အပိုင်း ၃၇

ရဲတိုက်အတွင်းသို့ဝင်ရမည့်တံခါး ပွင့်သွားခဲ့သည်။ ခါဆယ်ရ်က ချက်ချင်းဝင်ရောက်ရန် ပြင်နေသည့် အာဘူ၏ဇက်ကြိုးကို ဆွဲပြီးဟန့်တားလိုက်၏။ သူက ခေါင်းကိုလှည့်ကာ စောစောက ဂိတ်တံခါးဖွင့်ပေးခဲ့သည့် ရဲတိုက်အစောင့်တပ်သားများထဲမှ တစ်ယောက်ကို အသေအချာကြည့်လိုက်သည်။

ခက်ခဲသည့်တိုက်ပွဲကို အောင်မြင်စွာ အဆုံးသတ်နိုင်ခဲ့သည့် အချိန်က စိတ်အပန်းဖြေရန် အကောင်းဆုံးအချိန်ပင်။ သို့သော် ထိုအချိန်တွင် ပေါ့ဆမှုက အပြင်းထန်ဆုံး အားနည်းချက်ဖြစ်လာနိုင်ပေသည်။

ယင်းကား နတ်ရွာစံ ခမည်းတော်၏ သွန်သင်မှုပင်။ ထို့ကြောင့် ခါဆယ်ရ်တစ်ယောက် ယခုအချိန်တွင် စိတ်ဖိစီးမှုအမြင့်ဆုံးဖြစ်နေ၏။

ပုံမှန်အချိန်သာဆိုလျှင် သတိမထားမိဘဲ ကျော်သွားလိုက်မည့်အရာဖြစ်သော်လည်း စူးရှသည့်အမြင်က ထိုနန်းတွင်းအစောင့်ကို မသင်္ကာဖြစ်စေခဲ့သည်။ တစ်ချက်အကြည့်မှာပင် ထိုအစောင့်တပ်သားထံမှ ရင်းနှီးနေသော အန္တရာယ်အငွေ့အသက်ကို ခံစားမိနေ၏။

ရဲတိုက်မြို့ရိုးအပြင်ဘက်တွင် စောင့်နေသည့် အစောင့်တပ်သားမှာ ရာထူးနိမ့်သူပင်။ ဘုရင်မင်းမြတ်တွင် ရာထူးမြင့်သူကို အစောင့်တပ်သားလုပ်ခွင့်ပေးစရာအကြောင်းမရှိပေ။

ပတ်ဝန်းကျင်က မှောင်မိုက်နေ၏။ အရုဏ်တက်ချိန်ဖြစ်သော်လည်း လူတစ်ဦး၏မျက်နှာကို ခွဲခြားနိုင်လောက်အောင် မလင်းသေးပေ။ သို့သော် ခါဆယ်ရ်ကား စိတ်ထဲတွင် ဆန္ဒရှိပါက အမှောင်ထဲတွင်လည်း အရာဝတ္ထုများကို ကွဲပြားစွာမြင်နိုင်သူပင်။

သားရဲများ၏ ညဘက်တွင်မြင်နိုင်သော မျက်လုံးများကဲ့သို့ သူ့မျက်လုံးများမှ အပြာနုရောင်အလင်းများ ထွက်ပေါ်လာ၏။

မြေပြင်ကို ငုံ့ကြည့်နေသော အစောင့်တပ်သား၏ မျက်နှာကို မြင်းပေါ်တွင်ထိုင်နေသော ခါဆယ်ရ်၏ မျက်လုံးများက တိကျရှင်းလင်းစွာမမြင်နိုင်ခဲ့။

"ခေါင်းမော့လိုက်စမ်း။"

အစောင့်တပ်သား၏ ပခုံးများ တုန်သွားတော့သည်။ သူက ခဏကြာအောင် တုံ့ဆိုင်းနေပြီးမှ ဖြည်းဖြည်းချင်း ခေါင်းမော့လာ၏။ တင်းမာနေသော ထိုလူ၏မျက်နှာမှာ ကျိန်းသေပေါက် ခါဆယ်ရ်သိသော မျက်နှာပင်။

"ဆဗဲန်။"

"ဟုတ်ကဲ့ပါ၊ အရှင်မင်းကြီး။"

ခါဆယ်ရ်က မျက်လုံးများကို ကျဉ်းမြောင်းသွားသည်အထိ မှေးကြည့်လိုက်သည်။ ဆဗဲန်က တံခါးစောင့်လုပ်နေသည်တဲ့လား။

လာ့ခ်နှင့် ကြာရှည်လှသော တိုက်ပွဲပြီးဆုံးပြီးနောက် အနီးအနားတွင် လှည့်လည်သွားလာနေရသဖြင့် စစ်သည်တော်များ၏ပုံစံမှာ ကြည့်မကောင်းတတ်ကြပေ။ သို့သော် ဆဗဲန်ကား အလွန်သန့်ပြန့်နေ၏။

အကယ်၍သာ သူက စစ်မြေပြင်မှ ထွက်ခွာလာပြီး ဤနေရာတွင် တံခါးစောင့်အဖြစ် လာရောက်တာဝန်ယူခဲ့သည်ဆိုပါက ယခုတိုက်ပွဲ၏ ခေါင်းဆောင်ဖြစ်သူ ဘုရင်မင်းမြတ်၏ခွင့်ပြုချက်ကို ယူရပေမည်။ ခါဆယ်ရ်ထံသို့ ထိုသို့သော အစီရင်ခံတင်ပြချက်မျိုး ရောက်မလာခဲ့ပေ။

ဆဗဲန်တစ်ယောက် တိုက်ပွဲတွင် ပါဝင်ခဲ့ခြင်းမရှိဟူသည့် နိဂုံးချုပ်အဖြေ ထွက်လာ၏။

ခါဆယ်ရ်၏မျက်လုံးများက အေးစက်သောအငွေ့အသက်များကို ထုတ်လွှတ်နေရာမှ ချက်ချင်းပြန်ငြိမ်သက်သွားလေသည်။ ဆဗဲန်က ခါဆယ်ရ် တန်ဖိုးထားသော စစ်သည်တော်တစ်ယောက်ပင်။ ရိုးသားဖြောင့်မတ်သော စရိုက်ရှိပြီး ထူးချွန်သည့် စစ်သည်တော်ဖြစ်ကာ လာ့ခ်နှင့် တိုက်ခိုက်ရာက သေရမည်ဆိုလျှင်တောင် သွေးကြောင်စွာ ပြုမူမည့်သူမဟုတ်။

"နောက်က လိုက်ခဲ့။"

"…ဟုတ်ကဲ့ပါ၊ အရှင်မင်းကြီး။"

ပွင့်နေသော ဂိတ်တံခါးဝမှ ဘုရင်မင်းမြတ်စီးလာသောမြင်းက ရှေ့ကနေဝင်သွားပြီး အနောက်မှ လူများလိုက်ပါလာကြသည်။

အတွင်းဘက်မြို့ရိုးတံတိုင်း၏ အနက်ရှိုင်းဆုံးနေရာတွင်ရှိသော ရဲတိုက်ဆီသို့ရောက်ရန် အင်မတန်ဝေး၏။ အဝေးမှကြည့်လျှင်ပင် အင်မတန်ကြီးမားလှသည့် ရဲတိုက်ဖြစ်ပေသည်။

အမှောင်ထဲတွင် မြုပ်နေသင့်သော ရဲတိုက်ဆီမှ အလင်းရောင်များ ဖြာထွက်နေ၏။

ခါဆယ်ရ်က မြင်းကို ရပ်လိုက်သည်။ အပါးတော်မြဲ အကြီးအမှူးက အစေခံ ဆယ်ယောက်ကျော်ကိုခေါ်ကာ အပြေးထွက်လာခဲ့၏။

တိုက်ပွဲပြီး၍ အိမ်ပြန်လာသော ရှင်ဘုရင်ကို ကြိုဆိုဖို့ရန်အတွက် အင်မတန် ရိုးရှင်းလှပေသည်။ သို့သော် ဤရဲတိုက်တွင်တော့ မြင်တွေ့နေကျ မြင်ကွင်းတစ်ခုပင်။

ခါဆယ်ရ်က ပုံမှန်အားဖြင့် မကြာခဏ အပြင်ထွက်လေ့ရှိ၏။ သာမန်အရပ်သားတွေ ကိုယ့်အိမ်ကိုယ် ဝင်ထွက်သလို တစ်နေ့ကို အကြိမ်ပေါင်းများစွာ ရုတ်တရက် ထွက်သွားလိုက်၊ ပြန်ဝင်လာလိုက် လုပ်တတ်သူဖြစ်သည်။ ဘယ်ကိုသွားမည်ဟု ကြိုမပြောဘဲ ထွက်သွားလိုက်၊ ဘာမှမပြောဘဲ ပြန်ဝင်လာလိုက် မကြာခဏ လုပ်နေကျပင်။

ယနေ့လည်း ခါဆယ်ရ်က ဘယ်တော့ပြန်လာမည်ဟု ကြိုတင်သတင်းပို့ထားခြင်းမရှိခဲ့။ အခုလေးတင် ဂိတ်တံခါးဖွင့်လိုက်ပြီး ဘုရင့်ထက် တစ်လှမ်းအရင် ပြေးသွားသူက သတင်းပို့ခဲ့ခြင်းဖြစ်ပေလိမ့်မည်။

အာဘူ၏ ကျောပေါ်မှ ဆင်းလာသော ဘုရင်မင်းမြတ်အပါးကို အပါးတော်မြဲအကြီးအမှူးက ချဉ်းကပ်လာပြီး ဦးညွှတ်ခဲ့သည်။

"ဘေးကင်းတဲ့ပုံစံကို တွေ့မြင်ရတဲ့အတွက် ကျွန်တော်မျိုး ကျေးဇူးတင်ဝမ်းမြောက်မိပါတယ်၊ အရှင်မင်းကြီး။"

"အပါးတော်မြဲ အကြီးအမှူး။"

"ဟုတ်ကဲ့ပါ၊ အရှင်မင်းကြီး။"

"ဒီမီးတွေက ဘာတွေလဲ။"

ရဲတိုက်တွင် မြောက်မြားလှစွာသော အခန်းများကို မီးထွန်းရန်အတွက် အချိန်ယူရပေသည်။ ဘုရင် ဘယ်တော့ပြန်လာမလဲ၊ ဒီနေ့ ပြန်လာမလားဆိုသည်ကိုပင် မသိရသည့်အတွက် တစ်ညလုံး မီးထွန်းထားခဲ့သည်ဟူသောသဘောပင်။

မီးထွန်းရာတွင်သုံးသော ဆီက အဖိုးတန်ပစ္စည်းဖြစ်သည်။ ဤမျှလောက်သော အဖိုးတန်ပစ္စည်းလေးအတွက်နှင့် တုန်လှုပ်နေရလောက်အောင် နန်းတော်က ဆင်းရဲနေခြင်းမျိုးမဟုတ်သော်လည်း အရေးပေါ်အခြေအနေဖြစ်နေ၏။ အပါးတော်မြဲ အကြီးအမှူးတွင် ရဲတိုက်ထဲ၌ သိုလှောင်ထားသော ပစ္စည်းများကို လက်လွတ်စပယ်သုံးပိုင်ခွင့် မရှိပေ။

"အရှင်မိဖုရားက အမိန့်ပေးခဲ့တာပါ။"

ထင်မှတ်မထားသောလူက ရုတ်တရက် စကားထဲပါလာသည်။ ခါဆယ်ရ်လည်း အံ့အားသင့်မှုကို ဖုံးကွယ်ပြီး ခပ်တိုးတိုး မေးလိုက်၏။

"…မိဖုရားက ဘာဖြစ်လို့လဲ။"

"အရှင်မိဖုရားက သန်းခေါင်ကျော်တဲ့အထိ အရှင်မင်းကြီးကို စောင့်နေရင်းကနေ အိပ်ပျော်သွားခဲ့တာပါ။ ပြီးတော့ နောက်ကျမှဖြစ်ဖြစ် အရှင်မင်းကြီး ပြန်လာလောက်မလား မသိနိုင်တဲ့အတွက် မီးတွေထွန်းထားဖို့ အမိန့်ပေးခဲ့ပါတယ်….အပြင်ကနေ အိမ်ပြန်လာတဲ့အခါ မီးတွေအကုန်ငြိမ်းနေရင် ဝမ်းနည်းသလိုလို ခံစားရလိမ့်မယ်လို့ ပြောပြီးတော့ပါ..."

အပါးတော်မြဲအကြီးအမှူးက အသံတိတ်နေချိန် ရှည်ကြာလာသဖြင့် အသာလေး မော့ကြည့်လိုက်မိသည်။ အကယ်၍များ ဘုရင်မင်းမြတ် အမျက်တော်ရှခဲ့မည်ဆိုလျှင် မိဖုရား၏ ရည်ရွယ်ချက်ကို အမှားအယွင်းမရှိစေဘဲ ရှင်းပြနိုင်ရန် စကားလုံးများထပ်ဖြည့်ဖို့ တွေးထား၏။

ဘုရင်မင်းမြတ်၏ မျက်နှာက တင်းမာနေသည်။ သို့သော် အမျက်တော်ရှနေဟန်တော့ မရှိခဲ့ပေ။ အပါးတော်မြဲ အကြီးအမှူးလည်း ဘုရင်မင်းမြတ်၏ မျက်နှာထားကို သတိထားပြီး အကဲခတ်လိုက်၏။

ခါဆယ်ရ်က မိဖုရား ရဲတိုက်ကို 'အိမ်' ဟု တင်စားခေါ်ဝေါ်ခြင်းကို သဘောပေါက်ဟန်မတူပေ။ သူက နန်းတော်ကို ထိုသို့သောအမြင်မျိုးဖြင့် တစ်ခါမှ မတွေးဖူးခဲ့သောကြောင့်ပင်။

ရဲတိုက်က ခိုင်မာသော ဘုရင့်အာဏာ၏ သင်္ကေတဖြစ်ပေသည်။ တိုင်းပြည်အဖြစ် အုပ်စိုးနေသကဲ့သို့ တစ်ချိန်တည်းမှာပင် ကာကွယ်စောင့်ရှောက်ပေးရမည့် အရာလည်းဖြစ်၏။

ခါဆယ်ရ်တစ်ယောက် အပါးတော်မြဲအကြီးအမှူး၏ အစီရင်ခံတင်ပြမှုကို မည်သို့တုံ့ပြန်ရမှန်း မသိခဲ့ချေ။ သူက လောလောဆယ် အရင်ဆုံးလုပ်ဆောင်ရမည့်အရာကို ပြန်တွေးလိုက်၏။ ဆဗဲန်ထံမှ ဖြစ်စဉ်အသေးစိတ်ကို နားထောင်ပြီးမှသာ အပြစ်ဒဏ်ကို ဆုံးဖြတ်ရပေမည်။

"ဆဗဲန်။ လိုက်ခဲ့။"

"ဟုတ်ကဲ့ပါ၊ အရှင်မင်းကြီး။"

ခါဆယ်ရ်လည်း နန်းတော်ထဲသို့ ဝင်လာခဲ့သည်။ အမြဲတစေ သွားနေကျလမ်းက ယနေ့ကျမှ အစိမ်းသက်သက်ဖြစ်နေသလိုပင်။

သူက နေဝင်ပြီးနောက် ရဲတိုက်ထဲတွင် ထွန်းရမည့် မီးအိမ်များကို အမှောင်ထဲတွင် ထွန်းစေခဲ့သည်။ လဲကျမသွားဘဲ ပတ်ဝန်းကျင်ကို မြင်ရစေရုံလောက်သာဖြစ်ပြီး ယခုကဲ့သို့ စင်္ကြံလမ်းထောင့်များတွင် အလုံးစုံမီးထွန်းထားခြင်းမျိုး တစ်ခါမှမရှိဖူးခဲ့။

ခါဆယ်ရ်က ရုံးခန်းထဲသို့ ရောက်သည်နှင့် အကျင့်ပါနေသည့်အတိုင်း စာကြည့်စားပွဲကို မျက်လုံးဖြင့်ဝေ့ဝဲကြည့်လိုက်၏။ ထို့နောက် စားပွဲဆီသို့ လျှောက်သွားကာ ဘာမှမရှိသည့် စားပွဲပေါ်ကို မျက်လုံးဖြင့် ထပ်မံစစ်ဆေးပြီး ပြောခဲ့သည်။

"ဆဗဲန်။ ဘယ်သူ့အမိန့်လဲ။"

ရုံးခန်းဆီသို့ လာနေသည့်လမ်းမှာပင် ခါဆယ်ရ် ကောက်ချက်ချထားပြီးသားဖြစ်၏။ လာ့ခ် အလိုက်ထွက်နေရာမှ ဆဗဲန်က သူ့ကိုယ်သူ ကာကွယ်ရန် ရှောင်ထွက်သွားခဲ့ခြင်းမဟုတ်။ ဆဗဲန်ကား မမှတ်မိနိုင်သော လူတစ်ဦး၏ အမိန့်ကို ရရှိခဲ့ခြင်းဖြစ်ပေမည်။

"နန်းရင်းဝန်ရဲ့ အမိန့်ကို ရခဲ့ပါတယ်။"

ခါဆယ်ရ်က ခေါင်းညိတ်လိုက်သည်။ သူ ခန့်မှန်းထားသည့်အတိုင်းပင်။

"အသေးစိတ်ပြော။"

"ရဲတိုက်အတွင်းဘက်ကို ကင်းလှည့်နေရင်း အရေးပေါ်အခြေအနေ တစ်စုံတစ်ရာ ပေါ်လာခဲ့ရင် သတင်းပို့ဖို့ မှာထားခဲ့တာပါ။"

"သတင်းပို့လိုက်ရတာမျိုးရှိလား။"

"ဟုတ်ကဲ့။ အတွင်းရဲတိုက်တံခါး ပွင့်သွားတဲ့အဖြစ် ရှိခဲ့ပါတယ်။"

"တံခါးပွင့်သွားတယ်၊ ဟုတ်လား။ ဘယ်သူဖွင့်တာလဲ။"

"အရှင်မိဖုရားရဲ့ ခွင့်ပြုချက်နဲ့ ရံရွေတော်မိန်းကလေးတစ်ယောက် ထွက်လာပါတယ်။"

ဆဗဲန်၏ အဖြေကို ကြားပြီးသည့်နောက် ခါဆယ်ရ်လည်း အခြေအနေကို လျင်မြန်စွာ နားလည်လိုက်လေသည်။

'မိဖုရားကို စောင့်ကြည့်ဖို့ လုပ်ခဲ့တာလား။'

ဘယ်ရုစ် မိဖုရားကို စောင့်ကြည့်နေရသည့် အကြောင်းရင်းကိုလည်း ခန့်မှန်းမိ၏။

'ခြောက်သွေ့ရာသီမှာ မိဖုရား ပျောက်သွားတဲ့ကိစ္စကြောင့်ပဲဖြစ်မယ်။'

ထိုမတိုင်မီက ဘယ်ရုစ်တွင် မိဖုရားနှင့် ထိပ်တိုက်ရင်ဆိုင်ရမည့် ကိစ္စမျိုးမရှိခဲ့။

'ဘယ်ရုစ်ရဲ့ စရိုက်နဲ့ လုပ်တတ်တဲ့လုပ်ရပ်ပဲ။'

ဘယ်ရုစ်က ပြီးပြည့်စုံမှုကိုသာ ရှာဖွေတတ်သော စိတ်ရောဂါရှိသည့်ပုံပင်။ တိုက်ပွဲကြာရှည်လာပါက လူတို့၏ စိတ်ဝင်စားမှုသည်လည်း စစ်မြေပြင်ဆီသို့သာ ရောက်ရှိသွားမည်ဖြစ်ပြီး ထိုအခွင့်အရေးကို အသုံးချ၍ မိဖုရားက တခြားအရာတွေများ လုပ်ဆောင်မလား မသိနိုင်ဟု သံသယဝင်ခဲ့ပေလိမ့်မည်။

သို့သော် ဦးနှောက်က နားလည်သော်ငြားလည်း ခါဆယ်ရ်၏စိတ်ထဲတွင်တော့ မကျေနပ်မှုတစ်မျိုးကို ခံစားလိုက်ရသည်။ ဘယ်ရုစ် သူ့လုပ်ပိုင်ခွင့်အာဏာထက် ကျော်လွန်ပြီး လုပ်ဆောင်ခဲ့ခြင်းကြောင့် မဟုတ်သလို၊ ဘယ်ရုစ်ကို သံသယဝင်၍လည်းမဟုတ်။

တစ်စုံတစ်ယောက်က မိဖုရားကို စောင့်ကြည့်နေသည်ဟူသော အချက်ကြောင့် စိတ်အနှောင့်အယှက် ဖြစ်ရ၏။ ယင်းမှာ ယုတ္တိတန်သော အကြောင်းပြချက်ကို ရေရေရာရာ မပြောနိုင်သည့် ခံစားချက်ဖြစ်နေသောကြောင့်ပင်။

"ဆဗဲန်။ သွားပြီး ဘယ်ရုစ်ကို ငါ့စကားပြန်ပါးလိုက်။ အကယ်၍ မိဖုရားရဲ့ ပတ်ဝန်းကျင်မှာ လူတွေစေလွှတ်ထားတယ်ဆိုရင် အားလုံးကို ဖယ်ရှားလိုက်ဖို့။ ရှေ့လျှောက် ငါ့အမိန့်မပါဘဲ အဲ့ ဒီလိုလုပ်မယ်ဆိုရင် ပြင်းပြင်းထန်ထန် အရေးယူခံရမယ်။"

"ဟုတ်ကဲ့ပါ၊ အရှင်မင်းကြီး။"

"ဒီကိစ္စကိုလည်း အသာလွှတ်ပေးမှာမဟုတ်ဘူး။ မကြာခင် ဆင့်ခေါ်ပြီးစစ်ဆေးမှာမို့လို့ အဲ့ဒီမတိုင်ခင် ရဲတိုက်ထဲ မလာဘဲနေဖို့ပါ ပြောလိုက်။"

"ဟုတ်ကဲ့ပါ၊ အရှင်မင်းကြီး။"

ဆဗဲန် ပြန်ထွက်သွားပြီးသည့်နောက်တွင် ခါဆယ်ရ်က အပါးတော်မြဲ အကြီးအမှူးကို ခေါ်လိုက်သည်။

"အပါးတော်မြဲ အကြီးအမှူး၊ ဘာတွေဖြစ်ခဲ့လို့လဲ။"

"အရှင်မင်းကြီးအနေနဲ့ စိုးရိမ်ရမဲ့ အကြောင်းကိစ္စမျိုးရှိတယ်လို့ မကြားမိပါဘူး။"

"ဒါဆို ဘာဖြစ်လို့လဲ......"

ခါဆယ်ရ်က ရှင်းလင်းသပ်ရပ်စွာ စီစဉ်ထားသော စာကြည့်စားပွဲကို ငေးကြည့်လိုက်သည်။

နန်းရင်းဝန် ဘယ်ရုစ်မှာ တိုင်းရေးပြည်ရာများတွင်သာ ကြီးမားသော အခွင့်အာဏာကို လွှဲအပ်ခြင်းခံထားရသူဖြစ်၏။ တိုင်းပြည်ရေးနှင့် မသက်ဆိုင်သော ရဲတိုက်အတွင်းပိုင်းမှ ကိစ္စများတွင် ဝင်ရောက်စွက်ဖက်ပိုင်ခွင့်မရှိပေ။ တော်ဝင်မိသားစု၏ ကိစ္စများကို တော်ဝင်မိသားစုမှသာ စီမံခန့်ခွဲပေသည်။

ထို့ကြောင့် ခါဆယ်ရ် ရဲတိုက်မှ အချိန်အကြာကြီး ထွက်သွားပြီး ပြန်လာခဲ့လျှင် အထိန်းတော်ချုပ် တင်သွင်းသော အတည်ပြုရမည့် စာရွက်စာတမ်းများကို ဦးစားပေး၍ စစ်ဆေးရလေ့ရှိ၏။ အကြောင်းမူကား ဘုရင်မင်းမြတ်သာလျှင် ထိုကိစ္စများကို ဖြေရှင်းနိုင်သောကြောင့်ပင်။

ရက်ပိုင်းအတွင်း ဘာမှမဖြစ်ခဲ့ဘူးဆိုလျှင်တောင်မှ အစီရင်ခံစာ တိုတိုလေးတစ်စောင်လောက်တော့ တင်ပြထားရပေမည်။ အထိန်းတော်ချုပ်၏ အမှားများလားဟု သံသယဝင်မိ၏။

"အထိန်းတော်ချုပ်ကို...ဘာမှမဟုတ်တော့ဘူး။"

အိပ်နေသောသူကိုပါနှိုး၍ ထောက်ပြမေးမြန်းရမည့် ကိစ္စတော့မဟုတ်ပေ။ အစီရင်ခံစာတင်ရန် မေ့လျော့သွားရလောက်သည်အထိ ကိစ္စထွေထွေထူးထူးမရှိဘဲ ရက်ပိုင်းလောက် အေးအေးချမ်းချမ်းကုန်ဆုံးခဲ့သည်ဆိုလျှင် ပို၍ပင်ကောင်းသေး၏။

"ဧကန္တ မိဖုရားက ကျုပ်ကို စကားပါးထားတာတွေ ဘာတွေများ ရှိသေးလား။"

"ကျွန်တော်မျိုးကို စကားပါးခဲ့တာမျိုးတော့ မရှိပါဘူး။"

'ဘာလို့ ငါ့ကို စောင့်နေတာပါလိမ့်။'

ဘာကိစ္စကြောင့် မိဖုရားက သူ့ကို စောင့်နေခဲ့သည်ကို ခန့်မှန်း၍မရခဲ့ပေ။

"အရှင်မင်းကြီး။ ရေချိုးရေ အသင့်ဖြစ်ပါပြီ။ အခုပဲ ဝင်ပါတော့မလား။"

ခါဆယ်ရ့်တွင် ယခုအထိ အပြင်ဘက်၌ ဖြေရှင်းရမည့်ကိစ္စများ များစွာရှိနေသေး၏။ အချိန် ခဏလေးဖယ်ပြီး ရဲတိုက်ထဲသို့ ခဏဝင်လာခဲ့ခြင်းသာ။

လုံခြုံရေး အရေးပေါ်အခြေအနေကြောင့် လှုပ်ရှားမှုနယ်ပယ်ကို ကန့်သတ်ခြင်းခံထားရသော နန်းတွင်းသူ နန်းတွင်းသားများ၏ လက်ရှိအခြေအနေကို ပြေလည်အောင် ဖြေရှင်းပေးပြီး အထိန်းတော်ချုပ် တင်သွင်းသော အတည်ပြုရန် စာရွက်စာတမ်းများကို လျင်မြန်စွာ ဆောင်ရွက်ပေးပြီးလျှင် ချက်ချင်းပြန်ထွက်သွားရန် စိတ်ကူးထားခဲ့၏။

သို့သော် မထင်မှတ်ဘဲ အနားယူရန် အချိန်ရသွားသည်။ အပါးတော်မြဲအကြီးအမှူး၏ အကြံပေးချက်က နားထဲဝင်လာ၏။ သူ့ခမျာ ရက်ပိုင်းအတွင်း သင့်လျော်သော အိပ်စက်ခြင်း၊ စားသောက်ခြင်း၊ ရေချိုးသန့်စင်ခြင်း အစရှိသော နေ့စဉ် ဇိမ်ခံမှုများကို လုံးဝခံစားခဲ့ရခြင်းမရှိခဲ့။

"ကောင်းပြီ။"

ခါဆယ်ရ်လည်း ခေါင်းညိတ်လိုက်တော့သည်။

အပါးတော်မြဲအကြီးအမှူးက အချိန်ကိုက်၍ လုပ်ဆောင်နေရသော ဘုရင်မင်းမြတ်၏ စိတ်ကို သဘောပေါက်နားလည်သူပင်။ ရေချိုးရင်း ပေါ့ပေါ့ပါးပါး စားနိုင်သော သရေစာများကိုလည်း ပြင်ဆင်ထားပေးခဲ့သည်။

အကြာကြီးနေမှ ပထမဆုံးအကြိမ်အဖြစ် ရေချိုးကန်ထဲ၌ ခန္ဓာကိုယ်ကိုစိမ်၍ အေးအေးဆေးဆေး ရေချိုးပြီး ဗိုက်ကို အသင့်အတင့် ဖြည့်ပြီးသောအခါ ခါဆယ်ရ်၏ စိတ်သည်လည်း အနည်းငယ် ပို၍ပေါ့ပါးလာတော့၏။

အဝတ်အစားလဲနေစဉ်တွင် အပါးတော်မြဲအကြီးအမှူးက လျှောက်တင်လာသည်။

"အရှင်မင်းကြီး။ အထိန်းတော်ချုပ်က အခစားဝင်ခွင့်တောင်းနေပါတယ်။"

ခါဆယ်ရ်က ရုံးခန်းထဲတွင် အထိန်းတော်ချုပ်နှင့် တွေ့ဆုံခဲ့သည်။ ဆာရာက ခါးကိုညွှတ်၍ အနူးအညွတ် အရိုအသေပြုလေ၏။

"အရှင်မင်းကြီး ဘေးမသီ ရန်မခဘဲ ရှိနေတာကို မြင်တွေ့ရလို့ ကျေးဇူးတင်ဝမ်းမြောက်ရပါတယ်။"

"လာခဲ့။ ပင်ပန်းသွားခဲ့ပြီ။"

"ကျွန်တော်မျိုးမက ကိုယ့်တာဝန်ကိုယ် ထမ်းဆောင်ရုံပါပဲ။"

"ကျုပ် ရဲတိုက်ကနေ အကြာကြီး ထွက်သွားရလည်း နောက်ဆံမတင်းရတာ အထိန်းတော်ချုပ်က တာဝန်ယူထားလို့ပဲပေါ့။"

"တရားလွန် ချီးမွမ်းနေပါပြီ။ တကယ်တော့ ကျွန်တော်မျိုးမက ဘာမှမလုပ်ခဲ့ရပါဘူး။ အရှင်မိဖုရားက ခိုင်မာတဲ့ ဗဟိုအချက်အချာအဖြစ် ရှိနေပေးခဲ့တာပါ။ ကျွန်တော်မျိုးမက အရှင်မိဖုရားကို ဝိုင်းကူပေးခဲ့ရုံပါပဲ။"

ခါဆယ်ရ်က ဆာရာ၏ မျက်နှာကို သေသေချာချာ အကဲခတ်လိုက်သည်။ အထိန်းတော်ချုပ်၏ နှုတ်မှထွက်လာသော စကားများက ကျိုးနွံနှိမ့်ချသောသဘောဖြင့် ပြောနေသော စကားများ ဖြစ်ဟန်မတူပေ။

"မိဖုရားရဲ့ အမိန့်နဲ့ ဂိတ်တံခါးကို ဖွင့်ပေးခဲ့တယ်ဆို။"

"မှန်ပါတယ်၊ အရှင်မင်းကြီး။"

ဆာရာက မိဖုရား၏ ခွင့်ပြုချက်ကို ရယူပြီး အပြင်သို့ ထွက်သွားခဲ့သော ရံရွေတော်မိန်းကလေးအကြောင်း အကျဉ်းချုပ် ရှင်းပြခဲ့သည်။

"ဘာလို့ အစီရင်ခံစာမတင်ခဲ့တာလဲ။"

"အစီရင်ခံစာကို အရှင်မိဖုရားဆီ တင်သွင်းခဲ့ပါတယ်။ အရှင်မိဖုရားက စစ်ဆေးပြီးသွားရင် အရှင်မင်းကြီးကို တင်ပြမယ်လို့ ပြောခဲ့တာပါ။ ဒီအတောအတွင်း အရှင်မိဖုရားက စည်းမျဉ်းတွေကို ထိန်းသိမ်းခဲ့ပါတယ်။ ကျွန်တော်မျိုးမတို့လည်း အရှင်မိဖုရားရဲ့ အမိန့်ကိုနာခံပြီး လိုက်နာခဲ့ကြတာပါ။"

ဆာရာ၏ မျက်နှာထားနှင့် အဖြေတွင် မည်သို့သောတုံ့ဆိုင်းမှုမှ ရှိမနေပေ။ သို့သော် ခါဆယ်ရ်တစ်ယောက် ယခင်က ဆာရာ၏ ဖြူစင်ဟန်ဆောင်ထားသည့် မျက်နှာထားဖြင့် အလိမ်ခံခဲ့ရဖူး၏။ ဆာရာနှင့် မိဖုရားတို့ကြားတွင် သက်သောင့်သက်သာ ဆက်ဆံရေးမျိုး မရှိခဲ့သည်ကို အတန်ကြာသည်အထိ သူမသိခဲ့။

"အထိန်းတော်ချုပ်။ မတရားမှုတစ်ခုခုရှိခဲ့တယ်ဆိုရင်လည်း ကျုပ်ကို ဘာမှ ထိန်ချန်ဖုံးကွယ်မထားနဲ့။"

"အရှင်မင်းကြီး။ မှန်ရာမှန်ကြောင်းစကားပါ။ ကျွန်တော်မျိုးမက အရှင်မင်းကြီးကို ဘယ်လိုများ ရာရာစစ လိမ်ညာဝံ့ပါ့မလဲ။"

"ကောင်းပြီလေ။"

အထိန်းတော်ချုပ် ပြန်ထွက်သွားပြီးသည့်နောက် ခါဆယ်ရ်တစ်ယောက် စာကြည့်စားပွဲရှေ့တွင် ထိုင်ကာ အချိန်အတော်ကြာအောင် စဉ်းစားနေခဲ့သည်။ အမြဲတစေ ထပ်တလဲလဲ ဖြစ်နေသော သူ၏ နေ့စဉ်ဘဝတွင် မကြာသေးမီက ရုတ်တရက် ပြောင်းလဲမှုများ တိုးလာ၏။ အကြောင်းရင်းကို ပြန်စစ်ကြည့်လိုက်လျှင် မိဖုရားက အမြဲတစေ ရှိနေသည်။

သူက မိဖုရား၏ မှတ်ဉာဏ်ဆုံးရှုံးမှုကို ဖြစ်စဉ်တစ်ခုဟုသာ တွေးထားခဲ့၏။ ငြိမ်သက်နေသော ရေပြင်ပေါ်သို့ ပစ်ချလိုက်သည့် ကျောက်တုံးကဲ့သို့ ဤမျှကြီးမားသော လှိုင်းဂယက်များကို ဖြစ်ပေါ်စေလိမ့်မည်ဟူ၍ကား ထင်မထားခဲ့ပေ။

ခါဆယ်ရ် ပြတင်းပေါက်အပြင်ဘက်သို့ ငေးကြည့်လိုက်သည်။ ယခုအထိ နေမထွက်သေး။

~~~~

Miel's Translations