အပိုင်း (၁၇) - ရာထူးတိုး (၁)
နှစ်ကုန်နီးလာပြီဖြစ်၍ ချွိတူး၏လမ်းမများထက်၌ ပိုးထည်စ သို့မဟုတ် ရွှေစက္ကူတို့ဖြင့် ရာသီအသစ််၏ပန်းပွင့်များနှင့် ပိုးကောင်လေးများအဖြစ် ပြုလုပ်ထားသည့် အကောင်းဆုံးသောခေါင်းပေါင်း၊ ခေါင်းဆောင်းများကို ဝတ်ဆင်ထားသည့်လူများနှင့် စည်ကားနေလေ၏။ နှစ်သစ်၏အမှတ်သင်္ကေတဖြစ်သည့် နွေဦးပွဲတော် ချဥ်းကပ်လာသည်နှင့်အမျှ သာမန်ပြည်သူများက မိမိတို့၏နေအိမ်များ၌ မုန့်များ၊ အသားဟင်းများကို အပြိုင်အဆိုင််ချက်ပြုတ်တတ်ကြသည်။ ရုံးတော်အမတ်များ၏ စားတော်ပွဲကြီးအတွက်မူ နန်းတော်က ရက်သတ္တပတ်နှစ်ပတ်လောက် ကြိုတင်ပြင်ဆင်ကြရ၏။ အရာအားလုံး ပြီးစီးရန်အတွက် တော်ဝင်စားဖိုဆောင်တစ်ခုလုံး ပျားပန်းခတ်မျှ အလုပ်များခဲ့ရသော်လည်း ကုန်းကုန်းများကသာ အကျိုးအမြတ်ရခဲ့ကြသည်။
ရှောင်းကျိမင် အဝတ်လဲနေစဥ် ရှောင်းချီရယ်က စာရင်းစာအုပ်ကို အသံကျယ်ကျယ်ဖြင့်လှန်လှောကာ ပြောလိုက်သည်။ "ဒေသဆိုင်ရာအမတ်တွေ မြို့တော်ကိုလာတဲ့အခါ မြို့တော်ကအမတ်တွေကို 'ပင်းကျင့်'* ဆက်သကြရတယ်။ ဖန်းရူကွေ့က ဒီကဏ္ဍမှာ သိပ်ကိုအထင်ကြီးစရာကောင်းတာပဲ။ သူက စာရင်းတွေကို စနစ်တျကနဲ့ ကောင်းကောင်းပြုစုထားတယ်။ တစ်စုံတစ်ယောက်က ပြဿနာမဖြစ်ချင်ရင် စာရင်းအတိုင်းပေးချေဖို့လိုတယ်။"
[TN/ ပင်းကျင့် - မြန်မာလိုတိုက်ရိုက်ပြန်ရင် ရေခဲလက်ဆောင်ပါ။ ချင်မင်းဆက်တုန်းက နွေရာသီမှာဆက်သရတဲ့ ငွေကြေးပဏ္ဏာပါ။]
"ပြီးတော့ ဒါက နှစ်အစရဲ့သေးငယ်တဲ့ငွေကြေးပမာဏလေးပဲရှိသေးတာ။" လုကွမ်းပိုင်က သူ့လက်ဖက်ရည်ထဲမှ အမြှုပ်များကိုဖယ်ရှားရင်း ပြောလာခဲ့သည်။ "ငါ မင်းကိုပြောပြမယ််။ ဖန်းရူကွေ့လက်အောက်က အငယ်တန်းကုန်းကုန်းတစ်ယောက်ရဲ့ တစ်နှစ်ဝင်ငွေက ရှေ့တန်းမှာစခန်းချနေတဲ့ စစ်သည်တော်တစ်ထောင်ရဲ့ နှစ်နှစ်စာရန်ပုံငွေထက် ပိုများတယ်။ တစ်နှစ်ပြီးတစ်နှစ် ငါတို့သာ့ကျိုးက တပ်ဖြန့်တော့မဲ့အချိန်ဆို အခွန်ဘဏ္ဍာရေးဝန်ကြီးဌာနက အဖေကိုနားပူနေတဲ့ ကလေးတစ်ယောက်လိုမျိုး ငါတို့ကို တိုက်ခိုက်ပေးဖို့အတွက် ဝပ်တွားခယနေတော့တာ။ ဒါပေမဲ့ စစ်ပွဲပြီးသွားလို့ ငါတို့တွေ တပ်ပြန်ဆုတ်တဲ့အခါကျ အကြွေးစုဆောင်းဖို့လာတဲ့ လူယုတ်မာတွေလိုမျိုး ဆက်ဆံခံခဲ့ရတာ။"
"ငွေကြေးကို ကိုင်ဆောင်ထားတဲ့သူတွေက တကယ့်သခင်အစစ်တွေပဲ။" ရှောင်းချီရယ်က အပြုံးလေးဖြင့်ပြောလိုက်သည်။
"ဒီနှစ် ကျွန်တော်တို့တွေ ဧကရာဇ်ကိုကယ်တင်ဖို့ လာတဲ့အချိန်တုန်းက ကျွန်တော်တို့လီပေတပ်ဖွဲ့တွေမှာ ရေခဲပြင်နဲ့ နှင်းတောကြီးကို ကျော်ဖြတ်ပြီး ချီတက်လာခဲ့ရတာ။" ကျောင်းဟွေးက ပြောလာလေ၏။ "လူတွေရော၊ မြင်းတွေရော ပင်ပန်းခဲ့ရတယ်၊ သံချပ်ကာမြင်းတပ်ရဲ့ ပစ္စည်းကိရိယာတွေကို နွေဦးမတိုင်ခင် အပြီးပြင်ဆင်လိုတယ်။ ကျွန်တော်တို့ အလုပ်ရုံတွေမှာ တင်နေတဲ့အကြွေးတွေက အချိန်လွန်နေတာ တော်တော်ကိုကြာနေပြီ။ နေရာတိုင်းမှာ ပိုက်ဆံလိုအပ်နေတယ်။" သူက ဂရုတစိုက် တွက်ချက်ပြလိုက်သည်။ "ကျွန်တော်တို့ ချွိတူးကိုမဝင်ခင်တုန်းကဆို လီပေမြို့စောင့်တပ်တွေက ကျွန်တော်တို့စခန်းချတဲ့မြေနေရာတွေမှာ စိုက်ပိိုးရေးတွေလုပ်ကိုင်ပြီး ရန်ပုံငွေထောက်ပံဖို့အတွက် ကောက်ပဲသီးနှံတွေကို ရောင်းချခဲ့ရတယ်။ ကျွန်တော်တို့ တစ်ပြားတစ်ချပ်လေးကိုတောင် ခွာပြီးသုံးစွဲခဲ့ရတာ။ ကျွန်တော်တို့ဆက်ခံသူရဲ့ ကြင်ယာတော်ဆိုရင် နှစ်သစ်ကူးပွဲတော်အတွက်တောင် ဝတ်ကောင်းစားလှတွေမဝယ်နိုင်ခဲ့ဘူး။ ဖန်းရူကွေ့လိုမျိုး နန်းတွင်းကုန်းကုန်းတစ်ယောက်က သာ့ကျိုးခရိုင်တစ်ခုလုံးရဲ့အခွန်ငွေထက်တောင် ငွေကိုပိုပြီးသဲ့ယူနိုင်တယ်။ စုံစမ်းစိစစ်ရေးမှူးတွေက ဒေသဆိုင်ရာရုံးတော်တွေဆီ စာရင်းစစ်ဖို့ စေလွှတ်ခံလိုက်ရချိန်ဆို ဖိအားပေးနိုင်တဲ့သူတွေလို ပြုမူခဲ့ကြပေမဲ့ ချွိတူးမှာရှိနေတဲ့အချိန်ကျ ဒီအကျင့်ပျက်ချစားမှုတွေအကြောင်းကို တစ်လုံးမှတောင် မဟခဲ့ကြဘူး!"
"ဒါပေမဲ့ ငါတို့က ဘာလုပ်နိုင်မှာလဲ။ ငါတို့က ဆင်းရဲတယ်။" လုကွမ်းပိုင်က အပြစ်တင်ညည်းတွားလိုက်သည်။ "ငါတို့က တစ်နှစ်ပြီးတစ်နှစ် ငွေကြေးအတွက် စိတ်ပူနေရတာ။ ဒီနှစ်မှာတောင် ကျိမင်မြို့တော်မှာရှိနေလို့ အခွန်ဘဏ္ဍာရေးဝန်ကြီးဌာနက မနှောင့်နှေးနိုင်ဘဲ အတွင်းဝန်ဌာနဆိီ ရန်ပုံငွေအတွက် တောင်းဆိုတာကို စောစောစီးစီးတင်ပြပေးခဲ့တာ။ ဖန်းရူကွေ့ကလည်း ကောင်းကောင်းပြုမူခဲ့ပြီး အတည်ပြုပေးကြောင်း လက်မှတ်ထိုးပေးခဲ့တယ်။ ဒီတစ်ခေါက်တော့ လီပေက မြို့တော်ကနေမပြန်ခင် ပိုက်ဆံမြင်ရတော့မယ်ထင်တယ်။"
ရှောင်းချီရယ်က စာရင်းစာအုပ်များကို ဘေးချလိုက်ပြီး လုကွမ်းပိုင်ဘက်သို့ လှည့်လိုက်သည်။ "ကျွန်တော်တို့မှာ ကျွန်တော့်ရဲ့သာ့ကောရှိတယ်။ ဒါပေမဲ့ ခင်ဗျားရော ဘာလုပ်ဖို့စီစဥ်ထားလဲ။"
"အရှင်မင်းမြတ်က ငါ့ကိုအတွေ့ခံမှာမဟုတ်ဘူး။" လုကွမ်းပိုင်က ဝန်ခံလိုက်သည်။ "လုမျိုးနွယ်က ချွိတူးမှာ ဘယ်တော့မှ သြဇာအာဏာမရှိခဲ့ဘူး။ မဟာမျိုးနွယ်ရှစ်စုက ငါတို့ကို သဲကန္တရလူရိုင်းတွေလိုပဲ အမြဲတမ်းသဘောထားခဲ့တာ။ အထူးသဖြင့် ဟွားမျိုးနွယ်ဆို ငါတို့နဲ့ မျက်လုံးချင်းတောင် ဆုံမကြည့်ဘူး။ မင်း ငါ့ကို ဖန်းရူကွေ့ကိုမြှောက်ပင့်ဖို့ အကြံပေးရင်တောင် အဲ့လိုလုပ်ဖို့အတွက် ငါ့မှာ ပိုက်ဆံမရှိဘူး။ ငါတို့မှာ စားပွဲပေါ်ကို အစားအသောက်တင်နိုင်ဖို့တောင် အနိုင်နိုင်ပဲ။ တခြားမြို့စောင့်တပ်တွေက ခက်ခဲတဲ့အချိန်တွေကို ကျော်လွှားဖို့ သူတို့ရဲ့နယ်မြေတွေမှာ စိုက်ပျိုးရေးလုပ်နိုင်ကြသေးတယ်။ ဒါပေမဲ့ ပျန်းကျွင့်နယ်စပ်ဒေသက မိုင်ပေါင်းများစွာ အဝါရောင်သဲနဲ့ဖုံးလွှမ်းနေတာ။ စိုက်ပျိုးမြေဆိုတာ လုံးဝကိုမရှိတာ။"
"ဒီတစ်ခေါက် ငါတို့ရဲ့တပ်ဖွဲ့တွေ အမြန်ချီတက်ခဲ့ရပေမဲ့ လမ်းခရီးအတွင်း လူတွေနဲ့ မြင်းတွေအားလုံးအတွက် ရိက္ခာအကုန်လုံးက စစ်သူကြီးချီရဲ့စုငွေထဲကထုတ်ခဲ့ရတာ။ ရှင်းရှင်းပြောရရင် စစ်သူကြီးချီရဲ့ရက်ရောမှုကြောင့်သာမဟုတ်ရင် ငါ့ရဲ့တပ်ဖွဲ့က ထျန်းဖေးစောင့်ကြည့်မျှော်စင်ကိုတောင် ကျော်ဖြတ်နိုင်မှာမဟုတ်ဘူး။ ဒါပေမဲ့ စစ်သူကြီးချီမှာ ငွေကြေးက ဘယ်လောက်များများရှိနိုင်မှာလဲ။ အဲ့ဒါက စစ်သူကြီးချီအတွက် ကြင်ယာတော်မယ်မယ်ထားခဲ့တဲ့ ခန်းဝင်ငွေကြေးတွေ။ သူ(မ)ရဲ့ကိုယ်ပိုင်တပ်ဖွဲ့ကတောင် ဘောင်းဘီတွေချွတ်ရောင်းရတော့မဲ့အခြေအနေရောက်နေပြီ! အခွန်ဘဏ္ဍာရေးဌာနက ငါ့ကို နေ့တိုင်းရှောင်နေခဲ့တာ၊ ငါ့မှာ မူးဝေလာတဲ့အထိ သူတို့နောက် ဝိုင်းကြီးပတ်ပတ်လိုက်နေခဲ့ရတယ်။ ရန်ပုံငွေတွေကို ပေးဖို့ငြင်းဆန်နေတာ ဘယ်လောက်တောင် တာဝန်မဲ့လိုက်သလဲ။ ငါ့လို ငနုံငအက အဲ့ဒါနဲ့ပတ်သက်ပြီး ဘာမှလုပ်နိုင်တာမရှိပါဘူးကွာ။"
လုကွမ်းပိုင် ဒေါသထွက်သည်မှာ ရှားပါးသော်လည်း သူလည်းမတတ်နိုင်ပေ။ ပျန်းကျွင့်က အင်ပါယာ၏သဲကန္တရအစွန်း၌ တပ်စွဲထားရသောကြောင့် လီပေအပြင် ၎င်းက ပျန်းရှားမြင်းတပ်နှင့် ထိပ်တိုက်တွေ့ဆုံမှုအများဆုံးရှိသည့် မြို့စောင့်တပ်လည်းဖြစ်သည်။ ၎င်းတို့က ဓါးမောက်ရှည်၏အောက်မှာ အသက်ဆက်ဖို့အတွက် တစ်နှစ်ပတ်လုံး ပြေးလွှားနေခဲ့ရပြီး ကောင်းကောင်းမအိပ်ခဲ့ရသလို ဗိုက်ပြည့်အောင်လည်း မစားခဲ့ရချေ။ သို့သော် ချွိတူးက နယ်စပ်သဲကန္တာရခေါင်းဆောင်ကို ဖိနှိပ်ထားပြီး သူက တော်ဝင်အဆင့်များကြားမှာ နာမည်မရှိသော လူမွဲတစ်ယောက်ဖြစ်လာခဲ့သည်။ သူ့မိသားစုအပေါ် ချီးမြှင့်သောဆုလာဘ်များက အမြဲတမ်းလိုလို စစ်တပ်ကိုထောက်ပံ့ရန်အတွက် အသုံးပြုရသော ငွေကြေးများဖြစ်လာခဲ့လေသည်။
ရှောင်းကျိမင် အဝတ်အစားဆင်မြန်းပြီးနောက် အစေခံများက ထွက်ခွာသွားကြပြီး အခန်းထဲမှာ ၎င်းတို့လေးဦးသာ ကျန်တော့သည်။ ရှောင်းကျိမင်က လက်ဖက်ရည်တစ်ငုံသောက်လိုက်ပြီး မှတ်ချက်ပြုလာ၏။ "ဒီနှစ်က အချိန်ကောင်းပဲ။ ရုံးတော်အမတ်တွေရဲ့နွေဦးစားတော်ပွဲရှိတယ်ဆိုတော့ ချီကျူးယင်းလည်း ရောက်လာမှာပဲ၊ ဟုတ်တယ်မလား။"
"ဟုတ်တယ်။" လုကွမ်းပိုင်က ပြန်ဖြေခဲ့သည်။ "အစတုန်းက စိုးရိမ်နေခဲ့ပေမဲ့ နောက်တော့ ဒီကိစ္စမှာ သူတို့စိတ်ရှိသလိုသာ အချိန်ဆွဲခွင့်ပေးထားလိုက်တယ်။ သူတို့က စစ်သူကြီးချီ မြို့တော်ကိုဝင်တဲ့အချိန်ထိ အချိန်ဆွဲကြမယ်ဆိုလည်း - အင်း၊ သူတို့ ကံကောင်းပါစေပေါ့။"
"အခု ချွိတူးမှာ သူ(မ)ကို အားလုံးကချစ်ကြတယ်။" ရှောင်းကျိမင်က ပြောလာ၏။ "ချွိတူးမှာရှိတဲ့ သူခိုးဂျပိုးတွေနဲ့ ငွေတိုးချေးစားတဲ့သူတွေတောင် သူ(မ)ကိုလေးစားကြတယ်။ လက်ရှိဒီကိစ္စတွေက ပြေလည်သွားနိုင်ပေမဲ့ ခင်ဗျား သူ(မ)ကိုပဲ ဆက်ပြီးအားကိုးနေလို့မရဘူး။ ပျန်းကျွင့်နယ်စပ်ဒေသက ဗျူဟာအရအရေးပါတယ်။ အခွန်ဘဏ္ဍာရေးဌာနက ဒီနှစ် ခင်ဗျားတို့ကို ထပ်ပြီးလူစုဆောင်းဖို့ တောင်းဆိုလိမ့်မယ်လို့ ကျွန်တော် မနေ့ကကြားခဲ့တယ်။"
လုကွမ်းပိုင်က သူလက်ဖက်ရည်ခွက်၏ နှုတ်ခမ်းဝကို ပွတ်သပ်လိုက်သည်။ "စုဆောင်းရမယ်? အဲ့ဒီအကြောင်းကို တွေးတောင်မတွေးလိုက်နဲ့။ လူတိုင်းက ကျုံးပေါ်မှာဖြစ်ပျက်ခဲ့တာတွေကြောင့် ကြောက်နေကြတာ။ ဝန်ကြီးဌာနက ပျန်းကျွင့်က ပျန်းရှားတွေဆီမှာ နှိပ်ကွပ်ခံလိုက်ရမှာကို စိုးရိမ်နေတာ၊ သူတို့က ငါတို့ရဲ့စစ်သည်တော်နှစ်သောင်းနဲ့ မြင်းတွေက သူတို့ကို မတားဆီးနိုင်မှာစိုးရိမ်နေကြတာ။ ဒါပေမဲ့ ငါ စစ်သည်တော်တွေ ထပ်ပြီးစုဆောင်းမယ်ဆိုရင် သူတို့က ငါ့ကို ငွေပေးမယ်လို့အာမခံလား။ ငါကတော့ လုံးဝမတတ်နိုင်ဘူး။ ဒီနှစ် ငါ့လည်ပင်းကို ဓါးနဲ့ထောက်ပြီးပြောရင်တောင် ငါလုပ်မှာမဟုတ်ဘူး။"
"အဲ့ဒါမှန်တယ်။" ရှောင်းချီရယ်က ပြောလိုက်၏။ "အတိတ်တုန်းက သူတို့ တခြားဒေသတွေကိုထောက်ပံ့ဖို့ ဘယ်လောက်ပဲနှောင့်နှေးနှောင့်နှေး၊ အခွန်ဘဏ္ဍာရေးဌာနက ကျုံးပေါ်ရဲ့မြို့စောင့်တပ်တွေဆီ ရန်ပုံငွေနဲ့ ရိက္ခာတွေကို အမြဲတမ်း အမြန်ဆုံးပို့ပေးတယ်။ အခု သူတို့အားလုံးလည်းသေကုန်ပြီ၊ ငွေကြေးကို ထားလိုက်ပါဦး၊ ဆန်စပါးတွေက ဘယ်ကိုရောက်သွားတာလဲ။ ပျန်းရှားမြင်းတပ် ပြန်ပြေးသွားတုန်းက အဲ့လောက်များတဲ့ဆန်စပါးတွေကို အကုန်လုံးသယ်သွားနိုင်ဖို့ နည်းလမ်းလည်းမရှိဘူး။"
ကျန်သုံးဦးက သူ့ကိုကြည့်နေခဲ့ကြ၏။
"အရူးလေး၊ အဲ့ဒီအကြောင်းကို မေ့လိုက်လို့ရပြီ။" လုကွမ်းပိုင်က ပြောလာခဲ့သည်။ "သိမ်းဆည်းခဲ့တဲ့ စပါးတွေအကုန်လုံးကို ကျွယ်ရှီးရဲ့မြို့ဆယ့်သုံးမြို့အတွက် မနှစ်တုန်းက မပေးချေရသေးတဲ့လစာတွေအစားပြန်ပေးဖို့ အသုံးပြုလိမ့်မယ်။ အခွန်ဘဏ္ဍာရေးဌာနက ဒီကိစ္စကနေ ဘာလို့ရှောင်နေလဲဆိုတာ မင်း မခန့်မှန်းနိုင်ဘူးလား။ မကြာသေးမီနှစ်တွေအတွင်း မျိုးနွယ်စုရှစ်စုက မဟာတပ်ရင်းရှစ်ခုဖြစ်လာပြီး သူတို့ရဲ့အသုံးအဆောင်တွေနဲ့ ကုန်ကျစရိတ်တွေက သာ့ကျိုးမှာ အကောင်းတကာ့အကောင်းဆုံးပဲ။ ဒါပေမဲ့ အဲ့ဒီငွေတွေအားလုံးက အခွန်ငွေတွေဆီကနေ တိုက်ရိုက်ရောက်လာတာ - အားလုံးပေါင်း နှစ်သန်းကျော်တယ်။ အဲ့လောက်ပမာဏာက ဘယ်လောက်တောင်ရူးသွပ်လိုက်သလဲဆိုတာ လူတိုင်းပြောနိုင်တယ်! ဒါပေမဲ့ ဧကရီမယ်မယ်နဲ့ အတွင်းဝန်ဌာနရဲ့ အကြီးအကဲဟွားတို့က မျက်ကွယ်ပြုနေမှတော့ အခွန်ဘဏ္ဍာရေးဌာနက ဘယ်သူကများ ဒီကိစ္စကို ဝင်စွက်ဖက်ရဲမှာလဲ။ မနှစ်က မြို့ဆယ့်သုံးမြို့လုံး ကျိုင်းကောင်ကပ်နဲ့ကြုံခဲ့ရလို့ စပါးတစ်စေ့တောင်မှ မရိတ်သိမ်းနိုင်ခဲ့ကြဘူး။ တိုင်းပြည်ဘဏ္ဍာတိုက်ကလည်း အပေါက်ကြီးဖြစ်နေတော့ ကျွယ်ရှီးရဲ့အခက်အခဲတွေကိုဖြေရှင်းပေးဖို့ အခွန်ဘဏ္ဍာရေးဌာနက ဘယ်ကရန်ပုံငွေကိုရနိုင်တော့မှာလဲ။"
"သူတို့က ပြည်နယ်အုပ်ချုပ်ရေးမှူး ကျန်းချင်းရှန်းရဲ့ကျေးဇူးကြောင့်သာ အနည်းအကျဥ်း အဆင်ပြေခဲ့ကြတာ။" လုကွမ်းပိုင်က ဆက်ပြောခဲ့သည်။ "သူက အဆင့်တိုင်းက ပြည်နယ်အမတ်တွေအားလုံးကို ကိုယ်ပိုင်ဘဏ္ဍာတိုက်တွေဖွင့်ခိုင်းပြီး ဒုက္ခရောက်ခဲ့ရတဲ့ပြည်သူတွေကို ဝေငှခိုင်းခဲ့တယ်။ ကျန်းချင်းရှန်းက လူသိန်းချီကယ်တင်ခဲ့ပေမဲ့ ကျွယ်ရှီးရဲ့အမတ်တွေဆီကနေတော့ အမုန်းခံခဲ့ရတယ်။ နှစ်သစ်ကူးမတိုင်ခင်တုန်းက အကြွေးရှင်တွေ သူတို့ပိုက်ဆံကိုပြန်ရဖို့အတွက် သူ့အိမ်တံခါးကို ကန်နေကြတယ်လို့ ငါကြားခဲ့တယ်။ အဲ့ဒီလူက ဒုတိယအဆင့် အုပ်ချုပ်ရေးအမတ်တစ်ယောက်ဆိုပေမဲ့ သူ့ရဲ့ အသက်ရှစ်ဆယ်အရွယ်အမေအိုကြီးတောင် အကြွေးတွေဆပ်ဖို့ အထည်တွေယက်နေရတုန်းပဲ! ချွိတူးကသာ ထောက်ပံ့မပေးရင် သူတို့ကို သေဖို့ဖိအားပေးနေတာပဲ။ အဆုံးသတ်မှာ အတွင်းဝန်အမတ်ဟိုင်က အဲ့ဒီအကြောင်းကိုတင်ပြလိုက်တော့ အတွင်းဝန်ဌာနနဲ့ ဖန်းရူကွေ့တို့ နှစ်ပတ်လောက် အချေအတင်ဖြစ်ခဲ့ပြီးတာတောင် ကွာဟချက်တွေကို အပြည့်အဝမဖြည့်ဆည်းပေးနိုင်ခဲ့ဘူး။"
ကျောင်းဟွေးက မနေနိုင်ဘဲ ဝင်ပြောလာ၏။ "အဲ့ဒီမြို့တော်အမတ်တွေက ဆင်းရဲတယ်လို့ကြွေးကြော်နေကြပေမဲ့ လာဘ်ပေးလာဘ်ယူမှုတွေက ပမာဏအများကြီးပဲ၊ အမှန်အကန်အလုပ်လုပ်နေကြတဲ့သူတွေခမျာ သူတို့ခါးဝတ်ကို တင်းကျပ်နေအောင် ချည်ထားရတယ်။ ကျွန်တော်တို့က ကြက်ဥခွံပေါ်လမ်းလျှောက်နေကြရတာ၊ ကျွန်တော်တို့လည်း ချွိတူးကို မလာခဲ့သင့်ဘူး။ ဒါက တကယ်စိတ်ပျက်စရာကောင်းလွန်းတယ်။"
အပြင်ဘက်မှာ နှင်းများကျဆင်းနေသော်လည်း အထဲမှာ ပျော်ရွှင်ဖွယ်လေထုမျိုးရှိမနေပေ။ အရှုပ်အထွေးများက တစ်ခုပေါ်တစ်ခုဆင့်ကာ ချွိတူး၏တောက်ပသောမြင်ကွင်းများက ဟက်တက်ကွဲနေသောဒဏ်ရာပေါ် ဖုံးကွယ်ထားသော ပိတ်စပါးလေးနှင့်တူပြီး ဒဏ်ရာက ပြည်များတောင်ထွက်နေလေပြီ။ ဆီးနှင်းများက အချိန်မှန်ကျဆင်းလာပြီး အရာအားလုံးကို လှလှပပဖုံးကွယ်ပေးခဲ့သည်။ ဤသို့ဖြင့် ၎င်း၏အောက်ဘက်မှ ပုပ်ပွနေသောအညစ်အကြေးများကို မမြင်ချင်ယောင်ဆောင်ကာ ဤအရူးနိဗ္ဗာန်ဘုံမှာ ယစ်မူးနေသောအမူးသမားနှယ် ဆက်ပြီးရှင်သန်ခွင့်ပေးထားလေသည်။
***
Aurora Novel Translation Team