အပိုင်း ၁၂
“ဒီမှာ၊ ဟန်ဆောယောင်းခင်ဗျ။”
“မြောက်ကိုရီးယား ထွက်ပြေးမဲ့သူကို သတင်းယူပြီး ကူညီပေးခဲ့ပါတယ်လို့။”
“အဲ့ဒီပါးစပ်ကို ပိတ်ထား။”
“ပြီးတော့ ခဲအိုဆိုတဲ့ပုဂ္ဂိုလ်က စုံစမ်းကြည့်လိုက်တော့ အမျိုးသားထောက်လှမ်းရေးဝန်ထမ်းဟောင်း ဖြစ်နေတယ်မဟုတ်လား။”
ဆောယောင်း ရယ်လိုက်တော့ ဂျောင်ဖီလ်ဂယူတစ်ယောက် လည်ပင်းအထိ နီရဲသွားကာ မျက်လုံးများပြူးသွားတော့သည်။
“တကယ်ပဲ ဘာဖြစ်ချင်နေတာလဲ။”
“ဂျောင်ဖီလ်ဂယူက ထင်မထားလောက်အောင် အချစ်ကြီးတဲ့ပုံပဲရှင့်။”
ရုတ်တရက် ဆောယောင်းက ခပ်ရေးရေးပြုံးလိုက်ရင်း မေးခဲ့သည်။
“မြောက်ကိုရီးယားကနေ ထွက်ပြေးလာတဲ့ ညီအစ်မနှစ်ယောက်ကို စောင့်ရှောက်ပေးရင်း လက်ထပ်ဖို့အတွက် အလုပ်ပါ ထွက်လိုက်တာလား။”
“ထပ်ပြီး အဓိပ္ပာယ်မရှိတဲ့စကားတွေ ပြောနေစရာအကြောင်းမရှိပါဘူး။”
ဂျောင်ဖီလ်ဂယူက ကြမ်းတမ်းစွာ ထရပ်ပြီး နောက်လှည့်လိုက်သည်။
“ချန်နာကို သံသယဝင်လာရင် ရှင့်ဇနီးလည်း လွတ်မှာမဟုတ်ဘူးဆိုတာ မသိတာလား။ ကျောမခိုင်းဘဲ ထိုင်လိုက်ပါ။ ကျွန်မရဲ့ လိုရင်းကိစ္စက မပြီးသေးဘူးရှင့်။”
ဂျောင်ဖီလ်ဂယူက ဖောင်းကြွနေသော ရင်အုပ်ကို ခပ်ကြမ်းကြမ်းပွတ်ပြီး လက်သီးကို ကျစ်ကျစ်ဆုပ်လိုက်သည်။ ဆောယောင်းကို စိုက်ကြည့်နေသည့် သူ့မျက်လုံးများတွင် နက်ရှိုင်းသော စက်ဆုပ်ရွံရှာမှုနှင့် သတိထားမှုတို့ ရှိနေ၏။ ဆောယောင်းက မထီတရီအကြည့်ကို တည်ငြိမ်စွာ လက်ခံကာ စောင့်ဆိုင်းနေလိုက်သည်။
“...တကယ်ပဲ လိုချင်တာက ဘာပါလဲ။”
“အလုပ်နေရာပါ။”
“ခင်ဗျာ။”
ကျုံ့နေသော သူ့နဖူးက တစ်ချက်ကလေး ပြေသွားသည်။
“ကျွန်မတို့နိုင်ငံမှာ VIP ဖောက်သည်တွေကို ကိုယ်ရံတော် အများဆုံးပေးတဲ့ ပုဂ္ဂလိကကုမ္ပဏီက Blast လို့ ပြောကြတယ်ရှင့်။”
“...”
“အမှုဆောင်ကိုယ်စားလှယ်ဆိုတဲ့လူနဲ့ အင်တာဗျူးလုပ်ထားတဲ့ ဆောင်းပါးကို တွေ့လိုက်လို့ပါ။ ဒီနှစ်ရဲ့ ဆိုက်ဘာကာကွယ်ရေးပြိုင်ပွဲမှာ အမျိုးသားထောက်လှမ်းရေးရဲ့ ဒုညွှန်မှူးက ကိုယ်တိုင် ဆုပေးပွဲတက်ခဲ့တယ်လို့ပြောပါတယ်။ အဲ့ဒီပွဲရဲ့ လုံခြုံရေးတာဝန်ကို Blast ကုမ္ပဏီက ယူခဲ့တာပဲရှင့်။”
ဆောယောင်းက အန္တရာယ်ရှိသော အတွင်းစိတ်ကို ဖုံးကွယ်ကာ သာမန်အတိုင်း ရယ်ပြခဲ့သည်။
“စစ်ဘက်ရေးရာ စာတမ်းတစ်စောင်ကို ဖတ်ကြည့်လိုက်တော့ အမျိုးသားထောက်လှမ်းရေးကလည်း Blast ကုမ္ပဏီကိုပဲ ပြင်ပကန်ထရိုက်ပေးတာတဲ့။ စစ်ဆင်ရေးတွေမှာ လိုအပ်လာရင် ပုဂ္ဂလိကကုမ္ပဏီတွေကို သင့်တော်သလို အသုံးပြုတယ်ဆိုပြီးတော့လေ။”
“တကယ်ပဲ... အဲ့ဒီလိုအရာတွေကို ဘာလို့ ရှာနေရတာလဲဗျ။”
မျက်နှာက နဂိုအတိုင်း ပြန်ဖြစ်နေပြီဖြစ်သော ဂျောင်ဖီလ်ဂယူတစ်ယောက် အလွန်ဒေါသထွက်နေခဲ့သည်။
“ကျွန်တော့်ဆီကနေ ဘာလိုချင်တာလဲ။”
“ပြောပြီးပြီလေ။”
ကိုယ်ရံတော်ကို အသုံးပြုပြီး ဓာတ်ပုံရိုက်ရန်နှင့် VIP အရာရှိကို ကိုယ်တိုင်ချဉ်းကပ်ရန်။ သူ့အတွက် ယခုချက်ချင်း လိုအပ်နေသည်က အယောင်ဆောင်အလုပ်တစ်ခုပင်။
“အလုပ်နေရာပေါ့လေ။ အဲ့ဒါကို ကျွန်တော်က ယုံရမှာလား။”
“...”
ဂျောင်ဖီလ်ဂယူ၏ မေးရိုးများ တင်းမာသွားတော့သည်။ ဤမိန်းမသာ တကယ်ပဲ ထင်ရာစိုင်းမည်ဆိုလျှင်...။ ခဏတာ ဒေါသကြောင့် လက်သီးကို ကျစ်ကျစ်ပါအောင် ဆုပ်လိုက်မိ၏။
သူ၏ဇနီး၊ သမီးငယ်လေးနှင့် ခေါင်းမာသည့် ခယ်မလေးကို တွေးလိုက်မိသည်။ ဤမိန်းမသာ ဝန်ထမ်းအယောင်ဆောင်သည့်အမှုထဲ ချန်နာကို ဆွဲထည့်မည်ဆိုလျှင်...။
တွေးကြည့်ရုံနှင့်တင် နားထင်တွေ ထိုးကိုက်လာတော့၏။ သို့သော် သူက လက်တွေ့ကျကျစဉ်းစားပြီး ပြဿနာများကို အရင်ဆုံး စစ်ဆေးအတည်ပြုလိုက်သည်။
"Blast ကုမ္ပဏီက စစ်ဘက်ဆိုင်ရာနည်းပညာရှိတဲ့သူတွေကိုပဲ ခန့်ထားတာပါ။ ကာကွယ်ရေးဝန်ကြီးဌာန၊ အမျိုးသားထောက်လှမ်းရေးအေဂျင်စီ၊ အထူးတပ်ဖွဲ့ဝင်ဟောင်းတွေ၊ ထောက်လှမ်းရေးအေဂျင်စီ ဝန်ထမ်းဟောင်းတွေနဲ့ အငြိမ်းစားစစ်သားတွေက သူတို့ရဲ့ ပစ်မှတ်လေ။ ဒါပေမဲ့ ဟန်ဆောယောင်းကတော့..."
သူက စိတ်ကျဉ်းကျပ်နေပုံနှင့် ဟန်ဆောယောင်းကို ကြည့်ခဲ့သည်။
"နည်းပညာမှ မရှိတာဗျ။"
Blast ကုမ္ပဏီကား ကုမ္ပဏီအဆင့်သတ်မှတ်ချက် နံပါတ် ၃ နေရာတွင်ရှိသော ဆယ်ဟွာလုပ်ငန်းစု၏ လက်အောက်ခံကုမ္ပဏီတစ်ခုပင်။ ပြည်ပသို့တိုးချဲ့ပြီး စာချုပ်ချုပ်ဆိုရန်သွားကြသော အရာရှိများကို ကာကွယ်ပေးနိုင်ရေးအတွက် ပြည်ပမှ PMC များနှင့် (Private Military Company - ပုဂ္ဂလိက စစ်ဘက်ရေးရာကုမ္ပဏီ) ပူးပေါင်းခဲ့ပြီး လုံခြုံရေးလုပ်ငန်းများကို စတင်လုပ်ဆောင်ခဲ့ခြင်းဖြစ်၏။
စစ်ပွဲများမှ စီးပွားရှာသည့်ခေတ်တွင်...။
ပြောင်းလဲလာသော အခြေအနေများအောက်၌ သူတို့က လွန်ခဲ့သော နှစ် ၂၀ အတွင်း အီရတ်၊ လစ်ဗျား၊ အာဖဂန်နစ္စတန်၊ UAE နှင့် နိုင်ဂျီးရီးယားကဲ့သို့ ပဋိပက္ခဖြစ်ပွားရာဒေသများသို့ Blast ကုမ္ပဏီမှ တပ်သားများကို စေလွှတ်ခဲ့၏။ ထိုသို့ဖြင့် ရရှိခဲ့သော အတွေ့အကြုံများကြောင့် သူတို့က ယခုဆိုလျှင် အရှေ့အာရှကို ကိုယ်စားပြုသည့် စစ်ဘက်ဆိုင်ရာကုမ္ပဏီတစ်ခုပင် ဖြစ်လာခဲ့ပေပြီ။
သမားရိုးကျ စစ်ဆင်ရေးများအပြင် ကိုယ်ရံတော်အစောင့်အရှောက်ပေးခြင်း၊ လုံခြုံရေး၊ သယ်ယူပို့ဆောင်ရေးနှင့် စုံစမ်းစစ်ဆေးရေးကဲ့သို့သော ပုဂ္ဂလိက စစ်ဘက်ရေးရာလုပ်ငန်းများကိုပါ ကျယ်ကျယ်ပြန့်ပြန့် ပံ့ပိုးပေးနေ၏။ နိုင်ငံအသီးသီး၏ အစိုးရများထံမှရသော စာချုပ်များ၏ တန်ဖိုးများက တစ်ခုတည်းနှင့်တင် ကိုရီးယားဝမ် ထရီလီယံနီးပါးရှိပေသည်။ နိုင်ငံခြားရေးဝန်ကြီးဌာနနှင့် အမျိုးသားထောက်လှမ်းရေးတို့ မစွမ်းဆောင်နိုင်သော နေရာများတွင် ပုဂ္ဂလိကကုမ္ပဏီများက စတင်ဖြည့်ဆည်းပေးလာကြ၏။
သူတို့၏ ဖောက်သည်များကလည်း အမျိုးမျိုးအစားစားပင်။ ရက်စက်သော အာဏာရှင်များ၊ အကြမ်းဖက် သူပုန်များ၊ မူးယစ်ဆေးဝါးဂိုဏ်းများမှသည် တရားဝင် အချုပ်အခြာအာဏာပိုင်နိုင်ငံများ၊ အစိုးရမဟုတ်သည့်အဖွဲ့အစည်းများ (NGO) နှင့် ကယ်ဆယ်ရေးအဖွဲ့အစည်းများအထိ ကျင့်ဝတ်စံနှုန်း အလွှာအသီးသီးမှ လူများပါဝင်ပေသည်။
ထို့ကြောင့် ကုမ္ပဏီ လိုအပ်နေသည်က အထူးပြု နည်းပညာရှိသော အရည်အချင်းမြင့်ပုဂ္ဂိုလ်များသာ ဖြစ်သော်လည်း...။
"ဟန်ဆောယောင်းက ဘာကိုများ ကောင်းကောင်းလုပ်တတ်လဲခင်ဗျ။"
ထိုစကားကို ကြားလိုက်တော့ ဆောယောင်း၏ခေါင်းထဲတွင် ပေါ်လာသည်က တစ်ခုတည်းသာ။
"သ..."
"...ကျေးဇူးပြုပြီး လူသတ်တာတွေအထိတော့ မသွားပါနဲ့။ အခုလို မြောက်ကိုရီးယားကို ထွက်ပြေးတယ်ဆိုတာကတောင် လွန်နေပါပြီ။"
ဂျောင်ဖီလ်ဂယူ နဖူးကို လက်ဖြင့်ဖိလိုက်တော့ ဆောယောင်းက တည်တည်ငြိမ်ငြိမ်ပင် ခေါင်းခါလိုက်သည်။
"မဟုတ်ပါဘူး၊ သန့်ရှင်းရေးနဲ့အိမ်မှုကိစ္စတွေကို ပြောတာပါ။"
~~~~~
မာကျောသော သံတိုင်များက တိုက်ခိုက်မှုကြောင့် ကြမ်းတမ်းစွာ လှုပ်ခါနေသည်။ ထောင်မှူးဖြတ်သွားတိုင်း ဝတ်လစ်စားလစ်ဖြစ်နေကြသော အကျဉ်းသားများက သံတိုင်များတွင်ကပ်ပြီး ဆဲဆိုကြ၊ ကြိမ်းမောင်းကြ၏။
လက်တစ်ဖဝါးစာလောက်ကျယ်သောနေရာတွင် ရာနှင့်ချီသော အကျဉ်းသားများကို ချုပ်နှောင်ထားသည့် ပုဂ္ဂလိကအကျဉ်းစခန်းထဲ၌...။
အကျဉ်းသားများက ဆာလောင်မွတ်သိပ်မှုကြောင့် ပိန်ချုံးနေသော ခန္ဓာကိုယ်များဖြင့် ရောထွေးပြီး ရန်ဖြစ်ကြ၊ သတ်ဖြတ်ကြ၊ တစ်ယောက်နှင့်တစ်ယောက် ကိုက်ဖြတ်ကြသည်အထိ ဖြစ်နေ၏။
ဤကဲ့သို့ စည်းကမ်းနှင့် တစ်ကိုယ်ရေသန့်ရှင်းမှုဆိုတာ မရှိသောနေရာတွင် လူတစ်ယောက်ကတော့ ဘေးဘီပတ်ဝန်းကျင်ကို ဂရုမစိုက်ဘဲ အသာအယာလဲလျောင်းကာ ပြတင်းပေါက်အပြင်ဘက်ကို ငေးကြည့်နေသည်။
တိမ်စိုင်တစ်ခု...
ပုံပန်းသဏ္ဌာန်ကတော့ မျက်လုံးအကြီးကြီးနှင့် ဇီးကွက်တစ်ကောင်လိုပင်။
သူက အကျဉ်းသားများ၏ ကြောက်စရာရန်ပွဲကို ဂရုမစိုက်ဘဲ ပါးစပ်ကို အကျယ်ကြီးဟကာ သမ်းဝေလိုက်သည်။
ဘယ်လောက်တောင် လက်သီးထိုးခဲ့သလဲမသိ၊ လက်ဖမိုးရှိ အရိုးများပေါ်မှ ခဲနေသောသွေးများပင် နဂိုအသားအရောင်လို ဖြစ်နေ၏။
တာဝန်ပြီးဆုံးတိုင်း ဤသို့သောနေရာမျိုးကို အနားယူရန် လာတတ်ခြင်းက နှစ်စဉ်ပြုလုပ်နေကျ အလုပ်တစ်ခုလိုဖြစ်နေပေပြီ။ သူက ပျင်းရိစွာ အိပ်စက်ပြီး မစားမသောက်ဘဲ ကျက်သရေမရှိသူများ တစ်ယောက်နှင့်တစ်ယောက် ရောထွေးသတ်ပုတ်ကာ ရန်ဖြစ်နေကြသည်ကို ငြီးငွေ့စွာ ကြည့်နေ၏။
ဒုညွှန်မှူးကတော့ အီဝူရှင်း၏ ထူးဆန်းသောအပြုအမူတွေအတွက် ပူညံပူညံလုပ်လေ့ရှိသော်လည်း သူကတော့ ဤကဲ့သို့ ရှုပ်ထွေးပွေလီသောနေရာတွင်မှ စိတ်အေးလက်အေးနေနိုင်သူပင်။
တစ်ခါတစ်ရံတော့ ပြန်သွားစရာ နေရာမရှိသဖြင့် ဤကဲ့သို့ပိတ်လှောင်ထားသော ပတ်ဝန်းကျင်ကို နှစ်သက်ခြင်းများလားလို့ တွေးမိ၏။
ထို့ကြောင့် သာမန်ဘဝတစ်ခုကို ဟန်ဆောင်နေရခြင်းက သူ့အတွက် အင်မတန် အဆင်မပြေခဲ့ပေ။
အချိန်ဇယားနှင့် ရုံးတက်ရုံးဆင်းလုပ်ရသော ရုံးဝန်ထမ်းတစ်ယောက်၊ ကြင်နာပြီး အနစ်နာခံတတ်သော ခင်ပွန်းတစ်ယောက်၊ သက်တောင့်သက်သာရှိသော မွေ့ရာပေါ်တွင်သာ အိပ်ရပြီး၊ မနက်စာကို အချိန်မှန်စားရသည့် ဘဝမျိုးဆိုသည်မှာ...။
ယခင်ကရော ယခုရော တွေးကြည့်လေလေ ရယ်စရာကောင်းလေလေပင်။ အိမ်ရှင်မဖြစ်သော သူ့ဇနီးက သူ့အတွင်းခံများကို လျှော်ဖွပ်ပေးသည့် ဘဝမျိုးက ဤသို့သောအလုပ်မျိုးကို ဆယ်နှစ်ကြာလုပ်ခဲ့ရသော သူ့အတွက် အင်မတန် အခက်တွေ့စေသော တာဝန်တစ်ခုဖြစ်၏။
ထို့အပြင် "ဂင်ဟျွန်း" ဟူသော နာမည်ကသာ သူ့ကမ္ဘာတစ်ခုလုံးဟု မှတ်ယူထားခဲ့သည့် တစ်စုံတစ်ယောက်ကရော။ ထိုအချိန်အတောအတွင်းက မွန်းကျပ်စရာ ချစ်ခြင်းမေတ္တာကိုတွေးမိတော့ သူ့မျက်နှာက အလိုလိုရှုံ့မဲ့သွားရသည်။
ဖြစ်ချင်ဖြစ် လည်ပင်းကို ဓားဖြင့်အလှီးခံရသည်ကမှ ကောင်းသေး၏။ ထိုသို့သောလူ၏ လက်ကိုကိုင်ပြီး အတူတူ လမ်းလျှောက်ရသည့်အဖြစ်ကတော့...
သူက ယားယံနေသော အရေပြားကို လက်သည်းဖြင့် ကြမ်းကြမ်းဖိလိုက်သည်။ ဆီလီကွန်မျက်နှာဖုံးကို အချိန်ကြာကြာ တပ်ထားရလျှင် အမြဲတမ်း ထိုသို့ဖြစ်လေ့ရှိ၏။
ယနေ့အထိဆိုလျှင် ဘယ်နှစ်ရက်တောင် ဝတ်ထားမိပြီလဲ။ ခြောက်သွေ့နေသော မျက်လုံးများက ဖြည်းဖြည်းချင်း မှိတ်လိုက်ဖွင့်လိုက်ဖြစ်သွားသည်။
"...အ"
ထိုအချိန်တွင် သွားတစ်ချောင်းက နာကျင်လာ၏။ ကောင်းကင်ကို မျက်နှာချင်းဆိုင်ထားသောနဖူးက ရှုံ့မဲ့သွားတော့သည်။
"ဒီဟာကို စောစောကတည်းက ဖျက်ဆီးပစ်ခဲ့ရမှာ။"
သူက မေးရိုးကို ကိုင်ထားရင်း မျက်နှာတစ်ခြမ်းကို မဲ့လိုက်သည်။
သွားကိုက်ရသည့် အကြောင်းရင်းကား တစ်ခုတည်းပင်။ လျှပ်စစ်စီးဆင်းနေသော သွားထဲတွင် တစ်လတစ်ကြိမ် black အေးဂျင့်များ အသက်ရှင်လျက်ရှိကြောင်း သတင်းပို့ရန်အတွက် အသုံးပြုသည့်ကိရိယာတစ်ခု ထည့်ထား၏။
ထိုကိရိယာကို ကြမ်းကြမ်းဖိလိုက်လျှင် အသက်ရှင်လျက်ရှိကြောင်း သတင်းပို့ပြီးသားဖြစ်ပြီး၊ အပြန်အလှန်အားဖြင့်လည်း ဤအတိုင်းပင်...။
ဒုတ်...ဒုတ်...ဒုတ်...
သွားက အဆက်မပြတ် တုန်ခါနေ၏။
ဤသည်က ပုံမှန်စည်းမျဉ်းတစ်ခုဖြစ်သလို လျှို့ဝှက်ကုဒ်တစ်ခုလည်းဖြစ်သည်။ ဆက်တိုက်ဆိုသလို ခံစားရသော နာကျင်မှုက ဦးနှောက်တစ်ခုလုံးကို သက်ရောက်စေ၏။
အရေးပေါ်ပြန်လာရန် ဆင့်ခေါ်မိန့်ပင်။
အီဝူရှင်းက ထောင်မှူးကို ဒေါ်လာတစ်လိပ် ပေးလိုက်သည်။ 'ကောင်းကောင်း အနားယူပြီးပါပြီ' ဟု နှုတ်ဆက်လိုက်တော့ နှစ်ပေါင်းများစွာကတည်းက အပေးအယူလုပ်လာခဲ့သော ထောင်မှူးက ရှေ့သွားများပေါ်အောင် ရယ်ပြပြီး နှုတ်ဆက်လေ၏။
~~~~~
အပြင်ရောက်သည်နှင့် အသင့်ပြင်ဆင်ထားသော ကားထဲသို့ဝင်ပြီးလျှင်ဝင်ပြီးချင်း မျက်နှာဖုံးကို ချက်ချင်းချွတ်လိုက်သည်။
ယခင်စစ်ဆင်ရေးများတုန်းကကဲ့သို့ အစားထိုးရန် အချိန်မရဘဲ ယခုတစ်ခေါက်တော့ ရက်သတ္တပတ်အတော်ကြာအောင် ပစ်ထားခဲ့ရသဖြင့် အရေပြားများ နီရဲကာ ယားယံနေ၏။
သူက ချက်ချင်းပင် အေးစက်နေသော ရေသန့်ဘူးကို မျက်နှာပေါ် လောင်းချလိုက်သည်။ ထို့နောက် လက်အိတ်ထည့်ထားသည့်ဘူးကိုဖွင့်ပြီး ကြိုးမဲ့နားကြပ်ကို အတင်းထိုးထည့်လိုက်၏။ ကားစက်နှိုးလိုက်ချိန်တွင် ရင်းနှီးနေသည် အသံတစ်ခု ထွက်ပေါ်လာသည်။
-အီဝူရှင်း၊ အမြန်ဆုံးပြန်လာခဲ့။
ထိုပုဂ္ဂိုလ်နှင့်ပတ်သက်ပြီး ပြောစရာ အထူးပြုစကားလုံးများ အများအပြားရှိ၏။ အမျိုးသားထောက်လှမ်းရေး၏ ပထမဆုံးသော အသက်အငယ်ဆုံး ဒုညွှန်မှူး၊ တစ်ဦးတည်းသော အမျိုးသမီးအမှုဆောင်အရာရှိ။ ထို့အပြင် အမျိုးသားထောက်လှမ်းရေး၏ အကြီးအကဲဖြစ်လာရန် အလားအလာအရှိဆုံး ပုဂ္ဂိုလ်။
နောက်ပြီး လွန်ခဲ့သောဆယ်နှစ်က UDT အထူးအေးဂျင့်ဖြစ်ခဲ့သူ အီဝူရှင်းကို ကိုယ်တိုင်စုဆောင်းခန့်အပ်ခဲ့သော အထက်အရာရှိဟောင်းလည်းဖြစ်၏။
"နုတ်ထွက်စာအတွက်ပဲ ဒါကို လက်ခံတာပါ။"
-ပြည်ပမှာရှိတဲ့ ငါတို့ရဲ့ ထောက်လှမ်းရေးအရာရှိနှစ်ယောက် သေသွားပြီ။
"အဲ့ဒီတော့ သတင်းမပို့ရကောင်းလားဆိုပြီး အသက်ရှင်နေတဲ့လူရဲ့ သွားကို အခုလိုမျိုး လာဆွလိုက်ရောလား။"
အီဝူရှင်းက မျက်တောင်တစ်ချက်မခတ်ဘဲ ကားကို အရှိန်ပိုတင်လိုက်သည်။ တစ်စုံတစ်ယောက် သေဆုံးသွားခြင်းက အထူးအဆန်းကိစ္စမဟုတ်တော့။ သူက လက်တစ်ဖက်ဖြင့် စတီယာရင်ဘီးကို ကိုင်ထားပြီး တောင့်တင်းနေသော လည်ပင်းကို နှိပ်နယ်လိုက်၏။
- အရင်ပြန်လာခဲ့၊ ပြန်လာပြီးမှ ပြောရအောင်။
"ပြန်လာဖို့က ပျင်းတယ်၊ ပြောဖို့ကလည်း ငြီးငွေ့နေပြီ။"
-ငါက စောင့်ပါဦးလို့ ပြောခဲ့သားပဲ။ နင့်လို အေးဂျင့်တစ်ယောက်ကို မွေးထုတ်ဖို့ဆိုတာ လွယ်တယ်များမှတ်နေလား။ အခုပဲ ဆယ်နှစ်အတွေ့အကြုံရှိတဲ့ အေးဂျင့်နှစ်ယောက် သေသွားပြီကို... ငါက ဒီလိုအခြေအနေမျိုးမှာ 'ကိုယ်ရေးကိုယ်တာအကြောင်းပြချက်' ဆိုပြီး ရေးထားတဲ့ နင့်ရဲ့ နုတ်ထွက်စာကို လွယ်လွယ်နဲ့ လက်ခံပေးမယ်များထင်နေလား။
"အဲ့ဒါကြောင့် အကျယ်တဝင့် ရှင်းပြခဲ့ပြီးပြီလေ။"
-...အေးလေ၊ မက်ဆေ့ဂျ်နဲ့။ 'စိတ်ရောဂါဖြစ်နေသည်' ဆိုပြီးတော့။"
ကြိုးမဲ့နားကြပ်ထဲမှတစ်ဆင့် ဒုညွှန်မှူး၏ အသက်ပြင်းပြင်းရှူလိုက်သည့်အသံကို ကြားလိုက်ရ၏။ အီဝူရှင်းက နှုတ်ခမ်းထောင့်စွန်းကို ခပ်မိုက်မိုက်ပင့်လိုက်သည်။
"ဒါဆို ဒီတစ်လျှောက်လုံး စိတ်မှန်တဲ့လူလို့ ထင်နေခဲ့တာလားဗျ။"
~~~~~
Miel's Translations