ကွမ်းကျိုးက ယွမ်ယယ်ရိုက်ကူးရမည့်ရှိုးတွင် ဧည့်သည် MC ဖြစ်၏။ ယွမ်ယယ် ယခင်က ထိုကဲ့သို့ရသစုံရှိုးများကို တက်ရောက်လေ့မရှိပေ။ မှတ်တမ်းတင်ခြင်းက နာရီအနည်းငယ်ကြာမြင့်ခဲ့ပြီး ပုံမှန်အားဖြင့် ကြိုတင်ပေးထားသော ဇာတ်ညွှန်းများအတိုင်း လိုက်နာရုံသာဖြစ်သည်။ သို့သော် အစီအစဥ်ကို ဟာသများစွာဖြင့် ကောင်းမွန်စွာ ပြင်ဆင်ထားခဲ့ကြပြီး ဇာတ်ညွှန်းအတိုင်းသွားရုံကိုပင် ယွမ်ယယ်တစ်ယောက် သစ်သားတုံးကြီးလို မခံစားခဲ့ရပေ။
ရိုက်ကူးရေးပြီးနောက် ကွမ်းကျိုးက အိမ်သို့တန်းမပြန်ခဲ့ချေ။ သူတို့နှစ်ဦး တစ်ခုခုစားရန် အတူတူသွားခဲ့ကြသည်။
ကွမ်းကျိုးက သူ့ကိုပြောလာ၏။ "အင်တာနက်သုံးတဲ့သူတွေရဲ့ တုန့်ပြန်ချက်တွေအရ မင်းက တော်တော်လေး နာမည်ကြီးတာပဲ။"
"အဲ့လိုလား။" ယွမ်ယယ်က မေးလိုက်၏။ "ရှိုးမှာပါတဲ့အတွဲတိုင်း နာမည်ကြီးပါတယ်။"
"မင်းက အတိတ်တုန်းက အတော်လေးလျှို့ဝှက်ဆန်းကြယ်တာကိုး။" ကွမ်းကျိုးက အပြုံးလေးဖြင့် စနောက်လိုက်သည်။ "အခုကစပြီး အစီအစဥ်ဖိတ်ကြားချက်တွေကို လက်ခံလိုက်ရင်ရော? မင်း ကောင်းကောင်းလုပ်နိုင်မယ်လို့ ငါတော့ထင်တယ်။"
ယွမ်ယယ် ရယ်မောကာ မျက်ခုံးပင့်လျက် သူ့ကိုမေးလိုက်သည်။ "မင်းလာနောက်နေတာလား။"
ကွမ်းကျိုးကလည်း ပြုံးလိုက်၏။ ခဏကြာပြီးနောက် သူ၏မျက်နှာအမူအရာကို အရှိန်သတ်ကာ ယွမ်ယယ်ကိုပြောခဲ့သည်။ "အိုး ဟုတ်သားပဲ၊ မင်းတို့နှစ်ယောက် ဂရုစိုက်ဖို့လိုနေတုန်းပဲ။ သူတို့ မင်းကိုပြောပြီးသားလား၊ မပြောရသေးဘူးလားမသိပေမဲ့ မင်းတို့ကောင်တွေရဲ့ကွာရှင်းတဲ့သတင်းတွေ ပေါက်ကြားလာတယ်။"
ယွမ်ယယ် သူ့ကိုမော့ကြည့်လိုက်၏။ "အဲ့ဒါကို မဖျက်ရသေးဘူးလား။"
"ဖျက်ပြီးပြီ ဒါပေမဲ့ အဲ့ဒါတွေက တစ်ခုထက်ပိုများတယ်။" ကွမ်းကျိုးက ပြောလာသည်။ "လွန်ခဲ့တဲ့ရက်ပိုင်းအတွင်း ရုပ်သံဌာနက ငါတို့ကို ဖိအားပေးလာသေးတယ်။ ငါထင်တာတော့ တစ်ယောက်ယောက်က တမင်သတင်းဖြန့်နေတာပဲ။ ဖန်းရှောက်ယိနဲ့ သူ့အဖွဲ့လည်း အဲ့သတင်းကိုကြားပြီးလောက်ပြီဆိုတာ လောင်းရဲတယ်။"
ယွမ်ယယ် ခေါင်းညိတ်လိုက်သည်။ ထို့နောက် ဘာမှထပ်မပြောဘဲ တိတ်တဆိတ်သာ ဆက်စားနေခဲ့၏။
ကွမ်းကျိုးမှာ အတော်လေး လေးနက်နေပုံပင်။ သူနှင့် ယွမ်ယယ်၏ဆက်ဆံရေးအရ သူက အလွန်စိတ်ပူနေ၏။ "ငါတောင် အဲ့အကြောင်းသိနေတယ်ဆိုရင် ဒါက ဒီနယ်ပယ်ထဲမှာ လျှို့ဝှက်ချက်တစ်ခုမဟုတ်တော့ဘူး။ ငါထင်တာတော့ မင်းတို့ကွာရှင်းထားတာကို လူတော်တော်များများ သိလောက်တယ်။ ဒီတော့ ဘယ်သူက ပြဿနာရှာတာလဲဆိုတာ အတပ်ပြောလို့မရနိုင်ဘူး။ အဲ့ဒါက ငါတို့နဲ့ပြိုင်ဘက်ချန်နယ်က သူတို့ရဲ့ရှိုးကြည့်ရှုသူများဖို့အတွက် ကြိုးစားတာလည်း ဖြစ်နိုင်တယ်။ ဘာပဲဖြစ်ဖြစ် သက်သေမရှိဘဲတော့ ဘာမှလုပ်လို့မရပါဘူး။ ဒါပေမဲ့ တစ်ယောက်ယောက်ကသာ နောက်ရက်တွေမှာ တင်ခဲ့ရင် အဲ့ဒါကိုထပ်ပြီး လျှိူ့ဝှက်ထားလို့ရမှာ မဟုတ်တော့ဘူး။"
"အမ်း၊ ငါသိပြီ။" ယွမ်ယယ် ကွမ်းကျိုးကိုကြည့်လိုက်ပြီး ပြုံးပြလိုက်သည်။ "ငါ့အတွက် စိတ်မပူပါနဲ့။"
ကွမ်းကျိုးမှာ အတော်လေး စိတ်ဆိုးသွားပုံရ၏။ "မင်းက ရယ်ပြုံးနေနိုင်သေးတယ်ပေါ့လေ။"
ယွမ်ယယ်၏နှုတ်ခမ်းထောင့်များက မြင့်တက်သွားပြီး သူ့ကို ပြောလိုက်သည်။ "ပြုံးပြုံး မပြုံးပြုံး ငါလုပ်နိုင်တာ ဘာမှမရှိဘူးလေ။ ပြီးတော့ ခုထိ ဘာမှမဖြစ်သေးပါဘူး။ ဘာလို့စိတ်ပူနေမှာလဲ။"
ယွမ်ယယ်က အမှန်တကယ်ကိုစိတ်မဝင်စားပေ။ ယခုတစ်ကြိမ်တွင် သူ မွန်ဂိုလီးယားပြည်တွင်းခရီးစဥ်အတွင်း ဓါတ်ပုံအနည်းငယ် ရိုက်ကူးခဲ့၏။ အိမ်တွင် ဘာမှလုပ်စရာမရှိရာ ထိုပုံများကို တည်းဖြတ်နေခဲ့သည်။ သူ တကယ်ကြိုက်သောပုံက အနည်းငယ်သာရှိပေ၏ - တစ်ပုံမှာ ကန္တာရထဲ ဖန်းရှောက်ယိက မတ်တတ်ရပ်ပြီး သူ့ကို လှည့်ကြည့်နေသောပုံဖြစ်သည်။ သူ၏မျက်နှာအမူအရာက အတော်လေးအေးစက်နေပြီး မျက်ခုံးများကလည်း အနည်းငယ်တွန့်ချိုးနေသည်။ နေစူးသောကြောင့်ဖြစ်နိုင်သလို လေတိုက်ခတ်နေသောကြောင့်လည်း ဖြစ်နိုင်ပေ၏။
ယွမ်ယယ် ၎င်းအား သူ့လပ်တော့နောက်ခံပုံအဖြစ်ထားလိုက်သည်။ သူ၏မောက်စ်ကိုရွှေ့သည့်အခါတိုင်း မြားလေးကို ဖန်းရှောက်ယိ၏ပုံရိပ်အပေါ်တွင် အမြဲတမ်း ခဏရပ်လိမ့်မည်ပင်။
သူ မြက်ခင်းပြင်ရှိ သိုးအုပ်တစ်အုပ်၏ဓါတ်ပုံကို ရွေးလိုက်သည်။ ထိုပုံထဲရှိ သိုးတစ်ကောင်က ကင်မရာကိုကြည့်နေ၏။ ယွမ်ယယ် ရှောင်ယွမ်ဓါတ်ပုံရိုက်ခဲ့သည်ဟူသောစာသားဖြင့် moments တွင် ပို့စ်တင်လိုက်၏။
ထို့နောက် ကျီရှောင်ထောင်းက ချက်ချင်းပင် လိုက်ခ်လုပ်ခဲ့သည်။
ယွမ်ယယ် သူ့ကို စာပို့လိုက်သည်။ "ဘယ်အချိန်ရှိနေပြီလဲ၊ ကြုံရာပို့စ်တွေကို လိုက်ခ်ပေးဖို့ ဒီမှာ ရှိနေတုန်းပဲလား။"
ကျီရှောင်ထောင်းက ချက်ချင်းဆိုသလို သူ့ထံ အသံမက်ဆေ့ချ်ပို့လာခဲ့သည်။ သူ၏အသံက အလွန်ပင်ပန်းနေပြီး အားအင်များလည်းကုန်ခန်းနေသည့်အသံပေါက်နေ၏။ "ကျွန်တော်တို့ မနားရသေးဘူး ယယ်ကော... ကျွန်တော်တို့ နောက်ထပ် ညလုံးပေါက် ရိုက်ကူးရဦးမှာ။"
ယွမ်ယယ် အချိန်ကိုတစ်ချက်ကြည့်လိုက်ရာ မနက်နှစ်နာရီထိုးနေပြီဖြစ်ကြောင်း တွေ့လိုက်ရသည်။ သူ ဘာပြန်ပြောရမလဲမသိပေ။ သူပြောဖို့အတွက် သင့်တော်သောစကားမရှိချေ။ နောက်ဆုံးတွင် သူက ရိုးရိုးရှင်းရှင်းသာ ပြန်ပို့လိုက်သည်။ "ပင်ပန်းသွားပြီ။"
ကျီရှောင်ထောင်းက အသံမက်ဆေ့ချ်ထပ်ပို့လာခဲ့၏။ သူ၏လေသံမှာ အနည်းငယ်ရယ်သံစွက်နေလျက်ပင်။ "မဟုတ်ပါဘူး။ ကောတို့ ရိုက်ကူးရေးသွားရင် ကျွန်တော်နားရက်တွေအများကြီးရမှာပဲလေ။"
ယွမ်ယယ် ဖုန်းမပိတ်ခင် သူနှင့် ပေါ့ပေါ့ပါးပါး အပြန်အလှန် စာအနည်းငယ်ပို့လိုက်သည်။
မျက်စိတစ်မှိတ်အတွင်း သူတို့ အပိုင်းနှစ်ပိုင်း ရိုက်ကူးပြီးသွားလေပြီ။ တည်နေရာမှာ စုစုပေါင်းငါးခုသာရှိ၏။ နောက်တစ်ပိုင်းပြီးလျှင် ရိုက်ကူးရန်လိုအပ်သော တစ်ဝက်ကျော်လောက်ကို ပြီးဆုံးသွားမည်ဖြစ်သည်။
ယွမ်ယယ် ယခုအချိန်ထိ တစ်ချိန်လုံးနီးပါး အတော်လေးပူးပေါင်းပေးခဲ့သည်။ ခရီးစဉ်တွင် အရာအားလုံးကို လိုက်နာခဲ့ပြီး ဒါရိုက်တာအဖွဲ့က သူ့ကို လုပ်ဆောင်ဖို့ပြောသမျှတိုင်းအား လုပ်ဆောင်ပေးခဲ့သည်။ အရင်က အတော်လေးခက်ခဲလိမ့်မည်ဟု သူထင်ခဲ့သော်လည်း ရက်အနည်းငယ်ကြာပြီးနောက်တွင် ၎င်းက သိပ်မဆိုးကြောင်း တွေ့လိုက်ရသည်။
ယခုတစ်ကြိမ် သူတို့သွားရမည့်နေရာက ဂျပန်ဖြစ်သည်။ အရင်တစ်ခေါက်ကနဲ့မတူဘဲ ယွမ်ယယ် ဖန်းရှောက်ယိ၏ရိုက်ကွင်းသို့ ကြိုပြီးလိုက်မသွားခဲ့ချေ။ သူနှင့် ဖန်းရှောက်ယိတို့က သီးခြားစီ ထွက်လာသည့်အတွက် ရိုက်ကူးရေးကို လေဆိပ်တွင် စတင်ခဲ့ကြရသည်။ လေယာဥ်ပေါ်တွင် လူငယ်ဒါရိုက်တာလေးက နောက်ဆုံးအပိုင်းတွင် ပြောင်းလဲမှုအနည်းငယ်ရှိလိမ့်မည်ဖြစ်ကြောင်း ပြောလာခဲ့သည်။
အစက သူတို့၏နောက်ဆုံးအပိုင်းကို သြစတေးလျတွင်ရိုက်ကူးရန် စီစဥ်ထားခဲ့သည်။ ယခုတွင် အကြောင်းကြောင်းကြောင့် ကနေဒါသို့ ပြောင်းလိုက်ရ၏။
ထိုအရာကိုကြားလိုက်ရသောအခါ ယွမ်ယယ် သူ(မ)ကိုကြည့်ကာ မေးလိုက်သည်။ "ဘယ်နှရက်လောက်ကြာမှာလဲ။"
လူငယ်ဒါရိုက်တာက ပြန်ဖြေလာ၏။ "ပုံမှန်ဆို နှစ်ရက်လောက်ပဲကြာမှာပါ။ ဒီလိုမှပဲ အားလုံး အချိန်ကိုညှိနိုင်ကြမှာ။ ဒါပေမဲ့ လောင်ရှီးတို့အားလုံး အချိန်ဇယားတွေကျပ်နေတာမို့ လူတိုင်းရဲ့အချိန်ဇယားပေါ်မူတည်ပြီး တစ်ရက် ဒါမှမဟုတ် နှစ်ရက်လောက်ပဲ ဖြစ်မှာပါ။"
ယွမ်ယယ် ဆက်မမေးတော့ဘဲ ခေါင်းကိုသာခါလိုက်၏။ "မဖြစ်ဘူး။"
လူငယ်ဒါရိုက်တာသည် ယွမ်ယယ် တိုက်ရိုက်ကြီး ငြင်းဆိုလာလိမ့်မည်ဟု ထင်မထားခဲ့ချေ။ ထို့အပြင် နေရာပြောင်းလိုက်သည်မှလွဲ၍ ရိုက်ကူးရေးလုပ်ရမည်က လုပ်ရမည်ပင်။ ရုတ်တရက်ပြောင်းလဲလိုက်ရသည်ကြောင့် တစ်စုံတစ်ခု အကျိုးသက်ရောက်စေကာမူ ၎င်းမှာ အလုပ်အတွက် တစ်စိတ်တစ်ဒေသဖြစ်သည်။
"ဘာဖြစ်လို့လဲ ယွမ်လောင်ရှီး။" လူငယ်ဒါရိုက်တာက သူ့ကိုမေးလာ၏။
ထိုအချိန်တွင် ဖန်းရှောက်ယိက နံဘေးမှာ မျက်လုံးအကာဝတ်ကာ အိပ်စက်နေခဲ့သည်။ ယွမ်ယယ်က သူ၏လေသံကိုလျှော့ကာ သူ(မ)ကိုပြောလိုက်၏။ "စာချုပ်ထဲမှာပါတဲ့အတိုင်းပဲလုပ်ပြီး ကျွန်တော်တို့ အရင်ကဆုံးဖြတ်ထားတဲ့နေရာကိုပဲ သွားရအောင်။ ကနေဒါကတော့ ဖြစ်မှာမဟုတ်ဘူး။ ဒါမှမဟုတ် မင်းတို့ ပိုနီးတဲ့တစ်နေရာရာကို ရွေးလိုက်ရင်ရော။ အိန္ဒိယ၊ ထိုင်း၊ ဆော်ဒီအာရေးဗီးယား - အဲ့ဒါတွေလည်း အဆင်ပြတာပဲ။ ဥရောပဘက်တွေဆို မဖြစ်ဘူး။"
လူငယ်ဒါရိုက်တာမှာ လုံးဝဆွံ့အသွားခဲ့သည်။ သူ(မ) ထိုကိစ္စကို စကားအနည်းငယ်ပြောလိုက်ရုံဖြင့် ဖြေရှင်းနိုင်လိုက်မည်ဟု ထင်နေခဲ့၏။ မမျှော်လင့်စွာဖြင့် ယွမ်ယယ်က ယခုလိုတုံ့ပြန်လာခဲ့သည်။ သူ(မ) နောက်တစ်ကြိမ်ကြိုးစားကြည့်လိုက်သည်။ "ယွမ်လောင်ရှီး၊ ဘာလို့လဲဆိုတာကို ကျွန်မ မေးကြည့်လို့ရမလား။"
ယွမ်ယယ် ခေါင်းယမ်းလိုက်၏။ သူ၏မျက်နှာအမူအရာမှာ ထပ်ပြီးမဆွေးနွေးချင်တော့ဘူးဟု ပြောနေသယောင်ပင်။ "အကြောင်းပြချက်မရှိဘူး။ ကျွန်တော်က ရုတ်တရက်ပြောင်းလဲမှုတွေကို မကြိုက်ရုံပဲ။ ကျွန်တော် စာချုပ်ထဲမှာ သဘောတူထားတာကိုပဲ ရိုက်ကူးနိုင်မယ်။ စာချုပ်ထဲမှာ သြစတေးလျမှာရိုက်မယ်လို့ပြောထားတယ်။ မင်းတို့က ရုတ်တရက်ကြီး နေရာပြောင်းဖို့ ဆုံးဖြတ်လိုက်ပြီးမှ ကျွန်တော့်ကိုသတိပေးတာမျိုး လုပ်လို့မရဘူးလေ။ ဒါက အကျိုးကြောင်းမသင့်ဘူးဆိုတာ မင်းတို့ မပြောနိုင်ဘူးလား။"
လူငယ်ဒါရိုက်တာမှာ အရင်က ထိုကဲ့သို့သောအဖြစ်အပျက်မျိုးတွင် ပါဝင်ခြင်းမရှိခဲ့ဖူးသဖြင့် လက်ရှိအခြေအနေကို မည်သို့ကိုင်တွယ်ရမှန်း မသိတော့ပေ။ သူ(မ)က လေယာဥ်ပေါ်ကဆင်းဆင်းချင်း သူ(မ)၏ဘော့စ်ထံ ချက်ချင်းတင်ပြကာ သူ့အား ယွမ်ယယ်ပြောသမျှကို ပြောပြလိုက်သည်။ တစ်ဖက်တွင် သူ(မ)၏ဘော့စ်က ယွမ်ယယ်ကို ချက်ချင်းဖုန်းခေါ်၍ သူ၏အတွေးများကိုမေးမြန်းလာသည်။ ယွမ်ယယ်က အလွန်ယဥ်ကျေးစွာပြောခဲ့သော်လည်း သူ၏စိတ်ကိုပြောင်းလိမ့်မည်မဟုတ်ကြောင်း ပြတ်ပြတ်သားသားပြောခဲ့သည်။
"မစ္စတာ၊ ကျွန်တော်တို့ သဘောတူညီမှုကို ပြောင်းလိုက်လို့ရတယ်။ ကျွန်တော်တို့ သြစတေးလျကိုမသွားဘူးဆိုရင် နီးတဲ့နိုင်ငံတစ်ခုခုကို ရွေးချယ်လို့ရပါတယ်။ ကနေဒါကတော့ အဆင်မပြေနိုင်ပါဘူး။"
စောစောက လေယာဥ်ပေါ်တွင် ဖန်းရှောက်ယိက အိပ်ပျော်နေခဲ့ပြီး ယွမ်ယယ် သူ၏အသံကိုလျှော့ထားရာ ထိုအကြောင်းကို မသိခဲ့ပေ။ လက်ရှိတွင် ယွမ်ယယ်ဖုန်းပြောနေစဥ် လူငယ်ဒါရိုက်တာက သူ့အား အခြေအနေကို ရှင်းပြလာခဲ့သည်။ ဖန်းရှောက်ယိက ခေါင်းညိတ်ကာ သူ(မ)အား သဘောပေါက်ကြောင်း ပြောလိုက်၏။ သူက ဖုန်းပြောနေဆဲဖြစ်သော ယွမ်ယယ်ကို ကြည့်လိုက်သည်။ သူ၏အမူအရာကမှာ စိတ်မရှည်တော့သည့်ပုံပင်။
ဖန်းရှောက်ယိက လက်လှမ်းကာ သူ၏လက်ကောက်ဝတ်ကို ဆွဲလိုက်၏။ ထို့နောက် ယွမ်ယယ်ကို ခေါင်းယမ်းပြလိုက်သည်။
ယွမ်ယယ်က သူ့ကိုတစ်ချက်ကြည့်လိုက်ပြီး ဖုန်းတစ်ဖက်ရှိလူကို ထပ်ပြောလိုက်၏။ "ကောင်းပါပြီ။ ကျွန်တော်တို့ နောက်မှ ဆွေးနွေးကြတာပေါ့။"
ဖုန်းချပြီးနောက် သူက ဖုန်းကို လူငယ်ဒါရိုက်တာဆီပြန်ပေးလိုက်သည်။ ဖန်းရှောက်ယိက သူ့ကိုပြောလာ၏။ "ဒေါသကို နည်းနည်းလောက်ထိန်းထားဦး။"
ယွန်ယယ်က သူ့ကိုပြန်ကြည့်ကာ ပြောလိုက်၏။ "ငါ ဒေါသထွက်နေတာမဟုတ်ဘူး။ ငါ မသွားချင်ရုံပဲ။"
သူတို့ဘေးမှာ လူအများကြီးရှိနေသဖြင့် ဖန်းရှောက်ယိက ဘာမှထပ်မပြောတော့ပေ။ သူက ခေါင်းငုံ့လျက်လမ်းလျှောက်နေသည့် ယွမ်ယယ့်ကို အခြားသူများအား ဝင်မတိိုက်မိအောင် သူ့လက်ကိုဆွဲထားခဲ့သည်။
ဖန်းရှောက်ယိက လူငယ်ဒါရိုက်တာကို ပြောလိုက်၏။ "စိတ်မရှိပါနဲ့။ ကျွန်တော်တို့ နောက်မှ ထပ်ဆွေးနွေးကြတာပေါ့။"
"အာ၊ ကောင်းပါပြီ ဖန်းလောင်ရှီး။" လူငယ်ဒါရိုက်တာက အလျင်အမြန်ခေါင်းညိတ်လိုက်သည်။ "ကိစ္စမရှိပါဘူး။"
ယွမ်ယယ်နှင့် ဖန်းရှောက်ယိတို့က မြောက်ပိုင်းကနေ ပျံသန်းလာခဲ့ကြရာ ရိုက်ကူးရေးနေရာသို့ အစောဆုံးရောက်လာခဲ့ကြသည်။ အခြားအဖွဲ့များက တောင်ပိုင်းမြို့များတွင်ရှိနေရာ သူတို့၏လေယာဥ်ချိန်က နေ့လယ်ထိ ရောက်လိမ့်မည်မဟုတ်ပေ။
ယွမ်ယယ်နှင့် ဖန်းရှောက်ယိတို့က ဟိုတယ်တွင် အနားယူခဲ့ကြသည်။ ဖန်းရှောက်ယိက အိပ်ရာပေါ် လှဲကာ အနားယူနေစဥ် ယွမ်ယယ်က ဘေးတွင်ထိုင်ပြီး ဖုန်းသုံးနေခဲ့သည်။
ကွမ်းကျိုး၏သတင်းအရင်းအမြစ်က မြန်ပေ၏။ နေ့ခင်းတွင် သူက ယွမ်ယယ်ထံ WeChat မက်ဆေ့ချ်ပို့လာသည်။ [မင်း အခုဘာဖြစ်နေတာလဲ။ မင်း ဘယ်ငရဲကနေ တက်လာတာများလဲ။]
ယွမ်ယယ်: [နေ့စဥ်ငရဲက တက်လာတာ။]
ကွမ်းကျိုး: [ကောင်းပါပြီ ငရဲကနေ ပိုပြီး ညင်ညင်သာသာလေး တက်လာလို့ရမလား၊ သာ့ကောရ။ လူတွေအများကြီးကို စိတ်ဆိုးမနေစမ်းပါနဲ့။]
ယွမ်ယယ်: [ငါ အမြဲတမ်း အရမ်းကိုယဥ်ယဥ်ကျေးကျေးလေးပဲပြောတာပါ။]
ကွမ်းကျိုး: [ဒါရိုက်တာလင်းဝေနဲ့ ထုတ်လုပ်သူနဲ့ မင်းကို ဘယ်လိုတောင်ချေးများသလဲဆိုပြီး မှတ်ချက်ပေးနေကြတာ ငါကြားခဲ့တယ်။ မင်းရဲ့မိသားစု*က အဆင့်အတန်းမြင့်နေတာကြောင့်သာ သူထပ်မပြောတော့တာ။ မင်းနေရာမှာ တခြားသူသာဆို လင်းဝေက သေချာပေါက် ဆဲဆိုနေလောက်ပြီ။ သူက ပါးစပ်ထဲကနေ ညှစ်ထုတ်ဖို့ ဦးနှောက်မရှိတဲ့သူတစ်ယောက်ပဲ။ ဒါပေမဲ့ မင်း'မိသားစု'ထဲက အဲ့ဒီလူရဲ့အဆင့်အတန်းက အခု မင်းနဲ့ ဘာမှမဆိုင်တော့ဘူး သာ့ကော။ မင်း အဲ့ဒါကို သေချာသိအောင် လုပ်ထားဦး။]
[TN/ ဖန်းရှောက်ယိကိုပြောနေတာပါ။]
ယွမ်ယယ် စုတ်သတ်လိုက်ပြီး သူ့ကို မက်ဆေ့ချ်ပို့လိုက်၏။ [မင်းအလုပ်သာ ပြန်သွားလုပ်စမ်းပါကွာ။ ငါ့ကိုစိတ်ပူစရာမလိုပဘူး။]
ကွမ်းကျိုးမှာ အမှန်ပင်အလုပ်များနေခဲ့သည်။ သူ ထိုသတိပေးစကားများပို့ပြီးနောက် ထပ်ပြောမလာတော့ပေ။
ဖန်းရှောက်ယိ၏အချိန်ဇယားက အလွန်ကျပ်ပေ၏။ သူ ဘယ်လောက်တောင် အိပ်ရေးပျက်ခဲ့လဲကို မည်သူသိနိုင်မည်နည်း။ သူက သူ့ဘက်အခြမ်းအိပ်ရာပေါ်မှာ လှဲလိုက်ပြီး ဖြည်းဖြည်းမှန်မှန်အသက်ရှူကာ အိပ်ပျော်သွားခဲ့သည်။
ထို့နောက်တွင် ချန်ရုနှင့် သူ(မ)၏ခင်ပွန်းတို့မှလွဲ၍ အခြားအဖွဲ့နှစ်ဖွဲ့လည်း ရောက်လာခဲ့ကြသည်။ ယွမ်ယယ် အချိန်ကိုတစ်ချက်ကြည့်လိုက်၏။ လူငယ်ဒါရိုက်တာက မကြာခင် သူတို့ကို ခေါ်တော့မည်ပင်။ ယွမ်ယယ်တစ်ယောက် ခြေသံအရမ်းမကျယ်အောင် အသာလေးလျှောက်သွားလိုက်ပြီး ဖန်းရှောက်ယိအိပ်နေသော အိပ်ရာဘက်အခြမ်း၌ ရပ်လိုက်သည်။ ယွမ်ယယ် ဆောင့်ကြောင့်ထိုင်ကာ ဖန်းရှောက်ယိကိုနှိုးရန် ပါးစပ်ဖွင့်ဟလိုက်သော်လည်း သူပါးစပ်ဖွင့်လိုက်ရုံသာဖြစ်ပြီး အသံတစ်သံမှ မထွက်နိုင်ခဲ့ပေ။
ဖန်းရှောက်ယိ၏မျက်နှာက အမှန်တကယ်ကို ချောမောလှသည်။ သူ၏အသွင်အပြင်များက ထင်းနေပြီး သူ၏နှာတံကလည်း ဖြောင့်စင်းနေ၏။ ယွမ်ယယ် သူ၏နှာတံကို တော်တော်လေးသဘောကျသည်။ အတိတ်တုန်းက သူ ထိုနှာတံလေးကို နှမြောမနေဘဲ မကြာခဏကိုက်ခဲတတ်ပေသည်။
ဖန်းရှောက်ယိက နှစ်နှစ်ခြိုက်ခြိုက် အိပ်ပျော်နေခဲ့သည်။ သူက အလွန် သက်တောင့်သက်သာရှိနေပုံပေါ်ပြီး သူ၏အမူအရာမှာလည်း အေးချမ်းနေခဲ့၏။ သူအိပ်ပျော်နေသည်ကို ကြည့်ပြီး ယွမ်ယယ် ထိုသက်တောင့်သက်သာရှိမှုထဲကနေ သူ့ကို မနှိုးချင်တော့ပေ။
သူ ဆောင့်ကြောင့်ထိုင်တာ ပင်ပန်းလာသောအခါ ကြမ်းပြင်ပေါ် ထိုင်ချလိုက်ပြီး ဖန်းရှောက်ယိ၏အိပ်ရာနှင့် ပိုနီးအောင်တိုးကပ်ကာ မှီချလိုက်၏။ ထို့နောက်သူလည်း အိပ်ပျော်သွားခဲ့လေသည်။
သို့သော် သူက ရှစ်မိနစ်၊ ဆယ်မိနစ်လောက်သာ မှေးခနဲဖြစ်သွားခဲ့သည်။ ရိုက်ကူးရေးအချိန် ရောက်တော့မည်ဖြစ်ရာ ဖန်းရှောက်ယိကိုနှိုးဖို့က လိုအပ်နေဆဲပင်။ ယွမ်ယယ် ထရပ်လိုက်ပြီး ဖန်းရှောက်ယိ၏ပခုံးကိုပုတ်ကာ ခေါ်လိုက်၏။ "ယိကော။"
ဖန်းရှောက်ယိက တုံ့ပြန်မလာပေ။ ထို့ကြောင့် ယွမ်ယယ်က ထပ်ခေါ်လိုက်သည်။ "ယိကော"
ဖန်းရှောက်ယိ၏မျက်တောင်များ လှုပ်ရှားလာကြ၏။ စက္ကန့်အနည်းငယ်ကြာပြီးနောက် မျက်လုံးများ ပွင့်လာခဲ့သည်။
ဖန်းရှောက်ယိတစ်ယောက် အလွန်နှစ်ခြိုက်စွာ အိပ်ပျော်နေခဲ့သည်။ အခန်းတွင်းအပူချိန်ကလည်း အလွန်ကွက်တိကျနေခဲ့ရာ အိပ်မက်ကောင်းကောင်းတောင် မက်ခဲ့သေးသည်။ သူ၏မျက်လုံးများထဲမှာ အနည်းငယ်သော ရှုပ်ထွေးမှုများရှိသော်လည်း နိုးလာပြီးနောက်တွင် မျက်မှောင်ကြုတ်သွားခြင်းမရှိခဲ့ပေ။ ယွမ်ယယ် ၎င်းကို လှမ်းကိုင်ပြီး ထိတွေ့လိုစိတ်များအား ထိန်းချုပ်လိုက်ရသည်။ "...မအိပ်နဲ့တော့။"
ဖန်းရှောက်ယိက မျက်တောင်ခတ်လိုက်၏။ သူ ယွမ်ယယ်ကိုကြည့်လာရာ နှစ်ယောက်သား အကြည့်ချင်းဆုံသွားခဲ့သည်။ လက်ရှိတွင် သူတို့၏အကြည့်များထဲမှာ မည်သည့်ရှုပ်ထွေးသောစိတ်ခံစားချက်မှ မပါဝင်ခဲ့ပေ။ အရာရာတိုင်းက ရိုးရှင်းပြီး တည်ငြိမ်နေခဲ့သည်။
ယွမ်ယယ်က ဖန်းရှောက်ယိ အပြည့်အဝနိုးလာစေရန် တစ်ခုခုပြောလိုက်ချင်သော်လည်း သူအခွင့်အရေးမရခင်ပင် ဖန်းရှောက်ယိက လက်ဆန့်ထုတ်ကာ ယွမ်ယယ်ကို သိုင်းဖက်လာခဲ့သည်။ အိပ်စက်ထားပြီးနောက် ဖန်းရှောက်ယိ၏ခန္ဓာကိုယ်အပူချိန်က အလွန်မြင့်နေခဲ့၏။ ခြောက်သွေ့သည့်နွေးထွေးမှုလေးက ယွမ်ယယ်၏အသက်ရှူလမ်းကြောင်းထဲ ဝင်ရောက်လာပြီး သူ့ကို အံ့သြမှင်တက်သွားစေခဲ့သည်။
သူ၏မျက်နှာက ဖန်းရှောက်ယိ၏ရင်ခွင်ထဲ မြှုပ်နေခဲ့၏။ တစ်ဖက်လူ၏ကိုယ်သင်းနံ့က ရင်းနှီးနေသော သက်တောင့်သက်သာရှိမှုတို့ကို ခံစားရစေသည်။ ၎င်းမှာ အလွန်နှစ်လိုဖွယ်ကောင်းပေသည်။ ယွမ်ယယ် ဘာမှမပြောဘဲ သူ၏မျက်လုံးများကိုသာ မှိတ်ထားခဲ့သည်။
သူ၏မျက်လုံးက တိုက်တိုက်ဆိုင်ဆိုင် ဖန်းရှောက်ယိ၏ညှပ်ရိုးနားတွင် ရှိနေပြီး အရိုးခပ်မာမာပေါ်မှာ မှီနေရသည့်အတွက် အနည်းငယ်နာကျင်ရ၏။
ဖန်းရှောက်ယိက ယွမ်ယယ်၏ဦးခေါင်းအနောက်ဘက်ကို လက်တစ်ဖက်ဖြင့်ဖိကပ်လာပြီး လက်ဖဝါးနွေးနွေးက သူ၏ဦးရေပြားကိုထိလာခဲ့သည်။ ထိုနွေးထွေးမှုလေးက အလွန်နှစ်လိုဖွယ်ကောင်းပြီး ယွမ်ယယ်တစ်ယောက် တစ်ရေးတစ်မောတောင် အိပ်ချင်လာခဲ့သည်။
နောက်ဆုံးမှာတော့ ယွမ်ယယ်က အရင်ဆုံး လှုပ်ရှားလိုက်၏။ ထိုအနေအထားက သူ့ကို ပင်ပန်းစေသည်။ သူသည် အသက်ပြင်းပြင်းတစ်ချက်ရှူလိုက်ပြီး ဖန်းရှောက်ယိ၏လက်ကို ဖယ်ရှားလိုက်သည်။ ယွမ်ယယ် ခေါင်းမော့ကာ ဖန်းရှောက်ယိ၏မျက်လုံးများကို စိုက်ကြည့်လိုက်သည်။ သူတို့၏အကြည့်များ နောက်တစ်ခါထပ်ဆုံသွားချိန်မှာ ယွမ်ယယ်က ပြုံးပြလိုက်ပြီး ဘာမှမဖြစ်ခဲ့သည့်အတိုင်း မေးမြန်းလိုက်သည်။ "ဘာဖြစ်လို့လဲ။"
ဖန်းရှောက်ယိက သူ့ကိုစိုက်ကြည့်နေပြီး အခိုက်အတန့်တစ်ခုလောက် တိတ်ဆိတ်နေခဲ့သည်။ ထို့နောက် အကြည့်လွှဲကာ မျက်ခုံးနှစ်ဖက်ကြားနေရာကို ဖိလိုက်ရင်း ပြန်ဖြေခဲ့လေ၏။ "ဘာမှမဟုတ်ဘူး။ အိပ်မက်မက်လို့။"
*****