လက်မလျှော့နဲ့ (၁)
"ဟမ်?"
"ဘာမှမဟုတ်ဘူး။"
ဟန်တာက စတင်ကစားလိုက်ပြီး အသံကိုတောင် ချဲ့လိုက်သေးသည်။ ထိုစဥ် သူ့ဘေးကလူကတော့ အသံတိတ်သာ ဆေးလိပ်သောက်နေခဲ့သည်။
ဟန်တာ အချိန်တစ်ခုကြာအောင် ကစားပြီးသွားချိန်၌ ဝင်စတန်က ဖြည်းဖြည်းချင်း မေးလာ၏။ "တစ်ရှိုက်လောက်ဖွာချင်လား။"
"အိုး... အိုခေလေ..." သူ၏မျက်လုံးများက ဖုန်းကနေ အကြည့်မခွာဘဲ ဦးခေါင်းလေးအား အနားတိုးပေးကာ သူ၏ပါးစပ်ကို အသာလေးဖွင့်ဟပေးလိုက်၏။
အရိပ်တစ်ခုက ချဥ်းကပ်လာကြောင်း ခံစားမိလိုက်သော်လည်း အချိန်အတော်ကြာတဲ့အထိ ဆေးလိပ်ကတော့ ရောက်မလာခဲ့ပေ။ နောက်ဆုံးတော့ ဟန်တာ မျက်လုံးပင့်ကြည့်လိုက်သည်။
ထိုအခိုက်အတန့်တွင် သူ၏အတွေးရထားတန်းတွဲကြီးက ချက်ချင်းဆိုသလို တစ်စုံတစ်ခုကြောင့် မှင်တက်သွားစေခဲ့သည် - တစ်စုံတစ်ခုက ဝင်စတန်၏မျက်ဝန်းများပင်။
သူ၏အသိစိတ်က နောက်ဆုတ်စေချင်ခဲ့သော်လည်း ထိုမျက်ဝန်းများကြား လှောင်ပိတ်မိနေသလို လှုပ်ရှားလို့မရခဲ့ချေ။
ဝင်စတန်က ပါးစပ်ထဲကနေ ဆေးလိပ်ငွေ့များကို မှုတ်ထုတ်လိုက်ရာ ဟန်တာ၏ အနည်းငယ်ပွင့်ဟနေသော ပါးစပ်ထဲကို ဝင်ရောက်ကာ သူ၏သွားများကြားထဲ ရစ်ဝဲနေခဲ့သော်လည်း ထပ်ပြီးတိုးမဝင်နိုင်တော့ချေ။
ဟန်တာ ချောင်းဆိုးလိုက်သည့်အချိန် ဝင်စတန်က ခါးပြန်မတ်လိုက်ပြီး သူ့အား အေးအေးလူလူ ကြည့်နေခဲ့၏။
"ခင်ဗျား... ဆေးလိပ်ကို ဘယ်လိုတွေသောက်နေတာလဲ! ခင်ဗျား အခုလိုလုပ်တာ..."
ဒါ မမှန်သေးဘူး! ဘာလို့ ငါ့နားကို အရမ်းကပ်လာရတာလဲ။ လန့်လိုက်တာကို!
ဝင်စတန်က ဆေးလိပ်ကိုမီးသတ်ကာ ဘေးနားမှာရှိသော အမှိုက်ပုံးထဲ ပစ်ထည့်လိုက်သည်။ "မင်း F1 ကားကို ကိုယ့်ဦးခေါင်းပေါ်တည့်တည့် မောင်းချလာမှာမဟုတ်ဘူးလား။"
ထိုသို့ပြောပြီးနောက် သူက အိတ်ကပ်ထဲလက်ထည့်ကာ ထွက်သွားခဲ့သည်။
ဟန်တာတစ်ယောက် လည်ချောင်းများယားယံကာ မျက်ရည်ကျလုမတတ် ချောင်းဆိုးနေတော့၏။
ထို့နောက် ဝင်စတန်က သူ့ကို ဆေးလိပ်ပေးသောက်ဖို့ အစီအစဥ်မရှိခဲ့ကြောင်း၊ သူ့ကို ရိုးရိုးရှင်းရှင်း လက်တုံ့ပြန်ခြင်းသာဖြစ်ကြောင်း သိလိုက်ရသည်။
"သောက်ကျိုးနည်း... ဘာကိုလူကြီးလူကောင်းလဲ။ ငြိုးတတ်လိုက်တာလွန်ရောပဲ!" ဟန်တာက ရေအဝသောက်ကာ ထရပ်လိုက်ပြီး သူ၏အသင်းဆီ ပြန်သွားခဲ့လေ၏။
မည်သို့ပင်ဖြစ်စေ သူ၏ ဖိစီးနေသောစိတ်အခြေအနေက ပျောက်ကွယ်သွားချေပြီ။
မိန်းပွဲကို နောက်တစ်နေ့ည ၈ နာရီတွင် ကျင်းပမည်။ ထိုအချိန်အတွင်း ဟန်တာ သူ၏အခြေအနေကို ထိန်းညှိဖို့လိုပြီး အသင်းနှင့်လည်း ပြောဆိုဆွေးနွေးရမည်။
ဟန်တာ အသင်း၏ ဗျူဟာခွဲခြမ်းစိတ်ဖြာရေးမှာ စိတ်အားထက်သန်စွာပါဝင်ခဲ့သည်မှာ တော်တော်ကြာခဲ့ပြီဖြစ်၏။ သူ၏အာရုံစူးစိုက်ထားသော စိတ်သဘောထားက နည်းပညာညွှန်ကြားရေးမှူးကို စိတ်ကျေနပ်သွားစေခဲ့သည်။
မက်ဂရက်ဒီ၏ခြေကျင်းဝတ်က ပျောက်ကင်းလုနီးပါးဖြစ်နေပြီး အင်္ဂလန်၏ Grand Prix တွင် မပါဝင်နိုင်ခြင်းကြောင့် သူ၏မတည်ငြိမ်နေသောနှလုံးသားက ပို၍သိသာလာခဲ့သည်။
ဟန်တာက ထွက်ခွာရန် ထရပ်လိုက်ချိန် မက်ဂရက်ဒီက ရုတ်တရက် မှတ်ချက်ပေးလိုက်၏။ "ဘာတွေဘယ်လိုဖြစ်နေဖြစ်နေ ဒါက မင်းရဲ့ ပုံမှန်အဆင့်ပဲ။"
ဟန်တာက နှုတ်ခမ်းထောင့်များကို ပင့်တင်ကာ ပြုံးလိုက်ပြီး မက်ဂရက်ဒီ၏နားရွက်ဘေးနားထိတိုးကာ ပြောလိုက်သည်။ "မင်းရဲ့ ဇောသန်နေတဲ့ဆန္ဒကို ဖြည့်ဆည်းပေးဖို့ အနာဂတ်မှာ ငါ ကောင်းကောင်းကြီး လုပ်ဆောင်ပေးရမှာပေါ့။"
မက်ဂရက်ဒီက ပြန်လည်တုံ့ပြန်ချင်ခဲ့သော်လည်း ဟန်တာက အိတ်ကပ်ထဲလက်ထည့်ကာ ထွက်သွားခဲ့လေပြီ။
"မက်ဂရက်ဒီ... ဟန်တာက ကလေးသာသာလေးပဲရှိသေးတယ်၊ မင်း ဘာအတွက်ကြောင့် သူနဲ့ရန်လိုက်ဖြစ်နေရတာလဲ။" လုခ်က မက်ဂရက်ဒီ၏ပခုံးကို ပုတ်လိုက်၏။
"ကလေး? သူ ငါ့ကို ဘာလုပ်ခဲ့လဲဆိုတာ မင်းသိလား။"
"ဘာလုပ်ခဲ့လို့လဲ။" လုခ်က သိချင်လာ၏။
မက်ဂရက်ဒီက ပါးစပ်ဖွင့်ဟလိုက်သော်လည်း တိတ်ဆိတ်ခြင်းနှင့်သာ အဆုံးသတ်ခဲ့သည်။
...
ကားများအားလုံး နေရာယူပြီးဖြစ်၏။
ဟန်တာ၏လက်ဖဝါးများမှာ ချွေးထွက်နေပြီး သူ၏ကိုယ်ပိုင်နှလုံးခုန်သံကိုတောင် ပြန်လည်ကြားယောင်နေရသည်။
သူ စိတ်လှုပ်ရှားနေမှန်း သူ့ကိုယ်သူသိ၏။
အခုကစပြီး အခွင့်အရေးတစ်ခုကိုမှ လက်လွှတ်လို့မဖြစ်ကြောင်း ရှင်းရှင်းလင်းလင်းသိထားသည်။
ဝင်စတန်က ရှေ့ဆုံးမှာရှိနေ၏။
ယခုတစ်ကြိမ်၌ ပြိုင်ပွဲဝင်များအားလုံးကြားမှာ သူက အဆုံးသတ်မျဥ်းနှင့်အနီးဆုံးဖြစ်သော်လည်း ဟန်တာတစ်ယောက် ယခင်အကျော့ကထက်တောင် သူနှင့်ပိုဝေးသွားခဲ့သည်။
(TN/ ဟန်တာက တာထွက်နောက်ကျတော့ ပန်းဝင်မျဥ်းနဲ့ အနီးဆုံးမှာရှိနေတာပါ။ ပန်းဝင်မျဥ်းက သူ့အနောက်မှာပါ။)
'နောက်တစ်ကွေ့မှာ ကိုယ် မင်းကိုစောင့်နေမယ်။'
ထိုစကားတစ်ခွန်းက သူ၏စိတ်ထဲ ပြန်လည်ဝင်ရောက်လာသောအခါ ဟန်တာ အလျင်လိုလာခဲ့သည်။
ပထမအကွေ့က စမှတ်နှင့် အနီးဆုံးဖြစ်သော်လည်း အန္တရာယ်အများဆုံးဖြစ်သည်... ဟန်တာ စိတ်မပူနဲ့၊ စိတ်အေးအေးထား...
ပြိုင်ပွဲမစခင်က တွက်ချက်ထားသလို သူ၏ကားက လမ်းကြောင်းပေါ်ကနေ ချော်ထွက်လုနီးပါး ဖြစ်ခဲ့ရသည်။ ဟန်တာ ဓါးသွားပေါ်မှာ လမ်းလျှောက်နေရသလို အချိန်မရွေး ပြုတ်ကျသွားနိုင်၏။
လုခ်တစ်ယောက် ပထမတစ်ပတ်ကို ချောမွေ့စွာ အဆုံးသတ်နိုင်သည့်အတွက် မားကပ်စ်က စိတ်လှုပ်ရှားစွာဖြင့် လက်သီးဆုပ်လိုက်သော်လည်း ဟန်တာက နောက်ဆုံးအကွေ့၏အလယ်မှာ ရှိနေဆဲပင်။
"ဒီတစ်ခေါက် ဟန်တာ ပေါ်လွင်ဖို့ ခက်ခဲလိမ့်မယ်။" နည်းပညာညွှန်ကြားရေးမှူးက မျက်မှောင်ကြုတ်နေမိသည်။
ဒုတိယအပတ်တွင်ဖြစ်၏၊ ကားသုံးစီးက အကွေ့တစ်ခုတည်းကို ဘေးချင်းယှဥ်ကာ မောင်းနှင်နေကြသည်။ ဟန်တာက ဆုံးဖြတ်ချက်ပြတ်သားစွာဖြင့် ထောင့်ကိုချိုးကွေ့ကာ ထိုထဲကနေ ပထမဆုံးရုန်းခဲ့ပြီး ဖြည်းဖြည်းချင်း တခြားကားများဆီကနေ ထွက်လာနိုင်ခဲ့သည်။
"ကောင်းတယ်... သူလုပ်သွားတာ ချောချောမွေ့မွေ့ပဲ... အခုလိုအနေအထားနဲ့ဆို ဟန်တာ အမှတ်ရနိုင်ခြေရှိသေးတယ်လို့ ငါထင်တယ်။" မားကပ်စ်က မျက်လုံးများမှေးကျဥ်းကာ ပြောလာခဲ့သည်။
ငါးပတ်ပြည့်ပြီးနောက် ဟန်တာ သူ့ရှေ့ရှိကစားသမားနှင့် စတင်စစ်ခင်းခဲ့သည်။
သူ၏အာရုံကြောများက အလွန်တင်းကျပ်နေသော်လည်း သူ့ကိုယ်ကို ပို၍တင်းကျပ်ဖို့လိုကြောင်း ပြောနေခဲ့၏! သူ လွှတ်ချလိုက်သည့်အချိန်မှာ သူ့ကို ထိန်းချုပ်လို့မရနိုင်တော့ပေ!
နောက်ဆက်တွဲဖြစ်လာသည့်အရာက မားကပ်စ်ကိုသာမက လူအုပ်ကြီးကိုပါ အံ့သြမှင်တက်သွားစေခဲ့သည်။
Williams ဘက်မှ ကစားသမားနှစ်ဦး အချင်းချင်းယှဥ်ပြိုင်နေကြချိန် ဟန်တာက ၎င်းတို့ကားနှစ်စီးကြားမှ နေရာလွတ်ကို အခွင့်အရေးဖမ်းဆုပ်၍ ၎င်းတို့ကိုကျော်တက်သွားခဲ့သည်။ ၎င်းမှာ မားကပ်စ်အား ချွေးအေးများထွက်လာစေရန် လုံလောက်ပေ၏။ ဟန်တာ၏အဆင့်က ချက်ချင်းဆိုသလို ၁၁ နေရာသို့ မြင့်တက်လာခဲ့သည်။
ထို့နောက် Caterham မှ ကစားသမားနောက်ကို ငါးပတ်လောက်ထိ အမိအရလိုက်နေခဲ့သည်။ သူ ကျော်တက်ဖို့ ကြိုးစားလိုက်တိုင်း သူ၏ပြိုင်ဘက်က လုပ်ဆောင်မှုများအားလုံးကို ခုခံခဲ့လေ၏။
"ဒီကလေးက တခြားသူတွေကို စိတ်ကုန်အောင်လုပ်ဖို့ စိတ်ရှည်တာပဲ။" နည်းပညာညွှန်ကြားရေးမှူးက မျက်လုံးများမှေးကျဥ်းကာ မေးစေ့ကိုပွတ်သပ်နေသည်။
"ခင်ဗျား အဲ့ကောင်စုတ်လေးကို ချီးကျူးနေတာလား။" မားကပ်စ်က မေးခွန်းထုတ်လိုက်၏။
"သူ့ဆီကနေ အလိုက်ခံရတဲ့ပြိုင်ဘက်တိုင်း တော်တော်သနားစရာကောင်းတာပဲလို့ ငါ ရုတ်တရက် ခံစားလိုက်ရလို့ပါ။"
တစ်ပတ်ပြီးတစ်ပတ် Caterham ဘက်မှ ကစားသမားခမျာ ဘယ်ကနေပေါ်လာမှန်းမသိတဲ့ ဟန်တာ၏တိုက်ခိုက်မှုတို့ကို မကိုင်တွယ်နိုင်တော့ဘဲ ထိုအခိုက်အတန့်တွင် ဟန်တာက ဘယ်ဘက်ထောင့်ကနေ လှပသေသပ်စွာ ကျော်တက်သွားပြီး ၁၀ နေရာသို့ တက်လာခဲ့သည်။
"လုပ်သွားတာ ကောင်းတယ်- " မားကပ်စ်တစ်ယောက် စိတ်မလှုပ်ရှားဘဲ မနေနိုင်တော့ပေ။
အရင်က သူသည် ဟန်တာနှင့်ပတ်သက်၍ အကောင်းမြင်စိတ် အနည်းဆုံးဖြစ်ခဲ့သော်လည်း ဘာ့ကြောင့်မှန်းမသိ၊ ထိုကောင်လေးက လူတိုင်းကို အံ့အားသင့်စေနိုင်သည်ဟု ခံစားလိုက်ရသည်။
*****
Aurora Novel Translation Team