အပိုင်း ၁၁
တစ်ချက်ပွင့်ပြီး ပြန်ပိတ်သွားသော တံခါးမှတစ်ဆင့် ပင်လယ်၏အသံက တိုးဝင်လာပြီး ခဏနေတော့ တိတ်ဆိတ်သွားပြန်သည်။ ဒါဟီးက ဘီယာခွက်ကိုကိုင်ယူကာ တစ်ဝက်ခန့်ကျန်နေသော ဘီယာကို တစ်ကျိုက်တည်း မော့ချလိုက်၏။ ဗိုက်ထဲသို့ဝင်သွားသော ကာဗွန်ဓာတ်ကြောင့် ဒါဟီးက မျက်နှာကို အနည်းငယ်မဲ့လိုက်ပြီး ခွက်ကိုပြန်ချလိုက်သည်။
“မာဝူဟျွန်းရှင့်၊ ရှင့်အကြောင်း ပြောပြချင်စိတ်မရှိရင် မပြောလို့လည်းရပါတယ်။”
ခဏနေတော့ ဒါဟီးက ပြောလာသည်။
“ဘာပဲဖြစ်ဖြစ် မင်းလည်း မေးဖို့စိတ်ကူးမရှိဘူးမဟုတ်လား။”
“အဲ့ဒါလည်းဟုတ်ပေမဲ့ ကျွန်မက ကိုယ့်အကြောင်းကိုယ်ပြောပြလို့ မာဝူဟျွန်းအနေနဲ့လည်း ကိုယ်အကြောင်းကိုယ် ပြောပြမှဖြစ်မယ်ဆိုပြီး ဖိအားမဖြစ်စေချင်တာပါ။ ကျွန်မတို့က တစ်ယောက်ကိုတစ်ယောက် ဖိအားပေးဖို့တွေ့ကြတာမဟုတ်သလို၊ ဘယ်လိုပတ်ဝန်းကျင်မှာ ကြီးပြင်းလာတယ်၊ ဘယ်လိုလူမျိုးလဲဆိုတာကို ကြိုးစားပြီးခန့်မှန်းနေဖို့လည်း မလိုဘူးလေ။ အာ၊ ဒါပေမဲ့ တစ်ခုတော့ ရှင်းရှင်းလင်းလင်း ပြောထားချင်ပါတယ်။”
“ပြောလေ။”
“မာဝူဟျွန်းမှာ သဘောကျနေတဲ့လူ ဒါမှမဟုတ် လက်ရှိတွဲနေတဲ့လူ ရှိလားရှင့်။”
“မရှိဘူး။ ဘာဖြစ်လို့လဲ။”
“မာဝူဟျွန်းရဲ့ အပျော်ရှာတဲ့ကိစ္စမှာ ကျွန်မက အသုံးချခံဖြစ်မှာကို လက်မခံနိုင်လို့ပါ။”
ဒါဟီး၏ လေသံတွင် တခြားသောကိစ္စတွေအားလုံး အဆင်ပြေသော်လည်း နောက်ကြောင်းမရှင်းလင်းခြင်းကိုတော့ မလိုလားကြောင်း ထင်ရှားပေါ်လွင်နေသည်။ ဝူဟျွန်းက ဒါဟီး၏ ဘီယာခွက်အလွတ်ထဲသို့ ဘီယာထပ်ဖြည့်ပေးလိုက်၏။
"စိတ်ပူစရာမရှိပါဘူး။"
"ဒါဆို ရပါပြီ။"
ဒါဟီးက ဘာမှမဟုတ်သလို ပြုံးလိုက်သည်။
~~~~~
စားသောက်ပြီးသည့်နောက် ဒါဟီးက ကုန်စုံဆိုင်သို့ဝင်ကာ ဘီယာနှစ်ဘူးနှင့် ကိုကာကိုလာတစ်ဘူး ဝယ်ခဲ့သည်။ ကိုကာကိုလာ ဘာလို့ဝယ်တာလဲဟု ဝူဟျွန်းက မေးလိုက်တော့ ဒါဟီးက 'ကားမောင်းမဲ့သူက ကိုကာကိုလာ သောက်ရမှာပေါ့' ဟု ပြန်ဖြေရင်း သူ့လက်ထဲသို့ ကိုကာကိုလာကို အတင်းထိုးထည့်ပေးခဲ့၏။
ပင်လယ်ပြင်ကို မြင်ရသည့်နေရာတွင် ကားကို ရပ်ထားပြီး နှစ်ဦးသား ဘေးချင်းယှဉ်လျက် ထိုင်ခဲ့ကြသည်။
နေကာအမိုးနှင့် ပြတင်းမှန်များကို အကုန်ဖွင့်ထားသောကြောင့် ပင်လယ်လေညင်းလေး အဆက်မပြတ် တိုက်ခတ်နေ၏။ ကားပြတင်းတွင် လက်တင်ကာ မှီထားသော ဒါဟီးက အသက်ကို ပြင်းပြင်းရှူသွင်းလိုက်သည်။
အရက်ရှိန်တက်လာပေပြီ။ တွေးကြည့်လိုက်မှ ဒီနေ့ မနက်စာလည်း မစားရသေးပေ။ တစ်နေ့လုံး အဆာခံထားသည့် ဗိုက်ထဲသို့ အရက်နှင့် ဆာရှိမိအေးစက်စက်တို့ကို ထည့်မိခဲ့၏။
'မူးတာလည်းမဆန်းပါဘူး။'
ထိုသို့တွေးရင်း ဒါဟီးက ဘီယာကို တစိမ့်စိမ့်သောက်နေလိုက်သည်။
ပင်လယ်ကမ်းခြေသို့ရောက်လျှင် အရက်သောက်ခြင်းကို ရပ်တန့်၍မရနိုင်ပေ။
ဒါဟီး၏ ဖခင်ဖြစ်သူက လှေစီးကာ အဝေးကြီးသို့သွားပြီး ပင်လယ်ငါးမျှားထွက်ရခြင်းကို နှစ်သက်ပေသည်။ ဖမ်းမိသည့် ငါးများကို ထိုနေရာမှာပင် ငါးအသားလွှာလှီးကာ ဘီယာနှင့် သောက်လေ့ရှိ၏။ အခြားသူများက ဆိုဂျူနှင့် သောက်ကြသော်လည်း ဒါဟီး၏ဖခင်ကတော့ ဘီယာကိုသာ နှစ်သက်ခဲ့သည်။ သမီးငယ်ကို ဘေးတွင်ထိုင်စေကာ အဖေ့အကြိုက်နှင့် အကိုက်ဆုံးဖြစ်ကြောင်း၊ အသက်ကြီးလာလျှင် သမီးကိုပါခေါ်ပြီး အတူသွားမည်ဖြစ်ကြောင်း အမြဲပြောတ်သူပင်။ ထိုသို့ဖြင့် သုံးနှစ်အကြာတွင် ဦးနှောက်သွေးကြောပေါက်ပြီး လေဖြတ်သွားသောကြောင့် ဝါသနာပါရာများကို လက်လွှတ်လိုက်ရသော ဖခင်ဖြစ်သူတစ်ယောက် စိတ်ဓာတ်ကျသည့်အခါမျိုးတွင် ပင်လယ်ကမ်းခြေ သို့မဟုတ် မြစ်ကမ်းဘေးသို့သွားကာ ဘီယာကိုသာ တစိမ့်စိမ့်သောက်တတ်လေ့ရှိသည်။ အိမ်ပြန်ရောက်လာလျှင် ဖခင်၏ကိုယ်မှ ငန်ကျိကျိပင်လယ်ရနံ့မျိုးထွက်နေတတ်၏။ တံငါသည်လည်းမဟုတ်သော ဖခင်ဖြစ်သူ၏ အဝတ်အစားပေါ်တွင် ကပ်ငြိနေတတ်သည့် ထိုရနံ့ကို ဒါဟီး မနှစ်မြို့ခဲ့ပေ။ ယခု ပြန်တွေးကြည့်တော့ ငန်ကျိကျိရနံ့ကို မုန်းတီးမိခြင်းမဟုတ်ဘဲ ငန်ကျိကျိရနံ့တွင် ရောယှက်နေသော ဖခင်ဖြစ်သူ၏ အထီးကျန်မှု၊ ဆွေးမြည့်တမ်းတမှုကို မုန်းမိခဲ့ခြင်းပင်။ ယခု အသက်ကြီးလာပြီဖြစ်သော ဒါဟီးက ပင်လယ်ကမ်းခြေသို့ ရောက်လာသည့်အခါ ဖခင်ဖြစ်သူ ခံစားခဲ့ရသော အထီးကျန်မှုနှင့် ဆွေးမြည့်တမ်းတမှုတို့အကြောင်းကို ပြန်လည်အမှတ်ရရင်း ဖခင်ကိုယ်စား ဘီယာသောက်လေ့ရှိသည်။
ကျိန်းသေပေါက် ခံစားချက်မဲ့သည့် ဒါဟီးကတော့ ထိုသို့လုပ်သည့်တိုင် အလွန်စိတ်ထိခိုက်ခံစားလွယ်သော ဖခင်၏ ဆွေးမြည့်တမ်းတမှုနှင့် အထီးကျန်မှုကို နားမလည်နိုင်ခဲ့ပေ။ အနည်းငယ်တွေဝေကာ ရင်ထဲတွင် နင့်ခနဲလေးလံသွားသလိုလောက်သာ ခံစားရ၏။ 'အဖေ ဒီလိုခံစားခဲ့ရလောက်မှာပဲ' ဟု မှန်းဆကြည့်နိုင်ရုံလောက်သာ။
"ဘာတွေစဉ်းစားနေတာလဲ။"
ဝူဟျွန်း၏ မေးခွန်းကြောင့် ဒါဟီး၏ အတွေးများ ပြတ်တောက်သွားတော့သည်။ ခေါင်းလှည့်လိုက်တော့ ဝူဟျွန်း၏ ပုံရိပ်က ဝိုးတိုးဝါးတားပင်။ သူ မူးနေပြီ။ သတိထားမိပါလျက်နှင့် ဒါဟီးတစ်ယောက် လက်ထဲမှ ဘီယာဘူးကို ချမထားနိုင်ခဲ့။ ဒါဟီး ကားထိုင်ခုံပေါ်သို့ ကိုယ်ကို မှီချလိုက်သည်။
"ဒီအတိုင်း လူယောက်ရဲ့ အထီးကျန်မှုအကြောင်းပါပဲ။"
တိုးတိုးလေး ပြောလိုက်သော ဒါဟီး၏ ဘေးတိုက်မျက်နှာကို ဝူဟျွန်း ငေးကြည့်နေခဲ့သည်။
ဒါဟီး၏ မျက်နှာတွင် ဇာတ်လမ်းတစ်ခုရှိနေသလိုပင်။ ရုတ်တရက် ထိုဇာတ်ကြောင်းကို သိချင်မိသည်။ သို့သော် ဝူဟျွန်းက မမေးခဲ့ပေ။ ဒါဟီးက စကားမပြောဘဲ ညပင်လယ်ကိုသာ ငေးမောကြည့်နေ၏။ မမြင်ရသော မိုးကုပ်စက်ဝိုင်းကို ကြည့်နေသလိုလည်း ခံစားရကာ၊ ပင်လယ်ပြင်ကို လုံးဝ ကြည့်နေတာမဟုတ်သလိုမျိုးလည်း ခံစားရသည်။
ဝူဟျွန်း၏ အကြည့်က ပင်လယ်ကမ်းခြေဆီသို့ ရောက်သွား၏။ Black Hole ၏ တွင်းပေါက်ကဲ့သို့ မည်းမှောင်နေသော ပင်လယ်ကို ကြည့်ရင်း ဝူဟျွန်းတစ်ယောက် မျက်လုံးများကို ဖြည်းညင်းစွာ မှိတ်လိုက်၊ ဖွင့်လိုက် လုပ်နေခဲ့သည်။
ပင်လယ်ကြည့်ရသည်ကို နှစ်သက်သော်လည်း ဝူဟျွန်းက မကြာခဏ လာနိုင်ခြင်းမရှိခဲ့ပေ။ ညပင်လယ်ကို တစ်ယောက်တည်း အကြာကြီး ကြည့်မိလျှင် ဘဝပြီးဆုံးသွားသလို ခံစားရပြီး ကြောက်စရာကောင်း၏။ ထိုခံစားချက်ကို မနှစ်မြို့သဖြင့် ညပင်လယ်ကို တစ်စုံတစ်ဦးနှင့် အတူကြည့်ရန် လာသည့်အခါတိုင်း စိတ်ဖြောင့်ဖြောင့် အနားယူနိုင်ခြင်းမရှိခဲ့။ ဘာစကားမှမပြောဘဲ ညပင်လယ်ကို တိတ်တဆိတ် အတူတူ ကြည့်ပေးမည့်သူလည်း မရှိခဲ့ပေ။ ယခုတော့ ထိုသို့သောသူကို ရှာတွေ့ပြီထင်သည်။
ဝူဟျွန်းလည်း ကားထိုင်ခုံပေါ်သို့ ကိုယ်ကို မှီချလိုက်သည်။ ရုတ်တရက် ခံစားလိုက်ရသော အကြည့်ကြောင့် ခေါင်းကိုလှည့်လိုက်မိ၏။ ဒူးကို ကွေးပြီးကျုံ့ထားသော ဒါဟီး၏ ခြေထောက်များပေါ်တွင် သူ့ဂျာကင်က ခြုံလွှားထားလျက်ရှိနေသည်။ ကွေးကွေးကျုံ့ကျုံ့လေး နေနေသော ဒါဟီးက မျက်လုံးများကို ဖြည်းဖြည်းချင်း မှိတ်လိုက်ဖွင့်လိုက်လုပ်ကာ ဝူဟျွန်းကို ကြည့်နေ၏။ ဒါဟီး၏ မျက်လုံးများက ညပင်လယ်ကို စုပ်ယူထားသည့်အလား မည်းနက်ကာတောက်ပနေသည်။ တခြားကမ္ဘာတစ်ခုအလား တိတ်ဆိတ်စွာ တောက်ပနေသော မျက်ဝန်းများက မျက်ခွံများအောက်တွင်ထပ်ပြန်တလဲလဲ ကွယ်သွားလိုက်၊ ပေါ်လာလိုက်ဖြစ်နေ၏။
"ဘာဖြစ်လို့ အဲ့ဒီလိုကြည့်နေတာလဲ။"
ဝူဟျွန်းက မေးလိုက်သည်။
"ဒီအတိုင်း date mate ရဲ့ (ဒိတ်လုပ်ဖော်) မျက်နှာကို သေချာကြည့်ထားသင့်တယ်လို့ ထင်လို့ပါ။"
"အဲ့ဒီစကားက ကိုယ်လည်း မင်းကို ကြည့်လို့ရတယ်ဆိုတဲ့သဘောလား။"
"ကြည့်လေ။ ပိုက်ဆံကုန်တာမှ မဟုတ်တာ။"
ဒါဟီး ရယ်လိုက်သောအခါ သူ့မျက်ဝန်းများက လခြမ်းကွေးကဲ့သို့ ကွေးညွတ်သွားတော့သည်။ ပေါ့ပေါ့ပါးပါး အပြုံးကလွဲ၍ သိပ်မရယ်တတ်သော ဒါဟီးက အရက်မူးသောအခါတွင်တော့ ရယ်တတ်ပေ၏။ ထိုအပြုံးက ထင်ထားသည်ထက် ပို၍ဆွဲဆောင်မှုရှိသောကြောင့် ဝူဟျွန်းတစ်ယောက် ကိုယ်တိုင်တောင်သတိမထားမိဘဲ အကြည့်မခွာနိုင်ခဲ့ပေ။
"ဒါမျိုးကို မြှူဆွယ်တာလို့ သဘောထားလို့ရတယ်ဆိုပြီးတော့ရော တွေးဖူးလား။"
"မဟုတ်ဘူး။ အဲ့ဒါကြောင့် အဲ့ဒီအတွေးကိုဖယ်ထားလိုက်ပါ။"
ဒါဟီးက ပြတ်ပြတ်သားသား ပြောခဲ့သည်။ ဝူဟျွန်းလည်း အသာတိုးတိုးရယ်မိ၏။ ဝူဟျွန်း၏ အကြည့်က ဒါဟီး၏ ညပင်လယ်ကဲ့သို့သော မျက်ဝန်းများဆီမှ ဖြည်းညင်းစွာ ဆင်းလာကာ ဒါဟီး၏ နှုတ်ခမ်းများဆီသို့ ရောက်ရှိလာသည်။ နီစွေးနေသော နှုတ်ခမ်းများက အနည်းငယ်ဟလျက်ရှိ၏။ လှိုင်းသံမှအပ တခြားမည်သည့်အသံကိုမှ မကြားရပေ။ ရုတ်တရက် တခြားကမ္ဘာတစ်ခု၏ အလယ်သို့ ရောက်ရှိသွားသလို ထူးဆန်းသော ခံစားချက်၏ လွှမ်းမိုးမှုကြောင့် ဝူဟျွန်းတစ်ယောက် အသိစိတ်လွတ်သွားသူလို ပြောလိုက်မိသည်။
"နမ်းချင်တယ်။"
ဒါဟီးက ခေါင်းငဲ့လိုက်သည်။ ကြားလိုက်ရသည့်စကားက အမှန်ဟုတ်၊ မဟုတ် သံသယဝင်နေသော မျက်နှာထားမျိုးပင်။
"နမ်းချင်တယ်။"
ဝူဟျွန်းက လိုလိုလားလားပင် နောက်တစ်ကြိမ် ထပ်ပြောခဲ့သည်။ ဒါဟီး၏ မျက်လုံးများ ကျုံ့သွားတော့၏။ သူ့အကြည့်က ဝူဟျွန်း၏ နှုတ်ခမ်းဆီသို့ ရောက်ရှိသွားသည်။ ပြုံးလိုက်လျှင် ပို၍ဆွဲဆောင်မှုရှိသော နှုတ်ခမ်းများပင်။ ထိုနှုတ်ခမ်းများ၏ အရသာကို သိချင်မိသည်။
"နမ်းရုံပဲ နမ်းမှာ။"
တည်ငြိမ်သည်ဟုထင်ရသော်လည်း လိုချင်တမ်းတမှုကို အပြည့်အဝ ဖုံးကွယ်မထားနိုင်သော သူ့အသံကြောင့် ဒါဟီးလည်း ဘီယာဘူးကို ချလိုက်မိ၏။ ငြင်းသင့်သလား၊ မငြင်းသင့်ဘူးလား။ ငြင်းရမည့်အခြေအနေဖြစ်သော်လည်း ထူးဆန်းစွာပင် ငြင်းချင်စိတ်မရှိပေ။ ဒါဟီးတစ်ယောက် ထိုသို့တွေးရင်း ဝူဟျွန်းကို နောက်တစ်ကြိမ် ကြည့်နေစဉ်၌။
ဝူဟျွန်းက လက်ကိုဆန့်ထုတ်ကာ ထိုင်ခုံ၏ ခေါင်းမှီကို ဆွဲကိုင်လိုက်သည်။ ဒါဟီး၏ ကျောပြင်က တံခါးနှင့် ထိုင်ခုံကြားမှနေရာနှင့် ထိသွားတော့သည်။ တစ်ချိန်တည်းမှာပင် နှုတ်ခမ်းပေါ်တွင် ချိုမြိန်သော ကိုကာကိုလာအရသာကို ခံစားလိုက်ရ၏။ မျက်လုံးကို မမှိတ်ထားသော ဒါဟီးက ခေါင်းငဲ့စောင်းလျက်ရှိသော ဝူဟျွန်းကို ကြည့်နေမိသည်။ ဝူဟျွန်း၏ မျက်နှာအနောက်တွင်တော့ မရေမတွက်နိုင်သော ကြယ်ပေါင်းများစွာ အဆုံးမရှိ မှိတ်တုတ်မှိတ်တုတ် လင်းလက်နေသည့် နေကာအမိုးက ပွင့်လျက်ရှိ၏။ တခြားကမ္ဘာတစ်ခုလိုပင်။
ဝူဟျွန်း၏နှုတ်ခမ်းများက ဒါဟီး၏နှုတ်ခမ်းများကို ဆွဲဆောင်မှုရှိစွာ စုပ်ယူခဲ့သည်။ အရက်ရှိန်ကြောင့် ထုံထိုင်းနေသော ဒါဟီး၏ ခေါင်းထဲတွင် ထူးဆန်းသော သာယာမှုတစ်မျိုး တရစ်ရစ်တက်လာ၏။ ဒါဟီးလည်း မျက်လုံးများကို မှေးမှိတ်ထားရင်း တိုးဝင်လာသော သူ၏လျှာကို လက်ခံလိုက်လေသည်။
~~~~~
Miel's Translations