ရိန်း ခေါင်းငုံ့ကာ တစ်ချက်ကြည့်လိုက်တော့ တာမင်နယ်မှာ "အမည်မသိ" ဟု ပေါ်နေသည်။
ယခင်ကဆိုလျှင် ရိန်းက ထိုကဲ့သို့ "အမည်မသိ" ဖုန်းခေါ်ဆိုမှုများကို လျစ်လျူရှုကာ ချပစ်လေ့ရှိသည်။ သို့သော် ယခုအချိန်၌ ဘိုးဘေးနှင့် တခြားသူများက အလွန်ပျင်းနေပုံရသည်ကြောင့် အိမ်တော်ထိန်းကို ခေါ်ဆိုမှုချိတ်ဆက်ဖို့ အချက်ပြလိုက်သည်။
ဘိုးဘေးက မကျေမနပ်ဖြစ်သွား၏။ မိသားစုထဲမှာ သူ့ဂုဏ်သိက္ခာက အလွန်မြင့်မားကြောင့် သူပြောတာကို မည်သူမျှ မလွန်ဆန်ရဲပေ။ သို့သော်လည ရိန်း… ဤအမှိုက်ကပဲ သူ့အာဏာကို အကြိမ်ကြိမ် စိန်ခေါ်ရဲနေသည်။ အကယ်၍ ... ဟင်း!
ရိန်းရဲ့ တာမင်နယ်တွက် ချိတ်ဆက်ပြီးသည်နှင့် ဗီဒီယိုတစ်ခု ပေါ်လာသည်။
ရိန်းမျက်လုံးများ ပြူးကျယ်သွားတော့၏။
ဘေးနားတွင် ရပ်နေသည့် ဒိုရစ်လည်း ကြည့်လိုက်သည့်အချိန် သူမပါးစပ်အဟောင်းသား ဖြစ်သွားရပြီး မျက်လုံးများက မယုံနိုင်မှုဖြင့် ဝိုင်းစက်နေသည်။
နောက်က အိမ်တော်ထိန်းကလည်း အံ့အားသင့်စွာဖြင့် "သခင်လေးပါလား!" ဟု အံ့အားသင့်ကာခေါ်လိုက်သည့်သံ တစ်ချက် ထွက်သွားသည်။
"ဘယ်သူ?!"
ရေမွန့်ဦးလေးနှင့် သူ့ဝမ်းကွဲညီအစ်ကို ကားလ်တို့က တစ်ပြိုင်နက်တည်း ပြောလိုက်ကြသည်။
ဘိုးဘေး မျက်နှာကလည်း အနည်းငယ် ပြောင်းလဲသွားလေပြီ။
ရိန်းက အိမ်တော်ထိန်းကို အလင်းမျက်နှာပြင်ပေါ် က ပုံရိပ်ကို ချဲ့ပြဖို့ အချက်ပြလိုက်သည်။ သုံးဖက်မြင် ဗီဒီယိုက ချက်ချင်း ပုံကြီးချဲ့ဖော်ပြလာသည်။ ရေမွန်က စစ်ဝတ်စုံနှင့် စစ်ဦးထုပ်ကို ၀တ်ဆင်ထားပြီး ယခင်ပုံစံနှင့် ကွဲပြားခြားနားခြင်းရှိမနေပါချေ။
ကားလ်က "ရေမွန်၊ မင်း အသက်ရှင်နေသေးတာလား?!" ဟုပင် အော်ဟစ်လိုက်သေးသည်။
ဒိုရစ်က အလင်းမျက်နှာပြင်ဆီ ပြေးသွားပြီး အသက်ရှင်နေသေးသည့် သားဖြစ်သူကို ကြည့်ကာ စိတ်လှုပ်ရှားစွာဖြင့် "ရေမွန်၊ မင်းလား။ မင်း အသက်ရှင်နေတာ အမှန်ပဲလား" ဟု ငိုယိုပြောဆိုလိုက်လေသည်။
ရေမွန်က လူအုပ်ကို ကြည့်လိုက်ပြီး မျက်မှောင် အနည်းငယ် ကြုတ်လိုက်ကာ ဒိုရစ်ကို ပြောလိုက်သည်။ "စိတ်မပူပါနဲ့ အမေ၊ ကျွန်တော် အသက်ရှင်နေပါသေးတယ်။ ဒါပေမယ့် ဒဏ်ရာ နည်းနည်းတော့ ရထားတယ်။ လွန်ခဲ့တဲ့ နှစ်ရက်လောက်ကတည်းက ထုံးကျောက်ဂြိုလ်ပေါ်မှာ ဆေးကုသမှု ခံယူနေရတယ်"
"မင်း အသက်ရှင်နေသေးတယ်၊ မင်း အသက်ရှင်နေသေးတယ်၊ ကောင်းလိုက်တာ! ရိန်း… ရှင်တွေ့ရဲ့လား။ ရေမွန် အသက်ရှင်နေသေးတယ်!"
"အင်း။"
ရိန်းက ဘာမှ ပြန်မပြောပေမယ့် အလင်းမျက်နှာပြင်ပေါ်က သားဖြစ်သူကို စိုက်ကြည့်နေ၏။ကားလ်က အလင်းမျက်နှာပြင်ပေါ်က ရေမွန်ကို လက်ညှိုးထိုးကာ အော်ဟစ်လိုက်သည် "အတုပဲ၊ ဒါ အတုပဲ၊ တခြားတစ်ယောက်ယောက်က ဟန်ဆောင်နေတာပဲ"
ရေမွန်က သူ့ကို လှည့်တောင်မကြည့်ဘဲ ရိန်းကိုပြောလိုက်သည် "အဖေ၊ ကြယ်တာရာကွန်ရက်ပေါ်က ဆိုင်ရယ်ဆိုတဲ့ မိန်းကလေးနဲ့ ကျွန်တော်နဲ့ ဘာမှ မဆိုင်ပါဘူး။ သူမ လွယ်ထားတဲ့ ကလေးကလည်း ကျွန်တော့်ရဲ့ ကလေး မဟုတ်ဘူး။ အဖေနဲ့ အမေ အယုံသွင်းခံလိုက်ရတာပါ။ ကျွန်တော် ပြန်လာရင် ဒီကိစ္စကို ကျွန်တော်ကိုယ်တိုင် ဖြေရှင်းပါ့မယ်"
တကယ်တော့ ရေမွန့်ကို ပထမဆုံး တွေ့သည့်အခါ ရိန်းက တစ်ယောက်ယောက် ဟန်ဆောင်နေတာလား ဟုတွေးလိုက်မိသည်။ သို့သော်လည်း ရေမွန် စကားပြောလိုက်သည့်အချိန်တွင် ရိန်း သိလိုက်ရသည်။ ဒါ သူ့ရဲ့သား အစစ်အမှန် ဖြစ်၏။
"ကောင်းပြီ၊ ကံကောင်းလို့ မင်း မိသားစုကို အချိန်မီ ဆက်သွယ်လိုက်လို့ပေါ့။ မဟုတ်ရင် မင်းရဲ့ စွမ်းအင်ကြယ်ကို လက်လွှတ် ရတော့မလို့" ဟု ရိန်းက ပြောလိုက်သည်။
ရေမွန် ဘာကိုဆိုလိုမှန်း ချက်ချင်းသဘောပေါက်သွားသည်။ သူသည် မျက်နှာချင်းဆိုင်ရှိ လူကို ယခုမှ စတွေ့ဖူးသည့်အလား စိုက်ကြည့်ကာ "ဘိုးဘေး" ဟု ခေါ်လိုက်သည်။
ဘိုးဘေက "ရေမွန်၊ မင်း အသက်ရှင်လျက် ရှိနေမှတော့ အိမ်ကို အရင်ဆုံး အကြောင်းမကြားဘဲ ဘာလို့ နေနေတာလဲ။ မင်းမိဘတွေ ဘယ်လောက် စိတ်ပူနေလဲ မင်းသိလား" ဟု ဆူငေါက်လိုက်သည်။
ရေမွန်က ပြန်ဖြေသည် "ကျွန်တော် ကြယ်တာယာကွန်ယက်က အကြောင်းကို ဒီနေ့မှ သိရတာပါ"
"မင်း သက်သာရဲ့လား။ စစ်တပ်က ထုတ်ပြန်လိုက်တဲ့ ဗီဒီယိုထဲမှာ မင်းရဲ့ စွမ်းအင်တွေ ကုန်ဆုံးသွားတာ ငါမြင်လိုက်တယ်" ဟု ဘိုးဘေးက မေးလိုက်သည်။
ရေမွန်၏ မျက်လုံးများ အနည်းငယ် လှုပ်ရှားသွားချေ၏။
ဘိုးဘေ၏ မျက်လုံးများ လက်သွားပြီး "မင်းရဲ့ အရွတ်တွေကို ဆက်ထားတာလား။ အရွတ်တွေ ဆက်ပြီးရင် သုံးရက်အတွင်း လှုပ်ရှားလို့ မရဘူး။ အိပ်ရာထဲမှာပဲ အေးဆေးနေရမယ်။ မာန်ကြွ မနေနဲ့၊ မဟုတ်ရင် နောင်တချိန်မှာ အရွတ်တွေ ပြန်ပြတ်သွားနိုင်တယ်" ဟု ပြောလိုက်လေသည်။
"ဘိုးဘေးရဲ့ စေတနာကို ကျေးဇူးတင်ပါတယ်" ဟုသာ ရေမွန်က ပြော၏။
ဘိုးဘေးက သူ့၏ ရှည်လျားလှသော မုတ်ဆိတ်ကို ပွတ်ရင်း "ဒီကလေး အသက်ရှင်လျက် ရှိနေတာ တကယ်ကံကောင်းတာပဲ။ ငါလည်း အရမ်းဝမ်းသာတယ်" ဟု ပြောလိုက်လေသည်။
ရေမွန်၏ ဦးလေးနှင့် သားဖြစ်သူတို့သည် ဘိုးဘေးကို စိုးရိမ်စွာ ကြည့်နေကြသည်။
ဘာလို့ ရေမွန် အသက်ရှင်လျက် ရှိနေတာကို မြင်တာနဲ့ ဘိုးဘေးရဲ့ စကားလုံးတွေ ပြောင်းလဲသွားရတာလဲ။ ရေမွန်က အစစ်အမှန်လား ဆိုတာကိုတောင် သူတို့ မသိသေးဘူးလေ။
"ရိန်း" ဟု ဘိုးဘေးက ခေါ်လိုက်သည်။ "ရေမွန်က အဲဒီ မိန်းကလေးနဲ့ ဘာမှ မဆိုင်ဘူးလို့ ပြောနေတာပဲ။ ဒီကိစ္စကို မိသားစုကိစ္စထဲ ထည့်မပါနဲ့တော့" ဟု ဆက်ပြောလိုက်၏။
ရေမွန်၏ ဦးလေးက "ဘိုးဘေး!" ဟု အသံကျယ်ကြီး ခေါ်လိုက်သည်။
ဘိုးဘေးကထရပ်လိုက်ပြီး "သွားကြစို့" ဟု ပြော၏။
ရေမွန်၏ ဦးလေးနှင့် သားဖြစ်သူတို့သည် အံကြိတ်ကာ ဘိုးဘေးနောက်မှ လိုက်သွားကြရသည်။
ရိန်းနှင့် ဒိုရစ်တို့က ထွက်လိုက်လာပြီး နှုတ်ဆက်ရန် အစီအစဉ် မရှိပေ။
အိမ်တော်ထိန်းကတော့ ပျော်ရွှင်နေသည်။ သူ့သခင်လေး အသက်ရှင်လျက် ရှိနေသည်ကို သူ အရမ်းဝမ်းသာနေသည်။ သူသည် ပေါ့ပါးသွက်လက်စွာ လမ်းလျှောက်ကာ အပြုံးမပျက်ပင် ဘိုးဘေးနှင့် အဖွဲ့ကို ပြန်လည် ပို့ဆောင်ပေးသည်။
ရေမွန်၏ ဦးလေးက မာရှယ်အိမ်တော်၏ ပိတ်ထားသော တံခါးကို မကျေမချမ်း ကြည့်ကာ "ဘိုးဘေး၊ အဲဒီ ရေမွန်က အတုအယောင်ပဲ ဖြစ်ရမယ်။ စစ်တပ်ရဲ့ ဝက်ဘ်ဆိုက်မှာ တင်ထားတဲ့ ဗီဒီယိုထဲမှာ သူ့ရဲ့ စွမ်းအင်တွေ ကုန်ဆုံးသွားတာ ကျွန်တော်တို့ မြင်တာပဲလေ"
ကားလ်လည်း ဒေါသတကြီး ပြောသည်။ "စွမ်းအင်တွေ ကုန်ဆုံးသွားပြီးတဲ့နောက် သူက ပုန်းကွယ်နေတဲ့ ကြယ်ပေါ်ကို ပြုတ်ကျသွားတာလေ။ အဲ့လို အမြင့်ကြီးကနေ ပြုတ်ကျရင် အပိုင်းပိုင်း ကွဲထွက်သွားရမှာပေါ့။ ဘယ်လိုလုပ် အသက်ရှင်နေနိုင်မှာလဲ။ ဘိုးဘေး၊ ကျွန်တော်တို့ အလိမ်ခံလိုက်ရပြီ"
ဘိုးဘေးက လှောင်ပြုံး ပြုံးလိုက်ပြီး "ဘာတွေ လန့်နေတာလဲ။ အဲဒီ ရေမွန်က အတုအယောင် ဆိုရင် ရိန်းနဲ့ ဒိုရစ်တို့က စစ်တပ်ကို လိမ်လည်ပြီး အာဏာရယူဖို့ ကြိုးစားတဲ့ ပုန်ကန်သူတွေအဖြစ် စွပ်စွဲခံရလိမ့်မယ်။ အဲဒီလူက တကယ်ပဲ ရေမွန် ဖြစ်နေတယ် ဆိုရင်တော့ သူ(ရေမွန်)က အသုံးမဝင်တော့တဲ့ သူတစ်ယောက် ဖြစ်သွားပြီပေါ့"
ရေမွန်၏ဦးလေးမှာ အနည်းငယ် စိတ်သက်သာရာ ရသွားသည်။ "တကယ်လို့ သူက ရေမွန်အစစ် ဖြစ်နေတယ်ဆိုရင် ရေမွန်ရဲ့ ပိုင်ဆိုင်မှုတွေကရော ဘယ်လိုလုပ်မလဲ" ဟု မေးလိုက်၏။
ပါးစပ်ဝရောက်လုနီးနီးဖြစ်နေတဲ့ အဆီဝင်းဝင်းဘဲဝတုတ်ကို ဘယ်လိုလုပ် လွှတ်ပေးနိုင်မှာလဲ။
ရေမွန့် ပိုင်ဆိုင်မှုတွေရဲ့ တစ်စိတ်တစ်ပိုင်းကို မိသားစုအတွက်ပေးရမှာ ဖြစ်ပေမယ့် ရေမွန် သေသွားရင် သူ(ရေမွန့်ဦးလေး)က မိသားစုအကြီးအကဲ ဖြစ်လာပြီး ပိုင်ဆိုင်မှုတွေကို သူကိုယ်တိုင် စီမံခန့်ခွဲရမှာ ဖြစ်တဲ့အတွက် သူ့ပိုင်ဆိုင်မှုနဲ့ ဘာမှ မခြားဘူးလေ။
"ပြီးတော့ အဲဒီ စွမ်းအင်ကြယ်ကြီးရော" ဟု ကားလ်က ထပ်ပေါင်း ပြောလိုက်သည်။
ကားလ်သည် ထိုစွမ်းအင်ကြယ်ကြီးကို အလွန်ပင်လိုချင်နေသည်မှာ ကြာပြီဖြစ်သည်။ ဘိုးဘေးကလည်း ဤကိစ္စပြီးသွားလျှင် ထိုစွမ်းအင်ကြယ်ကြီးအား သူ့(ကားလ်)ကို ပေးမည်ဟု ကတိပေးထားသည်။ မဟုတ်လျှင် အနှီ မကောင်းသည့် မျိုးရိုးရှိသော မိန်းကလေးအား သူဘယ်လိုလုပ် လက်ထပ်မည်လဲ။
ဘိုးဘေးက မျက်လုံးများကို မှေးစင်းကာ "စိတ်မပူပါနဲ့။ မင်းပိုင်တာတွေက မင်းဆီ ရောက်လာမှာပဲ။ မင်းမပိုင်တာတွေကတော့ မင်းဆီ ရောက်မလာဘူး" ဟု ပြောလိုက်လေ၏။
"ဘိုးဘေး ဘာကို ဆိုလိုတာလဲ" ဟု ရေမွန်၏ ဦးလေးက မေးလိုက်သည်။
"ထုံးကျောက်ဂြိုလ်က ဗဟိုကြယ်နဲ့ အဝေးကြီးမှာ ရှိတယ်။ ဂြိုလ်ပေါ်က ဓားပြတွေနဲ့ ဂြိုလ်တွေကြားက ကြေးစားစစ်သားတွေကလည်း အဲဒီလမ်းကြောင်းမှာ ခဏခဏ ပေါ်လာတတ်တယ်..." ဟု ဘိုးဘေးက ပြောလိုက်ပြီး ဆက်မပြောတော့ဘဲ ရပ်လိုက်သည်။
ရေမွန့်ဦးလေး၏ မျက်လုံးများ တောက်ပသွားကာ "ဘိုးဘေး ဘာကို ဆိုလိုတာလဲ" ဟု ထပ်မေးလိုက်သည်။
ကားလ်လည်း တစ်စုံတစ်ခုကို ကြားလိုက်ရသည့်အလား စိတ်လှုပ်ရှားစွာဖြင့် ပြောလိုက်သည် "ဘိုးဘေး ဆိုလိုတာက ကျွန်တော်တို့ သူ့ကို လမ်းမှာ ဖမ်းဆီးရမယ် ဆိုတဲ့ သဘောပဲ"
ထိုရေမွန်က အစစ်ဖြစ်စေ၊ အတုဖြစ်စေ သူက ယခု အသုံးမဝင်တော့သည့် သူတစ်ယောက် ဖြစ်နေပြီး တိုက်ခိုက်နိုင်စွမ်းလည်း မရှိတော့ချေ။
ရေမွန့်နောက်ကို သူ့တပည့်များ လိုက်လာကြသော်လည်း အားအကောင်းဆုံးဟု ပြောရမည့် ကော်ရေးဆိုသည့် Orc ကတောင် အဆင့် ၇ ၌သာ ရှိသေး၏။
သူတို့သာ ကြယ်တွေကြားရှိ ကြေးစားစစ်သားများကို ငှားရမည်ဆိုလျှင် ထိုကြေးစားစစ်သားများက အဆင့် ၆ နှင့် အဆင့် ၇ Orc များချည်းသာ။ သူတို့အားလုံးက ရဲရင့်ပြီး တိုက်ခိုက်ရေး အတွေ့အကြုံလည်း ရှိကြ၏။
ဗဟိုကြယ်ကို ပြန်သည့်လမ်း၌ ရေမွန် သေသွားလျှင် မည်သူက သံသယ ရှိမည်တဲ့လဲ။ ကံဆိုးလိုက်တာ ဟုသာ ပြောကြမည် ဖြစ်သည်။ ရေမွန့်ဦးလေးနှင့် သားဖြစ်သူ ကားလ်တို့သည် အပြန်အလှန် ကြည့်လိုက်ကြသည်။ သားအဖနှစ်ယောက်စလုံး၏ မျက်လုံးများတွင် လောဘဇောတွေကို မြင်တွေ့နိုင်၏။
ဘိုးဘေးက မျက်လုံးများကို ငုံ့ပြီး ရှည်လျားသော မုတ်ဆိတ်ကို ပွတ်ကာ "သွားကြစို့" ဟု ပြောလိုက်သည်။
ရေမွန့်ဦးလေးနှင့် သားဖြစ်သူတို့သည် ဘိုးဘေးကို လေယာဉ်ပေါ်သို့ တက်စေပြီး ထွက်ခွာသွားကြသည်။မာရှယ်အိမ်တော်အတွင်းတွင် ဒိုရစ် သည် အလင်းတန်းပေါ်ရှိ သားဖြစ်သူကို ၀မ်းသာအားရ ကြည့်နေသော်လည်း စိတ်မပူဘဲ မနေနိုင်။
သားဖြစ်သူ အသက်ရှင်လျက် ရှိနေသေးသည်အား ၀မ်းသာလှပါသည်။ သို့သော် သူ့ခင်ပွန်းကဲ့သို့ပင် တစ်နှစ်ပတ်လုံး အိပ်ရာထဲတွင်သာ နေရမည့် ဒုက္ခိတ တစ်ယောက် ဖြစ်သွားမည်ကိုတော့ စိုးရိမ်နေမိ၏။
ဝံပုလွေ ၊ ကျားသစ်များနှင့် တူသော မျိုးနွယ်အုပ်စုဝင်များကလည်း ရှိနေသေးသည်။ သူတို့သည် ရေမွန်ကို ခုန်အပ်ကာ ကိုက်ဖြတ်စားသောက်ရန် အသင့်စောင့်နေကြသည်။
သူမသည် အဆင့် ၃ အလယ်အလတ် အမျိုးသမီးတစ်ဦးသာ ဖြစ်ပြီး ရိုးရိုးစစ်သားတစ်ဦးကိုပင် အနိုင်ယူနိုင်ခြင်း မရှိပေ။ သူမတွင် ဘယ်လိုလုပ် ကြီးမားလှသော ပိုင်ဆိုင်မှုများ၊ ခင်ပွန်းနှင့် သားဖြစ်သူကို ကာကွယ်နိုင်မည်နည်း။
ရေမွန်သည် တစ်လအတွင်း အိုမင်းရင့်ရော်လာသည့် မိခင်နှင့် ပို၍ပင် အိုမင်းပိန်လှီ သွားသော ဖခင်ကို ကြည့်ကာ ပြောလိုက်သည်။ "အဖေ၊ အမေ၊ ကျွန်တော် စွမ်းအင်တွေ မပျောက်ဆုံးသွားပါဘူး"
"ဘာတွေ ပြောနေတာလဲ" ဒိုရစ်က သူမ နားကြားမှားသည် ဟုထင်မှတ်ကာ မေးလိုက်သည်။
ဗီဒီယိုထဲတွင် ရေမွန်သည် မတ်တပ်ရပ်ကာ ခြေလှမ်းအနည်းငယ် လျှောက်ပြီး စကျင်ကျောက်ဖြင့် ပြုလုပ်ထားသော ကော်ဖီစားပွဲငယ်လေးကို လက်ဖြင့် ညင်သာစွာ ပုတ်လိုက်သည်။ ကော်ဖီစားပွဲငယ်လေးသည် ချက်ချင်း ကွဲကြေသွားတော့၏ာ
ယခုတစ်ကြိမ်တွင် ရိန်းပင် အံ့အားသင့်သွားသည်။ သူ့သားသည် စွမ်းအင် မပျောက်ဆုံးသွားသည်သာမက ပို၍ပင် အားကောင်းလာသည်ကို သူ မြင်လိုက်ရသည်။
"ရေမွန်၊ ဘာတွေဖြစ်နေတာလဲ။ စစ်တပ်က ဗီဒီယိုအတု ထုတ်ပြန်လိုက်တာလား" ဟု ရိန်းက မေးလိုက်သည်။
ဒိုရစ်လည်း အလွန်ပင် ပျော်ရွှင်နေသည်။ သူမ၏ သားသည် အသက်ရှင်လျက် ရှိနေရုံသာမက သူ၏ စွမ်းအားများလည်း မပျောက်ဆုံးသွားပေ။ ထိုကြီးမားလှသော အံ့အားသင့်စရာကြောင့် သူမ မူးနောက်နေသော်လည်း ရိန်း၏ စကားကြောင့် ချက်ချင်းပင် သတိပြန်ဝင်လာသည်။
"စစ်တပ်ထဲက တစ်ယောက်ယောက်က မင်းကို ဒုက္ခပေးဖို့ လုပ်နေတာလား" ဟု ဒိုရစ်က မေးလိုက်သည်။
သူမ၏ သားသည် အသက်ရှင်လျက် ရှိနေသည်မှာ ထင်ရှားနေသော်လည်း စုံစမ်းစစ်ဆေးခြင်း မရှိဘဲ သေဆုံးသွားပြီဟု တရားဝင် ကြေညာခဲ့သည်။ တစ်ယောက်ယောက်က နောက်ကွယ်က ကြိုးကိုင်နေမည်ဟု သူမ ယုံကြည်နေသည်။
ရေမွန်က "ဗီဒီယိုက အစစ်ပါ။ အခု ပြောလို့ အဆင်မပြေဘူး။ မနက်ဖြန် ဗဟိုကြယ်ကို ကျွန်တော်တို့ ထွက်လာမယ်။ ပြန်ရောက်ရင် သေချာလေး ရှင်းပြပါ့မယ်"
ဆက်သွယ်မှု ပြတ်တောက်သွားပြီးနောက် ဒိုရစ်နှင့် ရိန်းတို့သည် အပြန်အလှန် ကြည့်လိုက်ကြသည်။ ခဏအကြာတွင် ဒိုရစ်က ရုတ်တရက် မေးလိုက်သည် "ရေမွန် မတ်တပ်ရပ်ပြီး လမ်းလျှောက်နေတုန်းက ဗီဒီယိုထဲမှာ မျိုးစိတ်ကွဲတစ်ယောက်ရှိနေတာ မြင်လိုက်လား"
ရိန်းသည် မျက်မှောင်ကြုတ်ကာ စဉ်းစားပြီးနောက် ပြန်ဖြေလိုက်သည် "ရှိနေပုံပဲ"
ရေမွန်တွင် စွမ်းအင်များ မပျောက်ဆုံးသွားသည့် အံ့အားသင့်စရာ သတင်းကြောင့် သူတို့နှစ်ဦးစလုံး အာရုံလွဲသွားခဲ့သည်။ ယခု ပြန်စဉ်းစားကြည့်လိုက်ချိန် ဗီဒီယိုထဲတွင် မျိုးစိတ်ကွဲတစ်ယောက် လှုပ်ရှားနေသည်ကို တွေ့လိုက်ရ၏။
"ရေမွန် ရှိနေတဲ့ အခန်းက အိပ်ခန်း ဖြစ်ပုံရတယ်။ ရှင်ဘယ်လိုထင်လဲ။ အဲဒီ မျိုးစိတ်ကွဲနဲ့ ကျွန်မတို့သားရဲ့က ဘယ်လိုဆက်ဆံရေးမျိုးလဲ" ဟု ဒိုရစ်က မေးလိုက်သည်။
ရိန်း : …
ဒိုရစ် : …