာ အနောက်ဘုရင့်တိုင်းပြည်ရဲ့ မင်းသား လာမယ်လို့ကြားရပါတယ်။ အဲ့ဒါ တကယ်ပဲလားရှင့်။"
ရံရွေတော်တစ်ဦးက မေးလိုက်တော့ တခြားရံရွေတော်များလည်း တစ်ပြိုင်နက်တည်း စကားပြောရပ်ကာ ကျွန်မဘက်သို့ အကြည့်များ စူးစိုက်လာကြ၏။ ကျွန်မက ပြုံးပြီးခေါင်းညိတ်လိုက်တော့ သူတို့က ယပ်တောင်ဖြစ်ဖြစ်၊ လက်တွေနဲ့ဖြစ်ဖြစ် မျက်နှာကို တစ်ဝက်လောက် အုပ်ကွယ်ကာ ထူးဆန်းစွာ အကြည့်ဖလှယ်ကုန်ကြသည်။ ကျွန်မလည်း ရယ်ချင်စိတ်ကို မနည်း ထိန်းချုပ်ပြီး နှုတ်ခမ်းကို တင်းတင်းစေ့ထားလိုက်ရ၏။ ရံရွေတော်တွေ ဤမျှအထိ မျှော်လင့်တကြီးဖြစ်နေကြတာလည်း သဘာဝကျပေသည်။
'အနောက်ဘုရင့်တိုင်းပြည်၏ မင်းသား' ဆိုသူမှာ အနောက်ဘုရင့်တိုင်းပြည် ဘုရင်မင်းမြတ်၏ တစ်ဦးတည်းသော ညီတော်ဖြစ်သည့်အတွက်၊ အကြောင်းအမျိုးမျိုးနှင့် နာမည်ကြီးနေသူပင်။
"ကြားရတာတော့ တအားချောတယ်ဆိုပဲ။"
"မျက်လုံးချင်းဆုံရုံနဲ့တင် ရင်ခုန်မိလောက်အောင်ကိုပဲတဲ့။"
"ဒါပေမဲ့ ခေါင်းမာတာကတော့ တော်ရုံသင့်ရုံမဟုတ်ဘူးဆိုပဲ။ ဘယ်လောက်တောင်လဲဆိုရင် အနောက်ဘုရင့်တိုင်းပြည်ရဲ့ နတ်ရွာစံဘုရင်မင်းမြတ်တင်မကဘူး၊ လက်ရှိဘုရင်မင်းမြတ်ပါ ထိမ်းမြားလက်ထပ်ပေးဖို့ကို လက်လျှော့ထားရပြီတဲ့လေ။"
"အစေ့မပါတဲ့ ဖရဲသီး*ဆိုတဲ့ ကောလာဟလကရော တကယ်ပဲလား။"
[TL/N : *အစေ့မပါတဲ့ဖရဲသီး - မြုံနေတာ၊ ကလေးမရနိုင်တာကို တင်စားပြောထားတာပါ။]
"မပြောတတ်ပါဘူး။ ဒါပေမဲ့ အနောက်ဘုရင့်တိုင်းပြည်ရဲ့ ဘုရင်မင်းမြတ်ကလည်း ရင်သွေးတစ်ယောက်မှ ရှိတာမဟုတ်ဘူးလေ။ အဲ့ဒီလောက်မိန်းမတွေ အများကြီးနဲ့ ပွေရှုပ်ခဲ့တဲ့ မင်းသားကလည်း အခုအထိ ကလေးမရှိသေးတာကိုကြည့်ရင် နည်းနည်းတော့ သံသယဖြစ်စရာပဲပေါ့။"
တီးတိုးပြောနေကြသော ရံရွေတော်တို့၏ စကားများကို ကျွန်မ ချက်ချင်းပင် နားစိုက်ထောင်လိုက်မိသည်။ အနောက်ဘုရင့်တိုင်းပြည်ကား ဘုရင်အုပ်ချုပ်သော တိုင်းပြည်ပင်ဖြစ်လင့်ကစား တကယ်တမ်းတွင် ကျွန်မတို့၏ အရှေ့အင်ပါယာကြီးနှင့် ပခုံးချင်းယှဉ်နိုင်လောက်အောင် ကြီးမားသည့် စစ်အင်အားနှင့် အာဏာရှိသော တိုင်းပြည်တစ်ခုပင်။ တိုင်းပြည်၏ ကြွယ်ဝချမ်းသာမှုကို ပြောရလျှင် ကမ္ဘာပေါ်တွင် အချမ်းသာဆုံးဟု ဆိုနိုင်ပေသည်။ ထိုသို့သော တိုင်းပြည်၏ ထီးမွေနန်းမွေခံအဖြစ် ပထမဆုံးနေရာတွင်ရှိသည့် တော်ဝင်မင်းသားက မကောင်းသတင်း ကောလာဟလအမျိုးမျိုးဖြင့် သတင်းကြီးနေသည်ကို သိလျက်နှင့်ပင် စိတ်မဝင်စားဘဲ မနေနိုင်ပေ။ ကျွန်မလည်း ခေါင်းကိုက်စရာ ဆိုဗီရ်ရှုနှင့် သူ့ချစ်သူအကြောင်းကို ခဏမေ့ထားကာ၊ ရံရွေတော်တို့၏ သကြားလုံးကဲ့သို့ ချိုမြိန်ဖွယ် စကားဝိုင်းထဲသို့ စီးမျောပျော်ဝင်လိုက်တော့သည်။
~~~~~
"စားသောက်ပွဲ မရှိဘူးတဲ့လားရှင့်။"
ရက်ရှ်တာတစ်ယောက် ဧကရာဇ် ဆိုဗီရ်ရှုအား ချစ်သူအဖြစ် အသိအမှတ်ပြုစာချုပ် ချုပ်ဆိုသည့်အခါ ပွဲတော်ကို မည်မျှ ခမ်းနားစွာကျင်းပမည်နည်း၊ သူ့ မိတ်ဆွေများကို ဖိတ်ကြား၍ ရမည်လား၊ မရဘူးလား အစရှိသည်ဖြင့် မေးမြန်းကြည့်ရာမှ လုံးဝ အံ့အားသင့်သွားတော့၏။
"ဘယ်ရွန် လန့်ထ်ပြောတော့ ခမ်းနားတဲ့ စားသောက်ပွဲကြီး ကျင်းပပေးမယ်ဆို..."
"ပြောခဲ့ပြီးသားမဟုတ်လား။ မကြာခင် နှစ်သစ်ကူးပွဲတော်ပဲလို့။ လောစရာမလိုဘူးလို့ ပြောခဲ့တုန်းကတော့ အမြန်ဆုံး အကျဉ်းချုပ်လုပ်ချင်တယ်လို့ ပြောခဲ့တာ ရက်ရှ်တာ၊ မင်းပဲလေ။"
"..."
ဆိုဗီရ်ရှုက ရှင်းပြခဲ့သော်လည်း ရက်ရှ်တာ၏ ခေါင်းထဲတွင် မေးခွန်းတစ်ခု ပေါ်နေဆဲပင်။ ရက်ရှ်တာတစ်ယောက် နားမလည်စွာ ငေးကြည့်နေမိ၏။ ဆိုဗီရ်ရှုလည်း ရက်ရှ်တာ၏ အသိဉာဏ်အဆင့်ကို အလွန်ပေါ့ပေါ့လေး တွေးထားခဲ့မိကြောင်း နောက်ကျမှ ရိပ်မိသွားတော့သည်။ ရက်ရှ်တာ့ကို ထင်ထားသည်ထက် ဉာဏ်ကောင်းသည်ဟု မှတ်ယူခဲ့သဖြင့်၊ မှူးမတ်အနွယ်တော်များ အလိုလို သိတတ်ကြသည့် အရာများအကြောင်း တစ်ခုမျှ မသိသေးဟူသောအချက်ကို မေ့လျော့သွားခဲ့ခြင်းပင်။
"ငါ့ အမှားပါ။"
"ဘာကို ပြောနေတာပါလဲရှင့်။"
"ပွဲတစ်ခုတက်ရတယ်ဆိုတာကလည်း လွယ်ကူတဲ့ ကိစ္စမဟုတ်ဘူးကွ။ ပြင်ဆင်ရမဲ့ကိစ္စတွေ အများကြီး၊ အချိန်ဇယားကလည်း အရမ်းကျပ်တာ။ အဲ့ဒါကြောင့် ခမ်းနားတဲ့ပွဲတော် ကျင်းပပေးဖို့ တောင်းဆိုတာက ထုံးတမ်းအစဉ်အလာယဉ်ကျေးမှုနဲ့ မဆီလျော်ဘူး။"
"အာ... ရက်ရှ်တာ စာချုပ်ချုပ်တဲ့နေ့နဲ့ သိပ်မကွာတဲ့နေ့မှာ တခြားပွဲတစ်ခုခုများ ကျင်းပဖို့ ရှိနေလို့လားဟင်။"
"မကြာခင် နှစ်သစ်ကူးပွဲတော်ပဲ မဟုတ်လား။"
ခမ်းနားကြီးကျယ်သော စားသောက်ပွဲကြီးတွင် မှူးမတ်အပေါင်း၏ ဂုဏ်ပြုခြင်းကို ခံယူရန် စိတ်ကူးယဉ်ခဲ့သော ရက်ရှ်တာလည်း အနည်းငယ် ဝမ်းနည်းသွားတော့သည်။ အမြဲတမ်း အပေါ်တွင်သာ ရှိလိမ့်မည်ဟု ထင်ထားခဲ့သော လူများက သူ့ဆီသို့ ပြေးကြလာမည်ကို မြင်ချင်ခဲ့သော်လည်း...
သို့သော် ယခု အလုပ်များနေသဖြင့် နောက်မှပဲ အကျဉ်းချုပ် လုပ်ကြရအောင်ဟု ဧကရာဇ်ကို နားချခဲ့သူမှာလည်း ရက်ရှ်တာကိုယ်တိုင်ပင် ဖြစ်နေပြန်သည်။ ဤကိစ္စကြောင့် ဝမ်းနည်းနေလျှင် ဧကရာဇ်က စိတ်ရှုပ်စရာကောင်းသည်ဟု ထင်သွားမည်ဖြစ်သဖြင့် ရက်ရှ်တာလည်း ဝမ်းနည်းသည့် အမူအရာကို ထပ်ပြီးထုတ်ဖော်မပြနိုင်တော့ဘဲ ပါးစပ်ပိတ်လိုက်၏။
သို့သော် စာချုပ်ချုပ်ဆိုသည့်နေ့တွင်မူ စိတ်မချမ်းသာမှုက ပိုမိုကြီးထွားလာခဲ့သည်။ ခမ်းနားသော စားသောက်ပွဲမဟုတ်လျှင်တောင် ပွဲအသေးစားလေးတစ်ခုတော့ ပြင်ဆင်ပေးခြင်းဖြစ်ဖြစ်၊ ကိုယ်တိုင်လာရောက်တာဖြစ်ဖြစ်တော့ လုပ်လိမ့်မည်ဟု ထင်ခဲ့မိ၏။ တောင်းပန်စကားနှင့်အတူ လက်ဆောင်ပို့ပေးလိမ့်မည်ဟု မျှော်လင့်မိခဲ့သော်လည်း မည်မျှပင် စောင့်ဆိုင်းနေပါစေ၊ နန်းတော်မှလက်ဆောင်ပို့လာခြင်း မရှိသည့်အပြင် ဂုဏ်ပြုစကားပင်မရှိခဲ့ပေ။ နန်းတော်၏ အတွင်းရေးကိစ္စအားလုံးက ဧကရီ၏ တာဝန်ယူမှုအောက်တွင်ရှိသည်ဟု ဘယ်ရွန် လန့်ထ်ထံမှ ကြားသိခဲ့ရသောကြောင့် ရက်ရှ်တာတစ်ယောက် ဧကရီနှင့်ပတ်သက်ပြီး စိတ်ထိခိုက်မိရသည်။ ထိုမျှအထိ ကြိုးစားပမ်းစား လေ့ကျင့်ပြင်ဆင်ခဲ့သော လက်မှတ်သည်ပင်၊ စာရွက်ပေါ်တွင် လျှင်မြန်စွာ ရေးထိုးလိုက်သောအခါ ဘာမှမထူးခြားတော့သဖြင့် ပို၍ဟာတာတာကြီးဖြစ်နေသလို ခံစားရ၏။ နန်းရင်းဝန်အရှေ့တွင် လက်မှတ်ထိုးပြီးသည့်နောက် နန်းရင်းဝန်ကလည်း အလုပ်များနေသည်ဟုဆိုကာ တစ်နေရာသို့ထွက်သွားခဲ့သည်။ စိတ်ကူးယဉ်ခဲ့ရသော ဂုဏ်ပြုသံများ၊ ပတ်ဝန်းကျင်မှ လက်ခုပ်သံများ၊ ကမ္ဘာပေါ်ရှိ အရာအားလုံးကို ပိုင်ဆိုင်ထားသကဲ့သို့ ပျော်ရွှင်သော ခံစားချက်မျိုးပင် မရှိခဲ့ပေ။ ဆိုဗီရ်ရှုကလည်း အလုပ်မပြီးသေးဟုဆိုကာ နောက်မှတွေ့မည်ဟု နှုတ်ဆက်ပြီး ထွက်သွား၏။ ကိုယ့်အခန်းကိုယ် ပြန်လာသော ရက်ရှ်တာလည်း စိတ်ဓာတ်ကျကာ လက်နှစ်ဖက်ဖြင့် မျက်နှာကိုအုပ်လိုက်သည်။
"ဒါက ဘာကြီးလဲ။"
သူ့အပါးတွင် ပျာပျာသလဲဖြစ်နေကြသော ရံရွေတော်များက စိုးရိမ်တကြီးနှင့် ဘာဖြစ်ခဲ့သည်ကို မေးမြန်းကြလေရာ ရက်ရှ်တာလည်း သူ၏ စိတ်မကောင်းဖြစ်မှုများကို တိုင်တည်ရင်ဖွင့်လေတော့သည်။
"ဧကရီအရှင်မက ငါ့ကို အထင်သေးပြီး အရေးမလုပ်တာ ကျိန်းသေတယ်။ မဟုတ်ရင် ပွဲမကျင်းမပေးရုံတင်မကလို့၊ လက်ဆောင်ပါ မပို့ပေးစရာ အကြောင်းမရှိဘူးလေ။ လက်ဆောင် မပို့ပေးရင်တောင် မျက်နှာတော့ ပြသင့်တယ်မဟုတ်ဘူးလား။"
"မငိုပါနဲ့ လေဒီ ရက်ရှ်တာရယ်။ ဒီလို နေ့ကောင်းနေ့မြတ်မှာ ဘာလို့ ငိုရတာလဲ..."
"ဘယ်လိုပဲဖြစ်ဖြစ် ဧကရီအရှင်မနဲ့ တွေ့ဖို့ကလည်း ခဲယဉ်းမှာဆိုတော့ စိတ်ထဲထားမနေပါနဲ့။"
သို့သော် အလွန်အင်မတန် မျှော်လင့်ထားခဲ့သောကြောင့် ဝမ်းနည်းသည့် ခံစားချက်များက လွယ်လွယ်ကူကူ ပြေပျောက်မသွားခဲ့ပေ။ နောက်ဆုံးတွင် အလုပ်များကို အလျင်စလိုလက်စသတ်ပြီး ရက်ရှ်တာ့ကို လာတွေ့သော ဆိုဗီရ်ရှုကလည်း ရက်ရှ်တာ စိတ်မကောင်းဖြစ်နေသည်ကို ချက်ချင်းရိပ်မိကာ မေးခဲ့၏။
"ငါ့ရဲ့ သားကောင်လေးက ဒီလို အဓိပ္ပာယ်ရှိတဲ့နေ့မှာ မျက်နှာမကောင်းဘူးပဲ။"
"အဓိပ္ပာယ်ရှိတဲ့နေ့က ဘာများထူးလို့လဲ။ ဘယ်သူမှလည်း ဂုဏ်မပြုကြဘဲနဲ့..."
"ဘယ်သူမှဂုဏ်မပြုဘူးဆိုတာက ဘာစကားလဲ။ နန်းရင်းဝန်က မင်းကို ဂုဏ်ပြုကြောင်းပြောခဲ့သလို၊ ရံရွေတော်တော်တွေကလည်း ဂုဏ်ပြုကြောင်း လာပြီးဂါရဝပြုခဲ့ကြတာပဲမဟုတ်လား။"
နန်းရင်းဝန်က ဘာမှမဟုတ်သလို ပေါ့ပေါ့တန်တန် ပြောခဲ့ခြင်းဖြစ်ပြီး၊ ရက်ရှ်တာလိုချင်သည်မှာ ရံရွေတော်တို့၏ ဂါရဝပြုနှုတ်ဆက်စကားမဟုတ်ဘဲ မှူးမတ်တို့၏ နှုတ်ဆက်စကားပင်။ ကမ္ဘာပေါ်တွင် သူတို့ကိုယ်သူတို့ အတော်ဆုံးဟုမှတ်ယူကာ ခေါင်းမော့ရင်ကော့ထားကြသူများထံမှ အသိအမှတ်ပြုမှုနှင့် ဂုဏ်ပြုခြင်းကို ခံယူလို၏။
"ထင်တဲ့အတိုင်း ဧကရီအရှင်မက ရက်ရှ်တာ့ကိုမုန်းနေတာ သေချာပါတယ်..."
ရက်ရှ်တာ၏ မျက်နှာအမူအရာ တဖြည်းဖြည်း မှောင်မိုက်လာသောအခါ ဆိုဗီရ်ရှုလည်း မတတ်သာဘဲ ပြောပြရတော့သည်။
"ဧကရီက မင်းကိုမုန်းလို့ ပွဲတော်ရော၊ လက်ဆောင်ပါ မပြင်ဆင်ပေးတာ မဟုတ်ဘူး။ ငါကပဲ အခြေအနေမပေးလို့ မလုပ်နဲ့လို့ ပြောခဲ့တာ။"
ရက်ရှ်တာ ဆိုဗီရ်ရှု၏ စကားကို မယုံကြည်သည်မှာ သေချာသည်။ အရှေ့တွင် ရပါတယ်ဟု ခေါင်းညိတ်ခဲ့သော်လည်း ဆိုဗီရ်ရှုက ရက်ရှ်တာ အဆင်မပြေမှန်းသိ၏။ ဤသို့သော အခြေအနေမျိုးတွင် ချစ်သူဖြစ်လာသော သားကောင်လေးနှင့် ချိုမြိန်ယစ်မူးဖွယ်အချိန်ကို ကုန်ဆုံးရန်မဖြစ်နိုင်ပေ။ နောက်ဆုံးတော့ နောက်တစ်နေ့တွင် ဆိုဗီရ်ရှုလည်း သူ၏လက်ထောက်ကို စေခိုင်းကာ ရက်ရှ်တာ့အရွယ် မှူးမတ်အမျိုးသမီးငယ်များ အနှစ်သက်ဆုံးဟုဆိုသော လက်ဆောင်ကို ပြင်ဆင်စေပြီးနောက် ဧကရီ၏ အမည်ဖြင့် ရက်ရှ်တာအား လက်ဆောင်ပေးခဲ့လေသည်။
~~~~~
Miel's Translations