ယွမ်ယယ်တစ်ယောက် အသက်မွေးဝမ်းကြောင်းအတွက် ဘယ်တော့မှ သူ၏ရုပ်ရည်ကို အသုံးမပြုခဲ့ပေ။ ထိုကိစ္စကို လုံးဝအာရုံမစိုက်ခဲ့ဖူးချေ။ ရိုးရိုးသားသားပြောရလျှင် သူက ကြမ်းတမ်းသောလူတစ်ယောက်သာ။ သူက အမြဲတမ်း ဂျင်းဘောင်းဘီ သို့မဟုတ် sweatpant၊ တီရှပ် သို့မဟုတ် sweatshirt များကိုသာ ဝတ်လေ့ရှိပြီး အခြေခံအားဖြင့် ရိုးရိုးရှင်းရှင်းသာဝတ်ဆင်လေ့ရှိသည်။ ပွဲတစ်ခုခုရှိမှသာ ကော်လံပါတီရှပ်များကို ဝတ်ဆင်တတ်၏။ သူ ဤရှိုးကိုရိုက်ကူးပြီးနောက် သူ၏အသွင်အပြင်ကြောင့် ဖန်အများကြီးရှိလာလိမ့်မည်ဟု လုံးဝမထင်ထားခဲ့ချေ။
မိန်းကလေးငယ်အများစုက သူ့ပုံစံကို နှစ်သက်ကြသည်။ ဦးခေါင်းခွံပုံစံကောင်းမွန်သူတို့သာ ထိုကဲ့သို့ ကတုံးဆံပင်ပေါက်ပုံစံနှင့် လိုက်ဖက်ပေသည်။ သူက သင့်ကို သူ၏မျက်ခွံပါးပါးနှင့် တစ်ချက်ကြည့်လိုက်ပြီး သူ၏ပါးစပ်ထောင့်ကို လှောင်ပြုံးသဖွယ် ပင့်တင်လိုက်ချိန်တွင် ဆိုးသွမ်းသောကောင်လေးတစ်ယောက်နှင့် လုံးဝတူသွားလိမ့်မည်။ သို့တည်းမဟုတ် ပို၍တိတိကျကျပြောရလျှင် ဆိုးသွမ်းသောဦးလေးတစ်ယောက်ပင်။ ကတုံးဆံပင်ပေါက်ဦးလေးယယ်သည် အခြားမည်သူတစ်ဦးမျှ လုံးဝတုပနိုင်မည်မဟုတ်သော ပုံစံမျိုးဖြစ်သည်။ အခြားသူ၏မျက်လုံးထဲမှာ ထိုကဲ့သို့အရာခပ်သိမ်းကိုကောင်းစွာသိသော အကြည့်မျိုးမရှိပေ။ ၎င်းတို့က လုံလုံလောက်လောက် မစူးရှသလို ဆွဲဆောင်မှုလည်းမရှိချေ။
အမှန်မှာ ယွမ်ယယ်က ပျင်းနေခြင်းသာ။ သူ၏ဆံပင်ပုံစံကို နှစ်ပေါင်းများစွာမပြောင်းလဲခြင်းက မိမိုက်နေစေရန် သို့မဟုတ် ကြည့်ကောင်းနေစေရန်မဟုတ်ဘဲ ငါးနှစ်ခြောက်နှစ်လောက် ထိုဆံပင်ပုံစံကိုပဲထားခဲ့ခြင်းကြောင့်သာဖြစ်သည်။ သူသည် ၎င်းနှင့်အသားကျနေပြီဖြစ်၏။ နေ့တိုင်း သူမျက်နှာသစ်နေစဥ် လုပ်ရမည်က သူ၏ဆံပင်ကို ရေအနည်းငယ်နှင့် လျှော်လိုက်ရုံသာပင်။ ဆံပင်ပုံစံသွင်းရန်၊ အခြောက်ခံရန်အတွက် အလုပ်မရှုပ်တော့ဘဲ မြန်ဆန်လွယ်ကူသွားပေသည်။
သို့သော်လည်း ယွမ်ယယ်၏ပရိသတ်ဖြစ်ရသည်မှာ နာကျင်ရပေသည်။ ထိုအစီအစဥ်မှလွဲ၍ အပြင်တွင် သူ၏အရိပ်အယောင်အား တစ်စက်ကလေးမျှပင် ဖမ်းမိနိုင်မည်မဟုတ်ပေ။ သူ့မှာ မည်သည့်ကြော်ငြာ သို့မဟုတ် မည်သည့်ထောက်ခံချက်မှလည်းမရှိပေ။ ရှိုးအတွက် အခြေခံပရိုမိုးရှင်းများမှလွဲ၍ သူ၏ Weibo တွင် ဘာမှမရှိချေ။ အခြားနာမည်ကြီးများဆိုလျှင် ရှိုးကနေနာမည်ကြီးလာစဥ်အတွင်း လေဆိပ်ဓါတ်ပုံများ များစွာရှိနေလိမ့်ည်။ ၎င်းတို့၏ပရိသတ်များက လေဆိပ်တွင်စောင့်ကာ ကိုယ်တိုင်ဓါတ်ပုံရိုက်၊ ကိုယ်တိုင်အကြောင်းအရာဖန်တီးကာ ပို့စ်တင်ကြလိမ့်မည်။ တစ်ခါတစ်ရံ နာမည်ကြီးအနုပညာရှင်များက သူတို့၏နေ့စဥ်ဘဝပုံရိပ်များကို ဓါတ်ပုံများတင်ပေးလိမ့်မည်။ ဤသို့ဖြင့် အနည်းဆုံးတော့ ပရိသတ်များအတွက် ကြည့်ရှုစရာတစ်စုံတစ်ခုကို ပေးတတ်ကြသည်။ သို့သော် ယွမ်ယယ်၏အချိန်ဇယားက မည်သို့ရှိကြောင်း မည်သူမျှ သဲလွန်စလေးတောင် မသိကြပေ။ ထို့ကြောင့် ၎င်းတို့အတွက် သူ့အား လေဆိပ်တွင်စောင့်နေရန်မှာ မဖြစ်နိုင်ချေ။
ပရိသတ်အသစ်လေးများတွင် သွားစရာမရှိသဖြင့် သူ၏ Weibo ပို့စ်အောက်၌သာ မှတ်ချက်များရေးကြတော့သည်။ "ငါတို့မှာ အဖွဲ့အစည်းတစ်ခုခုရှိလား။ ကောကောအဟောင်းတို့ ကျေးဇူးပြုပြီး ဦးဆောင်ကြပါ! အရင်က ရှောင်တိလေးတွေက အကုန်လုံးလုပ်နိုင်ပါတယ်။ ငါတို့ရဲ့ကျွမ်းကျင်မှုက level 100 ပဲ 555555*။"
[*wuwuwu ငိုတာပါ]
သူ၏ပရိသတ်အဟောင်းများက ထိုအောက်တွင် စာပြန်ခဲ့ကြ၏။ "ငါတို့မှာ ဘာအဖွဲ့အစည်းမှမရှိဘူး။ ရှိရင်တောင် သူတို့အကုန်လုံး ရိုင်းတယ်။ ငါတို့ထဲကအများစုက စာအုပ်ပရိသတ်တွေပဲ။ မင်း ဒီမှာနေမယ်ဆိုရင်၊ ဗုဒ္ဓဘာသာ*ကိုလိုက်နာပါ။ နောက်ကျ ကျင့်သားရသွားပါလိမ့်မယ်။"
[*အေးအေးချမ်းချမ်းနေပြီး စိတ်ရှည်ရှည်ထားပါလို့ပြောချင်တာပါ။]
ပရိသတ်အဟောင်းတစ်ချို့ကလည်း မှတ်ချက်တွင် စကားစမြည်တောင် ပြောလာကြသည်။ သူတို့က ရေကန်အဟောင်းထဲကို ရေသစ်များထပ်ထည့်ကာ အလွန်စိတ်လှုပ်ရှားစရာကောင်းသည်ဟု ပြောနေခဲ့ကြသည်။
ရိုက်ကူးရေးပြီးနောက် ယွမ်ယယ်က လုံးဝကို ပျောက်ကွယ်သွား၏။ ပရိသတ်များက သူ့ကိုတွေ့ချင်လျှင် ရှိုးနှင့် နောက်ကွယ်ရိုက်ချက်တစ်ချို့ကိုသာ အွန်လိုင်းပေါ်၌ ရှာကြည့်နိုင်ကြသည်။ ရုပ်သံအစုံကလည်း သူနှင့် အင်တာဗျူးလုပ်ချင်ကြသော်ငြား ယွမ်ယယ်က ၎င်းတို့၏ဖိတ်ကြားချက်များကို လက်မခံခဲ့ပေ။ - ဘာအကြောင်းကို အင်တာဗျူးကြမှာလဲ။ သူများများပြောလေ အမှားတစ်ခုခုပြောမိရန် လွယ်ကူလေဖြစ်လိမ့်မည်။ ထို့ပြင် သူက သူ၏ပုဂ္ဂိုလ်ရေးကိစ္စများကို အခြားလူများနှင့် မျှဝေရန် ဆန္ဒမရှိချေ။ သူတစ်ခုခုကိုပြောချင်လျှင် ၎င်းအား သူ၏စာအုပ်ထဲရေသားလိမ့်မည်။ သူက ဇာတ်ကြောင်းများပြန်ပြောပြရန်အတွက် သူ၏ပါးစပ်ကိုမဟုတ်ဘဲ သူ၏ဘောပင်ကိုသုံးရသည်အား သဘောကျပေသည်။
ယခုတွင် ကျီရှောင်ထောင်းပင်လျှင် သူ့ကိုအချိန်နှင့်အမျှ အဆက်အသွယ်မရတော့ပေ။ သူ့ဆီက ပြန်စာများရရန်မှာ တစ်ကမ္ဘာလောက်ကြာနေတတ်သည်။
ကန်းကျင့်ဝေက ရုပ်သံဌာနမန်နေဂျာနှင့် စကားပြောပြီးနောက် ထုတ်လုပ်ရေးအဖွဲ့သည် အသစ်အသစ်သောဒရမ်မာများခင်းခြင်းကို ယာယီရပ်တန့်သွားလေ၏။ အမှန်မှာ ထိုအခြေအနေက ကိစ္စသေးသေးလေးသာဖြစ်ပြီး လူသိများစေရန်အတွက်သာ။ ဒါရိုက်တာလင်းဝေက စိတ်ဆိုးပြီး ပြဿနာတစ်ချို့ကို တမင်ဖန်တီးလိုက်ခြင်းဖြစ်သည်။ သူသည် ယွမ်ယယ်က ဘာမှပြန်မပြောရဲဘူးဟု ထင်နေ၏။ ၎င်းက ကွာရှင်းသည်နှင့်ပတ်သက်၍တော့ ဘာမှပြောရဲမည်မဟုတ်ပေ။ အကယ်၍ ၎င်းကိုသာဖော်ထုတ်ခံလိုက်ရလျှင် ထုတ်လုပ်ရေးအဖွဲ့ဘက်က မည်သည့်အကျိုးအမြတ်မျှ ရမည်မဟုတ်တော့ချေ။ ထို့ပြင် သူသာ ထိုအကန့်အသတ်ကိုကျော်လိုက်ပါက အနာဂတ်တွင် သူတို့နှင့် မည်သူကမျှ ပူးပေါင်းလုပ်ဆောင်ရဲမည်မဟုတ်တော့ပေ။
ဖန်းရှောက်ယိ၏ဇာတ်ကားက နောက်ဆုံးခန်းရိုက်ကူးရေးကို လုံးဝ အဆုံးမသတ်ရသေးပေ။ ၎င်းမှာ တစ်ပတ်နီးပါးကြာနေပြီဖြစ်၏။ ထိုရိုက်ချက်အတွက် ဒါရိုက်တာနှင့် ဇာတ်ညွှန်းရေးဆရာတို့က ဘယ်လိုမှ သဘောထားချင်းမတူကြပေ။ ဒါရိုက်တာက ဖန်းရှောက်ယိကို အသက်ရှင်စေချင်ပြီး ဇာတ်ညွှန်းရေးဆရာက ထိုဇာတ်ကောင်ကို စစ်ပွဲအတွင်းသေသွားစေချင်၏။ ထို့ပြင် ယခင်ရိုက်ချက်များအားလုံးက ထိုဇာတ်လမ်းအသွားအလာနှစ်ခုလုံးနှင့်အညီ ရိုက်ကူးခဲ့ပြီး ကွဲလွဲမှုအနည်းငယ်သာရှိသည်။ ဤနောက်ဆုံးရိုက်ချက်တွင်လည်း ရိုက်ချက်ခွဲများ အများအပြားရှိ၏။ တည်းဖြတ်ချိန်တွင် ၎င်းတို့က နှိုင်းယှဥ်ကြည့်ကာ နောက်ဆုံးဆုံးဖြတ်ချက်ချမည်ဖြစ်သည်။
ထိုဇာတ်ကားကို 《Wind Wanderer》 ဟုခေါ်သည်။ ၎င်းက ကျန်းဟူဓါးသမားတစ်ယောက်၏ ဘဝအကြောင်းဖြစ်သည်။ သူသည် ငယ်ရွယ်စဥ်က ဓါးတစ်လက်နှင့် နယ်မြေအစုံလှည့်လည်သွားလာခဲ့ပြီး ဘာကိုမှမကြောက်ရွံ့တတ်ပေ။ နောက်ပိုင်းတွင် လက်ဖက်ရည်တစ်ခွက်ကြောင့် ကျန်းဟူရန်ပွဲများတွင် ပါဝင်ခဲ့ရပြီး ရလဒ်အနေဖြင့် မျက်လုံးတစ်ဖက်ကွယ်ခဲ့ရ၏။
နှစ်ပေါင်းများစွာကြာပြီးနောက် တိုက်ပွဲများစွာစတင်လေသည်။ ကျန်းဟူမှာ အရင်ကကျန်းဟူမဟုတ်တော့ပေ။ ပုဂ္ဂိုလ်ရေး ရန်ငြိုးဖွဲ့မှုများနှင့် အမျိုးသားရေး ပြိုင်ဆိုင်မှုများ ပေါင်းစပ်လာခဲ့၏။ သို့သော် သေရေးရှင်ရေးအချိန်တွင်တော့ ကမ္ဘာကြီးက ကျန်းဟူဖြစ်နေဆဲပင်။
နောက်ဆုံးရိုက်ချက်က ထိုဇာတ်ကား၏ အရေးကြီးဆုံးသောအခန်းတစ်ခုဖြစ်သည်။ ရာပေါင်းများစွာသောအပိုလူများလည်း ရိုက်ကူးရေးတွင် ပါဝင်ရ၏။ ဖန်းရှောက်ယိ၏ နောက်ဆုံးအခန်းအတွက် ဒဏ်ရာမိတ်ကပ်လိမ်းခြင်းမှာ သုံးနာရီလောက်ကြာမြင့်ခဲ့သည်။ အပိုလူများစွာနှင့် ရိုက်ကွင်းကိုထိန်းချုပ်ရန်မှာ ခက်ခဲသည်။ မြို့တံတိုင်းပေါက်ကွဲသည့်အခန်းမှာလည်း တစ်ကြိမ်ကျရှုံးခဲ့ပြီး ၎င်းကို ပြန်ပြင်ရန်အတွက် အနည်းဆုံး သုံရက်ခန့် အချိန်လိုအပ်ပေသည်။
ဒါရိုက်တာရှင်းမှာ လူအုပ်ကြားထဲ အမိန့်ပေးရန်အတွက် စပီကာကို သွားလေရာသယ်သွားရ၏။ သူ၏အသံက တစ်ချိန်လုံး ကြမ်းရှနေခဲ့သည်။
လူလုပ်မိုးအတုမှာ အဆင်မပြတ်ရွာသွန်းနေ၏။ ရေစိုခံရန်အတွက် ဖန်းရှောက်ယိ၏မိတ်ကပ်ကို ပို၍စေးကပ်ပြီး ခိုင်မာအောင်ပြုလုပ်ထားရသည်။ ရိုက်ကူးရေးပြီးနောက် ထိုအရာများကိုဆေးကြောရန် တစ်နာရီလောက်ကြာမြင့်ခဲ့ရသည်။ ထိုအခန်းရိုက်ကူးရေးမှာ အတော်လေးခက်ခဲခဲ့၏။ အထူးသဖြင့် ဖောက်ခွဲရေးအဖွဲ့နှင့် ပစ္စည်းဆင်ရသည့်အဖွဲ့မှ ဖိအားအတော်များသည်။ အချိန်ကို တိတိကျကျ မထိန်းချုပ်နိုင်လျှင် အရာအားလုံးက အလဟဿဖြစ်သွားလိမ့်မည်။
ဒါရိုက်တာက ခေါင်းဆောင်ရိုက်ကူးရေးသမားကိုမေးလိုက်သည်။ "အခု သုံးနာရီဆိုတော့ မမှောင်ခင်နောက်တစ်ခန်းရိုက်လို့ရနိုင်မလား။"
ခေါင်းဆောင်ရိုက်ကူးရေးဆရာက ခေါင်းယမ်းပြလာ၏။ "အလင်းရောင်က လေးနာရီနောက်ပိုင်းဆို မကောင်းတော့ဘူး။ စက်ပစ္စည်းတွေပြန်တပ်ဆင်ဖို့ဆို အနည်းဆုံးမိနစ်လေးဆယ်လောက် အချိန်ယူရမှာ။ ကျွန်တော်တို့မှာ အချိန်လုံလုံလောက်လောက် မရှိဘူး။"
ဒါရိုက်တာရှင်းက မျက်မှောင်ကြုတ်လိုက်ရာ သူ၏မျက်ခုံးနှစ်ဖက်ကြားတွင် ချိုင့်ရာလေးတောင်ဖြစ်နေ၏။ သို့သော်လည်း သူ့တွင် ရွေးချယ်စရာမရှိပေ။ ရိုက်ကူးရေးမှာ ထိုကဲ့သို့ပင်။ တစ်ခါတစ်ရံ ချောချောမွေ့မွေ့ပြီးသွားတတ်ပြီး တစ်ခါတစ်ရံမှာတော့ ထိုသို့မဟုတ်ပေ။ သူ အခြေအနေနှစ်ရပ်လုံးကို လက်ခံရပေသည်။ ဒါရိုက်တာက ပြောလိုက်၏။ "ဒီနေ့အတွက်ရိုက်ကူးရေးပြီးပြီ။ လူတိုင်းပြန်သွားပြီး အနားယူလို့ရပါပြီ။ မနက်ဖြန်မှာ ဒီရိုက်ချက်ကို ကြိုးစားပြီးကျော်ဖြတ်ကြမယ်။"
ကျီရှောင်ထောင်းက ကုတ်အင်္ကျီကိုင်ျက် ဘေးကနရပ်စောင့်နေ၏။ ဒါရိုက်တာက ပြီးပြီဟုပြောလိုက်သည်နှင့် ဖန်းရှောက်ယိအတွက် ကုတ်အင်္ကျီဝတ်ပေးရန် သွားခဲ့သည်။ သူ၏အဝတ်များက စိုရွှဲနေပြီး သူက အေးခဲနေပြီဖြစ်၏။
ဖန်းရှောက်ယိက လက်ခါပြကာ မလိုဘူးဟုပြောခဲ့သည်။
ကျီရှောင်ထောင်း: "ဒီမြို့တံတိုင်းသာ နောက်တစ်ခါထပ်ပြီး ဖောက်ခွဲခံရရင် လုံးဝပြိုကျသွားလိမ့်မယ်လို့ထင်နေတယ်။ ကျွန်တော်တို့ ပြန်ပြင်ဆင်ဖို့ နောက်ထပ်သုံးရက်လောက် စောင့်သင့်တာကို။"
ဖန်းရှောက်ယိက သူ၏ဝတ်စုံကိုချွတ်ကာ မိတ်ကပ်တဲထဲသို့ အဝတ်ဗလာဖြင့် လျှောက်ဝင်သွား၏။ အဝတ်အစားပေါ်က သွေးအတုများသည် ခြောက်တောင်နေပြီဖြစ်ရာ မနက်ဖြန်အတွက် သုံးလို့မရတော့ပေ။ သူ့အတွက် နေ့တိုင်းအဝတ်အစားအသစ်များ လိုအပ်ပေသည်။ အဝတ်အစားအဖွဲ့မှာ ဝတ်စုံဒါဇင်ကျော်ရရန် အလျင်အမြန်ပြုလုပ်ခဲ့ရသည်။ ဝတ်စုံကောင်းကောင်းတစ်စုံရရန် အချိန်နှစ်ရက်လောက်လို၏။ အဝတ်အစားအဖွဲ့က သူတို့ရိုက်ကူးရေး မည်မျှကြာအောင်လုပ်ရမည်ကို မည်သူမှ မသိသောကြောင့် ဝတ်စုံများကို အဆက်မပြတ်လုပ်နေခဲ့ကြရသည်။
ဖန်းရှောက်ယိ၏မိတ်ကပ်ကိုဖျက်ရန် မိတ်ကပ်အကူလက်ထောက်အများကြီး လိုအပ်သည်။ သို့မှသာ သူပြန်၍အနားယူနိုင်လိမ့်မည်။ မျက်ကပ်မဖျက်ခင် မျက်နှာပေါ်မှ ပလာစတာများတစ်လွှာပြီးတစ်လွှာ ဖယ်ခွာနေသည်မှာ အရေပြားကို ထုံထိုင်းပြီး သဲကြမ်းများဖြင့်ပွတ်တိုက်နေသလို ခံစားရစေသည်။ ၎င်းမှာ အလွန်အဆင်မပြေဖြစ်ပြီး အသားအရေလည်း အတော်လေးပျက်စီးပေလိမ့်မည်။ လက်ထောက်များက အကြမ်းပတမ်းမလုပ်ရဲကြပေ။ ၎င်းတို့က သူ၏မျက်နှာကို ဂရုတစိုက်နှင့် သန့်စင်ပေးနေကြ၏။
ဖန်းရှောက်ယိက တစ်ချိန်လုံး ခပ်မတ်မတ်ထိုင်နေခဲ့ရသည်။ သူ့ကို မိတ်ကပ်ဖျက်ပေးနေကြသော ထိုအကူလေးများမှာ တချို့က စောင့်ကြောင့်ထိုင်လျက်၊ တချို့ကလည်း သူ၏ခြေထောက်များကို တိုက်မိနေလျက်ရှိသည်။ ကြမ်းပြင်ပေါ်တွင်လည်း ရေပုံးတစ်ချို့ရှိ၏။ တစ်နေ့တစ်နေ့ မိတ်ကပ်လိမ်းခြင်းနှင့်ဖျက်ခြင်းအမှုသည် ငါးနာရီခန့်ရှိပြီး အလွန်ပင်ပင်းလှသည်။ ဖန်းရှောက်ယိ၏အသံမှာလည်း အက်ရှနေပြီး သူတို့ကိုပြောလိုက်၏။ "စိတ်မပူပါနဲ့ ပိုပြီးကြမ်းကြမ်းပွတ်လိုက်။ ဒါကိုလွယ်လွယ်ဖျက်နိုင်ရင် မြန်မြန်ပြီးသွားပြီး ပိုပြီးမြန်မြန်အိမ်ပြန်ရလေပဲ။"
သူ၏မျက်နှာကို ဖျက်ပေးနေသောမိန်းကလေးက နူးညံ့စွာပြောလာသည်။ "ကျွန်မတို့ မလုပ်ရဲပါဘူး။ နေ့တိုင်း မျက်နှာကို ကြမ်းကြမ်းတမ်းတမ်းပွတ်တိုက်နေရင် အရမ်းပျက်စီးကုန်မှာ။ ဖန်းလောင်ရှီး ပြန်ရောက်ရင် တကယ်ကိုဂရုစိုက်ဖို့လိုတယ်နော်။"
ဖန်းရှောက်ယိက မျက်လုံးများမှိတ်ထားလျက် အသံပြုလိုက်သည်။ သူ ထိုမိတ်ကပ်အလွှာများအားလုံးဖျက်ပြီးရန်ကိုသာ စောင့်နေခဲ့လေသည်။
ကျီရှောင်ထောင်းက အပူပေးပန်ကာအသေးလေးကို ဆွဲယူလာပြီး ဖန်းရှောက်ယိဘက်ကို လှည့်ထားလိုက်သည်။ ထိုကဲ့သို့ပြင်ပရိုက်ကူးရေးများတွင် အဝတ်လဲခန်းဟူ၍ မရှိပေ။ ထို့ကြောင့် လူတိုင်းမှာ ယာယီတဲများကိုသာ အသုံးပြုရသည်။ အထဲရှိအပူချိန်နှင့် ပြင်ပအပူချိန်မှာ အတူတူပင်ဖြစ်၏။ နှစ်ခုလုံး စိုစွတ်ကာ အလွန်အေးနေသည်။ ဖန်းရှောက်ယိက ဘောင်းဘီတိုကိုသာဝတ်ထားရပြီး ကျန်သောကိုယ်တစ်ပိုင်းမှာ ဗလာကျင်းနေသည်။ နေ့တိုင်း မည်သူမှ ထိုအခြေအနေကို မကူညီနိုင်ပေ။
ထိုရက်များတွင် ကျီရှောင်ထောင်းက စကားမပေါတော့ပေ။ သူသည် ဖန်းရှောက်ယိအလွန်ပင်ပန်းရသည်ကို သိပြီး သူ၏အနားယူချိန်ကို နှောင့်ယှက်မိမည်အား စိုးရိမ်နေသည်။ သူက မျက်စိမှိတ်ကာ မိတ်ကပ်အဖျက်ခံနေသော ဖန်းရှောက်ယိ၏ပုံကို ရိုက်ယူလိုက်သည်။ အတွေးတစ်ခုပေါ်လာပြီးနောက် ယွမ်ယယ်ဆီသို့ ထိုပုံကို ပို့လိုက်လေ၏။
ဖန်းရှောက်ယိက မျက်လုံးဖွင့်လာကာ သူ့ကိုကြည့်လိုက်သည်။ ထို့နောက် ခပ်နက်နက်လေသံဖြင့် ပြောလာ၏။ "အဲ့ပုံကို Weibo ပေါ်မတင်နဲ့။"
ကျီရှောင်ထောင်းက ထိုနေရာတွင် ဆောင့်ကြောင့်ထိုင်ကာ ခေါင်းညိတ်လိုက်၏။ "မတင်ပါဘူး။ ကျွန်တော် ယိကောဆီကိုပို့လိုက်တာ။"
ဖန်းရှောက်ယိက မျက်မှောင်ကြုတ်ကာ သူ့ကိုစိုက်ကြည့်လိုက်လေ၏။ "လျှောက်မလုပ်နဲ့။"
"ကျွန်တော် လျှောက်လုပ်နေတာမဟုတ်ပါဘူး။ ကျွန်တော်င နာကျင်နေတာ။" ကျီရှောင်ထောင်က ညင်ညင်သာသာပြန်ပြောလေသည်။
မကြာခင်က ရသစုံရှိုးမရိုက်ကူးခင်ကနှစ်နှင့်မတူဘဲ သူသည် ယွမ်ယယ်နှင့် ကြိမ်ဖန်များစွာ အဆက်အသွယ်လုပ်ခဲ့၏။ ထိုနှစ်က ၎င်းတို့အဆက်အသွယ်လုပ်သည်မှာ အလွန်ရှားပါးခဲ့သည်။ ကျီရှောင်ထောင်းမှာ ၎င်းတို့နှစ်ဦး၏အတွေးများကို ရှင်းရှင်းလင်းလင်းနားမလည်နိုင်ပေ။ သူတို့နှစ်ဦး လုံးဝအဆက်အသွယ်ဖြတ်လိုလျှင်လည်း သူပါကြားထဲကနေပါသွားရန်မှာ သူ့အတွက်မတရားပေ။ မည်သို့ပင်ဖြစ်စေ ရိုက်ကူးရေးပြီးဆုံးသွားကတည်းက သူ ယွမ်ယယ်နှင့် အဆက်အသွယ်ရှိနေဆဲပင်။ ယွမ်ယယ်၏စိတ်သဘောထားကလည်း အေးစက်မသွားဘဲ ကျီရှောင်ထောင်းနှင့် ထိုသို့စစနောက်နောက်ရှိနေဆဲဖြစ်၏။ ကျီရှောင်ထောင်းတစ်ယောက် ထိုအခြေအနေကိုတစ်ပတ်ပြန်လှည့်ရန် အခွင့်အရေးရှိလောက်မည်ဟု ခံစားမိနေသည်။
ဖနိးရှောက်ယိက သူ့ကိုပြောလိုက်သည်။ "ပြန်ဖျက်လိုက်။"
ကျီရှောင်ထောင်းက ကြိုးစားကြည့်လိုက်ပြီးနောက် ပြောလာ၏။ "လုပ်လို့ရတဲ့အချိန်အကန့်အသတ်ကျော်သွားပြီ။"
ဖန်းရှောက်ယိက သူ့ကို ထပ်မဆူတော့ချေ။ သူက မျက်ခုံးများတွန့်ချိုးနေပြီးနောက် နောက်တစ်ကြိမ်မျက်လုံးများမှိတ်ထားလိုက်တော့သည်။
နာရီဝက်ကြာပြီးနောက် ယွမ်ယယ်က စာပြန်ခဲ့၏။ ဖန်းရှောက်ယိမိတ်ကပ်ဖျက်နေသည်မှာ မပြီးသေးသော်လည်း ပြီးခါနီးနေပြီဖြစ်သည်။ သူက ထိုနေရာ၌ မျက်လုံးမှိတ်ကာထိုင်နေပြီး အိပ်ပျော်နေပုံပင်။
ယွမ်ယယ်: "မင်းတို့ကောင်တွေ ဘာရိုက်ကူးရေးလုပ်နေရတာလဲ။"
ကျီရှောင်ထောင်းက တုံ့ပြန်လိုက်သည်။ "နောက်ဆုံးအခန်းပါ။ တစ်ပတ်တောက်ရှိနေပြီ၊ ဒါပေမဲ့ ခုထိမအောင်မြင်သေးဘူး။"
ယွမ်ယယ်: "မိတ်ကပ်ကဘယ်မှာလိမ်းရတာလဲ။"
ကျီရှောင်ထောင်း; "တဲထဲမှာ။"
ယွမ်ယယ်က စက္ကန့်အနည်းငယ်ကြာပြီးနောက် စာလုံးတစ်လုံးတည်းဖြင့် စာပြန်လာ၏။ "Fuck"
ကျီရှောင်ထောင်းက အပူပေးပန်ကာအသေးစားလေးကို ဓါတ်ပုံရိုက်ကာ ယွမ်ယယ်ထံပို့လိုက်သည်။ "ကျွန်တော် အကောင်းဆုံးကြိုးစားခဲ့ပေမဲ့ ကျွန်တော်တို့မှာ ဒါလေးပဲရှိတယ်။"
ယွမ်ယယ်: "အမ်း။"
ကျီရှောင်ထောင်းတစ်ယောက် ထိုထက်ပိုပြီး မပြောရဲချေ။ သူသည် ဖန်းရှောက်ယိက သူ့ကိုထိုသို့လုပ်နေခြင်းမှ တားဆီးလာမည်ကို ကြောက်ပေ၏။ ထို့ပြင် သူတို့သာ တမင်တကာ သနားစရာကောင်းသည့်ပုံစံဟန်ဆောင်ပြီး ဖန်းရှောက်ယိကိုရောင်းစားပါက ဆိုးရွားသွားလိမ့်မည်။ ၎င်းက လုံလောက်နေပြီဖြစ်သည်။ ကျီရှောင်ထောင်းက မတုံ့ပြန်ခဲ့ပေ။ သူလုပ်နေတာမှန်ရဲ့လားကို သူ မသိပေ။ ယုတ္တိရှိရှိပြောရလျှင် သူက တစ်စုံတစ်ယောက်၏ စုံတွဲပြဿနာများကြားတွင် မပါဝင်သင့်သော်လည်း သူတို့နှစ်ဦးနှင့် အတော်လေးရင်းနှီးပေသည်။ ၎င်းမှာ သူရဲရဲဝံ့ဝံ့ ကြိုးစားလိုသည့် တစ်ခုတည်းသော အကြောင်းပြချက်ပင်။
ခဏကြာပြီးနောက် ယွမ်ယယ်က နောက်ထပ်မက်ဆေ့ပို့လာ၏။: "မင်းတို့ပြန်သွားပြီးမှ အဲ့ဒါကိုလုပ်လို့မရဘူးလား။ မိတ်ကပ်လက်ထောက်တွေကို မင်းတို့အခန်းထဲလိုက်ပြီး မိတ်ကပ်ဖျက်ပေးဖို့ ပြောလိုက်လေ။"
ကျီရှောင်ထောင်းက မြန်မြန်စာပြန်လိုက်သည်။ "ယိကောက ခွင့်မပြုဘူး။ အဲ့ပစ္စည်းတွေအကုန်လုံးက အမှုန်တွေဖြစ်ရင်ဖြစ် မဟုတ်ရင် ဆီတွေလိုရွှဲနေတာ။ အဆင်မပြေဘူး။ ပြီးတော့ ကျွန်တော်တို့က ကားနဲ့ပြန်ရတာဆိုတော့ အဲ့မိတ်ကပ်တွေနဲ့ဆို သွားရလာရတာလည်း ခက်တယ်လေ။"
ဖန်းရှောက်ယိက မျက်လုံးများပွင့်လာ၏။ သူကမေးလိုက်သည်။ "သူဘာပြောလဲ။"
ကျီရှောင်ထောင်းက ပြောလိုက်၏။ "ယယ်ကောက ကျွန်တော်တို့ကို ဘာလို့ဟိုတယ်ကိုပြန်ပြီးမှ မိတ်ကပ်မဖျက်တာလဲလို့မေးနေတာ။"
သူတို့ဘေးပတ်ပတ်လည်မှာ လူအများကြီးရှိနေသည်။ ဖန်းရှောက်ယိက ဘာမှမပြောဘဲ "မကောင်းတာဘာမှမပြောနဲ့" ဟုသာ ပြန်ပြောလိုက်သည်။
"အိုကေ၊ ကျွန်တော် ဘာမှမပြောပါဘူး။" ကျီရှောင်ထောင်းက ပြောလိုက်၏။
မိတ်ကပ်လက်ထောက်က ဖန်းရှောက်ယိကို ဘေးဘက်မှ မော့ကြည့်လိုက်သည်။ သူမက အပြုံးလေးဖြင့်ပြောလာ၏။ "ကျွန်မ 《In The Time》ကို ကြည့်ပြီးသွားပြီ။ လောင်ရှီးနဲ့ ယွမ်ယယ်လောင်ရှီးတို့က ဆက်ဆံရေးအရမ်းကောင်းတယ်နော်။ ယွမ်ယယ်လောင်ရှီးက ဒေါသထွက်လွယ်တဲ့သူမလား..."
ဖန်းရှောက်ယိက ပြောလိုက်သည်။ "မဟုတ်ပါဘူး။ သူက စိတ်ထားအရမ်းကောင်းတယ်။"
ညအချိန်၌ ဒါရိုက်တာက ဖန်းရှောက်ယိ၏အခန်းသို့ရောက်လာပြီး သူနှင့်အချိန်အတော်ကြာ စကားပြောနေခဲ့သည်။ တကယ်တမ်းတော့ ၎င်းတို့က ရိုက်ကူးရေးအဆုံးသတ်ချိန်အတွက် ဖန်းရှောက်ယိနှင့်စာချုပ်ချုပ်ဆိုထားသောအချိန်ကို ကျော်သွားပြီဖြစ်သော်လည်း အချိန်ဇယားထက် ပိုကြာနေတတ်သည်မှာ ရိုက်ကူးရေးတွင် ပုံမှန်ပဲဖြစ်သည်။ ဒါရိုက်တာသည်လည်း သူနှင့်ရင်းနှီးသောသူဖြစ်လေရာ ထိုကိစ္စမှာ ကြီးကြီးမားမားတော့မဟုတ်ပေ။ သူကလည်း ရသစုံရှိုးရိုက်ကူးရေးတွင်ပါရန် ရိုက်ကူးရေးတွင်ခွင့်ယူသွားခဲ့ရသည်များလည်းရှိခဲ့သည်။ သူ ထိုအခန်းများအားလုံးကို အလျင်အမြန် အကောင်းဆုံးကြိုးစားရိုက်ကူးထားပြီးဖြစ်သော်လည်း ရုပ်ရှင်အဖွဲ့သားများအတွက်တော့ ပြဿနာအနည်းငယ်ရှိနေဆဲပင်။
ဒါရိုက်တာက သူ့ကိုပြောလာ၏။ "မင်းလည်း ကြိုးစားခဲ့ပါတယ်။ ဒီအခန်းက ရိုက်ကူးရတာ တော်တော်ခက်တယ်။"
"လူတိုင်းကြိုးစားကြပါတယ်။" ဖန်းရှောက်ယိကပြုံးလျက်: "လက်ရာကောင်းတစ်ခုဖန်တီးဖို့အတွက် အချိန်လိုတာပဲလေ။"
"မင်းရဲ့နောက်လာမဲ့အချိန်ဇယားတွေနဲ့ပတ်သက်ပြီး ပြဿနာမရှိဘူးနော် ဟုတ်တယ်မလား။" ဒါရိုက်တာရှင်းက ပြုံးလိုက်သည်။ "လောင်ကျန်းကရော မင်းကို ခက်ခဲအောင်လုပ်သေးလား။ မင်းအတွက် ဒီဦးလေးက သူ့ဆီဖုန်းခေါ်ပေးဖို့လိုသေးလား။"
ဒါရိုက်တာရှင်းနှင့် ဖန်းရှောက်ယိ၏ဖခင်တို့မှာ အတော်လေးရင်းနှီးကြသည့်ဆက်ဆံရေးရှိသည်။ ရိုက်ကွင်းတွင် သူက တစ်ဖက်လူကို 'ဒါရိုက်တာ' ဟုခေါ်သော်လည်း သီးသန့်အချိန်တွင် 'ဦးလေး' ဟု ခေါ်တတ်သည်။ ဖန်းရှောက်ယိက ခေါင်းယမ်းကာပြောလိုက်သည်။ "မလိုပါဘူး။ ကောင်းကောင်းအနားယူပြီး ရိုက်ကူးရေးကိုပဲဆက်လုပ်နေပါ။ ကျွန်တော်လည်း အလျင်လိုမနေပါဘူး။ ဒါရိုက်တာကျန်းကလည်း ဦးလေးရဲ့ရုပ်ရှင်ဖြစ်နေရင် ကျွန်တော်ကို မလောပါဘူး။"
"သူလုပ်ခဲ့ရင် ငါ့ကိုပြောလိုက်၊ ငါ သူနဲ့စကားပြောလိုက်မယ်။" ဒါရိုက်တာက ပြောလိုက်သည်။
ဖန်းရှောက်ယိက ပြုံးကာ ခေါင်းညိတ်ပြလိုက်သည်။ မိနစ်အနည်းငယ်လောက် စကားထပ်ပြောပြီးနောက် သူသည် ဒါရိုက်တာကို လမ်းလျှောက်ကာပို့ပေးလိုက်တော့၏။
ဒါရိုက်တာထွက်သွားသည်နှင့်တစ်ပြိုင်နက် ကျီရှောင်ထောင်းက သူ၏ထိုင်ခုံပေါ်ကနေ အလန့်တကြားခုန်ထလိုက်သည်။ သူက ဖန်းရှောက်ယိ၏ဖုန်းကို သူ့လက်ထဲသိူ့ ထိုးပေးလိုက်၏။ "ကော! ခုလေးတင်ပဲ ယယ်ကောဆီက ဖုန်းလာသွားတယ်!"
ဖန်းရှောက်ယိက မျက်ခုံးပင့်ကာ သူ၏ဖုန်းကိုငုံ့ကြည့်လိုက်ရာ လွတ်သွားသောဖုန်းခေါ်ဆိုမှုတစ်ခုရှိနေ၏။ ၎င်းမှာ အမှန်ပင် ယွမ်ယယ်ဆီမှဖြစ်လေသည်။
နာမည်ပြောင်မှာလည်း အရင်ကနှင့်အတူတူပဲဖြစ်၏ - သူက 'မျောက်ကလေး' ဟု မှတ်ထားခဲ့ပြီး ယခုကြည့်ရတာ နည်းနည်းတော့ရယ်စရာကောင်းနေသည်။
ဖန်းရှောက်ယိက သူ၏ဖုန်းကို ဘေးသို့ချထားလိုက်သည်။ သူက ပြန်ခေါ်ဖို့အစီအစဥ်မရှိသလို ယွမ်ယယ်ကလည်း ထပ်ခေါ်လိမ့်မည်မဟုတ်ကြောင်း သူသိနေ၏။ မမျှော်လင့်ထားစွာပင် ဆယ်မိနစ်ခန့်ကြာပြီးနောက် သူ၏ဖုန်းက ထပ်မံတုန်ခါလာခဲ့သည်။
၎င်းမှာ 'မျောက်ကလေး' ဖြစ်နေဆဲ။
ဖန်းရှောက်ယိက အနည်းငယ်အံ့သြသွားပြီး နှုတ်ခမ်းကို တင်းတင်းဖိကာ ဖုန်းကိုဖြေဆိုလိုက်တော့သည်။
*****