အပိုင်း ၂၅

သို့သော် ထိုအတွေးက ခဏတာမျှသာ။ ဝူဟျွန်းနှင့် သူ၏ လက်ထပ်ခြင်းက ဖြစ်လာနိုင်မည်မဟုတ်။ လက်ထပ်ခြင်းဆိုသည်မှာ အခြေအနေချင်း သဘောတူညီမှုဖြစ်ဖြစ်၊ ချစ်ခြင်းမေတ္တာဖြစ်ဖြစ် ပါဝင်ရမည်ဖြစ်ပြီး သူနှင့် ဝူဟျွန်း၏ ဆက်ဆံရေးတွင် ထိုအရာတွေမပါဝင်ပေ။ ဝူဟျွန်းနှင့် သူက လက်ထပ်၍မရသောသူများပင်။

ဒါဟီးက ဝူဟျွန်းရှေ့တွင် အမေရိကာနိုအေးကို ချပေးခဲ့သည်။ ထို့နောက် မျက်နှာချင်းဆိုင်တွင်ထိုင်ကာ ဝူဟျွန်း၏ မျက်နှာကို ကြည့်ရင်း တည်ငြိမ်စွာ စကားစပြောလိုက်၏။

"တတ်နိုင်သလောက်တော့ လက်မထပ်ရအောင် ကြိုးစားမှာဆိုပေမဲ့ ဖြစ်လာရင်တော့လည်း လက်ထပ်ရမှာပေါ့လေ။ ဘဝဆိုတာ စိတ်ကူးထားသလို ဖြစ်လာမှာမှမဟုတ်တာ။ ပဉ္စလက်လိုမျိုး အမှတ်မထင် တစ်စုံတစ်ယောက် ပေါ်လာပြီး လက်ထပ်ဖို့ စိတ်ကူးယဉ်မိအောင် လုပ်ခဲ့မယ်ဆိုရင်တော့ အဲ့ဒီလူနဲ့ လက်ထပ်ရမှာပေါ့။"

"အတွေးတွေ အများကြီး ပြောင်းသွားတာပဲ။ အရင်ကတော့ ချစ်သူထားရတာတောင် မကြိုက်ဘူးဆို။"

ဝူဟျွန်း၏ အသံက ပို၍ပင် အေးစက်လာသည်။ စတွေ့ခဲ့သည့် လွန်ခဲ့သော လအနည်းငယ်ကတော့ ဒါဟီးက 'လက်ထပ်ခြင်း' ဟူသော စကားလုံးကို မသိသူတစ်ယောက်လို ပြုမူခဲ့သူပင်။ ချစ်သူထားဖို့ကိုပင် ငြင်းဆန်ခဲ့သူက ယခုတော့ ဖြစ်နိုင်လျှင် လက်ထပ်ကောင်းလက်ထပ်နိုင်သည်ဟူသော သဘောမျိုးဖြင့် ပြောဆိုနေလေသည်။

စိတ်ပျက်သလိုအမူအရာဖြင့်ရှိနေသည့် ဝူဟျွန်းကိုမြင်တော့ ဒါဟီးက မျက်လုံးများကိုကျုံ့ကာ ထူးဆန်းသလို ကြည့်လိုက်၏။ ယနေ့ ဝူဟျွန်း၏ မျက်နှာအမူအရာက မှောင်မှိုင်းနေပြီး၊ စကားပြောနေသည့် ခေါင်းစဉ်ကလည်း စောစောကတည်းက လက်ထပ်ခြင်းမှ မခွာချေ။ ဝူဟျွန်း ရုတ်တရက် ဒါဟီး၏ အချစ်နှင့် လက်ထပ်ခြင်းအပေါ်အမြင်ကို တအားစိတ်ဝင်စားလာခြင်းက ထူးဆန်းနေပြန်သည်။

သို့သော်လည်း ဒါဟီးက ခြေချင်းချိတ်ထိုင်ကာ မိခင်ဖြစ်သူနှင့် စကားပြောနေစဉ်အတွင်း အေးစက်သွားသော လက်ဖက်ရည်ခွက်ကို ဆုပ်ကိုင်ရင်း တည်ငြိမ်စွာ ပြန်ဖြေလိုက်၏။

"ရည်းစားထားတာထက်စာရင် လက်ထပ်တာက ပိုကောင်းတာပေါ့။"

"..."

"အနည်းဆုံးတော့ 'လမ်းခွဲရအောင်' ဆိုတဲ့ စကားမျိုး ကြားရနိုင်ချေ ပိုနည်းသွားတယ်လေ။"

"..."

"ဒါပေမဲ့ 'ဒီလို ကျွန်မ' ကိုတော့ သိထားမှဖြစ်မယ်။"

" 'ဒီလို ကျွန်မ' ဆိုတာက ဘာလဲ။"

"ဘယ်သူ့ကိုမှ ပြင်းပြင်းပြပြ မချစ်နိုင်တဲ့ 'ဒီလို ကျွန်မ' လေ။"

"မနက်ဖြန် blind date မှာတွေ့တဲ့လူက ဒီလို အီဒါဟီးကို နားလည်ပေးနိုင်မယ်ဆိုရင် လက်ထပ်နိုင်တယ်ဆိုတဲ့ သဘောလား။"

"မပြောတတ်ဘူး။"

ဟင့်အင်းဟု မငြင်းဘဲ ဒါဟီးက ဝူဟျွန်းကိုကြည့်ကာ မရေမရာ ပြုံးခဲ့သည်။ တိတ်ဆိတ်မှု လွှမ်းခြုံလာပြီး ဝူဟျွန်းလည်း နောက်ဆုံးတော့ အကြည့်လွှဲသွား၏။

တစ်ချက်လောက်တော့ စိတ်ပျက်မိသွားသည်။ ဒါဟီးက သူ ဘာကြောင့် ဤသို့သောမေးခွန်းမျိုးကို မေးရသလဲ၊ ဘာကြောင့် ဤသို့သောမျက်နှာထားမျိုး လုပ်နေရလဲဆိုသည်ကို စိတ်မဝင်စားပေ။ ဝူဟျွန်းတစ်ယောက် ဒါဟီး၏ခံစားချက်များက သူ့စိတ်ဝင်စားမှု၏ တစ်ဝက်တောင်မရှိဘူးဆိုသည်ကို သိလိုက်ရတော့သည်။

ဝူဟျွန်း နောက်ဆုံးတော့ ပြန်မပြုံးနိုင်ခဲ့ချေ။

~~~~~

'ကိုယ်ရေးကိုယ်တာ ကိစ္စကြောင့် ဆိုင်ပိတ်ပါသည်' ဟူသော ဆိုင်းဘုတ်ကို ချိတ်ဆွဲပြီးနောက် ဒါဟီးလည်း ဆိုင်တံခါးကို သော့ခတ်ကာ ထွက်ခွာလာခဲ့သည်။ ညဉ့်နက်နေပြီဖြစ်သော်လည်း လောကကြီးက သူ့အပူရှိန်နှင့်သူ ယစ်မူးနေဆဲ၊ ပူလောင်နေဆဲပင်။ အေးမြသော aircon လေရှေ့မှ ထွက်လာပြီးနောက် ပို၍ပင် ပူသည်ဟု ခံစားရသည်။ ကော်ဖီဆိုင်တံခါးကို သော့ခတ်ပြီး လှည့်ထွက်လာသော ဒါဟီးက တိုးတိုးလေး သက်ပြင်းချလိုက်၏။ ယနေ့မှ အထူးတလည် တင်းမာနေသော ဝူဟျွန်း၏ မျက်နှာကို သတိရမိသောကြောင့်ပင်။

ဘာကြောင့် ထိုသို့သောမျက်နှာထားမျိုး လုပ်ခဲ့တာဖြစ်မလဲ။ အတွေးများနေပုံရသည့် သူက နောက်ဆုံးအထိ ဘာစကားမှမပြောခဲ့ပေ။ သော့ကို အိတ်ထဲသို့ ထည့်လိုက်သော ဒါဟီးက ညလမ်းတစ်လျှောက် ခြေလှမ်းကျဲများဖြင့် ဆင်းလာခဲ့သည်။ အတွေးပေါင်းများစွာက အမြှုပ်များလို ဖောင်းပွလာလိုက်၊ အသံမကြားရအောင် ပျောက်ကွယ်သွားလိုက်နှင့် သံသရာလည်နေ၏။

တစ်ချိန်ချိန်တော့ ဝူဟျွန်းနှင့် ဆက်ဆံရေးက ပြီးဆုံးသွားပေမည်။ မည်သည့်အရာနှင့်မျှ သတ်မှတ်မရသော ဤဆက်ဆံရေး၊ ထို့ထက်ပို၍ မိတ်ဆွေများနှင့်ပင် မိတ်ဆက်ပေး၍မရသော ဤဆက်ဆံရေးက ဆက်လက် တည်မြဲနေမည်မဟုတ်ပေ။ နဂိုကတည်းက သိရှိထားသော အမှန်တရားပင်။ ထို့အပြင် ဤဆက်ဆံရေးက ဖြည်းဖြည်းချင်း စတင်၍ ကမောက်ကမ ဖြစ်လာနေသည်ကို မသိချင်သော်လည်း ခံစားနေရသည်။ ဝူဟျွန်း၏ မျက်နှာထားနှင့် ကိုယ်အမူအရာတို့က အရင်လိုမဟုတ်ဘဲ အေးစက်မှုတို့မရှိတော့။ စိတ်ဝင်စားမှုတို့၊ ဂရုစိုက်မှုတို့ထက်လွန်၍ မစင်ကြယ်သောခံစားချက်များ ရောနှောလာသည့်အခိုက်အတန့်တွင် ဆက်ဆံရေးက ပျက်စီးသွားပေမည်။

ဝူဟျွန်နှင့် လမ်းခွဲခြင်း။

"ဟား..."

ဒါဟီး အသက်ကို နက်ရှိုင်းစွာ ရှူသွင်းပြီး ပြန်ရှူထုတ်လိုက်သည်။

အပူမလျော့သေးသော ကတ္တရာလမ်းမှ ပူပြင်းသည့် အပူဓာတ်များ စုဝေးတက်လာ၏။ ပူသည်။ ပူလွန်းသောကြောင့်ပင် ဖြစ်ပေလိမ့်မည်။ ရင်ဘတ်ထဲတွင် မွန်းကျပ်နေရသည့် အကြောင်းရင်းကား....

~~~~

အပြင်သွားရန် ပြင်ဆင်၍ပြီးသွားသော ဒါဟီးက မှန်ရှေ့တွင် ရပ်လိုက်သည်။ မိခင်ဖြစ်သူ၏ အသိမိတ်ဆွေဖြစ်သောကြောင့် ပြဿနာမဖြစ်ရုံမျှသာ ယဉ်ကျေးစွာ ပြုမူရန် စဉ်းစားထား၏။ မနေ့ညက အိမ်ပြန်လမ်းတွင် ကောက်ကာငင်ကာ ညှပ်ခဲ့မိသော ဆံပင်တိုလေး၏ အဖျားများကို ပွတ်သပ်ပြီးနောက် လက်ကိုင်အိတ်ကို ဆွဲကိုင်လိုက်သည်။

ဒင်းဒေါင်၊ ဒင်းဒေါင်....

တိုက်တိုက်ဆိုင်ဆိုင် ဧည့်ခန်းမသို့ ဦးတည်နေသော ဒါဟီးက နားမလည်နိုင်သလို ခေါင်းငဲ့လိုက်သည်။ ယခုအချိန် ရောက်လာမည့်ဧည့်သည် ဘယ်သူမှမရှိပေ။

"ဘယ်သူလဲရှင့်။"

"ကိုယ်ပါ။"

တံခါးအပြင်ဘက်မှ ရင်းနှီးနေသည့်အသံကြောင့် ဒါဟီး မျက်လုံးများကိုကျုံ့လိုက်၏။ ဤအချိန်ကြီး၊ အဆက်အသွယ်လည်းမရှိဘဲ ဝူဟျွန်း ရောက်လာသည်။ ဖိနပ်စီးထားပြီးပြီဖြစ်သည့် ဒါဟီးက ဧည့်ခန်းမတံခါးကို တွန်းဖွင့်လိုက်သည်။ တီရှပ်နှင့် ဂျင်းဘောင်းဘီကို ဝတ်ဆင်ထားသော ဝူဟျွန်းက ထိုနေရာတွင် ရပ်နေ၏။ ဒါဟီးက တစ်ခုခုများဖြစ်လို့လားဟုတွေးကာ ဝူဟျွန်းကို အထက်အောက် စုန်ချည်ဆန်ချည် ကြည့်လိုက်သည်။

"ဘာဖြစ်လို့လဲရှင့်။"

ဒါဟီး၏ မေးခွန်းကို ဝူဟျွန်းက ဘာမှမပြောဘဲတုံ့ပြန်ခဲ့သည်။ စိတ်ထင့်စရာ တိတ်ဆိတ်မှုကြောင့် ဒါဟီးက မျက်နှာကိုမဲ့လိုက်၏။

"ဒီနေ့ blind date သွားတွေ့စရာရှိတယ်လေ။"

"အင်း၊ သွား။"

"..."

"ဒါပေမဲ့ ကိုယ်နဲ့ သွား။"

ဘာ​စကားလဲဆိုသည့် ပုံစံဖြင့် ဒါဟီးက ဝူဟျွန်းကို စိုက်ကြည့်လိုက်သည်။

"ကိုယ်နဲ့ တရားဝင် blind date တွေ့ပြီး ဆက်ဆံရေးကို ပြန်သတ်မှတ်ရအောင်။"

"မာဝူဟျွန်းရှင့်။"

ဒါဟီးက မဟုတ်ပါစေနဲ့ဟု ဆုတောင်းနေခဲ့သည်။ လအတော်ကြာ ထိန်းသိမ်းထားခဲ့သော ဆက်ဆံရေးကို ကစဉ့်ကလျားဖြစ်စေမည့် ထိုစကားမျိုး မဖြစ်ပါစေနဲ့ဟု ဆုတောင်းနေမိ၏။ သို့သော် ဝူဟျွန်းက ထိုစကားကို ပြောခဲ့ပြီး၊ ပြန်ရုပ်သိမ်းရန် စိတ်ကူးရှိပုံမပေါ်ချေ။

"အဲ့ဒီစကားရဲ့ အဓိပ္ပာယ်ကို သိရဲ့လား။"

"သိတယ်။"

"..."

"အီဒါဟီးရဲ့ဘဝထဲကို ကိုယ်ဝင်လာတော့မယ်လို့ ပြောတာ။ ပြတ်ပြတ်သားသားပြောတဲ့စကားကို မင်းလည်း ရှင်းရှင်းလင်းလင်းကြားလိုက်တာပဲ။"

ဒါဟီးလည်း နှုတ်ခမ်းကို ဖွဖွလေး ကိုက်လိုက်မိတော့သည်။

~~~~~

Miel's Translations