ဖန်းရှောက်ယိက သူအိပ်မက်မက်ခဲ့သည်ဟု ပြောလာသော်လည်း ယွမ်ယယ်က မည်သည့်အိပ်မက်ဖြစ်ကြောင်း မမေးခဲ့ချေ။ သူက ဖန်းရှောက်ယိကို ထပ်ပြုံးပြလိုက်၏။ သူပြုံးလိုက်ချိန်တွင် သူ၏မျက်လုံးများက မှေးကျဥ်းသွားပြီး ကြည့်ရသည်မှာ အလွန်နှစ်လိုဖွယ်ကောင်းနေသည်။
မတိုင်ပင်ထားသော ထိုမတော်တဆဖြစ်ရပ်လေးကြောင့် ယခုတစ်ကြိမ်ရိုက်ကူးရေးမှာ ချောချောမွေ့မွေ့ပြီးဆုံးသွားခဲ့သည်။ သူတို့နှစ်ယောက်လုံး တစ်ယောက်ကိုတစ်ယောက် မဝေဖန်ခဲ့ကြပေ။
ကင်မရာများရှေ့တွင် သူတို့က နှစ်ပေါင်းများစွာချစ်မြတ်နိုးလာခဲ့သည့် တကယ့်အစစ်အမှန်စုံတွဲများနှင့် တူနေပေ၏။ အကြည့်တိုင်းတွင် တစ်ယောက်ကိုတစ်ယောက် မည်မျှနားလည်ကြောင်း ပေါ်လွင်နေခဲ့သည်။ ယွမ်ယယ် ရုတ်တရက်ဆိုသလို ရသစုံရှိုးရိုက်ကူးရခြင်းနှင့် ကင်မရာများရှေ့တွင် သရုပ်ဆောင်နေရခြင်းက အလွန်စိတ်ဝင်စားဖို့ကောင်းသည်ဟု ခံစားလာရသည်။ သူနှင့် ဖန်းရှောက်ယိ မည်သူက သရုပ်ဆောင်ပိုကောင်းလဲ သိချင်လာခဲ့သည်။ သို့သော်လည်း ဖန်းရှောက်ယိက ရုပ်ရှင်ဧကရာဇ်တစ်ပါးပင်။ သူ့ကို တခြားသူများက အနိုင်မယူနိုင်ပေ။
ယွမ်ယယ် ဂျပန်သို့ အကြိမ်အနည်းငယ်ရောက်ဖူးပေ၏။ သူ ထိုနိုင်ငံကို အရမ်းကြီး ကြိုက်မနေခဲ့ပေ။ အဓိကအားဖြင့် အစားအစာများပင်။ အရင်က ယွမ်ယယ်တစ်ယောက် ဖန်းရှောက်ယိ၏ရိုက်ကွင်းတစ်ခုအား အတူလိုက်သွားဖူးသည်။ နှစ်လအတွင်း သူ ဆယ်ပေါင်နီးပါးကျသွားခဲ့ရ၏။
ယခုတစ်ကြိမ်တွင်လည်း ၎င်းတို့တွေ ရေပူစမ်းသို့ လည်ပတ်ခဲ့ကြသည်။ ယွမ်ယယ်နှင့် ဖန်းရှောက်ယိတို့ အခြားသူများအိပ်ပျော်နေစဥ် တိတ်တိတ်လေးခိုးထွက်ခဲ့ကြ၏။ သူတို့က ရေပူစမ်းတွင် ညလယ်သရေစာကိုတောင် စားခဲ့ကြသည်။
အမှန်တကယ်တော့ ၎င်းမှာ ရိုက်ကူးရေးအတွက် ထုတ်လုပ်ရေးအဖွဲ့သားများက စီစဥ်ထားခြင်းဖြစ်သည်။
ဤရိုက်ချက်မှာ အနည်းငယ်ကွဲပြားပေ၏။ ယွမ်ယယ်က ရေထဲတွင်သာ စိမ်နေခဲ့ပြီး မတ်တတ်ပင်မထရဲပေ။ သူ၏စိတ်ထဲတွင် သူတို့နှစ်ယောက် တစ်ယောက်ကိုတစ်ယောက်မျက်နှာချင်းဆိုင်ပြီး စကားစမြည်ပြောနေရခြင်းကို ထုတ်လုပ်ရေးအဖွဲ့က တမင်လုပ်နေသည်လား သို့မဟုတ် အရမ်းတုံးအလွန်းသည်လားဟု ညည်းညူနေခဲ့ကြသည်။ မည်သည့်အရာမှမဖြစ်ဘူးဆိုသည်မှာ ဖြစ်နိုင်ပါသလား။ အထူးသဖြင့် ယခုကဲ့သို့ထူးခြားသောအပြင်အဆင်မျိုးတွင်ပင်။ ယွမ်ယယ်၏မှတ်ဥာဏ်ထဲတွင် ယခုကဲ့သို့ ပူပူလောင်လောင်အမှတ်တရများ ရှိနေခဲ့သည်။ အကြောင်းအမျိုးမျိုးကြောင့် သူတို့နှစ်ဦးလုံးက ရေထဲတွင် အလွန်ငြိမ်သက်စွာ နေနေခဲ့ကြပြီး မည်သူမျှ အပြင်မထွက်ရဲကြပေ။
နောက်ဆုံးတွင် ယွမ်ယယ် ကင်မရာဆရာကို ပြန်သွားပြီး အိပ်ရန် အဝေးသို့နှင်လွှတ်လိုက်တော့သည်။
ရိုက်ကူးရေးအဆုံးသတ်ခါနီးတွင် လူငယ်ဒါရိုက်တာက ယွမ်ယယ်ကို ကနေဒါအခြေအနေအကြောင်း ထပ်မံပြောလာခဲ့သည်။ ယွမ်ယယ်ကလည်း သူ၏အမြင်ကို လုံးဝမပြောင်းလဲခဲ့ဘဲ ဘူးဆို ဖရုံမသီးခဲ့ပေ။ သူ ကနေဒါနိုင်ငံကို သဘောမကျချေ။
လူငယ်ဒါရိုက်တာတွင် အခြားရွေးချယ်စရာမရှိတော့ပေ။ သူ(မ)က ဖန်းရှောက်ယိဘကွလှည့်ကာ အကူအညီတောင်းရုံသာရှိတော့သည်။ သူ(မ)သည် ဖန်းရှောက်ယိက ပို၍သဘောကောင်းသလို ခံစားလိုက်ရ၏။ တကယ်တော့ ဖန်းရှောက်ယိက ယွမ်ယယ်ထက် ပိုပြီးကိုင်တွယ်ရခက်ပေသည်။ သူက သူ(မ)ကို ပြောလိုက်သည်။ "ဒီအကြောင်းကို ကုမ္ပဏီကို တိုက်ရိုက်ပြောလိုက်ပြီး သူတို့နဲ့ သွားဆွေးနွေးလိုက်ပါ။ ယွမ်ယယ်ကို ထပ်ပြောနေစရာမလိုပါဘူး။ သူက သူ့ဆုံးဖြတ်ချက်ကိုပြင်မှာမဟုတ်ဘူး။"
သူ၏အပြင်လူများအပေါ် သဘောထားသည် အမြဲတမ်း ယွမ်ယယ်နှင့်အတူတူပင်ဖြစ်သည်။ ယွမ်ယယ်က မသွားဘူးဟုပြောလိုက်လျှင် သူက လူကောင်းတစ်ယောက်ပုံပေါက်အောင် သဘောတူဖို့ကြိုးစားလိမ့်မည်မဟုတ်ပေ။ သို့သော် သီးသန့်အချိန်တွင် ဖန်းရှောက်ယိက ယွမ်ယယ်ကိုပြောလာ၏။ "ဘယ်ကိုပဲသွားသွား အတူတူပဲကို သူတို့ကို စိတ်မဆိုးပါနဲ့။ ဒေါသထွက်စရာမလိုပါဘူး။"
ယွမ်ယယ်က ခေါင်းခါကာ သေးသေးလေးမျှပင် မပြောင်းလဲခဲ့ပေ။ "မရဘူး။"
ဖန်းရှောက်ယိက သူ့ကိုစိုက်ကြည့်ကာ အံ့သြစရာကောင်းစွာပင် ဘာမှပြောမလာခဲ့ပေ။ သူက ခေါင်းညိတ်လိုက်၏။ "ကောင်းပါပြီ။"
ထို့နောက်တွင် သူတို့ ကနေဒါသို့ မသွားရတော့ချေ။ အခြားသူများက ဂရုမစိုက်သော်လည်း ဖန်းရှောက်ယိနှင့် ယွမ်ယယ်က နေရာများပြောင်းလဲခြင်းအား ခေါင်းမာစွာ မလိုက်လျောခဲ့ကြပေ။ နောက်ဆုံးတွင် ၎င်းတို့စီစဥ်ထားသည့်အတိုင်း သြစတေးလျသို့ သွားခဲ့ကြသည်။
ထုတ်လုပ်ရေးအဖွဲ့က မပျော်မရွှင်ဖြစ်နေကြသော်လည်း ဘာမှမပြောခဲ့ပေ။ ဘယ်လိုပဲဖြစ်ဖြစ် ဖန်းရှောက်ယိ၏အဆင့်အတန်းကလည်း ရှိနေသေးသည်မဟုတ်လော။ ထို့ပြင် စာချုပ်ထဲတွင် ကြိုတင်လက်မှတ်ရေးထိုးထားပြီး ဖန်းရှောက်ယိဘက်က ထိုပြောင်းလဲလိုက်ခြင်းအား ဆန့်ကျင်လာသည်မှာ ပုံမှန်ဖြစ်သဖြင့် ၎င်းတို့မှာ ဘာမှပြောလို့မရပေ။
ထိုနေ့က သူအိမ်ပြန်ရောက်ပြီးနောက် ယွမ်ယယ် အစီအစဥ်၏ခေါင်းဆောင်ဒါရိုက်တာလင်းဝေဆီမှ မက်ဆေ့ချ်ရခဲ့သည်။ သူကပြောလာ၏။ "ယွမ်ယယ်လောင်ရှီး၊ ကျွန်တော်တို့ လောင်ရှီးဆန္ဒအတိုင်း သြစတေးလျကို သွားရမှာပါ။"
ယွမ်ယယ်က တုံ့ပြန်လိုက်သည်။ "စိတ်မကောင်းပါဘူး ဒါရိုက်တာလင်း၊ ကျွန်တော် ဒုက္ခပေးမိပြီ။"
လင်းဝေ: "ပြောစရာမလိုပါဘူး ယွမ်လောင်ရှီးရယ်။ လောင်ရှီးနဲ့ ကြိုပြီးမဆွေးနွေးမိတာ ကျွန်တော်တို့အမှားပါ။"
အခြားသူများက ယွမ်ယယ်အား အပြစ်ရှာသည်ဟု တွေးကောင်းတွေးလိမ့်မည်။ သို့သော် ကနေဒါသို့ တစ်ရက် သို့မဟုတ် နှစ်ရက်တည်းဖြင့်သွားရမည်ဆိုသည်မှာ ဟာသတစ်ခုမျှသာ။ သူတို့ ရက်အများကြီးယူလိုက်ရလျှင် ဖန်းရှောက်ယိတွင် နားချိန်ရှိမည်မဟုတ်ပေ။ အခြားသူများမျက်လုံးထဲတွင် ထိုအခြေအနေကို ယွမ်ယယ်က အိုဗာလုပ်နေသည်ဟု ထင်နိုင်သော်လည်း ယွမ်ယယ်က အမှန်ပင် ထိုကဲ့သို့လူစားဖြစ်သည်။ သူက သူသဘောမတူသောအရာများကို အလျော့မပေးတတ်ပေ။ ဖန်းရှောက်ယိက သူ၏စိတ်ကိုပြောင်းလဲစေရန် ချဥ်းကပ်လာလျှင်တော့ ဖြစ်ကောင်းဖြစ်နိုင်လိမ့်မည်။ သို့သော် ဖန်းရှောက်ယိက ကြိုးစားလိမ့်မည်မဟုတ်ပေ။
၎င်းတို့၏ပထမဆုံးအပိုင်းအား TV တွင် ထုတ်လွှင့်ပြီးဖြစ်သည်။ ယွမ်ယယ် ထိုအကြောင်းကိည ဂျပန်မှာရှိစဥ်ကတည်းက သိထားပြီးဖြစ်၏။ ထိုအပိုင်းပြသအပြီးတွင် သူ၏ WeChat အကောင့်က အသက်ဝင်နေခဲ့ပြီး ကြည့်ရှုပြီးသူများက သူ့ဆီလာပြီးစကားပြောခဲ့ကြသည်။ နင်းလုက တိုက်ရိုက်ထုတ်လွှင့်မှုအတွင်း ဗီဒီယိုအတိုလေးပင်ဖြတ်ကာ သုံးခဲ့သေးသည်။ နောက်ပိုင်းတွင် ယွမ်ယယ်တစ်ယောက် အက်တာနက်ကိုပိတ်ကာ မည်သူ့ထံမျှ စာမပြန်ခဲ့တော့ပေ။
မည်သို့ပင်ဖြစ်စေ ထုတ်လုပ်ရေးအဖွဲ့သားများက ငွေကြေးအမြောက်အမြားသုံးစွဲကာ ကနဦးပရိုမိုးရှင်းပွဲများလည်း ပြုလုပ်ခဲ့ကြသဖြင့် CP များအားလုံး ရက်အတော်ကြာ နာမည်ကြီးနေခဲ့ကြ၏။ အသက်ငယ်သည့်စုံတွဲနှစ်တွဲက လက်ရှိတွင် အွန်လိုင်းဖော်လိုဝါအများဆုံးနှင့် နာမည်ကြီးနေသော အနုပညာရှင်များဖြစ်ကြသည်။ ထို့ကြောင့် ပထမအပိုင်း၏ အဆင့်သတ်မှတ်ချက်မှာ အတော်လေးကောင်းနေခဲ့၏။
ယခုနှစ်များတွင် ဖန်းရှောက်ယိက တိတ်တဆိတ်သာနေခဲ့ပြီး ရုပ်ရှင်များသာ ရိုက်ကူးနေခဲ့သည်။ ယွမ်ယယ်ကလည်း အနုပညာနယ်ပယ်ပြင်ပမှ လူတစ်ယောက်သာ။ မိန်းကလေးငယ်တော်တော်များများမှာ ၎င်းတို့အား သိပ်မသိကြပေ။ မိတ်ဆက်ပိုစ့်တစ်ခုပြီးတစ်ခုကို ဟိုးအောက်ခြေမှ တူးဆွလာခဲ့ကြသည်။ အတိတ်နေ့များတုန်းက ၎င်းတို့၏ မင်္ဂလာပွဲဗီဒီယိုအတို ခုနစ်ခုလောက်ပြန်တက်လာခဲ့သည်။ ထို့နောက် 'Shape CP' သည် လက်ရှိတွင် ရေပန်းအစားဆုံးရှာဖွေမှုဖြစ်လာခဲ့၏။
ထုတ်လုပ်ရေးအဖွဲ့က ၎င်းတို့အပိုင်းနောက်ဆုံးတွင်ရိုက်ကူးခဲ့ရသော အင်တာဗျူးအား တည်းဖြတ်ကာ အပိုင်းအလယ်လောက်တွင် ထည့်လိုက်သည်။ ထုတ်လွှင့်မှု မိနစ်အနည်းငယ်အတွင်းမှာပင် ၎င်းတို့က ယွမ်ယယ်၏ နောက်ဆုံးအဖြေကို ပြသလိုက်၏။ ကင်မရာထဲတွင် ယွမ်ယယ်၏အမူအရာမှာ သူ၏အပြောအတိုင်း အနည်းငယ်အေးစက်နေခဲ့သည်။ "သူ မကျော်ကြားလာရင်တောင် သူက ဖန်းရှောက်ယိပါပဲ၊ သူ ရုပ်ရှင်ဧကရာဇ်ဆုကို အနိုင်ရခဲ့ရင်တောင်မှ သူက ဖန်းရှောက်ယိဖြစ်နေတုန်းပါပဲ။"
ထိုအပိုင်းတွင် မိန်းကလေးအားလုံး ယွမ်ယယ်က အလွန်ဆွဲဆောင်မှုရှိသည်ဟု ခံစားလိုက်ရသည်။ ထို့ပြင် ယွမ်ယယ်၏ပါးလွှာသောမျက်ခွံနှင့် ဆံပင်ခပ်တိုတိုက သူ့အား ကောင်ဆိုးလေးတစ်ယောက်နှယ်ဖြစ်သွားစေ၏။ ခပ်ဆိုးဆိုးကောင်လေးတစ်ယောက်က ထိုကဲ့သို့ပြောနေသည်မှာ အလွန်ဆွဲဆောင်မှုရှိပေသည်။
ယွမ်ယယ်၏ပရိတ်သတ်တော်တော်များများက အတော်လေးစိတ်လှုပ်ရှားနေခဲ့သည်။ ၎င်းတို့သည် အစက တည်ငြိမ်သော ဗုဒ္ဓ၏ပရိတ်သတ်များသာ။ ထိုကဲ့သို့ရုတ်တရက်ပြင်းထန်သောရိုက်နှက်ချက်က ချက်ချင်းပင် သူတို့အား အသိစိတ်မြင့်မားသွားစေခဲ့သည်။ ၎င်းတို့ပ ပရိသတ်အသစ်များအတွက် စည်းကမ်းတချို့ချမှတ်ရန် လိုအပ်သလားဟုတောင် တွေးနေခဲ့ကြသည်။ 'ဦးလေးယယ်ဘက်ကို ပေါင်းလာခြင်းက ဗုဒ္ဓဘာသာအဖြစ်ပြောင်းလဲသွားခြင်းဖြစ်ပြီး မည်သည့်ဒုက္ခမှ မဖြစ်စေရပါ။ ရက်အနည်းငယ်လောက်သာ အပျော်သဘောဖြင့်ပါဝင်ခြင်းဖြစ်လျှင် သေချာပေါက် ပြန်ထွက်သွားလိမ့်မည်။ သူသည် စာရေးဆရာတစ်ယောက်သာဖြစ်ပြီး သင့်ရဲ့ပရိသတ်အသိုင်းအဝိုင်းက ကျွန်ုပ်တို့နှင့် မသင့်တော်ချေ။'
ယွမ်ယယ်၏ပရိသတ်အချို့က သူ့အား ဖန်းရှောက်ယိ၏ချစ်သူဆိုသည့် အချက်ကြောင့် အားရုံစိုက်လာကြ၏။ ကျန်ရှိသူများကတော့ အားလုံးသူ၏စာဖတ်ပရိသတ်များသာ။ ဟိုးအစကတည်းက သူ့ကိုအားပေးလာသူများမှာ ယခုတွင် အကုန်အသက်အရွယ်ရကာ ကိုယ့်မိသားစုနှင့်၊ ကိုယ့်ကလေးများနှင့်ကိုယ်တောင်ဖြစ်ကုန်ကြလေပြီ။ ယခုတွင် ပရိသတ်ဟောင်းတော်တော်များများက ဦးလေးယယ်အား TVတွင်မြင်လိုက်ရ၍ အံ့အားသင့်သွားကြောင်း ပြောလာကြသည်။ အွန်လိုင်းပေါ်ရှာဖွေကြည့်လိုက်ပြီးနောက် ၎င်းမှာ ယွမ်ယယ်အစစ်ဖြစ်ကြောင်း တွေ့လိုက်ကြရသည်။
ယွမ်ယယ်၏ Weibo ပို့စ်တစ်ခုအောက်ရှိ မှတ်ချက်တစ်ခုမှာ နှစ်သက်မှုအများဆုံးဖြစ်၍ ထိပ်ဆုံးတွင် ရှိနေခဲ့သည်။ မှတ်ချက်ရေးထားသည့်လူမှာ မိန်းကလေးတစ်ယောက်ဖြစ်၏။ "လွန်ခဲ့တဲ့နှစ်ရက်ကပဲ ကျွန်မ အမေတစ်ယောက်ဖြစ်လာခဲ့တယ်။ ရှင် အရင်ကလိုပဲပျော်နေတာတွေ့ရတာ အရမ်းကောင်းတာပဲ။ ရှင့်ရဲ့စာအုပ်ကို ပထမဆုံးဖတ်ဖူးတာက ကျွန်မအထက်တန်းကျောင်းစီနီယာနှစ်တုန်းကလေ။ အဲ့အချိန်တုန်းက ကျွန်မရှင့်လိုဖြစ်ချင်ခဲ့တာ - ခေါင်းမာပြီး ရဲရင့်တဲ့သူပေါ့။ ဒီနှစ်ပိုင်းအတွင်း ရှင်က Weiboမှာ ပို့စ်တွေ သိပ်မတင်တော့ဘူး။ တောင်တန်းတွေတစ်လျှောက် လျှောက်သွားပြီး သစ်ပင်အပေါက်တွေထဲ တူးဝင်နေတတ်တဲ့ ခပ်မိုက်မိုက်လူငယ်လေးက သိပ်မပျော်တော့ဘူးလားလို့ ကျွန်မသိချင်နေခဲ့တာ။ ဒီနေ့တော့ ရှင် ရှိုးမှာ အရင်ကလိုပဲ မာနကြီးတဲ့အပြုံးမျိုးနဲ့ တွေ့လိုက်ရတော့ ကျွန်မ အရမ်းကြည်နူးဖို့ကောင်းတာပဲလို့ ခံစားလိုက်ရတယ်။"
သို့သော် ယွမ်ယယ်၏ပရိသတ်အတော်များများက သူ၏စာဖတ်သူများဖြစ်သောကြောင့် ၎င်းတို့အတော်များများက သူ့အား ရသစုံရှိုးမရိုက်စေချင်ကြပေ။ ၎င်းတို့က သူ့ကိုစိတ်ပျက်နေကြပြီး ထိုကဲ့သို့သရုပ်ဆောင်ရခြင်းက ကြေးနီနံ့နံသည်ဟု ခံစားနေကြရ၏။ သူတို့အတွက် သူသည် ယခုအချိန်မှာ ငွေကိုဂရုစိုက်နေခြင်းဖြစ်သည်ဟု ထင်မှတ်နေကြသည်။
ယွမ်ယယ် ဘယ်လိုမှတ်ချက်မျိုးကိုမှ မဖတ်ခဲ့ပေ။ သူက weibo အကောင့်ထဲကိုတောင် လော့အင်မဝင်ခဲ့ပေ။ ထို့ပြင် ထိုအပိုင်းကိုလည်း မကြည့်ခဲ့ချေ။ အမှန်မှာ သူ ဂျပန်ကပြန်ရောက်ကတည်းက အွန်လိုင်းပင်မတက်ခဲ့ချေ။ သူ ရှိုးတွင်ရိုက်ကူးခဲ့သော်လည်း သူ့ကိုယ်သူ ဖန်သားပြင်ပေါ်တွင်ကြည့်ရန်ကိုတော့ မနှစ်သက်သေးပေ။ ၎င်းမှာ သူသည် အခြားတစ်ယောက်ကိုကြည့်နေရသလိုမျိုး ထူးဆန်းသည့်ခံစားချက်ဖြစ်စေ၏။ ဖန်းရှောက်ယိ၏ဘေးတွင် အတူသရုပ်ဆောင်သော သူစိမ်းတစ်ယောက်အားကြည့်နေရသလိုပင်။
သူသည် ဖန်းရှောက်ယိနှင့် တွဲဖက်သရုပ်ဆောင်သောသူများထဲက အဆိုးရွားဆုံးတစ်ယောက်ဖြစ်လိမ့်မည်။
ယွမ်ယယ် ရက်အတော်လေးကြာမှ အွန်လိုင်းပြန်သုံးခဲ့သည်။ ပျော်ရွှင်မှုတွင် ခဏတာပါဝင်သူများအားလုံး ပြီးဆုံးသွားပြီးနောက် သူ၏ WeChat အကောင့်ကို စစ်ကြည့်လိုက်၏။ သူ မည်သည့်အသုံးဝင်သည့်မက်ဆေ့ကိုမျှ စာမပြန်ခဲ့ပေ။
ဖုန်းလေကျစ်က သူ့ကို ဆက်သွယ်ထားသည်။ ပထမဆုံး အင်တာနက်သုံးစွဲသူများက ဖြတ်ညှပ်ကပ်လုပ်ထားသော ဓါတ်ပုံကိုပို့လာသည်။ ၎င်းမှာ ယွမ်ယယ်က သစ်ပင်ပေါ်တွင်ထိုင်နေပြီး ငှက်ပျောသီးများပစ်နေသည့်ပုံဖြစ်၏ - ၎င်းတို့က ယွမ်ယယ်ကို မျောက်အသွင် ဖိုတိုရှော့ထားခြင်းဖြစ်သည်။ ဖုန်းလေကျစ်က ပြောလာ၏။ "ဒီဓါတ်ပုံကို ကောင်းကောင်းဖိုတိုရှော့လုပ်ထားတာမဟုတ်ဘူးလား။"
ယွမ်ယယ်က Weibo တွင် ရှိမနေပေ၊ ထို့ကြောင့် ထိုဓါတ်ပုံကို မမြင်ဖူးသေးပေ။ သူက ဆဲရေးကာ ရယ်မောလိုက်ပြီး အသံမက်ဆေ့ပို့လိုက်၏။ "မင်းရဲ့ညီအစ်ကိုမှာ အခု ပရိုကျတဲ့ဓါတ်ပုံတွေရှိနေပြီလား။"
ဖုန်းလေကျစ်က ရိုးရိုးရှင်းရှင်းပင် ဖုန်းခေါ်လာရာ ယွမ်ယယ်က ကိုင်လိုက်လေသည်။ ဖုန်းလေကျစ်က ပြောလာ၏။ "ဒီရှိုးကိုကြည့်ပြီးတော့ မင်းကို ဘယ်လိုစကားပြောရမလဲဆိုတာတောင် မသိတော့ဘူး။ အတိတ်တုန်းက မင်းက နက်ရှိုင်းပြီး လေးနက်တဲ့အစ်ကိုကြီးတစ်ယောက်လို့ထင်ခဲ့တာ။ အခုတော့ မင်းက သောက်ရမ်းချစ်ဖို့ကောင်းတယ်လို့ ခံစားရတယ်။"
"ငါ အရင်တုန်းကရော ချစ်စရာမကောင်းလို့လား။" ယွမ်ယယ်က စီးကရက်အားမီးညှိလိုက်၏။ "ငါတော့ အမြဲတမ်း ငါကချစ်စရာကောင်းတယ်လို့ ခံစားရတာပဲ။"
ဖုန်းလေကျစ်ကလည်း ဆဲရေးလိုက်သည်။ ထို့နောက် သူက: "မင်းနဲ့ စနောက်နေဖို့ အချိန်မရှိဘူး။ ငါ စီးပွားရေးလုပ်ရဦးမယ်။"
ယွမ်ယယ်က မျက်ခုံးပင့်လိုက်၏။ "မင်းအတွက်လုပ်ထားတဲ့ ကြော်ငြာမြင်ပြီးပြီလား။ ငါ့ကို အခကြေးငွေပေးချင်ပြီလား။"
"ဘာကြော်ငြာလဲ။" ဖုန်းလေကျစ်က သူဘာပြောနေမှန်း နားမလည်ပေ။
ယွမ်ယယ်က ပြောလိုက်သည်။ "မင်းမမြင်ရသေးရင်လည်း ထားလိုက်တော့။ မထုတ်လွှင့်ရသေးဘူးထင်တယ်။"
ဖုန်းလေကျစ်ကပြောလာ၏။ "ဒါက အလုပ်ကိစ္စပဲ။ မင်း ငါအရင်ကပြောခဲ့တဲ့စာအုပ်အကြောင်း စဥ်းစားပြီးသွားပြီလား။"
ယွမ်ယယ်က မြန်မြန်ဆန်ဆန်ပြန်ဖြေလိုက်သည်။ "ငါ တကယ်ကို မမှတ်မိဘူး။ လွန်ခဲ့တဲ့လအနည်းငယ်က ငါ့ရဲ့ဦးနှောက်က ကောင်းကောင်းအလုပ်မလုပ်ဘူး။"
ဖုန်းလေကျစ်မှာ နှစ်စက္ကန့်လောက် ရပ်သွားသည်။ ထို့နောက် သူသည် တိုးတိုးလေးဆဲလိုက်၏။ "အရင်ဆုံး ငါမင်းကို အတိုချုပ်ပြောပြမယ်။ ဆွံအခြင်းအကြောင်း။ မင်းက အဲ့လိုမျိုးရေးတဲ့နေရာမှာ တော်တယ်ဆိုတော့ စမ်းကြည့်ချင်လား။ မင်းက ဒီလိုမျိုးပုံစံရေးတဲ့နေရာမှာ အကောင်းဆုံးပဲလေ။"
ယွမ်ယယ်က သူ၏ဆေးလိပ်ပြာများကို ခါလိုက်၏။ "ငါမှတ်မိပြီ။ အဲ့ဒါကို နောက်ကျ တစ်ယောက်ယောက်ရေးမှာမဟုတ်ဘူးလား။"
ဖုန်းလေကျစ်က လှောင်ပြောင်လိုက်သည်။ "သူက ချီးထုပ်တွေအတွက် မရေးနိုင်ဘူး။"
ယွမ်ယယ်သည် ယခုတွင် စာရေးရန် စိတ်အခြေအနေမဟုတ်သေးပေ။ သူ အရမ်းပျင်းနေခဲ့၏ - တစ်နှစ်လောက်ရှိလောက်ချေပြီ။ ဖုန်းလေကျစ်သည် အရင်တုန်းက သူ့အား ထိုဇာတ်ညွှန်းအတွက် ပြောခဲ့ဖူး၏။ ၎င်းမှာ ယွမ်ယယ် အတော်လေးစိတ်ဝင်စားသော ဇာတ်ညွှန်းတစ်ခုပင်။ သို့သော် သူ၏လက်ရှိအခြေအနေအရ မည်သည်ကိုမှ ကောင်းကောင်းရေးနိုင်မည်မဟုတ်ပေ။ ထို့ကြောင့် သူနောက်ဆုံးအကြိမ်ကမ်းလှမ်းလာတုန်းက ငြင်းခဲ့ခြင်းဖြစ်သည်။ ယခုမှာမူ ယွမ်ယယ် ဘာကိုမှ အတည်မပြုခဲ့ချေ။ သူက "ငါစဥ်းစားလိုက်ဦးမယ် ပြီးရင်မင်းကိုအသိပေးမယ်" ဟုသာ ပြန်ပြောခဲ့သည်။
"အမ်း။" ဖုန်းမချခင် ဖုန်းလေကျစ်က စနောက်သောလေသံပြောင်းသွားကာ ယွမ်ယယ်ကိုပြောလာ၏။ "သာ့ကော မင်းတို့နှစ်ယောက်က တော်တော်လေးချစ်နေကြတာပဲ။ စောစောက မင်းတို့ကွာရှင်းပြီးသွားပြီလို့ လူတွေပြောနေကြတာ ကြားခဲ့ရတယ်။ အခု ကြည့်ပြီးသွားတော့ ချီးကိုကွာရှင်း။ 'မင်းတစ်ခွန်းပြော၊ ပြီးရင် ငါတစ်ခွန်းပြောမယ်' လုပ်နေတာလား။ မင်းတို့ကောင်တွေ မင်းတို့ကိုယ်မင်းတို့ မရှက်ကြဘူးလား။"
ယွမ်ယယ်က ရယ်လိုက်၏။ "ငါတို့အဆင်ပြေပါတယ်။"
ဖုန်းချလိုက်ပြီးနောက် ယွမ်ယယ် ဆေးလိပ်ကို ပြာခွက်ထဲဖိချလိုက်သည်။ ထို့နောက် မျက်ခုံးများတွန့်ချိုးလျက် လက်မောင်းများအား အကြောဆန့်လိုက်၏။ ဖုန်းလေကျစ်က ဥာဏ်ကောင်းသောလူဖြစ်သည်။ သူက ကိစ္စများကို အကြောင်းရင်းမရှိဘဲ မပြောတတ်ပေ။ နောက်ဆုံးစကားတစ်ခွန်းမှာ သာမန်ဟာသတစ်ခုနှင့်တူသော်လည်း ၎င်းမှာ ယွမ်ယယ်အတွက် 'ငါ မင်းကွာရှင်းပြီးသွားတာကို သိထားတယ်' ဟူသော မက်ဆေ့တစ်ခုပင်။ ၎င်းမှာ ယွမ်ယယ်သိလိမ့်မည်ဖြစ်သော လျှို့ဝှက်သတိပေးခြင်းဖြစ်သည်။
ယွမ်ယယ်သက်ပြင်းချလိုက်၏။ ထို့နောက် ဆိုဖာပေါ်တွင် ပျင်းတိပျင်းရွဲထိုင်နေပြီး control ကို လိုက်ရှာ၍ TV ဖွင့်လိုက်လေသည်။
စောစောက ထိုလူပြောသွားသည်များကို ကြားလိုက်ရပြီးနောက် ယွမ်ယယ်တစ်ယောက် ရှိုးကို ကြည့်ချင်လာခဲ့၏။ သူတို့နှစ်ဦး မည်ကဲ့သို့ကြောင်တောင်တောင်ဖြစ်နေသည်ကို ကြည့်ချင်လာပြီး ဖန်းရှောက်ယိ မည်ကဲ့သို့ဖြစ်နေမည်ကိုလည်း သိချင်လာခဲ့သည်။
ပထမဆုံးနှစ်မိနစ်မှာပင် ယွမ်ယယ် ရှက်ရွံ့လုနီးပါးဖြစ်သွားလေ၏။ လူအများစုက သူတို့ကိုယ်သူတို့ TV ဖန်သားပြင်ပေါ်တွင် ယခုလိုပြန်ကြည့်နေရခြင်းကို မကိုင်တွယ်နိုင်ကြပေ။ ၎င်းက သူတို့ကို ရူးနှမ်းကာ အတုအယောင်သဖွယ်ဖြစ်စေသည်။ ယွမ်ယယ် ကင်မရာတွင်ပေါ်လာသည့်အချိန်တိုင်း သူ့တစ်ကိုယ်လုံး မသက်မသာဖြစ်လာခဲ့ပြီး ထိုမြင်ကွင်းများကို ကျော်ကြည့်လိုက်သည်။ နောက်ပိုင်းတွင် ဖန်းရှောက်ယိ၏အပိုင်းများ ရောက်လာလေ၏။ အခြားအဖွဲ့များ၏ရိုက်ချက်များလည်း အပြန်ပြန်အလှန်လှန်ပေါ်လာခဲ့သည်။ မိနစ်အနည်းငယ်အတွင်းမှာပင် သူ အတော်လေးစိတ်ဝင်တစားဖြစ်လာခဲ့သည်။
တောင်တက်ချိန်အတွင်းမှာ ယွမ်ယယ်က တစ်ယောက်တည်း လျှောက်ပတ်သွားနေခဲ့ခြင်းကြောင့် ဖြစ်ပျက်သွားသောအရာတော်တော်များများကို မသိခဲ့ပေ။ ထိုအချိန်တွင် ဖန်းရှောက်ယိက ကင်မရာဆရာကိုပြောလိုက်သည်။ "သူ့ကိုပေးဆော့လိုက်ပါ။ လောင်ရှီးတို့ ကျွန်တော်ကိုရိုက်ကူးလို့ရတယ်လေ။" ဖန်သားပြင်ပေါ်တွင် ဖန်းရှောက်ယိ၏အကြည့်များက အလွန်သိမ်မွေ့နေသည်။ အလင်းရောင်ကလည်း အလွန်နွေးထွေးနေပြီး မြင်ကွင်းတစ်ခုလုံးမှာ နူးညံ့သိမ်မွေ့နေတော့သည်။
ပထမအပိုင်းတွင် ၎င်းတို့တောင်ထိပ်ထိရောက်လာပြီး လူနေအိမ်များကျဲသွားသည်အထိပါပေ၏။ အစီအစဥ်အား ယွမ်ယယ်နှင့် ဖန်းရှောက်ယိတို့ သူတို့၏ရွက်ဖျက်တဲဘေး လဲလျောင်းကာ ကြယ်များကြည့်နေသောနေရာ၌ အဆုံးသတ်ထားသည်။ ထိုမြင်ကွင်းမှာ အတော်လေး ရိုမန်တစ်ဆန်ပေသည်။
ထိုကဲ့သို့အရာကို ကြည့်နေရခြင်းက သူ့ကို အရူးတစ်ယောက်လိုဖြစ်စေသော်လည်း အတော်လေးကျေနပ်စရာကောင်းနေ၏။ ယွမ်ယယ် ကြော်ငြာပြသမှုပြီးဆုံးသည်အထိ TV ကို မပိတ်ခဲ့ချေ။ ထို့နောက်တွင် ၎င်းတို့၏အင်တာဗျူး၏ ရိုးရှင်းသောဗားရှင်းဖြစ်သည့် နောက်ဆက်တွဲဲဗီဒီယိုသို့ အလိုအလျောက်ရောက်ရှိသွား၏။ အင်တာဗျူးပထမဆုံးအဖွဲ့မှာ ဖန်းရှောက်ယိနှင့် ယွမ်ယယ်တို့ဖြစ်သည်။
အင်တာဗျူးကို အတော်လေးစိတ်ဝင်စားဖွယ်ကောင်းအောင် တည်းဖြတ်ထား၏။ သူတို့တစ်ယောက်ချင်းစီ၏ အင်တာဗျူးများကို အပြန်အလှန်ရောနှောထားသည်။ ယွမ်ယယ် ထိုအပိုင်းကို အဆုံးထိကြည့်ခဲ့သည်။ သူ သူပြောခဲ့သည်များကို တိတိကျကျမှတ်မိသော်လည်း အချို့မေးခွန်းများအတွက် ဖန်းရှောက်ယိ၏အဖြေကို သူသိချင်မိသည်။
လူငယ်ဒါရိုက်တာက ဖန်းရှောက်ယိကို သူနှင့် ယွမ်လောင်ရှီးတို့ အတူရှိတာ ဘယ်လောက်ကြာပြီလဲဟု မေးခဲ့သည်။
ဖမ်းရှောက်ယိက ပြောလိုက်သည်။ "အချိန်အတော်ကြာပြီ။ ဆယ့်ငါးနှစ်တောင်ကျော်သွားပြီ။ အခုနှစ်ကိုရော ထည့်တွက်မယ်ဆို ကျွန်တော်တို့အတွက် ဆယ့်ခြောက်နှစ်မြောက်ဖြစ်လိမ့်မယ်။"
"ဒါက တော်တော်လေးကြာပြီပဲ။ တွက်ချက်ကြည့်မယ်ဆို လောင်ရှီးတို့ အသက်နှစ်ဆယ်ဝန်းကျင်လောက်ကတည်းက အတူတူရှိလာတာမလား။"
"ဟုတ်ပါတယ်။" ဖန်းရှောက်ယိက သူ၏ပုံမှန်လေးနက်သောအမူအရာအချို့ကို ဖယ်ရှားထားပြီး ကင်မရာများရှေ့တွင် ပို၍နူးညံ့နေပုံပေါ်၏။ သူက ခေါင်းညိတ်ကာဖြေလိုက်သည်။ "အဲ့တုန်းက ကျွန်တော်တို့ တော်တော်ငယ်သေးတယ်။"
ထိုအခြေခံမေးခွန်းများအတွက် ဖန်းရှောက်ယိ၏အဖြေများသည် ယွမ်ယယ်နှင့် အတူတူပင်ဖြစ်၏။
ထို့နောက် လူငယ်ဒါရိုက်တာက အပြုံးလေးဖြင့် မေးလာသည်။ "ကျွန်မတစ်ခုမေးလို့ရမလား။ လောင်ရှီးတို့နှစ်ယောက်ထဲက ဘယ်သူကအရင် ပိုးပန်းခဲ့တာလဲ။"
ဖန်းရှောက်ယိက ခပ်မြန်မြန်ပင်ဖြေလိုက်၏။ "ကျွန်တော်က သူ့ကို အရင်ပိုးပန်းခဲ့တာပါ။"
လူငယ်ဒါရိုက်တာက သူ့ကို တစ်ကြိမ်ထပ်မေးလာခဲ့သည်။ "လောင်ရှီးက အရင်ပိုးပန်းခဲ့တာ? သေချာလို့လား။"
ဖန်းရှောက်ယိက ခေါင်းညိတ်ကာ ထပ်မံဖြေကြားခဲ့သည်။ "ဟုတ်ပါတယ်။ ကျွန်တော်က အရင်လိုက်ခဲ့တာ။"
ယွမ်ယယ်က ဖန်းရှောက်ယိကို သူအရင်ပိုးပန်းခဲ့တာဟု ပြောခဲ့ပြီး ဖန်းရှောက်ယိကမူ ယွမ်ယယ်ကို သူ(ဖန်း)ကအရင်လိုက်ခဲ့တာပါဟု ပြောခဲ့လေ၏။ ရှိုးက သူတို့နှစ်ယောက်ကို ဘယ်ညာတစ်ဖက်စီ တည်းဖြတ်လိုက်ပြီး အလယ်တွင် ရောင်စုံမေးခွန်းသင်္ကေတကြီးကြီးသုံးခုကို ထည့်လိုက်သည်။
ယွမ်ယယ် TV ရှေ့တွင် မျက်ခုံးများပင့်တက်သွားသည်။ သူ ဖန်သားပြင်ပေါ်က ဖန်းရှောက်ယိကိုကြည့်နေရင်း ခေါင်းယမ်းကာ ရယ်မောလိုက်လေသည်။
အင်တာဗျူးများက ကြာချိန်တူပေ၏။ နောက်ဆုံးတွင် လူငယ်ဒါရိုက်တာမှာ မေးခွန်းတစ်ခုသာကျန်တော့သည်။ "ဖန်းလောင်ရှီး လောင်ရှီးတို့ရဲ့ ဆက်ဆံရေးကို ဘယ်လိုအကဲဖြတ်မလဲ။ တစ်ယောက်နဲ့တစ်ယောက်သိကျွမ်းလာပြီး နှစ်တွေအကြာကြီး ပေါင်းသင်းဆက်ဆံလာရတဲ့ ဒီဆက်ဆံရေးက လောင်ရှီးအတွက် ဘယ်လိုအဓိပ္ပါယ်ရှိလဲ။"
ယွမ်ယယ်ကိုမူ ထိုမေးခွန်း မမေးခဲ့ချေ။ ဖြစ်နိုင်သည်မှာ အဆုံးတွင် သူ အနည်းငယ်ဒေါသထွက်သွားသည့်အတွက် ဒါရိုက်တာက မမေးရဲတော့ခြင်းဖြစ်လောက်မည်။ သူ ခပ်မတ်မတ်ထိုင်ကာ ဖန်းရှောက်ယိ၏ တုံ့ပြန်မှုကို နားထောင်လိုက်သည်။
ထိုမေးခွန်းက ဖန်းရှောက်ယိကို မိနစ်အနည်းငယ်လောက် တိတ်ဆိတ်သွားစေခဲ့၏။ သူက ခေါင်းငုံ့ထားပြီး ကင်မရာကိုလည်း ကြည့်မနေခဲ့ပေ။ အလင်းရောင်က အလွန်နူးညံ့နေပြီး ဖန်းရှောက်ယိ၏မျက်နှာထက် တင်းမာသောမျဥ်းကြောင်းများရှိသော်လည်း ယခုတွင် ပို၍ပျော့ပျောင်းလာခဲ့သည်။ နောက်ဆုံးတွင် သူက နှုတ်ခမ်းကို ဖွင့်ဟကာ တိုးတိုးလေးပြောလိုက်သည်။ "မင်း ကျွန်တော့်ကို အငိုက်ဖမ်းလိုက်တာပဲ။ အဲ့ဒါက ကျွန်တော့်အတွက် ဘယ်လိုအဓိပ္ပါယ်ဖြစ်ရမှာလဲ။ ကျွန်တော်ဘယ်လိုဖြေသင့်လဲ။"
ခဏရပ်လိုက်ပြီးနောက် သူက မျက်တောင်ခတ်ကာ ကင်မရာကို စေ့စေ့ကြည့်လိုက်သည်။ ထိုအကြည့်များက ဖန်သားပြင်ကိုဖြတ်ကာ တစ်ဖက်လူ၏နှလုံးသားထဲထိ ဝင်ရောက်လာစေနိုင်ပေ၏။ သူက ပါးစပ်ဖွင့်ကာ ပြောလာသည်။ "ဒီတိုင်း... အခုလိုတွေ့ဆုံမှုအတွက်ကျေးဇူးတင်ချင်ပါတယ်၊ ကံကြမ္မာကိုလည်း ကျေးဇူးတင်တယ်။ တစ်ယောက်ယောက်ရဲ့ဘဝထဲ ဝင်ရောက်လာမဲ့သူအားလုံးကို ကြိုတင်သတ်မှတ်ထားတယ်မဟုတ်လား။ ဒါ့ကြောင့် ဒီကံကြမ္မာအတွက် ကျေးဇူးတင်ပါတယ်။"
*****