မောင်မောင့် ချစ်ဇနီး တော်တော်ထက်
အခန်း (၁၅) လုံရှိုးလန်
ကျင်းလိဝေ လျင်လျင်မြန်မြန် မရှောင်လိုက်ပါက သူမ၏ လက်သီးချက်ကြောင့် သူ၏ နှာခေါင်း ကျိုးသွားကာ သွေးထွက်သံယို ဖြစ်သွားနိုင်ပေသည်။
သူသည် မျက်စိတစ်မှိတ် အတွင်းမှာ သူမ၏ လက်ကို ဖမ်းဆုပ်လိုက်လေသည်။ သူမ၏ သေးသွယ်သော လက်သီးထဲမှ စွမ်းအားများ နစ်နေအောင် ပါဝင်သဖြင့် သူ့မျက်စိများပင် မှိတ်သွားလေသည်။
" တော်သေးတာပေါ့။ " သူသည် ထိုသို့ ရေရွတ်လိုက်လေသည်။
ဒေါသထွက်သော မိန်းကလေး မဟုတ်ပါ ဒေါသ ထွက်နေသော မိန်းမငယ်သည် နောက်တစ်စက္ကန့်တွင် ဆိုဖာပေါ်မှ ခုန်ဆင်းက တခြားသို့ ရွေ့သွားလေသည်။ သူမ၏ မျက်လုံးများသည် သူ့ကို စူးစူးရဲရဲကြည့်နေသည့် ပုံစံမှာ သူ့အား ကျားတစ်ကောင်လို ဝါးစားတော့မည့် ပုံစံ ပေါ်လေသည်။
သူသည် မျက်ခုံးကို တစ်ချက်ပင့်လိုက်ပြီး စောစောက သူမ ထိုင်ခဲ့သည့် ဆိုဖာအနီးရှိ ကြမ်းပြင်ပေါ်တွင် ကျကျန်ခဲ့သည့် ရုရှားဘာသာ နှင့် ရေးထားသည့် စာအုပ်ကို သူက ကောက်လိုက်လေသည်။
" ငါတစ်ခုခု မေးချင်လို့ပါ။ ဒီလိုမျိုး လွန်လွန်ကဲကဲ တုန့်ပြန်စရာ မလိုပါဘူး။ " သူသည် ထိုသို့ ရေရွတ်ရင်း စာအုပ်ကို ကြည့်လိုက်လေသည်။ သို့သော် စာအုပ်ထဲမှ စာလုံးများကို သူက တစ်လုံးမျှ မသိပါချေ။
လွန်လွန်ကျူးကျူး တုန့်ပြန်မိသည်ဟု သူမခံစားရလေသည်။ အိုင်းရစ်လုံ သည် စိတ်ကို တည်ငြိမ်အောင် ထိန်းချုပ်နေသော်လည်း ထိန်းချုပ်၍ မရပေ။
ထိုအကြောင်းပြချက်ကြောင့် သူသည် ဒဏ်ရာရရှိနိုင်သည်ဟု သူမတွေးမိလေသည်။ ထိုသူသည် ခန့်ညားထည်ဝါသည့် စီးပွားရေးသမား အင်္ကျီကို ဝတ်ဆင်ထားပြီး ချောမောလှပသည်သာ မက သန်မာသောသူ ဖြစ်ပေသည်။
သူမ၏ ရင်ခုန်သံကား မြန်လွန်းနေသည် မဟုတ်ပေလော။
ကျင်းလိဝေ က ထိုင်လိုက်လေသည်။ " လုံလျှိုးလန် ။ မင်း ဒီစာတွေကို ဖတ်တတ်လား။ "
သူမ၏ မျက်လုံးသည် စူးရှသွားပြီး မျက်လုံးထဲတွင် သံသယများနှင့် ပြည့်နှက်နေသည်။ ဤလူသည် အိုင်းရစ်လုံ၏ ငယ်နာမည်ကို အဘယ်ကြောင့် သိနေရသနည်း။
" ရှင်က ဘယ်သူလဲ။ " သူမသည် သံသယနှင့် မေးခွန်းမေးလေသည်။
" မင်းက ရုရှား ဘာသာစကားကို ဖတ်တတ်တာလား။ " သူသည် သူမ၏ မေးခွန်းကို လျစ်လျူရှုပြီး ထိုသို့ မေးလိုက်လေသည်။
" ကျွန်မ ဘာလုပ်လုပ် ဘာစာတွေပဲ ဖတ်ဖတ် ရှင်နဲ့ မဆိုင်ပါဘူး။ " သူမသည် နောက်ထပ် စကားလုံး
တစ်လုံးကို ထပ်ထည့် လိုက်လေသည်။ " ဆရာ။ "
သူမသည် စာအုပ်ကို ဆတ်ခနဲ လှမ်းယူဖို့ ကြိုးစားလိုက်သည်။ ထို့အပြင် ပိုက်ဆံအိတ်ကို သူမ ကောက်လိုက်ပြီး သံသယရှိသူနှင့် အဝေးသို့ ထွက်သွားလေသည်။ ဒွန်က ရောက်လာသင့် ပေပြီ။
ကျင်းလိဝေ သည် သူ့လက်ဆွဲအိတ် အတွင်းမှ ဖိုင်တွဲ တစ်ခုကို ထုတ်ယူလိုက်သည်။ " မင်းက ဒါကို ဖတ်နိုင်မလား ကြည့်ရအောင်။ " သူသည် ထိုသို့ ပြောပြီး ဖိုင်တွဲအား သူမဆီသို့ ပေးလိုက်လေသည်။
သူမသည် ဖိုင်တွဲကို တွန်းထုတ်လိုက်ပြီး သူမ၏စာအုပ်ကိုသာ ကြိုးစား ယူလေသည်။ သို့သော် ထိုသူသည် သူမ၏ စာအုပ်ကို ဓားစာခံ အဖြစ် ယူထားလေသည်။
သူ့ထံမှ စကားသံ ထွက်လာလေသည်။ " ဒီဖိုင်ကို အရင်ဖတ်ပြပါ။ ပြီးတော့ အဓိပ္ပါယ်ကို ပြောပြပါ။ အဲဒါမှ မင်းက ရုရှား စာကို ဖတ်နိုင်တယ် ဆိုတာကို ငါယုံကြည်နိုင်မယ်။ "
သူသည် သူမကို လှောင်ပြောင်နေသည် မဟုတ်ပေလော။ သူက အဘယ်ကြောင့် ဤသို့ လှောင်ပြောင်ဝံ့ သနည်း။ သူက သူမကို ယုံသည်ဖြစ်စေ မယုံသည် ဖြစ်စေ သူမအတွက် ဘာမျှ မထူးဆန်းပေ။ သို့သော် သူက မည်သူနည်း။
သူမသည် သနားစရာကောင်းသည့် စာအုပ်ကို ထားခဲ့ပြီး ထွက်သွားချင်သော်လည်း ဖိုင်တွဲပေါ်ရှိ ရှိနေသော တစ်စုံတစ်ခုသည် သူမနှင့် ရင်းနှီးနေသည်။ ထို့နောက် သူမသည် ဖိုင်တွဲကို လှမ်းယူကာ စာများကို ဖတ်လေတော့သည်။
ကျင်းလိဝေ သည် စိတ်တိုနေသော မိန်းကလေး---မဟုတ်ပါ ယခု သူမသည် စိတ်တိုနေသော မိန်မငယ် တစ်ဦး ဖြစ်နေသည်။ သူသည် စီးပွားရေး အဆိုပြုချက် စာဖိုင်ကို ဖတ်နေသည့် အမျိုးသမီးငယ်အား ကြည့်နေသည်။ သူမသည် ထိုစာများကို အလေးအနက်ထား၍ ဖတ်နေပုံရသည်။ သူက သူမကို ပြုံးပြချင်သော်လည်း သူမကို ဂရုမစိုက်သည့် ပုံစံနှင့်သာ နေလေသည်။
သူမသည် ရုရှားဘာသာစကားကို ဖတ်နိုင်သည့်သူအဖြစ် အခြားသူများအတွက် အထင်ကြီးစရာကောင်းသည့် ပုံစံဖြစ်နေပြီလော။
သူမနှင့် ပတ်သက်သည့် အရာများကို သူက စုံစမ်းပြီးနေပြီ ဖြစ်လေသည်။ သူမသည် ငယ်စဥ်က ဖျော်ဖြေရေး လုပ်ငန်းကိုသာ လုပ်ကိုင်ခဲ့ပြီး ကျောင်းကိုသာ တက်ခဲ့လေသည်။ သူ့အဖေ၏ အမိန့်ကြောင့်သာ မဟုတ်လျှင် သူမက အထက်တန်း ဘွဲ့တစ်ခုတောင် ရမည် မဟုတ်ပေ။ သူမ၏ ပညာအရည်အချင်းသည် အထင်ကြီးစရာ မရှိပေ။
သူမက ဘာသာစကားများကို တိတ်တဆိတ် လေ့လာခြင်း ရှိမည်မဟုတ်ပေ။ ယခုမှာ သူမသည် အင်္ဂလိပ် ဘာသာ စကားအပြင် ရုရှားဘာသာစကားအား ဖတ်နိုင်သည်ကို သူက မယုံကြည်နိုင်ပေ။
သူသည် အစောပိုင်းကပင် စားသောက်ဆိုင်ထဲမှာ ရှိနေပြီး စီးပွားရေး လုပ်ငန်းရှင်များနှင့် စကားပြောရင်း စားသောက်နေခဲ့ လေသည်။ သူသည် တခြား
သူများကဲ့သို့ သူမ၏ စန္ဒယားတီးသံနှင့် သီချင်းဆိုခြင်းများကို အာရုံစိုက်မိလေသည်။
သူမနှင့် ရင်းနှီးနေသည်ဟု သူက တွေးမိလေသည်။ ထိုနောက်မှ သူက သူမကို မှတ်မိလေသည်။ သူမသည် လုံလျှိုးလန် ဖြစ်ပြီး သူမ၏ အဆိုတော် အမည်မှာ အိုင်းရစ်လုံ ဖြစ်လေသည်။ သူမသည် သူ့တပည့်များကို အမိန့်ပေးပြီး စောင့်ကြည့်ခိုင်းထားသူ ဖြစ်နေသည်။
သူမသည် ကားမတော်တဆမှု ဖြစ်ပြီးနောက်ပိုင်း များစွာ ပြောင်းလဲသွားသွာကို သူကြားသိခဲ့လေပြီ။ သို့သော် ယခု သူမကို မျက်မြင်ကိုယ်တွေ့ တွေ့လိုက်ရလေပြီ။ လူတစ်ယောက်သည် ဤမျှလောက် ပြောင်းလဲသွားသည်ကို သူက မယုံကြည်နိုင်ပေ။ ဧကန္တ ဤမိန်းကလေးသည် ဟန်ဆောင်တာပဲ ဖြစ်ပေမည်။
သူသည် သူမကဲ့သို့ သူ၏ လက်ထောက်ကို ဧည့်ခန်းတွင် ထိုင်စောင့်နေခြင်း ဖြစ်လေသည်။ သူသည် သူမနှင့် စကားမပြောချင်ပေ။ သို့သော် သူမက ရုရှား
စာအုပ်အား ဟန်ဆောင်ဖတ်နေသည်ကို မြင်သောအခါ သူမကို မသိချင်ဟန်ဆောင် နေ၍ မရတော့ပေ။
ထို့ကြောင့် သူသည် သူမ၏ ပုခုံးကို အသာလေး ပုတ်လိုက်သောအခါ သူမလန့်ပြီး ကျားမ တစ်ကောင်လို သူမက ပြန်တိုက်ခိုက် မိလေသည်။
" ရှင်က ကျင်း ကော်ပိုရေးရှင်းက ကျင်းလိဝေ လား။ " သူမသည် စာကို မိနစ်အနည်းငယ်မျှ ဖတ်ပြီးနောက် သူ့အား စကားပြောလေသည်။ " ရှင်က ဂလာကထီကာ (နဂါးငွေ့တန်း) နဲ့ လက်တွဲဖို့ စီစဥ်နေတာလား။ "
သူ့မျက်လုံးထဲတွင် အံ့အားသင့်သည့် အရိပ်အယောင် သန်းနေလေသည်။ ဂလာကထီကာ သည် ရုရှား ကုန်သွယ်ရေး ကုမ္ပဏီတစ်ခု ဖြစ်လေကာ တရုတ်စျေးကွက်ကို ထိုးဖောက်လာပြီး သူ့ကုမ္ပဏီနှင့် ပူးပေါင်းလိုသောကြောင့် ဤစီးပွားရေး အဆိုပြုချက်ကို သူတို့ပေးလိုက်ခြင်း ဖြစ်ပေသည်။ သူမသည် ရုရှားလို ရေးထားသည့် အကြောင်းအရာ
များကို မည်သို့ သိနေသနည်း။
သူသည် ဤစာများကို မဖတ်တတ်သဖြင့် တရုတ်ဘာသာပြန် နှင့် ဖတ်ရလေသည်။ သူမသည် ရုရှားစာကို အမှန်တကယ် ဖတ်နိုင်သည်လော။ သို့သော် သူမ၏ နောက်ထပ် စကားလုံးသည် သူ့အား ပို၍ အံ့အားသင့်စေသည်။
" ဂလာကထီကာ နဲ့ ပူးပေါင်းပြီး စီးပွားရေး မလုပ်သင့်ဘူးလို့ ထင်ပါတယ်။ ရုရှား ကုမ္ပဏီနဲ့ စီးပွားရေး ပူးပေါင်း လုပ်ချင်တယ်ဆိုရင် သင့်လျော်တဲ့ ရုရှားကုမ္ပဏီတွေ အများကြီးရှိပါတယ်။ ဂလာကထီကာ က ပြည့်တန်ဆာ လုပ်ငန်း ၊ လူကုန်ကူးမှုနှင့် လက်နက် မှောင်ခို လုပ်ငန်းတွေကို လုပ်ဆောင်နေတဲ့ ကုမ္ပဏီ တစ်ခုဖြစ်ပါတယ်။ ကျင်း ကော်ပိုရေးရှင်းက တိုင်းပြည်ရဲ့ နံပါတ်တစ် ကုမ္ပဏီ တစ်ခု ဖြစ်ပါတယ်။ ဒီလို ညစ်ပတ်တဲ့ ကုမ္ပဏီနဲ့ ပူးပေါင်းလိုက်ရင် ရှင့်ကုမ္ပဏီရဲ့ ဂုဏ်သိက္ခာကို မထိခိုက်စေဘူးလား။ "
ကျင်းလိဝေ သည် သူမအား လေးလေးနက်နက်နှင့် ကြည့်မိလေသည်။ သူ့မျက်လုံးထဲတွင် သံသယ များ
နှင့် ပြည့်နှက်နေလေသည်။
အခန်း (၁၅) ပြီး။
ဘာသာပြန် ထူးထူး