အပိုင်း (၁) - ခါးသီးသောလေအေး (၁)

"ကျန့်ရှင်းဘုရင် ရှန်ဝေ့က အရှေ့မြောက်ပိုင်းအရပ်ရဲ့ ချာရှီမြစ်မှာ ရှုံးနိမ့်ခဲ့ပြီး သွင်ကျိုးရဲ့ရှေ့တန်းက ချက်ချင်းသိမ်းပိုက်ခံလိုက်ရတယ်။ စစ်သည်တော်သုံးသောင်းက ချာရှီမြေတွင်းထဲမှာ အရှင်လတ်လတ် မြေမြှုပ်ခံခဲ့ရတယ်။ မင်းကလည်း သူတို့ထဲကတစ်ယောက်ပဲ၊ ဒါကို ဘာဖြစ်လို့အသက်ရှင်နေရတာလဲ။"

ရှန်ဇယ်ချွမ်း၏မျက်လုံးများက အကြည့်လွှဲသွားပြီး ပြန်လည်မတုံ့ပြန်ခဲ့ချေ။

စစ်ဆေးမေးမြန်းသူက စားပွဲကိုရိုက်ချလိုက်ပြီး အရှေ့ကိုငုံ့ကိုင်းကာ မျက်လုံးများကလည်း မည်းမှောင်လာ၏။ "ဘာဖြစ်လို့လဲဆိုတော့ ရှန်ဝေ့က ပျန်းရှားမျိုးနွယ်ဆယ့်နှစ်စုနဲ့ လျှို့ဝှက်ပူးပေါင်းပြီး ကျုံးပေါ်ရဲ့နယ်မြေခြောက်ခုကို ရန်သူ့လက်ထဲ တမင်ထိုးကျွေးခဲ့လို့ပဲ။ မင်းတို့က မြို့တော်ကို အတွင်းရော၊ အပြင်ကနေပါ တိုက်ခိုက်ချင်ကြတာ။ ဒါ့ကြောင့် ပျန်းရှားမြင်းတပ်က မင်းကိုမသတ်ခဲ့တာပေါ့၊ ဟုတ်တယ်မလား။"

ခြောက်သွေ့ကာ အရေခွံလန်နေသော ရှန်ဇယ်ချွမ်း၏နှုတ်ခမ်းတို့က လှုပ်ရှားသွားခဲ့သည်။

စစ်ဆေးမေးမြန်းသူ၏စကားလုံးများကို နားထောင်ပြီးနောက် သူ၏လည်ချောင်းက ဖြည်းဖြည်းချင်းလှုပ်ရှားလာပြီး ခက်ခက်ခဲခဲ ပြန်ဖြေလိုက်သည်။ "မဟုတ်ဘူး..... အဲ့လိုမဟုတ်ဘူး။"

စစ်ဆေးမေးမြန်းသူက တင်းမာစွာပြောလာ၏။ "ရှန်ဝေ့က အပြစ်ပေးခံရမှာကြောက်လို့ သူ့ကိုယ်သူ မီးရှို့ပြီးသတ်သေခဲ့တယ်။ ပူးပေါင်းကြံစည်မှုရဲ့ သက်သေအထောက်အထားတွေကို တော်ဝင်အစောင့်တပ်က ဧကရာဇ်မင်းရဲ့လက်ထဲ ထည့်လိုက်ပြီ။ ဒါတောင် မင်းက ငြင်းချင်နေသေးတယ်၊ တကယ်ကို အဆုံးထိတောင့်ခံနေတာပဲ!"

ရှန်ဇယ်ချွမ်း၏ဦးခေါင်းက မူးဝေနေပြီး ထာဝရလောက်ကြာအောင် အနားမယူခဲ့ရသဖြင့် ပင်ပန်းနွမ်းနယ်ကာ သူ၏မျက်လုံးများကလည်း လေးလံလာခဲ့သည်။ သူ မြေပြင်အထက်မှာ အပ်ချည်ကြိုးတစ်မျှင်ဖြင့် တန်းလန်းချိတ်ဆွဲခံထားရသလို ခံစားနေရသည်။ သတိလက်လွတ်ဖြစ်သွားသည်နှင့် အပိုင်းပိုင်းပြိုကွဲသွားရလိမ့်မည်။

စစ်ဆေးမေးမြန်းသူက ဝန်ခံချက်ကိုဖွင့်ကာ တစ်ချက်ကြည့်လိုက်ပြီးနောက် ထပ်ပြီးမေးမြန်းလာ၏။ "မနေ့ညက မင်း ချာရှီမြေတွင်းထဲကနေထွက်လာနိုင်တာ မင်းရဲ့အစ်ကိုက မင်းကိုကယ်တင်ခဲ့လို့၊ အဲ့ဒါ ဟုတ်သလား။"

ရှန်ဇယ်ချွမ်း၏ ဝေဝါးနေသောအမြင်အာရုံထဲ၌ ထိုနေ့ကမြင်ကွင်းများက ပြန်လည်ပေါ်ထွက်ခဲ့၏။ မြေတွင်းကြီးက အလွန်နက်ရှိုင်းပြီး အထဲမှာ အပေါ်ပြန်တက်ဖို့ ရုန်းကန်နေကြသော စစ်သည်တော်များနှင့်ပြည့်နှက်နေသည်။ အလောင်းပုံကြီးက ပို၍ထူထဲလာသော်လည်း တွင်းနှုတ်ခမ်းဝကို မည်သူမှမရောက်နိုင်ခဲ့ပေ။ ပျန်းရှားမြင်းတပ်က တွင်းဝကို ဝိုင်းထားကြပြီး ညလေအေးများတိုက်ခတ်နေသည့်ကြားမှာ မြားပစ်သံများနှင့် နာကျင်စွာငိုကြွေးသံတို့က သူ့နားထဲပဲ့တင်ထပ်နေခဲ့၏။ သွေးများက သူ့ခြေသလုံးအလယ်ကို စင်လာခဲ့ပြီး ညည်းတွားသံများ၊ မောဟိုက်သံများက သူ့နားထဲပြည့်နှက်လာခဲ့သည်။

ရှန်ဇယ်ချွမ်း၏အသက်ရှူသံတို့က လျင်မြန်လာ၏။ သူ ထိုင်ခုံပေါ်မှာ တုန်တုန်ယင်ယင်ဖြစ်နေပြီး ရှိုက်ကြီးတငင်ငိုကြွေးရင်း သူ၏ဆံပင်များကို ဆုပ်ကိုင်ထားခဲ့သည်။

"မင်း လိမ်နေတာ။"

စစ်ဆေးမေးမြန်းသူက ဝန်ခံချက်ကို မြင့်မြင့်မြှောက်ကိုင်ကာ ရှန်ဇယ်ချွမ်း၏အရှေ့မှာ ဝှေ့ယမ်းပြခဲ့သည်။

"ကျန့်ရှင်းဘုရင်ရဲ့ တရားဝင်သားဖြစ်တဲ့ မင်းရဲ့အစ်ကို ရှန်ကျိုးကျိက ချာရှီဧရာမချောက်နက်ကြီးမှာ စစ်သည်တော်သုံးသောင်းကို စွန့်ပစ်ခဲ့ပြီး သူ့ကိုယ်ရံတော်တွေနဲ့ ထွက်ပြေးသွားခဲ့တာ။ ဒါပေမဲ့ ပျန်းရှားမြင်းတပ်ဆီမှာ ဖမ်းဆီးခံခဲ့ရတယ်။ ပြီးတော့ မြင်းမှာကြိုးနဲ့ချည်ပြီး ချာရှီမြစ်ကမ်းတစ်လျှောက် သေတဲ့အထိ အဆွဲခံခဲ့ရတယ်။ သူက သေသွားပြီ - ဒီတော့ မင်းကို ကယ်တင်နိုင်မဲ့သူမရှိခဲ့ဘူး။"

ရှန်ဇယ်ချွမ်း၏စိတ်ထဲ ရှုပ်ထွေးသွားခဲ့ပြီး စစ်ဆေးမေးမြန်းသူ၏အသံက ဝေးကွာသွားခဲ့သည်။ သူကြားနေရသည်မှာ မဆုံးနိုင်သော ငိုကြွေးသံများသာ။

ဘယ်မှာ လွတ်မြောက်နိုင်မလဲ။ တပ်ကူတွေရော ဘယ်မလဲ။

အလောင်းပေါ် အလောင်းဆင့်ကာ ပုပ်သိုးနေသောအသားများက သူ့ကို နစ်မွန်းသွားစေခဲ့၏။ ကျိမုက သူ့အပေါ်မှာ ဝိုးတဝါးပေါ်နေပြီး သူ(ရှန်)က သွေးသံတရွှဲရွှဲအလောင်းပုံကြီးအပေါ်မှာ လဲလျောင်းနေ၏။ သူ ကျိမု၏ ပင်ပန်းကြီးစွာရှူရှိုက်နေသော အသက်ရှူသံတို့ကို ကြားနေရပြီး သူကိုယ်တိုင်၏ငိုရှိုက်သံများက ကူကယ်ရာမဲ့မှုတို့ကြား လွှမ်းခြုံသွားခဲ့သည်။

[TN/ ကျိမုက ရှန်ဇယ်ချွမ်းရဲ့အပေါ်မှာ မှောက်လျက်အနေအထားနဲ့ အုပ်မိုးပေးထားပြီး ရှန်ဇယ်ချွမ်းကလည်း အလောင်းပုံအပေါ်ဆုံးမှာ မှောက်လျက်အနေအထားပါ။]

"ကောမှာ ခေါင်းသုံးလုံးနဲ့ လက်ခြောက်ဖက်ရှိတယ်။" ကျိမုက အားတင်းကာပြုံးလိုက်ပြီး သူ၏မျက်နှာထက် မျက်ရည်တို့စီးကျနေ၏။ သူ့အသံက ပြတ်တိပြတ်တောင်းဖြစ်နေသည့်တိုင်အောင် ဆက်ပြောနေခဲ့သည်။ "ကောက ခိုင်ခံ့တဲ့တံတိုင်းကြီး! ကောတို့ ဒါကို ကျော်ဖြတ်နိုင်မှာ။ ခဏလောက်ပဲ တောင့်ထားနော်၊ စစ်ကူတွေရောက်တော့မှာ။ အဲ့ကျရင် ကောက မင်းနဲ့အတူအိမ်ပြန်ပြီး မိဘတွေဆီ သွားကြမယ်။ ကော မင်းအတွက် မရီးရှာပေးရဦးမှာ..."

စစ်ဆေးမေးမြန်းသူက စားပွဲကို လက်ဖြင့်ရိုက်ချကာ အော်လိုက်ပြန်၏။ "အမှန်တိုင်းပြောစမ်း!"

ရှန်ဇယ်ချွမ်းတစ်ယောက် မမြင်နိုင်သောသံကြိုးများဆီကနေ လွတ်မြောက်ဖို့ကြိုးစားနေသကဲ့သို့ သူ၏ခြေထောက်များကို ရုန်းကန်နေခဲ့သည်။ သို့သော် တော်ဝင်အစောင့်များက သူ့ဘေးနားကိုဝိုင်းလာပြီး သူ့အားစားပွဲပေါ်သို့ ပြန်လည်ဖိချခဲ့၏။

"မင်းအသက်က ငယ်ငယ်လေးရှိသေးတာကိုထောက်ထားပြီး အကျဥ်းထောင်ထဲကိုဝင်လာကတည်းက ကြမ်းတမ်းတဲ့ညှင်းပန်းနှိပ်စက်မှုတွေကနေ သက်ညှာပေးခဲ့တယ်။ ဒါပေမဲ့ မင်းက အကျိုးကြောင်းပြောဖို့ငြင်းဆန်နေတော့ ငါတို့ကို ကြမ်းကြုတ်လို့ဆိုပြီး အပြစ်မတင်နဲ့တော့။ နှိပ်စက်တဲ့ကိရိယာတွေ ယူလာကြစမ်း!"

ရှန်ဇယ်ချွမ်း၏လက်များကို ကြိုးများဖြင့်ချည်နှောင်ထားပြီး ခန်းမအလယ်သို့ ဆွဲခေါ်သွားခံခဲ့ရသည်။ ရှည်လျားသောခုံတန်းရှည်တစ်ခုကို ချလိုက်ပြီးနောက် သူ၏ခြေထောက်များကို ထိုခုံရှည်မှာ ချည်လိုက်၏။ နံဘေးမှာရပ်နေသော ထွားထွားကျိုင်းကျိုင်းလူတစ်ယောက်က ထောင်ကြိမ်လုံးကြီးကိုဆွဲထုတ်ကာ သူ့လက်ထဲမှာချိန်ဆလိုက်ပြီးနောက် ရိုက်ချလိုက်သည်။

"မင်းကိုထပ်မေးမယ်။" စစ်ဆေးမေးမြန်းသူက လက်ဖက်ရည်ကိုမွှေနေပြီး ဖြည်းဖြည်းချင်းသောက်လိုက်သည်။ "ရှန်ဝေ့က တိုင်းပြည်အပေါ် သစ္စာဖောက်ခဲ့တာလား။"

ရှန်ဇယ်ချွမ်းက ဝန်ခံဖို့ကိုငြင်းဆိုကာ ကြိမ်ဒဏ်၏နာကျင်မှုများကြားကနေ အော်လိုက်၏။ "ဟင့်အင်း၊ မဟုတ်ဘူး!"

စစ်ဆေးမေးမြန်းသူက သူ၏လက်ဖက်ရည်ခွက်ကိုချကာ ပြောလိုက်သည်။ "မင်းရဲ့ခေါင်းမာမှုကို စစ်မြေပြင်မှာသာ အသုံးချခဲ့မယ်ဆိုရင် မင်းရဲ့ရှန်မိသားစုက ဒီကနေ့ ဒီနေရာမှာရှိနေမှာမဟုတ်ဘူး။ သူ့ကို ဆက်ရိုက်ကြစမ်း!"

ရှန်ဇယ်ချွမ်းက အားနည်းစပြုလာပြီး ခေါင်းငုံ့ကာ ညည်းညူသံဖြင့်ပြောလိုက်သည်။ "ရှန်ဝေ့က တိုင်းပြည်ကို သစ္စာမဖောက်ခဲ့ဘူး..."

"ချာရှီမြစ်မှာ ရှုံးနိမ့်ခဲ့ရတာက ရန်သူတွေနဲ့စေ့စပ်ခဲ့တဲ့ ရှန်ဝေ့ရဲ့ပေါ့လျော့မှုကြောင့်ပဲ။ အရှုံးနဲ့ရင်ဆိုင်ရပြီးနောက်ပိုင်း သူ သွင်ကျိုးမှာ ပြန်လည်သက်သာလာအောင် လုပ်လို့ရရဲ့သားနဲ့ စစ်အင်အားအရာမှာ သိသိသာသာ ကွာခြားနေတာတောင် အကြောင်းအရင်းမရှိဘဲ ဆုတ်ခွာသွားခဲ့တယ်။ ရလဒ်အနေနဲ့ သွမ်းကျိုးရဲ့မြို့သုံးမြို့ ကျခဲ့ပြီး ပျန်းရှားဓါးပြတွေလက်ထဲမှာ အပြစ်မဲ့ပြည်သူသောင်းချီ အသက်ဆုံးရှုံးခဲ့ရတယ်။" စစ်ဆေးမေးမြန်းသူက နက်နက်နဲနဲသက်ပြင်းချကာ အမုန်းတရားအပြည့်ဖြင့် ဆက်ပြောခဲ့သည်။ "ကျုံးပေါ်ရဲ့နယ်မြေခြောက်ခုမှာ သွေးချောင်းစီးခဲ့ရပြီး အခု မြစ်တွေအကုန် သွေးချင်းနီနေပြီ။ နောက်တော့ ရှန်ဝေ့က သူ့ရဲ့စစ်တပ်နဲ့ တောင်စူးစူးကိုဦးတည်သွားခဲ့တယ်။ ပြီးတော့ တုံးကျိုးကတိုက်ပွဲက သံသယဖြစ်စရာအကောင်းဆုံးပဲ! ချီသုန်းချိကျွင့်မြို့စောင့်တပ်က အထောက်အပံ့ပေးဖို့အတွက် ထျန်းဖေးချွဲ့ကိုတောင် ကျော်ဖြတ်ခဲ့ပြီးပြီ၊ ဒါတောင် သူက ဘယ်ညာညှပ်တိုက်မဲ့ဗျူဟာကို စွန့်လွှတ်ခဲ့တယ်။ ပြီးတော့ သူ့မိသားစုကို သမ်းမြို့ဆီ လိုက်လံပို့ဆောင်ဖို့ မြင်းတပ်ကို လမ်းလွှဲခဲ့တယ်၊ ဒီတော့ ဘာဖြစ်သွားသလဲ၊ တုံးကျိုးခံတပ်တစ်ခုလုံး ပြိုလဲခဲ့ရတယ်။ အဲ့ဒါတောင် တမင်လုပ်တာမဟုတ်ဘူးလို့ ပြောဦးမှာလား။ လီပေသံချပ်ကာမြင်းတပ်က သုံးရက်သုံးညလုံး ရေခဲပြင်ကိုဖြတ်ကျော်လာခဲ့လို့သာပေါ့၊ မဟုတ်ရင် ပျန်းရှားမြင်းတပ်က ချွိတူးကိုတောင် ရောက်နေလောက်ပြီ!"

***

Aurora Novel Translation Team