Chapter 68.1
“အင်္ဂလိပ်စာကအရမ်းခက်တာပဲ”
ဒီအချိန်မှာ ပြောရဲဆိုရဲသူက သေဖို့ကောင်းသည်။ အဓိကဇာတ်ကောင်က ဒီနေရာမှာရှိနေသည်။ မင်းရဲ့မိသားစုက ဘယ်လောက်ပဲအာဏာရှိပါစေ…ရှန်မိသားစုနဲ့ ယှဥ်နိုင်မှာတဲ့လား?
ထိုထက်ပိုသည်မှာ ယနေ့က ရှန်မိသားစု၏ အိမ်ဆောက်ဂိမ်းဆော့သည့်နေ့ဖြစ်တာကိုတောင် အချိန်အခါကိုမကြည့်ပဲ ဘယ်ညာဘယ်ညာ အတင်းအဖျင်းပြောနေကြ၏။
သို့သော် မင်းသိရမှာက လူ့သဘာဝက ကောက်ကျစ်သည့်သဘောရှိပြီး တစ်ခုခုကို နှိုးဆွပေးလေလေ လူတွေက ပိုကြားချင်လေဖြစ်ပြီး လူတိုင်းက နားစွင့်ထားကာ မျက်နှာဖြတ်ရိုက်ခြင်းကို စောင့်နေကြသည်။
ဒါပေါ့ ရှန်းယုဟန်နှင့် ရှန်ချီဟွမ်းက ကြားသွားပြီး ရှန်ချီဟွမ်းက ထိုအမျိုးသားကိုကြည့်ဖို့ ခေါင်းလှည့်လိုက်ကာ ရှန်းယုဟန်ကလည်း တူညီသောနေရာကို ကြည့်လိုက်၏။
သူ့ခင်ပွန်း၏ပါးစပ်စေ့ပိတ်ထားတာကို တွေ့တော့ ရှန်ချီဟွမ်း ဒေါသထွက်နေတာကို သူသိလိုက်သည်။ ရှန်းယုဟန်က သူ့ခင်ပွန်း၏လက်ညိုးကို ညင်ညင်သာသာ ချိတ်လိုက်ပြီး ပါးစပ်ဖွင့်ခဲ့သည့် လူငယ်ကိုကြည့်နေသည်။
ရှန်းယုဟန်က ရှန်ချီဟွမ်းနှင့်အတူ ဧည့်ခံပွဲအများကြီးမတက်ဖူးပေ။ သူက ခေတ်သစ်လူသားမဟုတ်တာကြောင့် ရှန်ချီဟွမ်းက သူ့ကိုခေါ်သွားချင်ပေမယ့် သူက ငြင်းဖို့ အကြောင်းပြချက် အမြဲရှာခဲ့ပြီး သူ့ခင်ပွန်းအတွက် ပြဿနာမဖြစ်စေချင်ခဲ့ပေ။ သို့သော် ယခုအချိန်မှာ သူက ခတ်သစ်လူသားတစ်ဝက်လို့ ခံယူလို့ရပြီဖြစ်၍ နေ့စဥ်ဆက်ဆံရေးများကို ပြဿနာမရှိပဲ ကိုင်တွယ်နိုင်သည်။
ပါးစပ်ဖွင့်ခဲ့သောလူငယ်ကလည်း ချမ်းသာပြီး အာဏာရှိသောမိသားစုမှဖြစ်၍ သူက ရှန်ချီဟွမ်းကိုမကြောက်ပေ။ သူက လူချမ်းသာအသိုင်းအဝိုင်းမှာ အတော်လေးနာမည်ကြီးသည်ဟု ယူဆလို့ရသည်။ အကြောင်းမှာ သူက ဝေ့ပေါ်တွင် တခြားသူများကို မကြာခဏဝေဖန်လေ့ရှိပြီး အချိန်တိုင်းမှာ တခြားသူများ၏ ပုဂ္ဂိုလ်ရေးအချက်အလက်ကို ထုတ်ဖော်ကာ အင်တာနက်သုံးစွဲသူများ၏ အာရုံစူးစိုက်မှုကိုရဖို့ အပျော်သဘော အသုံးချလေ့ရှိသည်။
သို့သော် သူက လူချမ်းသာအသိုင်းအဝိုင်းကဆိုပေမယ့် သူ့အမေက အငယ်အနှောင်းဖြစ်ပြီး သူကလည်း တရားမဝင်သားဖြစ်တာကို လူတိုင်းသိသည်။ သူ့နောက်ခံကို လူသိရှင်ကြားမထုတ်ဖော်ခင်မှာ သူက ခပ်လျှိုလျှိုနေခဲ့ပြီး မိသားစုထဲမှာ သူ့အဆင့်ကသိပ်မနိမ့်တာကြောင့် သူက ပို၍ မောက်မာစွာပြုမူလေ့ရှိပြီး အချိန်အခါမကြည့်ပဲ ပြောရဲဆိုရဲသည်။ လူအများစုက သူ့မိသားစုမျိုးရိုးကိုကြောက်လို့ ဒေါသမထွက်ရဲကြပဲ သူ့ထုတ်ဖော်ခဲ့သော လူတချို့ကသာ တုံ့ပြန်ခဲ့ကြသည်။ တချို့လူတွေက သူ့နဲ့သီးသန့်စကားပြောခဲ့ပြီး ပြဿနာထပ်မရှာအောင် နည်းအမျိုးမျိုးနဲ့ လိုက်လျောပေးခဲ့ကြသည်။
သူက ဒီနည်းလမ်းဖြင့် အမြတ်ရနေလို့လည်းဖြစ်နိုင်သည်။ မျိုးရိုးနာမည်ဖုန်းနဲ့လူငယ်က ပို၍ကြီးကြီးကျယ်ကျယ် ပြုမူလာခဲ့၏။
ယခုအခါ ရှန်းယုဟန်က ကြားသွားခဲ့သည်။ သူ့ခင်ပွန်းမှာ အဆင့်အတန်းရှိတာကြောင့် သူက ပုံမှန်အတိုင်းဆို ရိုင်းစိုင်းသူတစ်ယောက်နှင့် မငြင်းခုံချင်ပေ။ သို့သော် ရှန်းယုဟန်ကတော့ ငြင်းခုံနိုင်သည်။ သူက အပြင်မှာ သူ့ခင်ပွန်းကို ကိုယ်စားပြုပြီး သူ့ခင်ပွန်း၏အရှက်ကိုလည်း ကယ်တင်ရမည်။ လူတိုင်းက သူ့ခင်ပွန်းကိုလှောင်ပြောင်ဖို့ သူ့ဂုဏ်သိက္ခာကို နင်းချေပြီး အတိတ်ကိုအသုံးချရင် ‘ချီတိုင်းပြည်ရဲ့နံပါတ်တစ်ကော'ဆိုသော ဂုဏ်ပုဒ်က အချည်းနှီးဖြစ်မသွားဘူးလား?
သူက မတ်တပ်ထရပ်ကာ လူငယ်လေးကို ညင်သာသောလေသံဖြင့် မေးလိုက်သည်။ “မင်းငါ့အကြောင်းပြောနေတာလား?”
မိသားစုနောက်ခံနဲ့ လူငယ်လေးက အချိန်တော်တော်များများမှာ ပြဿနာရှာခဲ့ပေမယ့် သူတို့အားလုံးက ဟာသတွေဖြစ်ကြ၍ သူက ဒီတစ်ကြိမ်မှာ သံပန်းကိုကန်မိသွားမယ်လို့ မမျှော်လင့်ထားခဲ့ပေ။
သူက ခုံမှာတင်အေးခဲနေပြီး ခဏလောက် စကားမပြောနိုင်ဖြစ်သွားသည်။
ရှန်းယုဟန်က ရှန်ချီဟွမ်းကိုကြည့်ကာ ပုံမှန်လေသံနှင့်ပြောလိုက်၏။ “ယောကျာ်း၊ ကျွန်တော် အရင်တစ်ခေါက်ရေထဲကျသွားတာ ယောက်ဖနဲ့ဘာဆိုင်လို့လဲ? ကျွန်တော်က မစ်ဟွမ်နဲ့ တချို့ကိစ္စတွေမှာ သဘောထားကွဲလွဲမှုတွေရှိခဲ့ရုံပါ။ ကျွန်တော်တို့ စကားပြောတဲ့ပုံစံက နည်းနည်းရန်စနေသလိုဖြစ်တော့ မတော်တဆမှုဖြစ်သွားခဲ့တာ။ အပြင်မှာ ဒီလိုမျိုး ဘာကြောင့်ပျံ့နေတာလဲ? ဒီနေ့က ယောက်ဖရဲ့စေ့စပ်ပွဲပါတီလေ၊ တခြားဧည့်သည်တွေ ဒီလိုကောလာဟလမျိုးကြားသွားရင် မကောင်းဘူး။ ကျွန်တော်က စိတ်မရှိပေမယ့် မစ်ချီက ကျွန်တော်တို့မိသားစုထဲကို အခုထိမဝင်ရသေးတော့ လက်မထပ်ရသေးတဲ့ စုံတွဲရဲ့ဆက်ဆံရေးကို ဘယ်လောက်တောင် ထိခိုက်သွားနိုင်လဲ?”
ရှန်ချီဟွမ်းက သံယောင်လိုက်သည်။ “အွန်း၊ ကောလာဟလဖြန့်တာက လွယ်ပေမယ့် သူတို့ကို ချေဖျက်ဖို့က တကယ့်နာကျင်မှုပဲ။ ရေထဲကျသွားတာကို ဘာလို့ရေကြီးခွင်ကျယ်လုပ်နေတာလဲ၊ အလိမ်တွေဖန်တီးမယ့်အစား မင်းမှာအချိန်ရှိရင် စာအုပ်များများဖတ်၊ မင်းက ဘယ်မိသားစုကလဲ မေးလို့ရလား?” သူက တုံ့ပြန်ပြီး ချေပလိုသော လူငယ်ကိုကြည့်လိုက်သည်။
တစ်ယောက်ယောက်က တွေးနေခဲ့သည်။ ဒီလူကိုမသိတဲ့လူလည်း ရှိသေးတာလား?
ဒါပေမယ့် ဒုတိယအတွေးမှာ ရှန်ချီဟွမ်းက တမင်လုပ်ခဲ့တာဖြစ်ပေမယ့် သူက အဲ့လိုလုပ်လို့ ဝေဖန်ခံမှာမဟုတ်…ဘာပဲဖြစ်ဖြစ် သူက ပြဿနာစရှာခဲ့သူ မဟုတ်ဘူးလေ….
ရှန်ချီဟွမ်းနှင့်ရှန်းယုဟန်က စည်းဝါးကိုက်နေကြပြီး လူငယ်က ဘယ်လောက်အရေထူထူ ရှန်ချီဟွမ်း သူ့ကို ထိုကဲ့သို့ အထင်သေးနေတာကို သည်းမခံနိုင်ပေ။
လူငယ်လေးက ကျည်ဆံကိုက်ရုံမှလွဲ၍ ရွေးချယ်စရာမရှိတာကြောင့် တောင့်တောင့်ကြီးဖြေလိုက်၏။ “ကျွန်တော်က ဖုန်းမိသားစုကပါ၊ ပြီးတော့ ဖုန်းကျန့်ရှန်းက ကျွန်တော့်အဘိုး” သူက သူ့အဘိုးအိမ်ကထွက်လာပြီး ဖုန်းမိသားစုထဲကို ပြန်ဝင်နိုင်ခဲ့သည်မှာ သူတို့မှာ မြေးတွေမရှိ၍ ဖုန်းမိသားစုက အမွေဆက်ဆံသူလိုတာကြောင့် သူ့အဘိုးကလက်ခံခဲ့တာဖြစ်၏။
သူက ဝေ့ပေါ် မကြာခဏသုံးတာကြောင့် ရှန်ချီဟွမ်းက ရှန်းယုဟန်နှင့်ပတ်သတ်သော ပို့စ်များတင်လေ့ရှိတာကိုသိပေမယ့် သူက အဲ့ဒါကို ရှန်ချီဟွမ်း၏ ကျော်ကြားအောင်လုပ်နည်းလို့သာ ထင်ခဲ့၏။ ဒီလိုအိမ်ထောင်ရေးအတုမှာ ဒီလူက ခံစားချက်အစစ်ရှိမှန်း ဘယ်သူကသိခဲ့မှာလဲ!
ရှန်းယုဟန်က သူ့သူငယ်ချင်းအန်ကယ်အုပ်စုကြားမှာ ဖုန်းမျိုးရိုးနှင့် လူကြီးလူကောင်းတစ်ယောက်ရှိတာကို သတိရသွားသည်။ သူတို့က ဝီချက်မှာလည်း အက်ဒ်ထားပြီး ပြပွဲနေ့မှာ သူလည်းလာပြီး အများကြီးအားပေးခဲ့သည်။
သူက ဝီချက်ကိုဖွင့်ကာ လူငယ်လေး၏မျက်နှာပုံကို ရိုက်ယူလိုက်ပြီး မစ္စတာဖုန်းကို ဤစာသားနှင့်ပို့လိုက်သည်။ ဒါအန်ကယ့်မြေးလား?
မစ္စတာဖုန်းက ဒီနေ့မှာအားနေပြီး သူက ငှက်စာကျွေးနေသည်။ ထို့နောက် မက်ဆေ့တစ်စောင်ရောက်လာတော့ မျက်မှန်တပ်ကာကြည့်လိုက်သည်။
အို ရှောင်ရှန်းဆီကစာပဲ။
ဓာတ်ပုံကိုကြည့်ပြီးတော့ သူက ခဏလောက်တိတ်ဆိတ်သွားပြီး ဗီဒီယိုကောခေါ်လိုက်သည်။ ရှန်းယုဟန်က ဖြေလိုက်ပြီး ကင်မရာကို သူနဲ့ရှန်ချီဟွမ်း၏မျက်နှာကို ချိန်ထားသည်။ ဖုန်းကျန့်ရှန်းက သူတို့နောက်မှာ လူအများကြီးရှိနေတာကို တွေ့လိုက်ရသည်။
အန်ကယ်ဖုန်းက နွေးနွေးထွေးထွေး ပြုံးလိုက်သည်။ “ရှောင်ရှန်း၊ ရှောင်ရှန်လည်းရှိနေတာပဲ။ မင်းငါ့မြေးကိုဘာလို့မေးတာလဲ? သူက ငါ့မြေး ဖုန်းယွင်ဟိုင်”
ရှန်းယုဟန်က ပြောလိုက်သည်။ “အန်ကယ်ဖုန်း၊ အဲ့ဒါကဒီလိုပါ၊ ကျွန်တော့်ခင်ပွန်းနဲ့ ကျွန်တော်က ဒီနေ့ဧည့်ခံပွဲမှာ လူငယ်လေးတစ်ယောက်ကိုတွေ့ခဲတယ်။ သူက အန်ကယ့်ရဲ့မြေးပါလို့ပြောနေလို့ အန်ကယ့်ရဲ့မြေးအဖြစ်ဟန်ဆောင်မှာကို စိုးရိမ်လို့ မေးကြည့်လိုက်တာ။ ပိုင်ရွှယ်ကို အစာကျွေးနေတဲ့ အန်ကယ့်ကို နှောင့်ယှက်မိသလို ဖြစ်သွားလား?”ပိုင်ရွှယ်က ဖုန်းကျန့်ရှန်းမွေးထားသော ကြက်တူရွေးဖြစ်ပြီး သူ၏လှုပ်ရှားမှုများကို Moments မှာ ခဏခဏတင်သည်။ ရှန်းယုဟန်က တစ်ချက်ကြည့်ရုံနဲ့ မှတ်မိပြီး ငှက်ပျိုးထောင်နည်းအတွေ့အကြုံကို ကွန်းမန့်မှာ မျှဝေးခဲ့သေးသည်။
“ကိစ္စမရှိပါဘူး။ အဲ့ဒါက ငါ့မြေး။” အန်ကယ်ဖုန်းက ကြားလိုက်တာနဲ့ ဘာဖြစ်နေလဲဆိုတာကို သိသွားသည်။ အဲ့ဒါက အပြင်မှာ ပြဿနာရှာနေတဲ့ သူ့မြေးပဲဖြစ်ရမယ်။
သူစကားပြောနေစဥ် အဖြူရောင်ကြက်တူရွေးတစ်ကောင်က သူ့ပခုံးပေါ်တက်လာပြီး အော်လိုက်သည်။ “ဟယ်လို…ဟယ်လို!”
ရှန်းယုဟန်က ပြန်ဖြေသည်။ “ဟယ်လို၊ ပိုင်ရွှယ်”
စကားပြောနေစဥ် ပိုင်ရွှယ်၏ခေါင်းပေါ်က အမောက်ကခါယမ်းနေသည်။ “ကောင်ချောလေး…ဟယ်လို”
ရှန်းယုဟန်က ညင်ညင်သာသာ ပြုံးပြသည်။ ဤသည်မှာ တစ်ယောက်ယောက်က သူ့ကို ကောင်ချောလေးလို့ခေါ်တာ ပထမဆုံးအကြိမ်ဖြစ်ပြီး ခေါ်သူကလည်း ဖောင်းဖောင်းမို့မို့ ချစ်စရာကောင်းသော ကြက်တူရွေးဖြစ်၏။
ခဏအကြာမှာ ဗီဒီယိုကောလ်ကိုချလိုက်သည်။
ရှန်းယုဟန်က သူရေထဲကျသွားတာ ရှန်ချီယွင်ကြောင့် ဟုတ်မဟုတ်ဆိုတာကို သက်သေပြဖို့ သူ့စွမ်းအားကို အသုံးပြုခဲ့သည်။
ရှန်းယုဟန်က လူကြီးတစ်ယောက်ကို တိုက်ရိုက်သတင်းပို့နိုင်မယ်လို့ မမျှော်လင့်ထားသဖြင့် လူတိုင်းက စိတ်လှုပ်ရှားစွာ ကြည့်နေသည်။
အို၊ မဖြစ်နိုင်တာ… သူက မစ္စတာဖုန်းကိုသိတယ်!
ဖုန်းယွင်က မျက်နှာပြဖို့ပင် ရှက်နေသည်။ သူ့အတွက် သူ့အဖိုး၏ခွင့်ပြုချက်ကိုရဖို့ ဆယ်နှစ်အချိန်ယူခဲ့ရပြီး ယခု ရှန်းယုဟန်က ထိုမေးခွန်းကိုမေးလိုက်ရာ သူက လွတ်လပ်ရေးမရခင် နေ့ရက်များကို ပြန်သွားရမှာကြောက်နေသည်။
သူက အရှက်မရစေဖို့ တစ်ခုခုပြောခါနီးမှာ သူ့အဖေဆီက ဖုန်းကောလ်တစ်ခု ချင်ချင်းဝင်လာခဲ့သည်။ ဖုန်းယွင်ဟိိုင်၏ ဦးရေပြားက ထုံကျင်လာပြီး သူကခုံကနေချက်ချင်းထွက်သွားခဲ့သည်။ သူ့နောက်ကျောကိုကြည့်ပြီး ရှုံးသွားလို့ ထွက်ပြေးသွားတယ်လို့ ယူဆနိုင်သည်။
ရှန်းယုဟန်က တကယ်တော့ ဒီလိုမလုပ်ချင်ခဲ့ပေမယ့် သူက လာရှုပ်လို့ရတဲ့လူမဟုတ်ကြောင်း တခြားသူများကိုပြောပြချင်သည်။ သူတို့က သူ့နောက်ကွယ်မှာပြောလို့ရပေမယ့် သူ့ခင်ပွန်းကိုတော့ မဟုတ်မမှန်ပြောလို့မရပေ။ သူ ရံဖန်ရံခါ အဆက်အသွယ်သုံးမိသွားလည်း ကိစ္စမရှိပေ။ ဘာပဲဖြစ်ဖြစ် သူ့ပန်းချီအားလုံး ရောင်းထွက်သွားခဲ့လေပြီ။
ရှန်ချီဟွမ်းနှင့်ရှန်းယုဟန်ကို ပင်မစားပွဲဘေးရှိ စားပွဲမှာ နေရာချထားပြီး သူတို့နှစ်ယောက်လုံးက စီးပွားရေးမှာ အရေးပါသူများဖြစ်သည်။ ရှန်းယုဟန်က မရိုးရှင်းကြောင်း ဖုန်းကောလ်တစ်ခုနဲ့ ပြောပြခဲ့ပြီး စကားပျံ့နှံ့သွားရင် ရှန်းယုဟန်က လာရှုပ်လို့ရသောလူမဟုတ်ပဲ ကျောထောက်နောက်ခံရှိတာကို သိသွားကြမှာပင်။
ဒီအပိုင်းအသေးလေးအပြီးမှာ ရှန်ချီဟွမ်းနှင့် ရှန်းယုဟန်က အတူထိုင်နေကြပြီး စေ့စပ်ပွဲအခမ်းအနားက ဘာပြဿနာမှမရှိပဲ ပြီးသွားခဲ့သည်။
စေ့စပ်ပွဲပြီးသွားတော့ အရက်ခွက်မြှောက်ဂုဏ်ပြုပွဲရှိသည်။ ကြင်စဦးမောင်နှံက နှစ်ဖက်လူကြီးမိဘများ၏ စားပွဲမှာ ခွက်မြှောက်ဂုဏ်ပြုရမှာဖြစ်ပြီး ကျန်တာကတော့ ထုံးစံအတိုင်းဖြစ်၏။
သူတို့နှစ်ယောက်က ရှန်ချီဟွမ်းနှင့် ရှန်းယုဟန်၏စားပွဲကိုရောက်လာတော့ ရှန်ချီဟွမ်းက ရှန်းယုဟန်ကို အစိမ်းရောင်အရွက်ထည့်ပေးနေပြီး ရှန်းယုဟန်က သူ့ကိုအပြုံးတစ်ခုဖြင့် ကျေးဇူးတင်နေသည်။ ထို့နောက် သူတို့နှစ်ယောက်က စားပွဲဝိုင်းက တခြားသူများနှင့်အတူ ထရပ်ကာ အာရုံမစိုက်ပဲ ဝတ်ကျေတန်းကျေ ပြုမူနေသော စုံတွဲအသစ်ကို ခွက်မြှောက်ဂုဏ်ပြုလိုက်သည်။
ရှန်ချီဟွမ်းက နောက်ဆုံးမှာပြောလာခဲ့သည်။ “ငါမင်းနဲ့မစ်ချီကို ဝုဏ်ပြုပါတယ်။” ငါ့ဇနီးကို တစ်ချိန်လုံး စိုက်ကြည့်မနေနဲ့
ရှန်းယုဟန်ကလည်း သံယောင်လိုက်သည်။ “မင်းတို့နှစ်ယောက်အတွက် ပျော်ရွှင်ဖွယ်စေ့စပ်ပွဲလေးပါ” သူက မစ်ချီကိုလည်းသိပေမယ့် သူမကိုသိခဲ့သောဖြစ်စဥ်က သိပ်မကောင်းလှပေ။
ယနေ့အခန်းထဲမှာ အတောက်ပဆုံးဖြစ်အောင် ဝတ်ထားသော မစ်ချီက ပိုင်နိုင်စွာပြုံးလိုက်သည်။ “ကျေးဇူးပါ”
ရှန်ချီယွင်က အပြုံးတုဖြင့်ပြောလိုက်သည်။ “ကျေးဇူးပါ၊ မရီး” သူ့နှလုံးသားက ဆန္ဒမရှိသော်လည်း ရှန်းယုဟန်က အခုချိန်မှာ သူ့မရီးသာဖြစ်သည်။
ရှန်ချီယွင်က ရှင်းယုဟန်ကိုကြည့်လိုက်တော့ သူ့မျက်လုံးထဲမှာ သူ့ကိုစွန့်လွှတ်ဖို့ တုံ့ဆိုင်းနေသော အရိပ်အယောင်လည်းမရှိချေ။ သူက ဖန်ခွက်ကိုချပြီး ခေါင်းလှည့်ကာ ရှန်ချီဟွမ်းကို တီးတိုးပြောလိုက်သည်။ ရှန်ချီယွင်က ရှန်ချီဟွမ်းကိုကြည့်တော့ သူပြုံးနေသည်မှာ ကမ္ဘာ့အလှဆုံးစကားလုံးကို ကြားလိုက်ရသလိုပင်။ တကယ်တော့ ရှန်ချီဟွမ်းက သူ့ကို ခဏနေရင် အပြင်မှာစားဖို့ ခေါ်သွားမယ်လို့ ပြောနေတာဖြစ်၏။
ရှန်ချီယွင်က မစ်ချီ၏ခါးကိုဖက်ကာ ပျော်ချင်ယောင်ဆောင်ပြီး ထွက်သွားခဲ့သည်။ မစ်ချီက ဤနေရာမှ အမြန်ဆုံးထွက်သွားချင်နေသည်။ သူမက နောက်ဆုံးတစ်ခေါက် သူမမိသားစု၏ဧည့်ခံပွဲမှာ ရှန်းယုဟန်၏ တိုက်ခိုက်နိုင်စွမ်းကို မှတ်မိသေးသည်။
ဒီနေ့ခေတ်လူငယ်တွေက အရှက်တရားကိုမရှိကြဘူး၊ လူငယ်မျိုးဆက်အချင်းချင်း စကားများကြတာကို လူကြီးတွေကို တိုက်ရိုက်သတင်းပို့လို့ရလား?
ဘယ်လိုပဲဖြစ်ဖြစ် အဲ့ဒါက တကယ်ကိုထိရောက်တယ်ကွ!
သို့သော် ဤနည်းလမ်းအလုပ်ဖြစ်ရန်အတွက် အဓိကအချက်မှာ သခင်ကြီးဖုန်းနဲ့ ကောင်းမွန်သော ဆက်ဆံရေးရှိဖို့သာဖြစ်၏။
ယခုချိန်မှာ လူတိုင်းက နောက်မေးခွန်းတစ်ခုကို သိချင်နေကြသည်။ ရှန်းယုဟန်က သခင်ကြီးဖုန်းနဲ့ ဘယ်လိုရင်းနှီးသွားတာလဲ?
ယင်းကိုတော့ ရှန်းယုဟန် ပြန်ခါနီးမှ တချို့လူတွေက ရှာတွေ့ခဲ့ကြသည်။ ရှန်းယုဟန်က သူ၏လက်ရေးလှပန်းချီနဲ့ လူကြီးများကို သိမ်းသွင်းနိုင်ခဲ့တာကြောင့် သူက ထိုအုပ်စုနဲ့ အဆက်အသွယ်ရှိလာခဲ့တာဖြစ်၏။ ရှော့ပင်းမောလ်မှာ နှစ်ပေါင်းများစွာရှိခဲ့သော လူများထက် သူ့တွင် အဆက်အသွယ်ပိုရှိ၏။
ရုတ်တရက် ရှန်ချီဟွမ်းကိုတောင် နည်းနည်းအားကျလာသလိုပဲ…
ဒါက ဘဝရဲ့ဒဏ္ဍရီဆန်တဲ့ အောင်နိုင်သူမဟုတ်လား! သူက မိသားစုနောက်ခံလမ်းကြောင်းမှာ အနိုင်ရခဲ့ရုံတင်မဟုတ်ပဲ လှေကားတက်ဖို့လည်း အားစိုက်ထုတ်စရာမလိုပဲ တွန်းတင်ပေးခံရ၏။
&&&&&&&&&&&&&&&
Chapter 68.2
“အင်္ဂလိပ်စာကအရမ်းခက်တာပဲ”
ရှန်ချီယွင်နှင့် မစ်ချီတို့၏ စေ့စပ်ပွဲအပြီးမှာ ရှန်ချီယွင်၏ ရှန်ဂရုထဲရှိ ပြောခွင့်ဆိုခွင့်က မြင့်တက်လာပြီး ရှန်ချီဟွမ်းက အရင်ကလို အချိန်ပိုလုပ်စရာမလိုတော့သဖြင့် စိတ်သက်သာရာရခဲ့၏။ ရှန်းယုဟန်ကလည်း ဖြစ်နေတာတွေကိုသိသည်။ မျှော်လင့်ထားသလိုပင် ရှန်ထျန်းဖုန်းက ရှန်ချီယွင်အပေါ် ဘက်လိုက်ဆဲဖြစ်၏။
ရှန်ထျန်းဖုန်းက ခွဲစိတ်မှုပြီးကတည်းက ပြန်လည်သက်သာလာခဲ့ပြီး ရှန်ချီယွမ်က ကျန်းမာရေးမကောင်းလို့ ဆေးရုံမှာတစ်လလောက် နေခဲ့ရပြီးတော့ အားပြန်ဖြည့်ဖို့ အိမ်ပြန်ခဲ့ရသည်။ ရှန်ချီဟွမ်းမှာ ရှန်ဂရု၏စီးပွားရေးကို လက်လွှဲယူဖို့ စွမ်းဆောင်ရည်အပြည့်ရှိပေမယ့် သူက ခက်ခဲကြမ်းတမ်းပြီး ကျေးဇူးမဲ့သောအလုပ်များကို မလုပ်ချင်ပေ။ သူက သူ့အစ်ကိုကိုကူညီဖို့သာ ကုမ္ပဏီကိုဝင်ခဲ့တာဖြစ်ပြီး နောက်ကျရင် တာဝန်ကို ပြန်အပ်ရမှာပင်။
ရှန်ချီယွင်က ရှန်ဂရုကို ထိန်းချုပ်ချင်ရင် သူ့မှာ အရည်အချင်းရှိလားအပေါ် မူတည်သည်။ ရှန်ထျန်းဖုန်းက အာဏာလွှဲအပ်ဖို့ ဆန္ဒရှိပေမယ့် သူက အခုထိ အငြိမ်းစားမယူရသေးဘူးမလား?
သူတို့ ဒါကို ဘာလို့ဖြေရှင်းမရတာလဲ….
နှစ်သစ်က မကြာမီ ရောက်ရှိလာတော့မှာဖြစ်၍ မရောက်ခင်မှာ နှင်းများကျလာမည်ဖြစ်၏။
(တရုတ်နှစ်သစ်ကူးပါ)
ရှန်းယုဟန်က ရှန်ချီဟွမ်းကိုရွတ်ပြသည်: စပါးရိတ်သိမ်းချိန်အမှီ နှင်းတွေကျတော့မှာ၊ ပြီးတော့ သူတို့က နောက်နှစ်မှာ သေချာပေါက် အမြတ်အများကြီးရလိမ့်မယ်။
ရှန်ချီဟွမ်းက 'နောက်နှစ်မလိုဘူး၊ သူက ဒီနှစ်လည်း အမြတ်အများကြီးရခဲ့တယ်။ သူက ချစ်စရာကောင်းပြီး နူးညံ့သိမ်မွေ့တဲ့ဇနီးကိုလည်း ရခဲ့တယ်'လို့ ပြောလိုက်၏။
ဤချစ်စရာကောင်းပြီး သိမ်မွေ့သောဇနီးက ဝေ့ပေါ်ဖွင့်ပြီးနောက် ကမ္ဘာသစ်ကို ရှာဖွေတွေ့ရှိခဲ့သည်။
ယခုဆိုရင် သူက သူ့ကိုယ်သူနှင့် သူ့လက်ရေးလှပုံများကို ဝေ့ပေါ်မှာတင်လို့ရသည်။ အနုပညာပြပွဲက ပရိုမိုးရှင်းအပါအဝင် ရှန်ချီဟွမ်းက ဝေ့ပေါ်မှာ ပုံမှန်ပြန်တင်ပြီးနောက် တညအတွင်းမှာ သူ့ပရိသတ်အရေအတွက်က တစ်သန်းအထိ မြှင့်တက်လာခဲ့ပြီး သူက ဝေ့ပေါ်က ပရိတ်သတ်များ၏ မက်ဆေ့ကိုဖတ်ကာ သဘောကျနေ၏။
ဒါက ဝေ့ပေါ်သုံးလို့ရတဲ့ပုံစံပေါ့၊ ဝီချက်မှာက ကိုယ်သိတဲ့လူတွေနဲ့ ဆက်သွယ်လို့ရပြီး ဒီမှာတော့ သူစိမ်းတွေနဲ့ တိုက်ရိုက်ဆက်သွယ်လို့ရတယ်….
ခေတ်သစ်လူသားတွေက တကယ်ကိုထက်မြက်ကြတယ်၊ သူတို့က အင်တာနက်ကတစ်ဆင့် ဒီလိုလုပ်နိုင်ပြီး လူတွေနဲ့ဆက်သွယ်ဖို့ မျက်နှာပြဖို့လည်းမလိုဘူး။ လက်ချောင်းလေးလှုပ်ရုံပဲ….
ရှန်ချီဟွမ်းက သူ့ဇနီးလေး အင်တာနက်စွဲလမ်းနေတာကိုတွေ့ပြီး သူ့မျက်လုံးကိုကာကွယ်ဖို့နှင့် တစ်ချိန်လုံး ဝေ့ပေါ်သုံးနေတာကို ရပ်တန့်ရန် သတိပေးဖို့ အသင့်ဖြစ်နေခဲ့သည်။
ယနေ့တွင် သူက ရှားရှားပါးပါး အလုပ်စောစောပြန်လာခဲ့ပေမယ့် ထူးဆန်းတာက ရှန်းယုဟန် ပုံမှန်လို သူ့ကိုလာမကြိုပေ။ ရှန်ချီဟွမ်းက ယောကျာ်းလို့ နူးနူးညံ့ညံ့ အခေါ်မခံခဲ့ရသဖြင့် သူအထဲဝင်လာသော အခိုက်အတန့်မှာ စိတ်မကောင်းဖြစ်ရ၏။
သူအန်တီ့ကိုမေးကြည့်တော့ ရှန်းယုဟန်က စာဖတ်ခန်းထဲမှာ နေ့လည်ခင်းတစ်ခုလုံးရှိနေတာကို သိခဲ့ရပြီး သူက ရှန်းယုဟန် စားပွဲပေါ်မှာ ပန်းချီဆွဲနေပြန်ပြီလို့ ထင်ခဲ့သည်။ ရှန်းယုဟန်က ‘ဖန်တွေကိုအလိုလိုက်ခြင်း'ဆိုသော စကားလုံးအသစ်ကို ရှာတွေ့ထားပြီး သူက ပရိသတ်များ၏ တောင်းဆိုချက်အရ ပုံစံအသေးလေးတချို့ကို ရေးဆွဲပေးလေ့ရှိသည်။
ရှန်ချီဟွမ်းက သူပန်းချီဆွဲနေတာကိုကြည့်ရန် အပေါ်ထပ်ကို တိတ်တိတ်လေးတက်သွား၏။ ယနေ့အပြန်လမ်းမှာ သူက ဂီတတူရိယာဆိုင်တစ်ခုကို ဖြတ်သွားကာ ရွှင်းတူရိယာကိုဝယ်ခဲ့ပြီး သူ ငယ်ငယ်တုန်းက လေ့လာဖူး၍ ရှန်းယုဟန် တီးမှုတ်နိုင်အောင် ပြန်ယူလာပေးချင်ခဲ့၏။
အန်တီက ရှန်းယုဟန် အနှောင့်အယှက်မဖြစ်စေဖို့ သူမလုပ်စရာမရှိရင် အပေါ်ထပ်ကို တက်မသွားပေ။ သူ့စာဖတ်ခန်းက ပုံမှန်အားဖြင့် သောမခတ်ထားပဲ လေဝင်လေထွက် အပေါက်တစ်ခုကို ဖွင့်ထားသည်။
ရှန်ချီဟွမ်းက တံခါးကိုတွန်းဖွင့်ခါနီးမှာ အထဲကနေ အင်္ဂလိပ်လိုပြောနေသော အမျိုးသမီးအသံနှင့် တုပပြောနေသော ရှန်းယုဟန်၏အသံကို ကြားလိုက်ရသည်။
စက်ရုပ်အမျိုးသမီးအသံ: “ဂုဏ်ပြုပါတယ်”
ရှန်းယုဟန်: ‘ခမ်ကူလုထျောင်လဲ့ရှန်း”**ထို့နောက် သူက ပြောလိုက်သည်။ “အသံထွက်ဖို့ ခဲယဥ်းလိုက်တာ။”
(T/Nအရိုးကိုစားပြီး နံရိုးကိုဖောက်ထုတ်တာလို့ အဓိပ္ပါယ်ရပါတယ်: - Congratulation ၏အသံထွက်အသစ်)
စက်ရုပ်အမျိုးသမီးအသံ: “အောင်ပွဲခံကြမယ်”
ရှန်းယုဟန်: “ဇိန်နယ်လိန်ပလိန့်” ထို့နောက် သူက သက်ပြင်းချလိုက်၏။ “အင်္ဂလိပ်စာက အရမ်းခက်တာပဲ။”
(သူခိုးလို့အဓိပ္ပါယ်ရပါတယ်:)- Celebrate ရဲ့အသံထွက်အသစ်)
ရှန်ချီဟွမ်း: “......”
သူ အင်္ဂလိပ်စာ တိတ်တိတ်လေး သင်နေတာလား? ဒါပေမယ့် အသံထွက်က အရမ်းကိုမှ……
ရှန်ချီဟွမ်းက သူ့ပါးစပ်ကို မနည်းပိတ်ထားရသည်။ ဒီညအခန်းထဲပြန်လို့မရမှာစိုး၍ အကျယ်ကြီးတောင် မရယ်ရဲပေ။
ရှန်းယုဟန်၏ အင်္ဂလိပ်စကားပြော အလွန်ညံ့မယ်လို့မထင်ထားပေ။ သူ့ခင်ပွန်းက မိခင်ဘာသာစကားလို ပြောနိုင်တဲ့အချိန်မှာ သူကတော့ ချို့ယွင်းချက်ဖြစ်နေလေ၏။ ဒါကြောင့် သူ့ဇနီးလေး အင်္ဂလိပ်စာကို တိတ်တိတ်လေး သင်နေမှန်းတောင် မသိခဲ့တာပင်။
သူ့ဇနီးကလည်း အရှက်တရားကို ဂရုစိုက်သူမို့ သူက အပြင်မှာ သင်တန်းစာရင်းမသွင်းရဲပဲ အွန်လိုင်းအတန်းကို တိတ်တိတ်လေး တက်နေတာဖြစ်၏။
သူတိတ်တိတ်လေး ကြိုးစားသင်ယူနေတာကို ကယ်တင်ဖို့ အတန်းအပ်ပေးဖို့ အကြောင်းပြချက် ရှာလိုက်ရမလား……
သူနဲ့လိုက်ဖက်ညီဖို့ ရှန်းယုဟန်က အရမ်းကြိုးစားနေသည်။
ရှန်ချီဟွမ်းက စိတ်လှုပ်ရှားပြီး အကောင်းဆုံးအင်္ဂလိပ်သင်တန်းကျောင်းကို စုံစမ်းဖို့ လက်ထောက်ချွီကိုပြောလိုက်သည်။ သူက တစ်ဦးချင်းသင်ယူဖို့လိုပြီး ဆရာမလည်းဖြစ်ရမည်၊ ဆရာဖြစ်လို့မရပေ။
–
ရှန်းယုဟန်က ညစာစားဖို့ အောက်ထပ်ဆင်းသွားတော့ သူ့ခင်ပွန်းပြန်ရောက်နေပြီး သတင်းကြည့်နေတာကို တွေ့လိုက်ရကာ အံ့အားသင့်သွား၏။
သူက ရှန်ချီဟွမ်းကို လက်နှစ်ဖက်ဖြင့် ပွေ့ဖက်ပြီး နားထဲမှာ တိုးတိုးလေးပြောလိုက်၏။ “ယောကျာ်း၊ ပြန်ရောက်တာကို ဘာလို့မပြောတာလဲ”
ရှန်ချီဟွမ်းက ရင်ထဲကပြောလိုက်သည်။ အဲ့ဒါ သူ စာသင်နေလို့ အနှောင့်အယှက်မပေးချင်လို့ မဟုတ်ဘူးလား….. သို့သော် သူက ထိုသို့မပြောခဲ့ပေ။ “မင်းဘာလုပ်နေလဲဘယ်သူကသိမှာလဲ….. မင်းက ငါ့ကိုတောင်ထွက်မကြိုဘူး။”
“အာ၊ ကျွန်တော်ကားသံမကြားလိုက်လို့” ရှန်းယုဟန်က ရှန်းချီဟွမ်း၏နားထဲမှာ ထပ်ပြောလိုက်သည်။ “ယောကျာ်း၊ စိတ်မဆိုးပါနဲ့၊ ခင်ဗျားပြန်မလာခင် မက်ဆေ့ပို့ထားရင် ခင်ဗျားကိုကြိုဖို့ အောက်ဆင်းနေမှာပေါ့။”
ရှန်းယုဟန်က ကလေးဆိုးကြီးလို စိတ်ဆိုးနေသော သူ့ခင်ပွန်းကို ချော့လိုက်ပေမယ့် သူ့ရင်ထဲမှာ သက်ပြင်းချလိုက်သည်။ သူအင်္ဂလိပ်စာလေ့လာနေတာကို ရှန်ချီဟွမ်းမတွေ့သွားတာ တော်သေးတယ်….
သူက ခေါင်းစဥ်အမြန်ပြောင်းလိုက်၏။ “ရက်အနည်းငယ်မှာ တရုတ်နှစ်သစ်ကူးလာတော့မှာ၊ ကျွန်တော့်အိမ်အတွက် နှစ်သစ်ကူးပစ္စည်းတွေ ဝယ်ဖို့လိုလား? အလှဆင်ဖို့လိုသေးလား?”
ရှန်ချီဟွမ်း၏ တရုတ်နှစ်သစ်ကူးအပေါ် အမြင်မှာ တခြားအိမ်တော်သုံးအိမ်နဲ့ ရင်ဆိုင်ခဲ့ရတာဖြစ်၏။ ဒီနှစ်မှာ ရှန်းယုဟန်နှင့် ဖြတ်သန်းရမှာကိုတွေးလိုက်တော့ သူက စောင့်မျှော်နေမိသည်။
သူက ရှန်းယုဟန်၏လက်ကို သူ့ရင်ဘတ်ပေါ်တင်ကာ မေးလိုက်သည်။ “နှစ်သစ်ကိုဘယ်လိုကျင်းပချင်လဲ?” ရုတ်တရက်မေးလိုက်တာက သူ့စိတ်က ဗလာဖြစ်နေလို့ပင်။ နှစ်သုံးဆယ်နီးပါးနေခဲ့တာတောင် တရုတ်နှစ်သစ်ကူးမှာ သူဘာလုပ်ချင်လဲ စဥ်းစားလို့မရချေ။
ရှန်းယုဟန်က နှစ်သစ်ကူးကျင်းပသော ခေတ်သစ်နည်းလမ်းကိုတွေးလိုက်ပေမယ့် တောင်နဲ့မြောက်မှာ ကွဲပြားမှုရှိတာကို တွေ့ခဲ့ရပြီး သူ့ခင်ပွန်းက အတိတ်မှာ တရုတ်နှစ်သစ်ကူးကို ဘယ်လိုကျင်းပခဲ့လဲမသိချေ။
သူက ချီတိုင်းပြည်၏ နှစ်သစ်အတွေ့အကြုံကို ပြန်စဥ်းစားလိုက်၏။ “နှစ်သစ်ကူးပစ္စည်းတွေဝယ်မယ်။ တရုတ်ကဗျာတွဲကပ်မယ်။ မီးပုံးချိတ်မယ်။ ပြန်လည်ဆုံစည်းမှုညစာစားမယ်။ ထူစူးဝိုင်သောက်မယ်။ မီးရှူးမီးပန်းနဲ့ မီးပုံပျံကိုကြည့်မယ်။ အဆိုအကနဲ့ ငြိမ်းချမ်းရေးအောင်ပွဲခံတာကိုကြည့်မယ်?
ရှန်ချီဟွမ်းက သူ့ကို နှမြောတသ ပြောလိုက်သည်။ “တရုတ်နှစ်သစ်ကူးညစာအတွက် ငါတို့က အဖေ့နေရာကို သွားရမှာပေမယ့် အဲ့ဒါပြီးရင် ပြန်သွားစရာမလိုတော့ဘူး။”
“ကိစ္စမရှိပါဘူး။” ရှန်းယုဟန်က ထိုအရာကို ရှောင်လွှဲလို့မရမှန်းသိသည်။ “ဒါဆို ကျွန်တော်တို့ ကဗျာနဲ့ မီးပုံးချိတ်လို့ ရသေးတယ်မလား?”
“ရတယ်” ရှန်ချီဟွမ်းက အရင်နှစ်များက နှစ်သစ်ကူးအစီအစဥ်များကို ပြန်အမှတ်ရဖို့ ကြိုးစားခဲ့သည်။ “နှစ်သစ်ရဲ့ပထမနေ့ကို ငါတို့နှစ်ယောက်ပဲ ဖြတ်သန်းလို့ရတယ်။ ဒုတိယနေ့မှာ အစ်မလတ်က သူတို့မိဘအိမ်ကိုသွားမှာမို့ ငါတို့က အစ်ကိုကြီးတို့အိမ်မှာ နှစ်တိုင်းလုပ်တဲ့ ညစာသွားစားကြမယ်။ ပြီးရင် တတိယနေ့မှာ အစ်မလတ်တို့အိမ်မှာ ညစာသွားစားမယ်။”
“ကောင်းပြီ၊ ကျွန်တော် အစ်မလတ်နဲ့ အစ်ကိုကြီးတို့အိမ်ကို အခုထိ မသွားရသေးဘူး။” ရှန်းယုဟန်က မျှော်လင့်နေတာကြောင့် သူက အစီအစဥ် စတင်လိုက်သည်။ “ကျွန်တော် ကဗျာကို ကိုယ်တိုင်ပဲရေးလိုက်မယ်။ ဒါပေမယ့် စာရွက်ဝယ်ဖို့လိုတယ်။”
သူက ပင်မအိမ်တော်က ဇနီးအဖြစ် ပြင်ဆင်နေချိန်မှာ အိမ်တော်စီမံခန့်ခွဲမှုကိုလည်း သင်ယူပြီးလေပြီ။ “ကျွန်တော်တို့ နှစ်သစ်လက်ဆောင်ဝယ်ဖို့ လိုသေးတယ်။ ကျွန်တော့်ခင်ပွန်းက အရင်နှစ်က လက်ဆောင်စာရင်းရှိလား? အဲ့ဒါနဲ့သင့်တော်သလို ပြင်ဆင်ရမယ်။”
“လက်ဆောင်စာရင်း?” ကုမ္ပဏီ၏ပါတနာများကို ပုံမှန်ဆိုရင် ကုမ္ပဏီ၏သက်ဆိုင်ရာဌာနများက ကိုင်တွယ်တာကြောင့် သူက လက်ဆောင်ကို ကိုယ်တိုင်ပြင်ဆင်တာရှား၏။ “ငါက နှစ်သစ်မှာ လက်ဆောင်ပေးတာရှားတယ်။ ပေးရင်လည်း ပုံမှန်ဆိုရင် လက်ထောက်ချွီက ပြင်ဆင်ပေးတာ။”
ပေါင်းသင်းဆက်ဆံရေးနဲ့ပတ်သတ်ပြီး ဤအရာက ရှန်းယုဟန်၏ထူးခြားချက်ဖြစ်၏။ သူက ရှန်ချီဟွမ်း၏ဘေးမှာထိုင်ကာ အလေးအနက်ပြောလိုက်၏။ “အရင်နှစ်တွေမှာ ခင်ဗျားက အိမ်ထောင်မပြုရသေးတော့ လက်ဆောင်ပေးတာ မပေးတာက အားလုံးအတွက် အရေးမပါဘူး။ ဒါပေမယ့် ဒီနှစ်မှာ ကျွန်တော်တို့က လက်ထပ်ပြီးသွားတော့ သေချာပေါက် လက်ဆောင်ပေးသင့်တယ်။”
ရှန်ချီဟွမ်းက သူ့ဇနီးလေး၏ ပညာသင်ပေးခံနေရသလို ခံစားလိုက်ရပြီး နှိမ့်ချစွာပြောလိုက်၏။ “ဒါဆို လက်ထောက်ချီကိုမေးရင်ရော? ပြီးရင် မင်း လက်ဆောင်ပေးဖို့ ကြီးကြပ်လို့ရပြီ။”
ရှန်းယုဟန်က အလေးအနက်ခေါင်းညိတ်လိုက်သည်။ “အင်း၊ ကျွန်တော်တို့ လူအများကြီးကို လက်ဆောင်ပေးဖို့လိုတယ်။ အစ်ကိုကြီးနှင့် အစ်မလတ်ကို ကောင်းတာလေးပေးရမယ်။ ပြီးတော့ ကျွန်တော့်အသိအန်ကယ်တွေကိုလည်း လက်ဆောင်ပေးရမယ်။ သူတို့က အစားအသောက်မချို့တဲ့သလို့ အဖိုးတန်ပစ္စည်းတွေလည်း မချို့တဲ့ဘူး။ ဒီတော့ ကျွန်တော်တို့ရဲ့ နှလုံးသားထဲက လက်ဆောင်နဲ့တင် လုံလောက်တယ်။ ကျွန်တော်ယောကျာ်းရဲ့ သူငယ်ချင်းတွေကိုလည်း လက်ဆောင်ပေးဖို့လိုတယ်။ ပြီးတော့ ဝမ်းယိုနဲ့ သူ့အဖွဲ့ကိုရောပဲ။”
အကြောင်းတချို့ကြောင့် ထိုစကားများကို ပြောနေသော ရှန်းယုဟန်၏ မျက်လုံးတွေတောက်ပနေတာကို ရှန်ချီဟွမ်းက တွေ့ခဲ့ရပြီး သူက ဆွဲဆောင်ခံလိုက်ရသည်။
ရှန်းယုဟန်က သူလက်ဆောင်ပေးရမယ့် လူတွေကို ရေတွက်ပြီးနောက် သူက ခေတ်သစ်ကိုရောက်လာတာ နှစ်ဝက်မပြည့်ခင်မှာ လူအများကြီးကို တွေ့ဆုံခဲ့ရတာကို သတိထားမိခဲ့သည်။
သူ့ယောကျာ်းကို ကျေးဇူးတင်ရမည်။ အချိန်တိုအတွင်း သူက အမှီအခိုကင်းလာခဲ့သည်။
လက်ဆောင်ပေးမယ့်ကိစ္စက လက်ထောက်ချွီကိုလွှဲခဲ့ပြီး လက်ထောက်ချွီက ကုမ္ပဏီ၏နှစ်သစ်ကူး ကုန်ပစ္စည်းများကို တာဝန်ယူထားတာကြောင့် အခက်အခဲသိပ်ရှိမှာမဟုတ်ပေ။
ရှန်းယုဟန်က စာရင်းပေးလိုက်ပြီး လက်ထောက်ချွီက ဘယ်လက်ဆောင်တွေပေးမှာလဲ သူ့ကိုကူညီဖို့လိုသည်။ ထို့နောက် သူက နောက်နှစ်မှာသိနိုင်ဖို့ လက်ဆောင်စာရင်း ချရေးလိုက်သည်။
တရုတ်နှစ်သစ်ကူးမတိုင်ခင် နှစ်ရက်အလိုမှာ ရှန်းယုဟန်က ကဗျာရေးနေပြီး ဝီချက် Moments မှာတင်ခဲ့သည်။
ထိုအရာကိုမြင်ပြီးနောက် သူ့ Moments ထဲက အန်ကယ်တစ်ယောက်ချင်းစီက သူတို့အတွက် ကဗျာရေးပေးဖို့ပြောလာသည်။ ယင်းမှာ ရှန်းယုဟန်အတွက် လွယ်ကူသောအလုပ်ဖြစ်တာကြောင့် သူက သူတို့အားလုံးအတွက် ကဗျာရေးပေးလိုက်၏။ သူတို့က လာယူဖို့ လူလွှတ်လိုက်သောအခါ နှစ်သစ်လက်ဆောင်များကိုပါ ယူလာပေးခဲ့၏။
တစ်ရက်အတွင်းမှာ နှစ်သစ်ကူးလက်ဆောင်တွေ အိမ်မှာ အစုလိုက်အပုံလိုက်ရှိနေခဲ့ပြီး ကုန်ကြောင်းနဲ့ပင်လယ်က အရသာရှိသော အစားအစာအပါအဝင် တချို့က တန်ဖိုးကြီးဇိမ်ခံလက်ဝတ်ရတနာကိုပါ လက်ဆောင်ပေးခဲ့သည်။
ရှန်ချီဟွမ်းက ရုတ်တရက်သိလိုက်သည်။ တကယ်တော့ အကောင်းဆုံးနှစ်သစ်ကူးလက်ဆောင်က သူ့ဇနီးလေးရေးတဲ့ ကဗျာတစ်ပုဒ်မလား?
–
သို့သော် သူ့ဇနီးလေးယူဆောင်လာသော အံ့အားသင့်စရာက ဒီမှာတင်မပြီးသေးပေ။
နှစ်ဆယ့်ကိုးရက်မြောက်နေ့မှာ ရှေးဟောင်းသုတေသနဌာန၏ ဒါရိုက်တာက ရှန်ချီဟွမ်းကို ချဥ်းကပ်လာခဲ့သည်။
ရှန်ချီဟွမ်းက လက်ထောက်ချွီ၏ ဖုန်းခေါ်ဆိုမှုကို လက်ခံရခဲ့စဥ် လက်ထောက်ချွီက လူလိမ်တစ်ယောက်၏ လှည့်ဖြားလိုက်ရပြီလို့ သူထင်ခဲ့သည်။
“ ရှေးဟောင်းသုတေသနဌာန? ငါတို့ကုမ္ပဏီမှာ ရှေးဟောင်းသုတေသနနဲ့ပတ်သတ်တဲ့ ပရောဂျက်လည်းမရှိပါဘူး။ ရှေးဟောင်းသုတေသနဌာနက ငါ့ကိုဘာလို့ရှာနေရတာလဲ၊ ရှောင်ချွီ… မင်းဒီရက်ပိုင်း စိတ်ဖိစီးနေတာလား? ဒီနှစ်တရုတ်နှစ်သစ်ကူးမှာ ငါမင်းကို ပိတ်ရက်အပိုနှစ်ရက်ပေးပါမယ်။ လူလိမ်နဲ့ပတ်သတ်ပြီး စိတ်မပူနဲ့။”
လက်ထောက်ချွီက မျက်လုံးလှိမ့်လိုက်သည်။ “သူဌေး၊ ဒီနှစ်ရဲ့ ကုမ္ပဏီရုပ်ပိုင်းဆိုင်ရာစာမေးပွဲ အတောအတွင်းမှာ စစ်ဆေးမှုအားလုံးက သာမန်ပါပဲ။ ကျွန်တော့်သွားတွေက နည်းနည်းဆိုးနေတာကတော့ ချွင်းချက်ပေါ့။ ကျွန်တော် တစ်ဖက်လူရဲ့ ကြိုးဖုန်းနံပါတ်ကိုလည်း စစ်ဆေးခဲ့တယ်။ အဲ့ဒါက တကယ်ကိုဌာနကပါ။”
ရှန်ချီဟွမ်းက ရှုပ်ထွေးသွား၏။ “ငါ့ကိုဘာလို့ရှာနေတာလဲ?”
လက်ထောက်ချွီက သူ့ထက်ပိုရှုပ်သွားကာ ပြောလိုက်၏။ “သူတို့ကြည့်ရတာ သူဌေးရဲ့ဇနီး တီးခတ်ခဲ့တဲ့ သီချင်းရဲ့နာမည်ကို သိချင်နေကြတဲ့ပုံပဲ။”
ရှန်ချီဟွမ်းက ဗီဒီယိုအများကြီးတင်ဖူးသည်။ “ဘာသီချင်းလဲ?”
လက်ထောက်ချွီက ပြောလိုက်သည်။ “သူဌေးရဲ့ဇနီး သူဌေးအတွက် တီးခတ်ခဲ့တဲ့ ချင်တေးစုပဲ။ ခင်ဗျားဝေ့ပေါ်မှာတင်ခဲ့တာလေး”
ရှန်ချီဟွမ်းက နားမလည်နိုင်ပေ။ သုတေသနဌာနက လူတွေက သူ့ဇနီး တီးခတ်ခဲ့သော သီချင်းတစ်ပုဒ်အတွက် သူ့ဆီဘာလို့လာခဲ့တာလဲ..။
“အဲ့ဒါက ဂီတအပိုင်းအစတစ်ခုပဲ မဟုတ်ဘူးလား?”
လက်ထောက်ချွီကပြောလိုက်သည်။ “ကျွန်တော်မေးလိုက်တော့ သူတို့က လျို့ဝှက်ထားချင်တယ်လို့ပြောတယ်။ ဒါရိုက်တာဖန့်က ခင်ဗျားနဲ့တွေ့ပြီးဆွေးနွေးဖို့ ရက်ချိန်းယူချင်နေတယ်။ ဒီနေ့အဆင်ပြေရင် သူတို့ ကျန်းမြို့တော်ကို ညတွင်းချင်းလာလိမ့်မယ်။”
ရှန်ချီဟွမ်းက ပိုတောင်ရှုပ်ထွေးသွား၏။ “သီချင်းတစ်ပုဒ်အတွက်လား?” အဲ့လောက်အဝေးကြီးကနေ?
လက်ထောက်ချွီကလည်း ဘာကြောင့်လဲနားမလည်ပေ။ “ကျွန်တော်လည်းမသိဘူး။ အဆင်ပြေမလား?”
ကူချင်ကို ရှန်ချီဟွမ်းက ရှန်းယုဟန်အတွက် ဝယ်ပေးခဲ့တာဖြစ်သည်။ ဒီကိစ္စအတွက် သူ့ဇနီး၏ ခွင့်ပြုချက်လိုသည်။ “ငါ ရှောင်ဟန်ကို အရင်မေးလိုက်မယ်”
လက်ထောက်ချွီက ရင်ထဲကနေ ညည်းတွားလိုက်၏။ ရှောင်ဟန် ကြို့….